Wokem Ol Fasin We Oli Save Halpem Yu Blong Pulum Man i Kam Disaepol
Wokem Ol Fasin We Oli Save Halpem Yu Blong Pulum Man i Kam Disaepol
“Go long ol man long olgeta ples long wol, blong pulum olgeta oli kam man blong mi.”—MATIU 28:19.
1. ?Wanem gudhan mo gudfala fasin we sam man blong God bifo oli nidim blong lanem no wokem?
SAMTAEM ol man blong Jeova oli mas lanem gudhan blong wok mo ol gudfala fasin we oli save halpem olgeta blong mekem wok blong Jeova. Tingbaot Ebraham mo Sera taem Jeova i talem long tufala blong tufala i lego naesfala taon blong Uru, we i gat fulap samting long hem. Tufala i mas wokem mo lanem sam fasin we bambae i mekem se tufala i naf blong laef long ol haos tapolen nomo. (Hibrus 11:8, 9, 15) Tingbaot bigfala wok blong Josua, taem hem i mas lidim ol man Isrel oli go long Promes Lan. Hem i nidim fasin no fraet, hem i nidim blong trastem Jeova, mo i mas gat gud save tu long Loa blong Jeova. (Josua 1:7-9) Mo tingbaot Bejalehel mo Oholiab we tufala i gat gudhan finis blong wok. Taem oli jusum tufala blong mekem wok long haos blong God, i sua se spirit blong God i halpem tufala ya blong oli kam moa gud yet long gudhan we oli gat, nao oli naf blong joen mo lidim wok blong bildim haos blong God.—Eksodas 31:1-11.
2. ?Wanem ol kwestin we bambae yumi tokbaot long saed blong wok ya blong pulum man i kam disaepol?
2 Sam handred yia biaen, Jisas Kraes i givim oda ya long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) I no gat wan taem bifo we ol man oli bin gat janis blong mekem wan bigfala wok olsem. ?Blong mekem wok ya blong pulum man i kam disaepol, yumi nidim wanem fasin? ?Mo olsem wanem blong wokem ol fasin ya?
Soemaot Bigfala Lav Long God
3. ?Wok ya blong pulum man i kam disaepol, i givim janis long yumi blong mekem wanem?
3 Blong mekem wok ya blong go toktok wetem ol man mo traem pulum olgeta blong wosipim trufala God, yumi mas gat bigfala lav long Jeova. Ol man Isrel oli pruvum lav we oli gat long God taem oli obei long ol loa blong hem wetem fulhat blong olgeta, taem oli givim ol gudfala sakrefaes i go long hem, mo taem oli singsing blong presem hem. (Dutronome 10:12, 13; 30:19, 20; Ol Sam 21:13; 96:1, 2; 138:5) Yumi tede tu, we yumi gat wok blong pulum man i kam disaepol, yumi soemaot se yumi lavem Jeova taem yumi obei long ol loa blong Hem, be i no hemia nomo. Yumi soemaot lav ya tu, taem yumi tokbaot Jeova mo ol plan blong hem long ol narafala man. Taem yumi toktok, ol man oli mas luksave se yumi bilif strong long samting we yumi talem. Yumi mas jusum ol tok we oli stret, blong serem filing blong yumi long saed blong gudfala laef we God i wantem givim long yumi long fiuja.—1 Tesalonaeka 1:5; 1 Pita 3:15.
4. ?From wanem Jisas i glad blong tijim ol man long saed blong Jeova?
4 Jisas i gat bigfala lav long Jeova, taswe hem i glad bigwan blong toktok long ol man long saed blong ol stamba tingting blong God, Kingdom, mo trufala wosip. (Luk 8:1; Jon 4:23, 24, 31) Yes, Jisas i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Man blong raetem Sam i raetem tok ya we Jisas nao i talem, i se: “God blong mi. Mi ya, mi kam. Ol tok blong yu blong tijim mi oli stap long buk blong Loa blong yu. Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi. Hae God [Jeova]. Long fes blong olgeta man blong yu, mi mi talemaot gud nius ya we yu yu sevem mifala. Mo yu yu save we oltaem nomo, bambae mi stap talemaot samting ya, we neva bambae mi spel.”—Ol Sam 40:8, 9; Hibrus 10:7-10.
5, 6. ?Wanem impoten fasin ya we yumi nidim blong pulum man i kam disaepol?
5 Olgeta we oli lanem trutok blong Baebol i no longtaem, oli lavem God tumas, mo oli tokbaot Jeova mo Kingdom wetem strong tingting, taswe samtaem ol tok blong olgeta i gat paoa blong pulum narafala blong wantem faenemaot wanem we i stap insaed long Baebol. (Jon 1:41) Lav we yumi gat long God, hemia stamba samting we i mas pusum yumi blong wantem pulum man i kam disaepol. I gud yumi gohed oltaem blong ridim mo tingting dip long Tok blong God, blong mekem we lav ya i no lus.—1 Timoti 4:6, 15; Revelesen 2:4.
6 I klia se lav we Jisas Kraes i gat long Jeova i halpem hem blong kam wan tija we i wok strong. Be i no hemia nomo we i mekem se hem i karem gudfala frut long wok blong talemaot Kingdom. ?Ale, wanem wan narafala samting we i mekem se Jisas i nafgud long wok blong pulum man i kam disaepol?
Soem Se Yu Kea Long Man
7, 8. ?Wanem tingting blong Jisas long saed blong ol man?
7 Jisas i kea long ol man mo hem i soem se hem i rili intres long olgeta. Bifo we Jisas i kam long wol, hem i olsem “nambawan man blong wok” blong God long heven, mo hem i intres tumas long ol samting we i stap gohed long laef blong ol man long wol. (Ol Proveb 8:30, 31, NW) Taem Jisas i wan man long wol ya, hem i sore long ol man, hem i mekem i gud long olgeta we oli kam long hem. (Matiu 11:28-30) Jisas i soemaot lav mo sore olsem we Jeova hem wan i gat lav mo sore. Ol fasin ya blong Jisas oli pulum ol man i kam blong wosipim trufala God. Olkaen man nomo oli lesin long Jisas from we hem i soem se hem i kea long olgeta mo i tingbaot ol samting we oli stap kasem long laef blong olgeta.— Luk 7:36-50; 18:15-17; 19:1-10.
8 Taem wan man i askem long Jisas se hem i mas mekem wanem blong kasem laef we i no save finis, “Jisas i lukluk stret long man ya, mo i lavem hem tumas.” (Mak 10:17-21) Baebol i tokbaot filing we Jisas i gat long samfala we hem i tijim olgeta long taon ya Betani, i se: “Mata mo sista ya blong hem mo Lasaros, Jisas i lavem trifala tumas.” (Jon 11:1, 5) Jisas i kea bigwan long ol man taswe nating se samtaem hem i taed, hem i rere blong lego spel blong hem blong i save tijim ol man. (Mak 6:30-34) Fasin blong Jisas we hem i lavem mo i kea bigwan long ol man, i mekem se hem i gat gudhan bitim eni narafala man, blong pulum ol man oli kam long trufala wosip.
9. ?Pol i gat wanem fasin taem hem i mekem wok blong pulum man i kam disaepol?
9 Aposol Pol tu i rili kea long ol man we hem i prij long olgeta. Hem i raet i go long olgeta we oli kam Kristin long Tesalonaeka i se: “Mifala i no tingbaot blong talemaot gud nius ya nomo long yufala. Mifala i rere tu blong lego laef blong mifala from we mifala i lavem yufala, mo mifala i wantem tumas blong givhan long yufala.” From ol traehad ya blong Pol, sam man long Tesalonaeka oli ‘lego ol narafala god blong kam biaen long God ya we i tru mo i laef.’ (1 Tesalonaeka 1:9; 2:8) Sipos yumi rili kea long ol man olsem we Jisas mo Pol tufala i mekem, bambae yumi save glad tumas blong luk we gud nius i kasem hat blong olgeta we oli “stret blong kasem laef blong olwe.”—Ol Wok 13:48, NW.
Yumi Mas Rere Blong Lego Samting We Yumi Nomo i Wantem
10, 11. ?Taem yumi mekem wok blong pulum man i kam disaepol, from wanem yumi mas rere blong lego samting we yumi nomo i wantem?
10 Man we i naf blong pulum narafala i kam disaepol hem i man we i rere blong lego samting we hem nomo i wantem. Ol man olsem, oli no tingbaot fasin blong winim plante mane olsem se hemia i moa impoten. Nogat. Jisas i talem long ol disaepol blong hem se: “!Man! Bambae i strong tumas long ol rijman blong oli go insaed long niufala wol ya we God i king long hem.” Ol disaepol oli sapraes blong harem samting ya, be Jisas i gohed i se: “Ol pikinini blong mi. I strong tumas blong man i kam we God i King blong hem. I strong blong kamel i gotru long ae blong nidel, be i strong moa blong rijman i kam we God i King blong hem.” (Mak 10:23-25) Jisas i givim advaes long ol man blong hem se sipos oli wantem putum tingting blong olgeta i stap fulwan long wok ya blong pulum man i kam disaepol, oli mas gat wan laef we i no fasfas tumas wetem plante samting. (Matiu 6:22-24, 33) ?From wanem fasin ya we yumi rere blong lego samting we yumi nomo i wantem, i save halpem yumi blong pulum man i kam disaepol?
11 Man i mas wokhad blong tijim narafala long evri samting we Jisas i talem. Wan Kristin we i wantem pulum man i kam disaepol, hem i mas traem bes blong hem blong mekem Baebol stadi evri wik wetem man we i intres. Sam pablisa we oli wantem gat moa taem blong go faenem ol gudfala man, oli lego fultaem wok blong olgeta, oli faenem wok we i haftaem nomo. Plante taosen Kristin oli lanem wan narafala lanwis from we oli wantem kasem ol man blong narafala kantri we oli kam stap long ples blong olgeta. Sam narafala pablisa oli lego hom blong olgeta mo oli go stap long narafala ples no kantri blong spenem moa taem long wok blong prij. (Matiu 9:37, 38) Blong tekem ol desisen olsem, yumi mas rere blong lego samting we yumi laekem. Be i gat sam narafala samting moa yet we yumi nidim, blong karem frut long wok blong pulum man i kam disaepol.
Gat Longfala Tingting Be No Westem Taem
12, 13. ?From wanem longfala tingting i impoten taem yumi wantem pulum man i kam disaepol?
12 Longfala tingting i wan narafala gudfala fasin we i save halpem yumi long wok ya blong pulum man i kam disaepol. Toktok we yumi talemaot long ol man i wan woning we i mas pulum olgeta blong tekem desisen kwiktaem, be wok blong pulum man i kam disaepol i wan wok we, plante taem, hem i tektaem mo yumi mas gat longfala tingting. (1 Korin 7:29) Jisas i soem longfala tingting long brata blong hem Jemes. Nating se Jemes ya i savegud wok we Jisas i mekem blong prij, wan samting i holembak hem blong i no kam wan disaepol. (Jon 7:5) Be smoltaem afta we Jisas i ded, mo bifo long lafet blong Pentekos long yia 33 K.T., i luk olsem se Jemes i kam wan disaepol from we Baebol i stori se hem i stap prea wetem mama blong hem, ol brata blong hem, mo ol narafala aposol. (Ol Wok 1:13, 14) Jemes i gohedgud long saed blong spirit, mo biaen hem i holem sam bigfala wok insaed long Kristin kongregesen.—Ol Wok 15:13; 1 Korin 15:7.
13 Man we i planem kakae long garen, hem i save se ol samting we hem i planem oli no save gru wantaem nomo, oli gru sloslo. Long sem fasin, ol Kristin tu oli save se i tektaem blong man i kam wan disaepol—man ya i mas kasem save long Tok blong God, i mas lavem Jeova, mo i mas lanem blong gat tingting olsem Kraes. Taswe yumi mas gat longfala tingting. Jemes i raetem se: “Ol brata mo sista. Yufala i mas mekem tingting blong yufala i longfala, blong wet gogo Masta blong yumi i kambak bakegen. Yufala i traem tingbaot fasin blong wokem garen. Yufala i save mekem tingting blong yufala i longfala blong wet, gogo garen blong yufala i karem kakae. Yufala i save wet long san, blong yufala i go bonem garen, mo biaen, yufala i planem. Mo yufala i save wet longtaem bakegen blong go tekem kakae long hem. Nao long sem fasin, yufala i mas mekem tingting blong yufala i longfala, mo yufala i mas mekem tingting blong yufala i strong tu, from we dei ya blong Masta blong yumi bambae i kamtru i no longtaem.” (Jemes 5:7, 8) Jemes i pulum ol Kristin brata sista blong hem blong gat ‘longfala tingting from we dei blong Masta bambae i kamtru i no longtaem.’ Sipos i gat sam samting we ol disaepol oli no kasem save long hem, Jisas i tekem taem blong eksplenem klia long olgeta no i yusum sam pijatok. (Matiu 13:10-23; Luk 19:11; 21:7; Ol Wok 1:6-8) Naoia we Masta Jisas i stap finis, yumi mas gat longfala tingting tu wetem ol man we yumi wantem pulum olgeta oli kam disaepol. Long taem blong yumi, ol man oli nidim we yumi tijim olgeta wetem longfala tingting blong oli kam biaen long Jisas.—Jon 14:9.
14. ?Nating se yumi gat longfala tingting wetem ol man we yumi wantem pulum oli kam disaepol, olsem wanem yumi save yusum taem blong yumi long waes fasin?
14 Nating se yumi gat longfala tingting, tok blong God i no karem frut long laef blong bighaf blong ol man we yumi statem Baebol stadi wetem olgeta. (Matiu 13:18-23) I stret we yumi givhan long olgeta ya gogo kasem mak we yumi naf blong mekem. Be afta long hemia, i waes blong no moa spenem tumas taem long ol man olsem mo traem faenem narafala man we i rili tinghae long trutok blong Baebol. (Prija 3:1, 6) I tru, olgeta we oli tinghae long trutok blong Baebol tu maet oli nidim taem blong jenisim ol tingting mo fasin blong olgeta, mo lanem blong putum God fasples long laef blong olgeta. Taswe yumi mas gat longfala tingting, olsem we Jisas tu i gat longfala tingting wetem ol disaepol we oli tektaem blong wokem fasin we i stret.—Mak 9:33-37; 10:35-45.
Lanem Fasin Blong Tijgud
15, 16. ?Taem yumi stap tijim man blong i kam disaepol, from wanem i impoten blong tij long fasin we i isi blong kasem save mo i klia gud?
15 Yes, blong karem frut long wok blong pulum man i kam disaepol, yumi nidim blong lavem God, yumi mas kea long ol man, yumi mas rere blong lego samting we yumi wantem, mo yumi mas gat longfala tingting. Be i nidim tu blong yumi lanem blong tijgud. Fasin ya i impoten from we hem i save halpem yumi blong eksplenem samting long fasin we i klia, mo i no fasfas tumas blong man i kasem save. Tingbaot fasin blong Bigfala Tija ya Jisas Kraes. Plante long ol tijing blong hem oli gat paoa long tingting blong ol man from we oli isi nomo blong kasem save long olgeta. Ating yu yu save sam long ol toktok ya blong Jisas: “Hivimap ol gudgudfala samting blong yufala long heven.” “I nogud yu givim ol samting we i tabu, i go long ol dog.” “Ol gudfala wok blong ol man we oli stap folem waes blong God, oli stap soemaot we waes ya i tru.” “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Matiu 6:20; 7:6; 11:19; 22:21) Hemia i no min se Jisas i talem ol sotfala toktok nomo oltaem. Taem i nidim, hem i givim moa save long man mo i eksplenem samting i klia moa. ?Olsem wanem yu yu save folem fasin blong Jisas blong tij?
16 Blong tij long fasin we i isi blong kasem save mo i kliagud, yumi mas rere gud. Wan pablisa we i no rere gud, hem i save toktok tumas. Maet hem i wantem talem evri samting we hem i save long saed blong wan tijing, be from we hem i toktok tumas, ol impoten poen oli no klia long tingting blong studen. Defren olgeta, wan pablisa we i rere gud, hem i tingbaot nid blong studen, i tingting dip long tijing we bambae oli tokbaot, mo i givim save we i stret long wanem we studen i nidim. (Ol Proveb 15:28; 1 Korin 2:1, 2) Pablisa ya i tingbaot hamas save we studen i gat finis mo wanem ol poen we hem i nidim blong mekem oli klia long tingting blong studen long taem blong stadi. Maet pablisa i save plante poen long saed blong wan tijing, be blong mekem stadi i klia long tingting blong studen, pablisa i mas tingbaot sipos ol smosmol poen ya oli rili impoten no nogat.
17. ?Olsem wanem yumi save halpem ol man blong oli yusum tingting blong olgeta blong kasem save long Baebol?
17 Jisas i halpem ol man blong oli yusum tingting blong olgeta tu blong faenem trutok, bitim we hem i talem nomo evri save. Wan taem hem i askem wan aposol blong hem se: “Saemon, yu traem tingbaot. ?Ol king blong wol ya oli stap tekem takis long hu? ?Oli stap kasem mane blong olgeta long hu? ?Long ol man blong olgeta, no long ol strenja we oli stap long ples blong olgeta?” (Matiu 17:25) Taem yumi mekem Baebol stadi, maet yumi laekem tumas blong eksplenem ol save we oli stap insaed long Baebol, be yumi mas bos long maot blong yumi mo letem studen tu i talemaot tingting blong hem no letem hem i eksplenem save long prapa toktok blong hem. Yumi mas lukaot tu blong no sutum man wetem tumas kwestin. I moagud blong tingtinggud bifo yumi tok, yusum ol pijatok we oli stret, mo ol kwestin we yumi tingtinggud long hem fastaem. Ale bambae yumi save halpem studen blong i kasem save ol poen long Baebol we oli stap long ol buk blong yumi.
18. ?Blong ‘tijimgud ol man’ yumi mas mekem wanem?
18 Baebol i tokbaot fasin blong ‘tijimgud ol man.’ (2 Timoti 4:2; Taetas 1:9) I tru se yumi wantem man i rimemba gud ol trutok we hem i lanem. Be i no naf blong tijim man blong rimemba ol poen nomo. Yumi mas traem halpem wan Baebol stadi blong hem i kasem save olsem wanem trutok i defren long tok we i giaman, olsem wanem samting we i gud i defren long samting we i nogud, mo olsem wanem waes i defren long krangke fasin. Taem yumi stap mekem olsem, mo yumi traem pulum man blong lavem Jeova long fulhat blong hem, maet bambae hem i luksave from wanem hem i mas obei long Jeova.
Joen Fulwan Long Wok Blong Pulum Man i Kam Disaepol
19. ?Olsem wanem olgeta Kristin oli joen blong mekem disaepol?
19 Kristin kongregesen i wan ogenaesesen we wok blong hem i blong pulum ol man oli kam disaepol. Taem wan man i kam wan disaepol, Witnes blong Jeova we i bin faenem hem mo halpem hem blong lanem ol tijing blong Baebol, hem i glad tumas. Be i no hem nomo we i glad. Tingbaot sipos wan pikinini i lus long bus, ale ol man oli hivap wanples blong go lukaotem hem. Nating se ol man ya oli plante, bambae i gat wan nomo long olgeta we i faenem pikinini ya. Be taem hem i karem pikinini ya i kambak long papa mama blong hem, evri man we oli bin joen blong traem faenem pikinini ya, olgeta evriwan bambae oli glad. (Luk 15:6, 7) Hemia i sem mak long wok blong pulum man i kam disaepol. Olgeta Kristin oli joen long wok blong traem faenem hu man i save kam wan disaepol blong Jisas. Mo taem wan niuwan i stat blong kam long ol miting long Haos Kingdom, evri Kristin we oli stap, oli givhan long hem blong laekem trufala wosip. (1 Korin 14:24, 25) Taswe, evri Kristin oli save glad taem oli luk we plante taosen man oli kam disaepol evri yia.
20. ?Yu yu mas mekem wanem sipos yu wantem tijim narafala long ol trutok blong Baebol?
20 Plante Kristin we oli holemstrong long wok blong Jeova, oli wantem tumas blong tijim man long saed blong Jeova mo trufala wosip. Be nating se oli traehad olsem wanem, maet oli no bin faenem wan man yet we oli save tijim. Sipos yu yu wan olsem, i gud yu gohed blong mekem lav we yu gat long Jeova i gru, i gud yu gohed blong kea long man, wokem fasin we yu rere blong lego samting we yu nomo yu wantem, wokem longfala tingting, mo lukaot rod oltaem blong kamgud moa long fasin blong yu blong tij. Mo antap long olgeta samting ya, i gud yu prea long Jeova mo yu talem long hem se yu wantem tumas blong tijim trutok long narafala man. (Prija 11:1, NW) Mo tu, yu save harem gud taem yu tingbaot se evri samting we yu mekem long wok blong Jeova i givhan long wok blong pulum man i kam disaepol mo i blong leftemap nem blong God.
?Yu Yu Save Eksplenem?
• ?From wanem wok blong pulum man i kam disaepol i traem lav blong yumi long God?
• ?Wanem ol fasin we yumi nidim, blong mekem wok blong pulum man i kam disaepol?
• ?Olsem wanem blong ‘tijimgud ol man’?
[Kwestin]
[Tok blong pija long pej 17]
Taem yumi pulum man i kam disaepol, yumi soemaot se yumi gat bigfala lav long God
[Tok blong pija long pej 19]
?From wanem yumi mas kea long man taem yumi mekem wok blong pulum man i kam disaepol?
[Tok blong pija long pej 21]
Olgeta brata mo sista oli glad blong luk gudfala frut we i kamaot long wok blong pulum man i kam disaepol