Traehad Blong Mekem Se Laef Blong Yu i Gat Mining
Traehad Blong Mekem Se Laef Blong Yu i Gat Mining
“Yumi olgeta samting we yumi gat laef, yumi evriwan i mas presem [Hae God].”—OL SAM 150:6.
1. Tokbaot olsem wanem wan yangfala man i traem blong mekem se laef blong hem i gat mining.
“MI MI skul blong kam wan dokta from we mi wantem yusum laef blong mi blong givhan long ol man. Mi bin tingting se haenem mo mane we bambae mi kasem oli save givim glad long mi.” Seung Jin, we i gruap long Korea, i talem ol toktok ya. * Hem i gohed i se: “Mi harem nogud tumas taem mi kasem save se, nating we mi mi wan dokta, be mi no naf yet blong mekem plante samting blong givhan long ol man olsem we oli rili nidim. Biaen, mi lanem blong wokem ol naesfala pija blong flasem haos. Be ol naesfala pija ya oli no givhan bigwan long ol man, mo mi harem olsem se mi stap tingbaot mi wan nomo. Ale mi kam wan tija, be i no longtaem biaen, mi luksave se mi mi stap givimaot save nomo long ol narafala, be mi no stap lidim olgeta blong oli faenem trufala glad.” Seung Jin i olsem plante narafala man we oli stap traem blong mekem se laef blong olgeta i gat mining.
2. (a) ?I minim wanem se laef i gat mining? (b) ?Olsem wanem yumi save se God ya we i wokem yumi i gat wan gudfala risen blong putum yumi long wol ya?
2 Blong laef blong yumi i gat mining, yumi mas gat wan gudfala risen blong stap laef, samting we yumi wantem kasem i mas kliagud long tingting blong yumi, mo yumi mas gat wan bigfala mak we yumi stap traehad blong kasem. ?Olsem wanem? ?Ol man oli save gat wan laef olsem we i gat mining? !Yes! Taem God i wokem yumi, hem i mekem se yumi naf blong kasem save long ol samting, mo se tingting blong yumi i save jajem yumi bakegen, mo yumi naf blong yusum tingting blong yumi blong skelem ol samting. Ol samting ya oli soemaot se God ya we i Wokem yumi i gat wan gudfala risen blong putum yumi long wol ya. Taswe, laef blong yumi i save gat trufala mining nomo sipos yumi mekem i laenap wetem stamba tingting blong God.
3. ?Plan blong God long saed blong ol man i joen wetem wanem?
3 Baebol i talem se plan we God i gat long saed blong yumi i joen wetem plante samting. Tingbaot olsem wanem God i wokem yumi long fasin we i nambawan. Hemia i soemaot se hem i wan God we i gat lav, mo hem i no tingbaot hem wan nomo. (Ol Sam 40:5; 139:14) Taswe, sipos yumi wantem mekem laef blong yumi i laenap wetem plan blong God, yumi tu yumi mas lavem ol narafala olsem we God i mekem, mo yumi no mas tingbaot yumi wan nomo. (1 Jon 4:7-11) Hemia i min tu se yumi mas obei long ol tok blong God. Ol loa ya oli givhan long yumi blong laef folem plan blong God.—Prija 12:13; 1 Jon 5:3.
4. (a) ?I nidim wanem blong laef blong yumi i save gat trufala mining? (b) ?Wanem mak we i moa hae mo i givim moa mining long laef i bitim olgeta mak we man i save kasem?
4 God i wantem tu se ol man oli gat wan laef we i hapi, mo oli gat pis bitwin olgeta mo wetem ol narafala samting we Hem i wokem. (Jenesis 1:26; 2:15) ?Be yumi nidim wanem blong yumi save glad, stap sef, mo gat pis long tingting? Wan pikinini i hapi mo i harem se i sef taem hem i save se papa mama blong hem, tufala i stap klosap long hem. Long sem fasin, sipos yumi wantem se laef blong yumi i gat trufala mining, yumi mas gat wan gudfala fasin fren wetem Papa blong yumi long heven. (Hibrus 12:9) God i openem rod blong yumi save frengud wetem hem taem hem i letem blong yumi kam klosap long hem long prea, mo taem hem i lesin long ol prea blong yumi. (Jemes 4:8; 1 Jon 5:14, 15) Sipos yumi ‘wokbaot wetem God’ long saed blong bilif mo yumi kam fren blong hem, yumi save leftemap nem blong Papa blong yumi long heven mo mekem hem i glad. (Jenesis 6:9, NW; Ol Proveb 23:15, 16; Jemes 2:23) Mak ya i moa hae mo i givim moa mining long laef i bitim eni mak we man i save kasem. Man blong raetem Ol Sam i talem se: “Yumi olgeta samting we yumi gat laef, yumi evriwan i mas presem [Hae God].”—Ol Sam 150:6.
?Laef Blong Yu i Gat Wanem Mining?
5. ?From wanem i no waes blong putum ol sas samting long fasples long laef blong yumi?
5 Wan samting we God i wantem se yumi mekem blong givim mining long laef blong yumi, hemia se yumi mas lukaot gud long yumi wan mo long famle blong yumi. Hemia i min se yumi lukaot long ol nid blong yumi long saed blong bodi mo yumi traehad blong frengud wetem God tu. Be blong mekem olsem, yumi mas skelemgud ol samting, blong yumi no letem ol wok mo wari blong laef oli tekem ples blong ol samting we oli moa impoten, hemia ol wok long saed blong spirit. (Matiu 4:4; 6:33) Sore tumas, plante man oli spenem klosap ful laef blong olgeta blong hivimap ol sas samting nomo. Be yumi no waes sipos yumi ting se taem yumi ronem ol sas samting, hemia bambae i fulumap evri nid blong yumi. I no longtaem i pas, oli bin mekem wan stadi long Esia, long saed blong ol rijman. Stadi ya i soemaot se plante long ol rijman ya oli “no harem se oli sef mo oli no gat pis long tingting blong olgeta, nating se oli gat haenem mo oli haremgud long ol rij samting we oli gat.”—Prija 5:11.
6. ?Wanem advaes we Jisas i givim long saed blong fasin blong ronem ol sas samting?
6 Jisas i tokbaot se ‘ol sas samting oli gat paoa blong trikim man.’ (Mak 4:19, NW) ?Olsem wanem ol rij samting oli save trikim man? Hemia taem ol man oli ting se ol sas samting ya i save karem glad long olgeta. Tingting ya i giaman nomo. Waes King Solomon i talem se: “Sipos yu laekem mane tumas, nating we mane blong yu i plante olsem wanem, be neva yu save talem se yu harem gud, mane blong yu i naf.” (Prija 5:10) ?Olsem wanem? ?Yumi save ronem ol sas samting, mo long sem taem yumi mekem wok blong God long ful laef blong yumi? Nogat. Jisas i eksplenem se: “I no gat man we i save wok blong tu masta wantaem. Sipos man i mekem olsem, bambae hem i laekem wan, be i no laekem narawan, i agens long hem. No bambae hem i save ona long wan masta, be i stap lukluk nogud long narawan. Yufala i no save mekem we God i bos blong yufala, be long semtaem nomo, mane tu i bos blong yufala.” Jisas i pulum ol man blong hem blong oli no hivimap ol sas samting blong olgeta long wol ya. Be oli mas ‘hivimap ol gudgudfala samting blong olgeta long heven,’ hemia i min se oli mas gat gudnem long fes blong God. Jisas i tokbaot God i se: “Taem yufala i no askem ol samting long Papa blong yufala yet, be hem i save finis ol samting we yufala i sot long hem.”—Matiu 6:8, 19-25.
7. ?Olsem wanem yumi save “kasem laef ya we i prapa wan”?
7 Taem aposol Pol i raet i go long fren blong hem, Timoti, hem i givim sam strong advaes long saed ya i se: “Yu mas tok strong long olgeta we oli rijman . . . blong oli no . . . putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem. . . . Oli mas gat gladhat blong givhan long ol man, mo blong seraot ol samting blong olgeta long ol narafala man. Long fasin ya, i olsem we oli stap putumgud plante gudgudfala samting blong olgeta, we i olsem fandesen blong laef blong olgeta, we i save stap strong oltaem. Nao bambae oli save kasem laef ya we i prapa wan.”—1 Timoti 6:17-19.
?Wanem Ya “Laef Ya We i Prapa Wan”?
8. (a) ?From wanem plante man oli traehad blong kam rijman mo gat haenem? (b) ?Ol man ya oli no luksave wanem samting?
8 Long tingting blong plante man, taem oli harem tok ya “laef ya we i prapa wan,” oli tingbaot ol sas samting we i openem rod long man blong gat gudfala laef mo blong ronem ol pleplei. Wan niuspepa blong Esia i talem se: “Olgeta we oli stap lukluk ol sinema no oli wajem televisin, oli lanem fasin ya blong wantem samting we ae blong olgeta i luk, mo blong drim long ol samting we oli wantem gat.” Bigfala mak we plante man oli traem kasem long laef blong olgeta, hemia blong kam rijman mo gat haenem. Plante oli wokhad blong kasem ol samting ya, ale oli no haremgud long yangtaem blong olgeta, oli no lukaot gud long helt mo famle blong olgeta, mo oli no moa mekem ol impoten samting long saed blong spirit. Bighaf blong olgeta oli no tingbaot se ol sas samting we oli luk long televisin oli soemaot “spirit we i kamaot long wol.” Spirit ya hem i bigfala tingting we i gat paoa long plante milian man long wol mo i pusum olgeta blong oli mekem ol samting we i agensem plan we God i gat long saed blong yumi. (1 Korin 2:12; Efesas 2:2) !Yumi no sapraes se long taem blong yumi, plante man oli no glad!—Ol Proveb 18:11; 23:4, 5.
9. ?Wanem samting we ol man oli neva save mekem? ?From wanem?
9 ?Olsem wanem long ol man we oli tingbaot ol narafala, mo oli wokhad blong givhan long olgeta blong oli no moa hanggri, sik, mo blong ol man oli no moa spolem olgeta? Plante taem gudfala tingting mo traehad blong olgeta i givhan long ol narafala. Be nomata sipos oli mekem bes blong olgeta, bambae oli neva save jenisim rabis fasin blong wol ya mo mekem wol i kam gud mo stret. ?From wanem? From we “ful wol i stap aninit long paoa blong hemia we i rabis nomo,” hemia Setan, mo Setan i no wantem se wol ya i jenis.—1 Jon 5:19, NW.
10. ?Wetaem ol man we oli holemstrong long God oli save haremgud long “laef ya we i prapa wan”?
10 !Sore tumas sipos man i putum tingting blong hem i stap strong long laef ya nomo long wol tede! Pol i raetem se: “Sipos yumi stap putum tingting blong yumi long Kraes, be blong laef ya long wol nomo, man, sore tumas long yumi. Hemia, yumi kasem trabol we i bitim ol narafala man long wol.” Olgeta we oli bilif se laef blong yumi i blong naoia nomo, oli gat tingting ya se: “Yumi kakae, yumi dring, from we tumora bambae yumi ded.” (1 Korin 15:19, 32) Be i gat wan fiuja i stap, wan “niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.” (2 Pita 3:13) Long taem ya, ol Kristin oli save haremgud long “laef ya we i prapa wan,” hemia “laef ya we i no save finis.” !Laef ya bambae i stretgud olgeta, nomata sipos hem i antap long heven no hem i aninit long rul ya blong Kingdom gavman blong God ya we i gat lav!—1 Timoti 6:12.
11. ?From wanem fasin blong mekem wok blong Kingdom blong God i beswan samting blong givim mining long laef?
11 Kingdom blong God nomo bambae i save winim olgeta trabol blong man. Beswan samting we eniman i save mekem blong givim mining long laef blong hem, hemia blong mekem wok blong Kingdom blong God. (Jon 4:34) Taem yumi stap mekem wok ya, yumi save gat wan gudfala fasin fren wetem Papa blong yumi long heven. Mo tu, yumi kasem glad taem yumi wok wetem plante milian Kristin brata sista raon long wol we olgeta tu oli stap traehad blong mekem se laef blong olgeta i rili gat mining.
Lego Ol Samting We i Stret Blong Lego
12. Tokbaot olsem wanem laef blong wol tede i defren olgeta long “laef ya we i prapa wan.”
12 Baebol i talem se wol ya i ‘stap lus, wetem ol samting we ol man blong hem oli wantem.’ I no gat wan haf blong wol blong Setan we bambae i stap, ol haenem mo ol sas samting blong hem tu bambae oli lus. Be “man we i stap mekem ol samting we God i wantem, hem bambae i no save lus samtaem.” (1 Jon 2:15-17) “Laef ya we i prapa wan” i defren olgeta long ol sas samting we yumi no save trastem, mo long haenem we i blong smol taem nomo, mo long ol pleplei blong wol ya we oli mekem man i glad blong smol taem nomo. “Laef ya we i prapa wan” hem i laef we i no save finis aninit long Kingdom blong God. Laef ya i blong olwe mo i stret nomo we yumi lego sam samting blong yumi save kasem laef ya. Be yumi mas lego ol samting ya nomo we oli stret blong lego.
13. ?Olsem wanem wan hasban mo waef blong hem tufala i lego ol samting we i stret blong lego?
13 Tingbaot Henry mo Suzanne. Tufala i bilif fulwan long promes ya blong God, se olgeta we oli putum Kingdom long fasples long laef blong olgeta, God bambae i givhan long olgeta. (Matiu 6:33) From samting ya, tufala i jusum blong laef long wan haos we i no sas, olsem i no nid blong tufala tugeta i wok, nao tufala wetem tufala gel blong tufala, oli save spenem moa taem blong mekem wok blong Kingdom. (Hibrus 13:15, 16) Wan woman we i fren blong tufala, mo we i laekem tufala, i no kasem save from wanem tufala i mekem olsem. Woman ya i talem long Suzanne se: “Suzanne, sipos yu wantem laef long wan haos we i moa naes, yu mas lego sam samting.” Be Henry mo Suzanne, tufala i save se taem tufala i putum Jeova long fasples long laef blong tufala, ‘fasin ya bambae i givhan long tufala long laef ya long wol, mo bakegen, long laef ya we bambae i kamtru biaen.’ (1 Timoti 4:8; Taetas 2:12) Taem tufala gel blong tufala i kam bigwan, tufala i strong blong prij fultaem. Famle ya i no harem olsem se oli sot long wan samting, defren olgeta, oli kasem plante blesing taem oli mekem se laef blong olgeta i gat trufala mining, hemia se oli traehad blong kasem “laef ya we i prapa wan.”—Filipae 3:8; 1 Timoti 6:6-8.
No “Yusum Tumas Wol Ya”
14. ?Wanem trabol i save kamaot sipos yumi fogetem trufala mining blong laef blong yumi?
14 Yumi stap long bigfala denja sipos yumi fogetem trufala mining blong laef mo yumi no moa holemstrong long “laef ya we i prapa wan.” Yumi save foldaon long trap ya blong ‘tingting tumas long ol samting blong laef blong yumi, no yumi kam rijman, no yumi gat gud taem long laef blong yumi.’ (Luk 8:14) Sipos yumi wantem ol sas samting bitim mak mo yumi “wari tumas blong winim mane blong yusum long laef,” yumi save go kasem mak ya we yumi joen tumas long rabis wol ya. (Luk 21:34, NW, futnot) Sore tumas, be samfala oli bin foldaon long trap ya blong ronem mane olsem ol man blong wol, nao oli “gowe finis long fasin blong bilif. Mo oli stap mekem ol samting we olgeta tu oli harem nogud tumas from.” Oli lusum gudfala fasin fren we oli bin gat wetem Jeova tu. !Hemia wan rabis frut we yumi save kasem sipos yumi no “holemtaet laef ya we i no save finis”!—1 Timoti 6:9, 10, 12, NW; Ol Proveb 28:20.
15. ?Olsem wanem wan famle i kasem blesing from we hem i no “yusum tumas wol ya”?
15 Pol i givim advaes se: “Olgeta we oli stap yusum wol, oli mas kam olsem olgeta we oli no stap yusum tumas wol ya.” (1 Korin 7:31, NW) Keith mo Bonnie tufala i folemgud advaes ya. Keith i talem se: “Mi mi skul blong kam wan dokta blong tut. Taem klosap mi finis long skul ya, mi kam wan Witnes blong Jeova. Long taem ya, mi mas mekem wan desisen. Mi save wok plante mo kasem plante mane, be hemia bambae i blokem mi blong mekem wok blong God. Ale mi jusum blong katemdaon ol aoa blong wok blong mi, blong mi save spenem moa taem long ol wok long saed blong spirit mo lukaot long ol nid long saed blong filing blong famle blong mitufala, we i stap gru gogo kasem we mitufala i gat faef pikinini gel. Klosap oltaem mifala i gat mane we i naf nomo blong laef, be mifala i lanem blong no westem mane, mo oltaem mifala i gat samting we mifala i nidim. Famle blong mifala i joengud, i gat lav, mo mifala i glad tumas. Biaen, mifala evriwan i mekem wok blong prij fultaem. Naoia ol gel blong mitufala oli mared mo tri long olgeta oli gat pikinini. Famle blong olgeta tu i glad, from we oli gohed blong putum samting we Jeova i wantem long fasples long laef blong olgeta.”
Putum Samting We God i Wantem Long Fasples Long Laef Blong Yu
16, 17. ?Wanem eksampol we Baebol i soemaot long saed blong ol man we oli gat gudhan blong mekem ol samting? ?Mo yumi tingbaot olgeta from wanem?
16 Long Baebol i gat eksampol blong olgeta we oli putum samting we God i wantem long fasples long laef blong olgeta, mo samfala we oli no mekem olsem. Eksampol blong ol man ya i save tijim ol yangfala mo ol olfala, ol man we oli kamaot long ol defren laen, mo we oli gat ol defdefren fasin blong laef. (Rom 15:4; 1 Korin 10:6, 11) Nimrod i bildim ol bigbigfala taon, be hem i mekem olsem blong agensem Jeova. (Jenesis 10:8, 9, NW) Plante narafala oli soemaot gudfala eksampol. Olsem nao, Moses i wan haeman long Ijip, be hem i no putum mak ya se bambae hem i gohed blong holemtaet haenem blong hem. Nogat. Defren olgeta, hem i tinghae long wok we God i givim long hem, i winim “ol gudfala samting blong laef long Ijip.” (Hibrus 11:26) Luk i wan dokta, mo i klia se hem i givhan long Pol mo ol narafala we oli sik. Be hem i givhan moa long ol narafala, taem hem i talemaot gud nius mo i raetem sam haf blong Baebol. Long saed blong Pol, ol man oli no tingbaot hem olsem wan man we i savegud Loa, be olsem wan misinari, wan ‘aposol blong olgeta we oli no laen blong Isrel.’—Rom 11:13.
17 Faswan samting we ol man oli tingbaot long saed blong Deved, i no we hem i jif blong ami no wan man blong wokem mo plei miusik, be hem i “wan man we i stret gud long fes blong [God].” (1 Samuel 13:14) Yumi save Daniel, i no from we hem i wok olsem wan haeman blong gavman blong Babilon, be from wok blong hem olsem wan profet we i holemstrong long Jeova. Yumi save Esta, i no from we hem i wan kwin blong Pesia, be from we hem i soem gudfala eksampol long fasin blong bilif mo no fraet. Yumi save Pita, Andru, Jemes, mo Jon, i no from we oli gat gudhan blong pulum fis, be from we oli ol aposol blong Jisas. Mo beswan eksampol, hemia Jisas. Yumi save Jisas, i no from we hem i wan “man blong wokem haos,” be from we hem i “Mesaea.” (Mak 6:3; Matiu 16:16) Olgeta evriwan ya oli kasem save gud se nomata we oli gat gudhan long plante wok, oli gat plante samting, mo haenem, be laef blong olgeta i mas stanap long wok blong God, i no long wok blong olgeta wanwan. Laef blong olgeta i save gat mining we i gud tumas mo we i karem blesing, sipos oli stap olsem ol man mo woman blong God.
18. ?Wan yangfala Kristin i jusum blong yusum laef blong hem long wanem rod? ?Mo biaen, hem i kasem save long wanem samting?
18 Seung Jin, we yumi tokbaot long stat blong stadi ya, i kasem save long samting ya. Hem i eksplenem se: “Mi no yusum olgeta paoa blong mi long wok blong dokta, no blong wokem ol naesfala pija, no long wok blong tija. Mi mi givim laef blong mi i go long God, taswe mi gat strong tingting blong mekem laef blong mi i laenap wetem promes ya. Naoia mi wok long wan ples we i nidim tumas ol man blong tijim narafala long Baebol, mo mi stap givhan long ol man blong oli wokbaot long rod blong laef we i no save finis. Bifo, mi tingting se wok ya blong prij fultaem bambae i isi tumas, nao mi save kam les long hem. Be naoia mi luk se mi mi mekem plante samting long laef blong mi we oli no isi nating, taem mi traem blong kamgud moa long ol fasin blong mi, mo taem mi traehad blong gat gudhan blong tijim ol man we oli kamaot long ol defren laen. Mi luk se laef blong yumi i gat trufala mining taem yumi mekem samting we Jeova i wantem.”
19. ?Olsem wanem laef blong yumi i save gat trufala mining?
19 Yumi ol Kristin, blesing we yumi gat hemia save we i givim laef, mo hop ya se bambae yumi sef long fiuja. (Jon 17:3) From we ‘God i givhan long yumi finis, long gladhat blong hem,’ yumi no mas “letem gudfala wok ya blong [God] i go blong nating nomo.” (2 Korin 6:1) Defren olgeta, yumi mas yusum ol dei mo yia we oli stap long fored blong yumi, blong leftemap nem blong Jeova. Yumi mas talemaot save ya we bambae i givim trufala glad long man tede, mo we bambae i lidim man i go long laef we i no save finis. Taem yumi mekem olsem, bambae yumi luk se tok ya blong Jisas i tru taem hem i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Mo bambae laef blong yumi i gat trufala mining.
[Futnot]
^ Mifala i jenisim sam nem.
?Yu Yu Save Eksplenem?
• ?Wanem beswan mak we yumi save kasem long laef blong yumi?
• ?From wanem i no waes blong yusum laef blong yumi blong ronem ol sas samting nomo?
• ?Wanem “laef ya we i prapa wan” we God i promes blong givim?
• ?Olsem wanem yumi save mekem laef blong yumi i laenap wetem plan blong God?
[Kwestin]