Lukaot Ol Tingting Blong God We Oli Haed

‘Spirit ya blong God i save lukaot olgeta samting we i haed. Ol tingting blong God we man i no save faenemaot, be spirit ya i save faenemaot olgeta.’—1 KORIN 2:10.

1. ?Wanem sam trutok blong Baebol we oli save givim bigfala glad long ol man we oli stat blong stadi Baebol?

 BIGHAF blong yumi long Kristin kongregesen i save rimemba yet bigfala glad we yumi bin gat taem yumi kasem trutok. Yumi bin faenemaot from wanem i impoten blong singaot God long nem blong hem Jeova, from wanem hem i letem man i safa, from wanem samfala nomo oli go long heven, mo wanem samting bambae i hapen long ol narafala we oli stap tru long God. Ating yumi bin ridim Baebol longtaem finis i kam, be ol save ya i haed long yumi, olsem i haed long bighaf blong ol man long wol. Long taem ya, yumi olsem wan man we i stap long bot, mo i lukluk i godaon long ol korel aninit long solwota. Hem i no save luk klia ol naesfala korel ya. Hem i nidim samting blong givhan long hem blong lukluk. Ale sipos hem i putum glas blong daeva, no i go long wan bot we i gat glas long botom blong hem, hem i save luk klia ol naesfala kala blong korel, ol fis, ol gras blong solwota, mo ol narafala samting we hem i haremgud blong lukluk. Sem mak taem yumi stat blong kasem save long Baebol. Taem wan narafala i halpem yumi, yumi stat blong faenemaot ‘ol tingting blong God we oli haed.’—1 Korin 2:8-10.

2. ?Olsem wanem glad we yumi kasem taem yumi lanem Tok blong God i save stap olwe wetem yumi?

² ?Be yumi mas glad blong kasem save smol nomo long trutok blong Baebol? ‘Ol tingting blong God we oli haed’ i minim waes mo save blong God we tabu spirit i mekem ol Kristin oli kasem save long hem, be ol narafala man oli no save faenemaot. (1 Korin 2:7) !Waes blong God i bigwan tumas, i no gat en blong hem! !Mo taem yumi lukaot ol waes ya mo faenem, yumi haremgud tumas long hem! I tru, bambae yumi neva faenemaot evri samting long saed blong waes blong God. Be glad we yumi bin kasem taem yumi lanem ol stamba tijing  blong Baebol fastaem, i save stap olwe wetem yumi sipos yumi gohed nomo blong lukaot ‘ol tingting blong God we oli haed.’

3. ?From wanem yumi nidim blong kasem save gud long ol samting we bilif blong yumi i stanap long hem?

³ ?From wanem yumi nidim blong kasem save long ‘ol tingting blong God we oli haed’? I no naf blong save nomo samting we yumi bilif long hem, be yumi mas save tu from wanem yumi bilif olsem, mo ol bilif ya oli stanap long wanem. Olsem nao, bilif blong yumi bambae i kam strong mo yumi sua se bilif ya i tru. Baebol i talem se yumi mas yusum ‘tingting blong yumi’ blong “pruvum se ol samting we God i wantem, oli gud, oli mekem man i glad, mo oli stret gud olgeta.” (Rom 12:1, 2, NW) Sipos yumi kasem save from wanem Jeova i askem yumi blong folem sam fasin long laef blong yumi, tingting blong yumi bambae i kam strong moa blong obei long hem. Taswe, save long saed blong ‘ol tingting blong God we oli haed’ i save givim paoa long yumi blong stanap strong agensem ol traem we oli pulum yumi blong brekem loa blong Hem, mo i save pulum yumi blong yumi “strong blong mekem ol gudfala samting.”—Taetas 2:14.

4. ?Olsem wanem yumi stadi Baebol?

⁴ Blong kasem save long ol tingting we oli haed, yumi mas stadi. Be stadi i no minim se yumi ridim ol save nomo. Stadi hemia se yumi ridimgud ol save mo yumi tingting gud long hem blong luk olsem wanem i joen wetem ol save we yumi gat finis. (2 Timoti 1:13) Yumi traem luksave from wanem buk we yumi stadi long hem i talem samting we hem i talem. Taem yumi stadi long Baebol, yumi mas tingting dip olsem wanem yumi save yusum ol save ya blong mekem ol waes desisen mo blong halpem ol narafala. From we ‘olgeta tok blong Baebol oli kamaot long God fastaem mo oli stret gud,’ yumi mas stadi long “evri tok we God i talem.” (2 Timoti 3:16, 17; Matiu 4:4) !Tru ya, i nidim fasin traehad blong yumi save stadi long Baebol! Nating se i olsem, yumi kasem bigfala glad taem yumi stadi. I no strong tumas blong kasem save long ‘ol tingting blong God we oli haed.’

Jeova i Givhan Long Olgeta We Oli Gat Tingtingdaon Blong Oli Kasem Save

5. ?Hu i naf blong kasem save long ‘ol tingting blong God we oli haed’?

⁵ Maet yu yu wan man we i no skulgud mo yu no lan blong stadi. Nating se i olsem, yu no mas ting se yu yu no naf blong kasem save long ‘ol tingting blong God we oli haed.’ Taem Jisas i stap prij long wol ya, Jeova i no soemaot plan blong hem long ol man we oli waes mo oli skulgud. Be hem i soemaot long ol man we oli no gat nem mo oli no skulgud, olgeta we oli gat tingting daon blong letem man blong God i tijim olgeta. Olgeta ya oli olsem smol pikinini nomo taem yumi skelem olgeta wetem ol man we oli skulgud. (Matiu 11:25; Ol Wok 4:13) Aposol Pol i raetem leta i go long ol Kristin brata sista blong hem, blong tokbaot ‘plante samting we God i mekem rere finis blong ol man we oli lavem hem.’ Pol i talem se: ‘God i yusum spirit blong hem blong soemaot ol samting ya long yumi. spirit ya blong God i save lukaot olgeta samting we i haed. Ol tingting blong God we man i no save faenemaot, be spirit ya i save faenemaot olgeta.’—1 Korin 2:9, 10.

6. ?Wanem mining blong ol tok blong 1 Korin 2:10?

⁶ ?Olsem wanem spirit i lukaot ‘ol tingting blong God we oli haed’? Jeova i no toktok wetem wanwan Kristin blong givim save long olgeta. Be hem i yusum spirit blong hem blong lidim ogenaesesen blong hem, nao ogenaesesen ya i givim save blong Baebol long ol man blong God we oli joengud blong mekem wok blong hem. (Ol Wok 20:28; Efesas 4:3-6) Long evri ples blong wol, ol kongregesen oli folem sem program blong stadi long Baebol. Taem ol yia oli pas, oli stadi long olgeta tijing blong Baebol. Tabu spirit i yusum kongregesen blong givhan long ol man blong oli gat stret tingting mo fasin we oli nidim blong kasem save long ‘ol tingting blong God we oli haed.’—Ol Wok 5:32.

 ?Wanem ‘Ol Tingting Blong God We Oli Haed’?

7. ?From wanem plante man oli no kasem save long ‘ol tingting blong God we oli haed’?

⁷ Yumi no mas ting se i strong tumas blong kasem save long ‘ol tingting blong God we oli haed.’ Nogat. Bighaf blong ol man oli no faenemaot ‘ol tingting blong God we oli haed’ from we Setan i yusum ol giaman trik blong hem long olgeta, i no from we ol waes blong God i strong tumas blong kasem. Taem Setan i pulum olgeta, oli no wantem kasem help we Jeova i save givim tru long ogenaesesen blong hem.—2 Korin 4:3, 4.

8. ?Long leta we Pol i raetem long ol Kristin long Efesas long japta tri, hem i tokbaot wanem save we i haed?

⁸ Long leta we Pol i raetem long ol Kristin long Efesas, long japta tri, hem i soem se ‘ol tingting blong God we oli haed’ hemia plante trutok we bighaf blong ol man blong Jeova oli savegud. Long ol trutok ya, i gat save ya long saed blong hu i Sid we God i promes blong sanem, ol man we God i jusumaot blong laef long heven, mo Kingdom blong Mesaea. Pol i raetem se: ‘Long taem blong ol man bifo, God i no talemaot tok ya. Be naoia, hem i yusum spirit blong hem blong soemaot tok ya long ol tabu aposol mo ol profet blong hem. Tok ya i olsem. From gud nius blong Kraes, ol man we oli no laen blong Isrel oli gat raet wetem ol laen blong Isrel, blong kasem ol gudgudfala samting we God i stap givim. Olgeta ya evriwan, oli olsem ol haf blong wan bodi nomo. Mo promes ya we God i mekem long Jisas Kraes, hem i mekem wantaem nomo long ol narafala man tu.” Pol i talem se hem nao i gat wok blong “mekem olgeta man oli save fasin we God i folem blong mekem plan ya blong hem we fastaem i stap haed, i kamtru. God ya we i mekem olgeta samting, hem i haedem plan ya blong hem, i stat bifo olgeta, i kam kasem tede.’—Efesas 3:5-9.

9. ?From wanem i wan bigfala blesing blong kasem save long ‘ol tingting blong God we oli haed’?

⁹ Pol i gohed blong eksplenem se, God i wantem tu we ‘olgeta long heven oli kasem save tru long kongregesen, long bigfala waes blong God we i gat plante rod blong hem.’ (Efesas 3:10, NW) Yes, taem ol enjel oli lukluk mo kasem save long waes fasin we Jeova i soemaot long ol wok blong hem long Kristin kongregesen, samting ya i givhan long olgeta tu. !Tingbaot bigfala blesing we yumi gat blong kasem save long ol samting we ol enjel tu oli intres long olgeta! (1 Pita 1:10-12) Biaen bakegen, Pol i talem se yumi mas traehad wetem “olgeta man blong God long evri ples, blong kasem paoa blong save” long Kristin bilif, se hem i “bigwan olsem wanem, mo i longfala olsem wanem, mo i hae olsem wanem, mo i dip olsem wanem.” (Efesas 3:11, 18) Naoia bambae yumi tokbaot sam tingting blong God we oli haed we maet yumi no kasem save fulwan long olgeta yet.

Sam Tingting Blong God We Oli Haed

10, 11. ?Folem samting we Baebol i talem, wetaem Jisas i kam faswan haf blong “sid” blong “woman” blong God long heven?

¹⁰ Yumi save finis se Jisas nao i faswan haf blong “sid” blong “woman” blong God long heven, we Jenesis 3:15 (NW) i tokbaot. Be blong kasem save moa long samting ya, maet yumi askem se: ‘?Wetaem Jisas i kam Sid ya we God i promes blong sanem? ?Hem i kam Sid ya taem hem i stap yet wetem God bifo we hem i kam long wol ya? ?Hem i kam Sid ya taem hem i bon long wol, taem hem i baptaes, no taem hem i laef bakegen long ded?’

¹¹ God i promes se ogenaesesen blong hem long heven, we profet tok i talem se hem i “woman,” bambae i karem wan sid we bambae i smasem hed blong snek. Be blong plante taosen yia, woman blong God i no karem wan sid we i gat paoa blong spolem Setan mo ol wok blong hem. Taswe profet tok blong Aesea i talem se hem i “woman we neva i bonem pikinini” mo “i stap harem i nogud tumas.” (Aesea 54:1, 5, 6) Plante yia biaen, Jisas i bon long taon ya Betlehem. Be taem Jisas i baptaes mo tabu spirit i makemaot hem olsem wan spirit pikinini blong God, long taem ya nao Jeova i jes talem se: “Hemia pikinini blong mi.” (Matiu 3:17; Jon 3:3) Long taem ya, faswan haf blong “sid” blong woman i kamtru. Biaen, tabu spirit i kamdaon long sam man blong Jisas mo i makemaot olgeta blong oli go long heven. Afta long wan longfala taem we “woman” blong Jeova i harem se hem i wan “woman we neva i bonem pikinini,” hem i save ‘singsing mo i save glad.’—Aesea 54:1; Galesia 3:29.

12, 13. ?Wanem ol vas blong Baebol we oli soemaot se olgeta Kristin long wol we tabu spirit i makemaot olgeta, oli stap olsem “slef ya we i stret mo waes”?

¹² Wan narafala tingting blong God we i haed be hem i soemaot long yumi, hemia long saed blong plan blong Hem blong jusumaot 144,000 man long  wol. (Revelesen 14:1, 4) Yumi agri long tijing ya se smol grup blong ol man we tabu spirit i makemaot olgeta we oli laef long wol long ol defren taem long histri, hemia nao “slef ya we i stret mo waes” we Jisas i talem se bambae i givimaot “kakae” long stret taem blong hem long ol man blong wok blong hem. (Matiu 24:45, NW) ?Wanem ol vas blong Baebol we oli pruvum save ya? ?Maet Jisas i stap tokbaot eni Kristin we i givim save blong Baebol long ol brata blong hem blong mekem oli strong?

¹³ God i talem long neson blong Isrel se: “Yufala i witnes blong mi. Mi mi jusumaot yufala blong yufala i man blong wok blong mi.” (Aesea 43:10) Be long Nisan 11 long yia 33, Jisas i talem long ol lida blong Isrel se God i sakemaot neson blong olgeta finis, mo oli no moa man blong wok blong Hem. Jisas i talem se: “God bambae i tekemaot kingdom blong Hem long yufala, mo bambae i givim i go long wan neson we bambae i karem frut we i stret.” Nao Jisas i talem long ol man we oli hivap raon long hem se: “God i lego yufala finis, ples blong yufala i emti i stap.” (Matiu 21:43, NW; 23:38) Taem neson blong Isrel i mekem wok olsem slef blong Jeova, hem i no waes mo i no stret tu. (Aesea 29:13, 14) Long sem dei we Jisas i talem tok panis ya long neson blong Isrel, hem i askem se: “Hu ya i rili slef ya we i stret mo waes?” I olsem we hem i stap askem se: ‘?Wanem neson we i waes we bambae i tekem ples blong Isrel olsem slef blong God we i stret?’ Aposol Pita i givim ansa long kwestin ya taem hem i talem long kongregesen blong ol Kristin we tabu spirit i makemaot olgeta se: “Yufala i . . . ‘wan tabu neson, ol man we oli blong God nomo.’ ” (1 Pita 1:4; 2:9, NW) Neson ya long saed blong spirit, “Isrel blong God,” i kam niufala slef blong Jeova. (Galesia 6:16, NW) Long taem bifo, olgeta memba blong Isrel tugeta oli stap olsem wan “man blong wok.” Long sem fasin, tede, olgeta Kristin we tabu spirit i makemaot olgeta we oli stap yet long wol, olgeta evriwan oli mekemap “slef ya we i stret mo waes.” !Hem i wan bigfala blesing blong kasem “kakae” tru long slef ya blong God!

Yumi Save Haremgud Blong Stadi Yumi Wan

14. ?From wanem stadi blong Baebol i mekem yumi glad moa i bitim we yumi rid nomo?

¹⁴ ?Olsem wanem? ?Taem yu kasem save long wan niufala trutok blong Baebol, yu yu haremgud? Ating yu luk se hemia i mekem bilif blong yu i strong. Hemia nao from wanem stadi blong Baebol i mekem yumi glad moa i bitim we yumi rid nomo. From samting ya, taem yu ridim ol Kristin buk, yu mas yusum tingting blong yu mo askem plante kwestin. Yu save askem ol kwestin olsem: ‘?Save ya i sem mak long save we mi gat bifo long poen ya, no hem i niufala save? ?Wanem ol narafala vas blong Baebol no narafala save we i pruvum ol tingting we oli stap long haf ya we mi ridim?’ Sipos yu nidim blong lukaot moa save, yu save raetemdaon kwestin we yu wantem faenem ansa blong hem mo lukaot save long hem long wan narafala taem we yu stadi.

15. ?Yu save stadi long wanem samting we bambae i karem glad long yu? ?Mo yu save mekem wanem blong bambae stadi ya i givhan longtaem long yu?

¹⁵ ?Yu save stadi long wanem samting we maet i givim niufala save mo glad long yu? Yu save mekem save blong yu i kam dip moa sipos yu stadi long ol samting olsem ol kontrak we God i mekem blong givhan long ol man. Yu save mekem bilif blong yu i kam strong moa sipos yu stadi long ol profet tok we oli tokbaot Jisas Kraes, no sipos yu stadi long olgeta vas wanwan long wan buk blong Baebol we ol profet oli raetem. Narafala samting we i save bildimap bilif blong yu, hemia se yu stadi long histri blong ol Witnes blong Jeova long taem blong yumi, long buk ya Jehovah’s Witnesses—Proclaimers of God’s Kingdom (Les Témoins de Jéhovah : Prédicateurs du Royaume de Dieu), long wan lanwis we yu kasem save long hem. * Yu save gobak mo stadi long  haf ya “Wan Kwestin” long ol Wajtaoa we oli pas finis. Samting ya bambae i givim niufala save long yu long sam vas blong Baebol. Yu mas makemgud olsem wanem Wajtaoa i yusum ol vas blong Baebol blong eksplenem ansa blong ol kwestin ya. Hemia bambae i givhan long yu blong ‘trenem tingting blong yu gogo yu kam naf blong luksave’ wanem we i stret. (Hibrus 5:14, NW) Taem yu stap stadi, yu save raetem sam not long wan pepa no long prapa Baebol blong yu. Olsem nao, stadi we yu mekem bambae i givhan long yu longtaem mo yu save yusum blong halpem ol narafala tu.

Givhan Long Ol Yangfala Blong Oli Haremgud Blong Stadi Baebol

16. ?Olsem wanem yu save givhan long ol yangfala blong oli haremgud blong stadi Baebol?

¹⁶ Ol papa mama oli save mekem plante samting blong pulum ol pikinini blong olgeta blong wantem save moa long Baebol. Yu neva mas ting se ol yangfala oli no naf blong kasem save long ol dip trutok. Yu save talem long ol pikinini blong yu blong lukaot save long wan poen long famle Baebol stadi blong yufala, nao long taem blong stadi ya, yu save askem olgeta wanem samting oli lanem. Mo tu long famle stadi, yufala i save mekem ol pleplei olsem we yu stap prij. Samting ya i tijim ol yangfala blong talemaot bilif blong olgeta, ansa long ol kwestin blong ol man, mo blong pruvum se wanem we oli lanem i tru. Mo tu, yu save yusum smol buk ya “See the Good Land” (‘ Voyez le bon pays ’) * blong tijim olgeta long saed blong ol ples we Baebol i tokbaot, mo blong mekem Baebol riding blong yufala evri wik i kam moa klia.

17. ?From wanem yumi mas skelemgud taem we yumi yusum long ol projek we yumi mekem long prapa Baebol stadi blong yumi?

¹⁷ Sam projek we yu mekem long prapa Baebol stadi blong yu, oli save pulumgud tingting blong yu mo bildimap bilif blong yu. Be yu mas lukaotgud se yu no spenem olgeta taem blong yu long ol projek ya nao yu no moa rerem ol miting blong kongregesen. Jeova i yusum “slef ya we i stret mo waes” blong tijim yumi long plante rod, mo ol miting nao oli wan long ol rod ya. Sipos yu lukaot moa save taem yu stap rerem ol miting, yu save givim ol gudfala ansa, olsem long Buk Stadi no long haf blong Tiokratik Skul we i tokbaot ol bigfala poen blong Baebol riding.

18. ?From wanem bigfala traehad blong stadi long ‘ol tingting blong God we oli haed’ i no blong nating nomo?

¹⁸ Sipos yu stadi dip long Tok blong God, hemia bambae i givhan long yu blong kam klosap moa long Jeova. Baebol i soemaot olsem wanem stadi i mekem i gud long yumi i se: “Mane i save givhan blong mekem laef blong yu i gud, be waes tu i save mekem samting ya, mo hem i save go moa. Hem i save mekem we laef blong yu bambae i stap gud olwe.” (Prija 7:12) Taswe, bigfala traehad blong yu blong kasem save moa long ol dip trutok blong Baebol, i no blong nating nomo. Baebol i mekem wan promes long olgeta we oli gohed blong lukaot save, hem i se: “Bambae yu faenem save blong God.”—Ol Proveb 2:4, 5.

[Ol Futnot]

?Yu Yu Save Eksplenem?

• ?Wanem ‘ol tingting blong God we oli haed’?

• ?From wanem yumi neva mas stop blong mekem dip stadi?

• ?Olsem wanem olgeta Kristin oli gat janis blong kasem save long ‘ol tingting blong God we oli haed’?

• ?Yu save mekem wanem blong ‘ol tingting blong God we oli haed’ oli givhan moa long yu?

[Kwestin]

[Tok blong pija long pej 28]

?Wetaem Jisas i kam Mesaea?

[Tok blong pija long pej 31]

Ol papa mama oli save talem long ol pikinini blong olgeta blong lukaot save long wan samting long famle stadi blong olgeta