?I Gud We Yu Tingbaot Laef Blong Naoia Nomo?

“I MI mi neva tingbaot fiuja. Ol yia oli stap pas hareap, fiuja bambae i kasem mi kwiktaem.” Hemia toktok we wan man blong saens, Albert Einsten i bin talem. Plante man oli tingting olsem. Maet oli talem se: “I blong nating nomo blong wari long saed blong fiuja.” No maet yu harem sam man oli talem ol toktok olsem hemia: “Jes gohed nomo long laef blong yu.” “Haremgud long laef naoia nomo.” “No wari long tumora.”

Tingting ya we plante man oli gat i no wan niufala samting. “Kakae, dring, haremgud long laef. Ol narafala samting oli blong nating nomo.” Hemia nao stamba tingting we man ya Epikurus bifo mo ol man we oli folem hem, oli bin gat. Sam man we oli laef long taem blong aposol Pol oli gat tingting we i klosap sem mak. Tingting blong olgeta se: “I gud yumi gohed, yumi kakae, yumi dring, from we tumora bambae yumi ded.” (1 Korin 15:32) Oli no bilif se i gat wan samting long fiuja be oli ting se sotfala laef we ol man oli gat naoia, hemia nomo. Taswe oli leftemap tingting ya se oli mas haremgud fulwan long laef blong olgeta.

Be plante milian man tede oli no save ronem ol pleplei mo gudtaem blong haremgud fulwan long laef. Oli fesem tumas trabol, mekem se oli hadwok oltaem jes blong kasem wanem we oli nidim blong laef, hemia nao bigfala samting long laef blong olgeta. ?From wanem oli mas tingbaot fiuja? I luk olsem se “tumora” blong olgeta bambae i nogud nomo, mo i no gat wan samting we i givim hop long olgeta.

?Yumi Mas Plan From Tumora?

Laef blong sam man i no strong olsem. Be nating, olgeta tu oli luk se i blong nating nomo blong plan from fiuja. Maet oli askem se: “?Plan? !Westem taem!” Maet sam man oli ting se i nogud blong mekem plan blong fiuja, from we sipos plan i no kamtru, bambae tingting blong olgeta i foldaon mo oli harem nogud. Tingbaot man ya Job we hem i laef bifo. Hem i harem nogud taem hem i luk we ol plan blong hem blong gat wan hapi fiuja wetem famle blong hem, “oli foldaon.”—Job 17:11; Prija 9:11.

Wan man Skotlan, Robert Burns, i wan man blong raetem ol naesfala vas. Taem we hem i brasem garen blong hem, hem i spolem haos blong wan smol rat. Wantaem nomo laef blong smol rat ya i jenis mo hem i mas ronwe blong sevem laef  blong hem. Masta Burns i talem se hadtaem we ol man oli fesem i olsem samting we i hapen long smol rat ya. Hem i tingting se: ‘Yes, plante taem yumi fesem trabol we yumi no gat paoa blong kontrolem. Maet yumi bin mekem gud plan blong yumi, be plante taem plan ya i foldaon olgeta.’

?Hemia i min se i blong nating nomo blong plan from fiuja? Nogat. Sipos ol man oli no plan from wan hariken no wan narafala disasta we maet i kasem olgeta, i save gat bigfala trabol i kamaot. Tingbaot bigfala hariken ya Katrina. I tru se i no gat wan man we i save blokem hariken ya. Be, sipos oli bin tingtinggud mo plan from ol hariken fastaem, maet hariken Katrina i no mekem bigfala trabol long taon ya New Orleans mo ol man we oli stap long hem.

?Wanem tingting blong yu? ?I waes blong tingbaot laef blong naoia nomo mo blong no tingbaot tumora nating? Ridim wanem we nekis haf blong magasin ya i talem long saed blong samting ya.

[Tok blong pija long pej 3]

“Kakae, dring, haremgud long laef. Ol narafala samting oli blong nating nomo”

[Tok blong pija long pej 4]

Sipos ol man oli bin tingtinggud mo plan fastaem from ol hariken, maet hariken Katrina i no mekem bigfala trabol tumas long olgeta

[Credit Line]

U.S. Coast Guard Digital