?Jisas i Gat Wan Baebol?

NOGAT, Jisas i no bin gat wan Baebol. ?From wanem? From we long taem blong Jisas i no gat fulwan Baebol yet olsem we yumi stap yusum tede. Nating se i olsem, ol man oli kipim gud plante skrol i stap long ol haos blong prea, mo hanraet blong ol skrol ya nao oli stap long Baebol tede. Long haos prea long Nasaret, Jisas i ridim buk blong Aesea. (Luk 4:16, 17) Taem aposol Pol i go long taon ya Antiok, long Pisidia, hem i go insaed long haos prea nao i harem “wan man i stap ridim sam tok blong Loa blong Moses, mo sam tok blong ol profet bifo.” (Ol Wok 13:14, 15) Mo disaepol Jemes tu i talem se “evri wik long Sabat dei, i gat ol man we oli stap ridim Loa blong Moses insaed long ol haos blong prea blong ol laen blong Isrel.”—Ol Wok 15:21.

?Wanwan man long faswan handred yia oli gat skrol blong Tok blong God we i blong olgeta wan, no oli mas go ridim nomo long haos prea? Taem disaepol Filip i kam mitim wan haeman blong Kwin blong Itiopia we i sidaon long kat we hos i pulum long rod blong Gasa, haeman ya “i stap ridim buk blong Profet Aesea.” (Ol Wok 8:26-30) Aposol Pol i askem long Timoti blong i tekem ol buk, no skrol, blong hem i kam, speseli “olgeta we oli wokem long skin blong nani.” (2 Timoti 4:13) Pol i no talem se ol buk ya oli blong wanem, be ating i sua se oli ol hanraet blong Hibru Haf blong Baebol.

Wan profesa we i savegud ol olfala Semitik lanwis, nem blong hem Alan Millard, i raetem se long Isrel bifo, ol man we oli gat ol skrol blong Tok blong God “hemia wan spesel grup blong man nomo long Palestaen wetem olgeta we oli talem se oli skul gud, mo ol Farisi mo ol tija blong loa olsem Nikodimas.” Risen from wanem i olsem, hemia from we ol skrol ya praes blong olgeta i antap tumas. Millard i talem se “praes blong wan kopi blong buk blong Aesea hem i sikis kasem ten denarias,” mo hem i talem se fulwan Hibru haf blong Baebol “i gat 15 kasem 20 skrol” long hem, hemia i min se praes blong hem i olsem pei blong wan man we i wok blong sikis manis.

Baebol i no talem sipos Jisas mo ol disaepol blong hem oli bin gat prapa Baebol blong olgeta. Nating se i olsem, Jisas i save gud ol vas blong Baebol, mo hem i naf gud blong talem ol vas ya baehat. (Matiu 4:4, 7, 10; 19:4, 5) ?Sipos Jisas i no gat wan Baebol be hem i save gud ol vas blong hem, olsem wanem long yumi? Ating hemia wan gudfala eksampol long yumi tede we i isi nomo long yumi blong kasem wan Baebol, se i gud yumi tu yumi traem save gud mo ridim Baebol.