Olgeta Promes Blong Jeova Oli Kamtru
Olgeta Promes Blong Jeova Oli Kamtru
“Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.”—JOSUA 23:14.
1. ?Hu ya Josua? ?I no longtaem bifo we hem i ded, hem i mekem wanem?
I GAT wan komanda blong ami long taem bifo we hem i gat paoa mo i no save fraet, wan man blong bilif we i holemstrong long God. Man ya i wokbaot wetem Moses, mo Jeova i jusum hem blong lidim ol man Isrel oli kamaot long wan draeples we i nogud tumas, oli go long wan kantri we graon blong hem i rij mo i karem fulap kakae. Man ya hem i Josua, we ol man oli gat bigfala respek long hem. I no longtaem bifo we Josua i ded, hem i toktok i go long ol olfala man blong Isrel. Tok blong hem i tajem hat blong ol man ya, mo i sua se i mekem bilif blong olgeta i strong. Tok ya i save mekem sem samting long yumi tede.
2, 3. ?Taem Josua i toktok i go long ol olfala man blong Isrel, neson blong Isrel i stap olsem wanem? ?Josua i talem wanem?
2 Traem tingting gud long samting we Baebol i talem long saed blong taem ya: “Hae God i bin mekem ol laen blong Isrel, oli stap gud long ples blong olgeta long medel blong olgeta enemi blong olgeta longtaem finis, mo Josua i stap kam olfala tumas. Nao hem i singaot olgeta man ya wetem ol elda, mo ol lida, mo ol jaj, mo ol haeman blong olgeta oli kam wanples, nao hem i talem long olgeta se, ‘!Olgeta! Naoia mi mi olfala finis.’ ”—Josua 23:1, 2.
3 Long taem ya, Josua i gat klosap 110 yia blong hem. Hem i bin laef long wan taem we i gat plante bigfala samting i hapen long ol man blong God, i bitim ol narafala taem bifo. Hem i bin luk ol bigbigfala wok we God i mekem blong givhan long ol man blong hem, mo hem i bin luk olsem wanem ol promes blong Jeova oli kamtru. From samting ya, hem i talem wetem strong bilif se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.”—Josua 23:14.
4. ?Wanem ol promes we Jeova i mekem long ol man Isrel?
4 ?Wanem ol promes blong Jeova we Josua i luk oli kamtru? Bambae yumi tokbaot tri promes we Jeova i mekem long ol man Isrel. Faswan, God i promes blong mekem olgeta oli kam fri long wok slef long Ijip. Namba tu, hem i promes blong protektem olgeta. Mo namba tri promes, bambae hem i givim evri samting we oli nidim. Jeova i mekem ol semfala promes ya long ol man blong hem tede, mo yumi bin luk we ol promes ya oli kamtru, olsem we Josua i bin luk. Be bifo we yumi tokbaot ol samting we Jeova i mekem long taem blong yumi, bambae yumi tokbaot ol wok blong Hem long taem blong Josua.
Jeova i Mekem Ol Man Blong Hem Oli Kam Fri
5, 6. ?Olsem wanem Jeova i mekem ol man Isrel oli kam fri long Ijip? ?Bigfala wok ya i soemaot wanem?
5 Taem ol man Isrel oli stap wok slef long Ijip, oli krae i go long Jeova, mo Jeova i lesin long olgeta. (Eksodas 2:23-25) Jeova i toktok long Moses long wan tri we faea i laet long hem, i se: “Mi mi kamdaon blong tekemaot [ol man blong mi] long han blong ol man Ijip, mo blong lidim olgeta oli aot long Ijip oli kam. Bambae mi tekem olgeta i go long wan gudfala kantri, we i bigfala tumas, we graon blong hem i gud tumas, oltaem i karem fulap kakae.” (Eksodas 3:8) !Tingbaot bigfala glad blong olgeta taem oli luk we Jeova i mekem promes ya i kamtru! Be Fero we i king blong Ijip, i no wantem letem ol man Isrel oli gofri. Ale Moses i talem long hem se God bambae i mekem ol wota blong Nael Reva i kam blad. Tok ya blong Jeova i kamtru. Olgeta wota blong Nael Reva oli kam blad. Ol fis oli ded, mo ol man oli no save dring wota we i kamaot long reva ya. (Eksodas 7:14-21) Be Fero i mekem stronghed yet. Nao Jeova i mekem naen moa panis oli kam long ol man Ijip. Bifo long wanwan long olgeta, hem i talemaot wanem bambae i kamaot. (Eksodas, japta 8 kasem 12) Namba ten panis, hem i kilim olgeta fasbon blong Ijip oli ded. Afta long hemia, Fero i givim oda long ol man Isrel blong oli aot. !Ol man Isrel oli no tektaem!—Eksodas 12:29-32.
6 Bigfala wok ya blong Jeova blong mekem ol man Isrel oli kam fri, i openem rod blong hem i save jusum neson ya blong oli kam ol man blong hem, mo blong i givim Loa long olgeta. Wok ya blong Jeova i soemaot klia se hem i mekem olgeta promes blong hem oli kamtru, i no gat wan promes blong hem we i no save kamtru. Wok ya i soemaot tu se Jeova i hae moa long ol god blong ol narafala neson raonabaot. Taem yumi ridim stori ya olsem wanem Jeova i mekem ol man Isrel oli kam fri, bilif blong yumi i kam strong moa. !Tingbaot sipos yu yu stap long taem ya mo Jeova i mekem yu yu fri! Josua i lukluk klia se Jeova nomo i ‘Hae God, King blong olgeta ples long wol.’—Ol Sam 83:18.
Jeova i Protektem Ol Man Blong Hem
7. ?Olsem wanem Jeova i protektem ol man Isrel blong ol ami blong Fero oli no save kasem olgeta?
7 ?Olsem wanem long seken promes blong Jeova? ?Hem i protektem ol man blong hem? Taem Jeova i talem long ol man Isrel se bambae hem i tekemaot olgeta long Ijip mo lidim olgeta oli go long Promes Lan, i olsem we hem i promes blong protektem olgeta tu. Tingbaot olsem wanem Fero i kros tumas, nao hem i singaot strong ami blong hem wetem plante handred kat blong faet blong olgeta, ale oli ronem ol man Isrel blong holem olgeta bakegen. !Flas man ya Fero i suagud se bambae hem i kasem olgeta! Taem hem i luk we ol bigfala hil oli blokem olgeta biaen, mo bigfala solwota i stap fored long olgeta, hem i ting se ol man Isrel oli stap long wan trap! Be stret long taem ya God i girap, i mekem wan samting blong protektem ol man blong hem. Hem i mekem wan bigfala klaod i kamaot, we i go stap long medel blong ol soldia blong king blong Ijip mo ol man Isrel. Klaod ya i mekem se Fero mo ol soldia blong Ijip oli stap long tudak, be ol man Isrel oli stap long delaet. Bigfala klaod ya i mekem we ol soldia blong Ijip oli no save kam klosap long ol man Isrel. Hemia i givim taem long Moses blong leftemap wokingstik blong hem antap long Red Si, nao wota blong Red Si i seraot long tu haf, i mekem we ples long medel blong tufala wota ya i kam drae. Hemia nao rod blong ol man Isrel oli save ronwe, be hem i wan trap blong ol ami blong Ijip. Jeova i spolem fulwan ol strong man blong faet blong Fero, mo i protektem ol man blong Hem, i sevem olgeta oli aot long han blong ami blong Ijip we i save winim olgeta isi nomo.—Eksodas 14:19-28.
8. (a) ?Olsem wanem Jeova i protektem ol man Isrel long draeples? (b) ?Olsem wanem hem i protektem olgeta taem oli go insaed long Promes Lan?
8 Afta we ol man Isrel oli krosem Red Si, oli wokbaot long wan ‘bigfala draeples we i nogud olgeta, i gat ol snek mo skopion, we taem oli kakae man, man i ded from, mo i no gat wota nating long hem.’ (Dutronome 8:15) Long ples ya tu, Jeova i protektem ol man blong hem. ?Olsem wanem long taem ya we ol man Isrel oli rere blong go insaed long Promes Lan? Ol strong ami blong Kenan oli no wantem letem olgeta oli kam. Nating se i olsem, Jeova i talem long Josua se: “Naoia, yu wetem olgeta ya, yufala i mas mekemrere blong gokros long Jodan Reva, blong go long kantri ya we mi mi wantem givim long yufala. Mi mi talem long yu, oltaem long laef blong yu, bambae i no gat man i save winim yu. Mi bambae mi stap lukaot long yu, olsem we mi stap lukaot long Moses bifo. Mo bambae mi stap wetem yu oltaem, we neva bambae mi lego yu samtaem.” (Josua 1:2, 5) Promes ya blong Jeova i kamtru olsem we hem i talem. Long sikis yia, Josua i winim 31 king mo i tekem plante bigfala graon long Promes Lan. (Josua 12:7-24) Sipos Jeova i no bin protektem ol man Isrel, oli no save tekem kantri ya.
Jeova i Givim Evri Samting We Ol Man Blong Hem Oli Nidim
9, 10. ?Olsem wanem Jeova i givim evri samting we ol man blong hem oli nidim long draeples?
9 Naoia bambae yumi tokbaot namba tri promes blong Jeova—bambae hem i givim evri samting we ol man blong hem oli nidim. Smoltaem afta we God i tekemaot ol man Isrel long Ijip, hem i promes se: “Naoia bambae mi mekem we kakae blong yufala i aot long heven, i kamdaon long yufala we i plante we plante, i folfoldaon olsem ren. Evri dei, bambae yufala evriwan i mas go pikimap kakae blong yufala we i naf blong wan dei nomo.” Ale, promes ya i kamtru. Hem i givim ‘kakae ya we i kamdaon long heven.’ “Taem ol man [Isrel] oli luk samting ya, . . . oli stap asaskem long olgeta se, ‘?Olgeta, wanem samting ya?’ ” Hemia mana ya, kakae ya we Jeova i bin promes blong givim long olgeta.—Eksodas 16:4, 13-15.
10 Long ol 40 yia we ol man Isrel oli wokbaot long draeples, Jeova i lukaotgud long olgeta, i givim kakae mo wota long olgeta. Hem i mekem se ol klos blong olgeta tu oli stap gud, oli no brobrok, mo i mekem se leg blong olgeta i no soa taem oli stap wokbaot. (Dutronome 8:3, 4) Josua i luk olgeta samting ya we Jeova i mekem. Jeova i mekem ol man blong hem oli kam fri, i protektem olgeta, mo i givim evri samting we oli nidim, stret olsem we hem i bin promes blong mekem.
Mekem Ol Man Blong Hem Oli Kam Fri Tede
11. ?Wanem i hapen long Brooklyn, New York, long 1914? ?Stret taem i kam blong mekem wanem?
11 ?Olsem wanem long taem blong yumi? Long Fraede, Oktoba 2, 1914, long Brooklyn, New York, Charles Russell, we i lidim wok blong ol Baebol Studen long taem ya, i go long rum we ol wokman long Betel oli joen long hem blong dring ti long moning. Hem i talem gud moning long olgeta wetem wan voes we i hapi. Bifo we hem i sidaon, hem i talem wetem glad se: “Taem blong ol Hiten man i finis. Taem blong rul blong ol king blong olgeta i pas finis.” Yes, stret taem i kam blong Hae King blong heven mo wol, Jeova, i mekem wan samting bakegen blong givhan long ol man blong hem. !Mo i tru, hem i girap, i mekem wan samting!
12. ?Olsem wanem Jeova i mekem ol man blong hem oli kam fri long 1919? ?Wanem samting i kamaot from?
12 Faef yia biaen, Jeova i mekem ol man blong hem oli kam fri long ‘Bigfala Babilon,’ hemia bigfala ogenaesesen blong olgeta giaman skul blong wol. (Revelesen 18:2) I no plante long yumi we i bin luk gudfala taem ya. Be yumi luk klia ol samting we i kamaot from. Jeova i stanemap trufala wosip bakegen, mo i hivimap olgeta we oli wantem tumas blong mekem wosip long hem. Profet tok blong Aesea i talemaot samting ya, i se: ‘Long laswan haf blong ol dei, bigfala hil blong haos blong Jeova bambae i stanap strong antap long ol bigfala hil, mo tru, bambae hem i kam hae moa i bitim ol hil, mo ol neson oli mas kam wanples long hem, we oli fulap.’—Aesea 2:2, NW.
13. ?Long laef blong yu, yu bin luk se namba blong ol man blong Jeova i kam antap olsem wanem?
13 Ol tok blong Aesea oli kamtru evriwan. Long 1919, smol grup blong ol tabu man blong God oli no fraet, oli statem wan bigfala wok blong prij long fulwol we i leftemap wosip blong trufala God i kam antap olgeta. Long ol yia 1930, i kam klia se God i stap hivimap “ol narafala sipsip.” (Jon 10:16) !Fastaem i gat plante taosen man, biaen, plante handred taosen, mo naoia i gat plante milian man we oli stap mekem trufala wosip! Aposol Jon i luk olgeta long wan vison, mo hem i talem se oli “wan bigfala kampani blong man, we i no gat man i save kaontem olgeta. Ol man ya oli kamaot long olgeta neson, mo long olgeta laen, mo long olgeta kantri, mo long olgeta lanwis.” (Revelesen 7:9, NW) ?Long ol yia blong laef blong yu, yu luk wanem samting? ?Taem yu jes kasem save long trutok, i gat hamas Witnes blong Jeova long fulwol? Tede, namba blong olgeta we oli mekem wok blong Jeova i kasem 6,700,000. Taem Jeova i mekem ol man blong hem oli kam fri long Bigfala Babilon, hem i openem rod blong oli kam plante we plante, olsem yumi luk naoia long olgeta ples blong wol.
14. ?Wanem narafala samting we Jeova bambae i mekem yet blong ol man blong hem oli kamfri?
14 Bambae Jeova i mekem wan narafala samting yet blong mekem ol man blong hem oli kam fri. Bambae samting ya i gat paoa long evri man long wol. Bambae ol man oli sek long paoa blong Jeova, taem hem i spolemgud olgeta we oli agensem hem, mo i sevem ol man blong hem blong oli stap long wan niufala wol we i fulap long stret fasin nomo. !Bambae yumi haremgud tumas blong luk we ol rabis fasin oli finis mo wan niufala taem i stat we i moagud olgeta i bitim ol taem bifo!—Revelesen 21:1-4.
Jeova i Protektem Ol Man Blong Hem Tede
15. ?From wanem ol man blong Jeova oli nidim we hem i protektem olgeta long taem blong yumi?
15 Olsem yumi luk finis, ol man Isrel long taem blong Josua oli nidim we Jeova i protektem olgeta. ?Olsem wanem long yumi tede? !I sem mak! Jisas i givim woning long ol man blong hem se: “Bambae sam man oli holem yufala, oli mekem i nogud long yufala, gogo oli kilim yufala i ded. Bambae olgeta man oli no laekem yufala nating, oli agens long yufala, from we yufala i holem nem blong mi.” (Matiu 24:9) Long ol yia we oli pas, plante man oli agensem strong ol Witnes blong Jeova long plante kantri mo oli mekem i nogud tumas long olgeta. Be i klia se Jeova i stap wetem ol man blong hem. (Rom 8:31) Tok blong hem i promes se i no gat wan “samting blong mekem faet” we bambae i save stopem wok we yumi mekem blong talemaot Kingdom mo tijim ol man.—Aesea 54:17.
16. ?Yu yu luk wanem samting finis we i pruvum se Jeova i stap protektem ol man blong hem?
16 Ol man blong Jeova oli gohed nomo blong kam plante we plante, nating se ol man blong wol oli no laekem olgeta, oli agensem olgeta. Ol Witnes blong Jeova oli stap wok strong long 236 kantri. Tru ya, hemia wan strong pruf se Jeova i stap wetem yumi mo i stap protektem yumi long ol man we oli wantem spolem yumi mo satem maot blong yumi. ?Olsem wanem? ?Yu yu save tingbaot nem blong sam bigman blong politik no skul we oli bin mekem i strong tumas long ol man blong God long taem blong yu? ?Wanem i hapen long ol bigman ya? ?Oli stap wea naoia? Bighaf blong olgeta oli ded finis, olsem Fero long taem blong Moses mo Josua. ?Be olsem wanem long ol man blong God long taem blong yumi we oli bin holemstrong long God go kasem we oli ded? Jeova i protektem olgeta taem hem i holem olgeta oli stapgud long tingting blong hem. I no gat wan ples we i sef moa blong oli stap long hem. Yes, i klia se Jeova i holem promes blong hem blong protektem ol man blong hem.
Jeova i Givim Evri Samting We Ol Man Blong Hem Tede Oli Nidim
17. ?Jeova i mekem wanem promes long saed blong kakae blong spirit?
17 Jeova i givim evri samting we ol man blong hem oli nidim long draeples, mo hem i stap mekem i sem mak tede. “Slef ya we i stret mo waes” i stap givim kakae long yumi long saed blong spirit. (Matiu 24:45, NW) Yumi stap kasem save long ol dip trutok blong Baebol we oli bin haed blong plante handred yia. Wan enjel i talem long Daniel se: “Yu mas mekem ol tok ya oli haed mo lokem buk ya, gogo bambae taem blong en i kam. Bambae plante man oli wokbaot olbaot, mo tru save bambae i kam fulap.”—Daniel 12:4, NW.
18. ?From wanem yumi save talem se trufala save i fulap tede?
18 Yumi stap naoia long taem blong en, mo trufala save i fulap we i fulap. Long olgeta ples blong wol, tabu spirit i lidim ol man we oli laekem trutok blong oli kasem stret save long saed blong trufala God mo ol plan blong hem. I gat fulap Baebol long wol tede, wetem fulap buk tu blong givhan long ol man blong kasem save long ol gudgudfala trutok blong Baebol. Tingbaot buk ya ?Wanem Samting We Baebol i Rili Tijim? we yumi yusum blong stadi Baebol wetem ol man. * Hemia sam long ol japta blong hem: “?Wanem Trutok Long Saed Blong God?,” “?Ol Dedman Oli Stap Wea?,” “?Wanem Ya Kingdom Blong God?,” mo “?From Wanem God i Letem Man i Safa?” Long plante taosen yia we i pas ol man oli stap tingting long ol kwestin ya. Naoia oli save kasem ansa blong olgeta. Blong plante handred yia, ol man oli no gat save nating, mo ol giaman Kristin skul oli stap tijim olgeta long ol tijing we oli no laenap wetem Baebol. Be naoia, Tok blong God i kam antap, mo i givim save long olgeta we oli wantem tumas blong mekem wok blong Jeova.
19. ?Wanem ol promes we yu yu luk oli kamtru? ?From we ol promes ya oli kamtru finis, wanem tingting blong yu?
19 Tru ya, ol samting we yumi luk wetem prapa ae blong yumi i mekem we yumi save talem se: “Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.” (Josua 23:14) Jeova i mekem ol man blong hem oli kam fri, hem i protektem olgeta, mo i givim evri samting we oli nidim. ?Yu yu save talem wan long ol promes blong Jeova we i no kamtru long stret taem blong hem? I no gat wan promes olsem. Sipos yumi waes, yumi trastem Tok blong God oltaem se bambae hem i kamtru.
20. ?From wanem yumi save putum tingting blong yumi i stap strong long wan gudfala fiuja?
20 ?Olsem wanem long ol samting we oli mas hapen yet? Jeova i promes finis se bighaf blong yumi i save laef long wan nambawan paradaes long wol. Sam long yumi i gat hop blong rul wetem Kraes long heven. Nomata se yumi gat janis blong stap long heven no long wol, i gat gudfala risen blong stap tru long God olsem Josua i mekem. Stret taem bambae i kam blong God i mekem promes blong hem i kamtru long yumi. Long taem ya, bambae yumi tingtingbak long olgeta promes we Jeova i mekem finis, mo yumi tu bambae yumi talem se: “Olgeta promes ya blong hem, hem i mekem oli kamtru evriwan.”
[Futnot]
^ Ol Witnes blong Jeova oli wokem buk ya.
?Yu Yu Save Eksplenem?
• ?Wanem ol promes blong Jeova we Josua i luk oli kamtru?
• ?Wanem ol promes blong Jeova we yu yu luk oli kamtru?
• ?Yumi save sua long wanem samting long saed blong Tok blong God?
[Kwestin]
[Tok blong pija long pej 23]
Jeova i mekem ol man blong hem oli kam fri
[Tok blong pija long pej 23]
?Olsem wanem Jeova i protektem ol man blong hem long Red Si?
[Tok blong pija long pej 24]
?Olsem wanem Jeova i givim evri samting we ol man blong hem oli nidim long draeples?
[Tok blong pija long pej 25]
Jeova i stap lukaotgud long ol man blong hem tede