Tok Blong Jeova i Wan Samting We i Laef

Ol Bigfala Poen Long Buk Blong Malakae

TEMPOL long Jerusalem i stanap bakegen blong bitim 70 yia. Taem ol yia oli stap pas, ol man Jiu oli no moa frengud wetem God. Ol pris tu oli gat kruked fasin. ?Hu bambae i halpem olgeta ya blong oli luksave se oli slak, mo traem halpem olgeta blong oli frengud wetem God bakegen? Jeova i givim wok ya long profet Malakae.

Malakae i raetem laswan buk blong Hibru haf blong Baebol long wan fasin we i tok stret. Buk ya i fulap long ol profet tok we i kamaot long God. Sipos yumi tingtinggud long profet tok blong Malakae, samting ya i save halpem yumi blong rere from “bigfala dei blong Jeova we i mekem ol man oli fraet,” hemia taem rabis fasin blong laef blong wol ya bambae i lus.—Malakae 4:5, NW.

OL PRIS OLI “MEKEM PLANTE MAN OLI GORONG”

(Malakae 1:1–2:17)

Jeova i talemaot filing blong hem long ol man Isrel, i se: “Oltaem mi mi lavem yufala.” Be ol pris oli lukluk rabis long nem blong God. ?Oli mekem samting ya olsem wanem? ‘Taem oli stap tekem ol kakae we i nogud i kam, blong mekem sakrefaes long God long olta blong hem,’ mo taem oli givim wan “anamol . . . we i sik, no wansaed leg blong hem i nogud” olsem sakrefaes i go long God.—Malakae 1:2, 6-8.

Ol pris oli “mekem plante man oli gorong.” Ol man oli ‘stap brekem ol promes ya we olgeta nomo i mekem long olgeta.’ Sam long olgeta oli stap mared long ol hiten woman. Mo samfala oli brekem ‘promes we oli mekem long ol woman blong olgeta.’—Malakae 2:8, 10, 11, 14-16.

Ansa Blong Sam Kwestin Long Saed Blong Baebol:

2:2—?Olsem wanem Jeova i mekem “trabol i kam kasem ol gudgudfala samting” blong ol pris ya we oli no moa folem loa blong Hem? Jeova i mekem olsem taem hem i tanem ol tok we ol pris ya oli talem blong blesem ol man, hem i mekem ol tok ya oli karem trabol nomo i kam.

2:3—?I minim wanem se Jeova bambae i ravem fes blong ol pris long ol “doti blong ol anamol”? Folem Loa, ol pris oli mas tekemaot doti blong ol anamol we oli givim olsem sakrefaes, oli mas sakem afsaed long kamp mo bonem olgeta. (Levitikas 16:27) Tok ya se Jeova i ravem fes blong ol pris long doti blong ol anamol i min se Jeova i sakemaot ol sakrefaes blong olgeta mo se olgeta we oli mekem ol sakrefaes ya oli rabis nomo long lukluk blong Jeova.

2:13—?Wota blong ae blong hu i kavremapgud olta blong Jeova? Hemia wota blong ae blong ol waef we oli kam long tempol blong prea long Jeova mo talemaot long Hem evri samting we i stap long hat blong olgeta. ?Wanem i mekem se oli harem nogud olsemia? Hemia from we ol hasban blong olgeta we oli man Jiu oli stap askem divos long olgeta from sam samting we i  blong nating nomo, mo oli lego olgeta blong go mared long ol yangfala hiten woman.

Ol Lesen Blong Yumi:

1:10, NW. Jeova i no glad nating long ol sakrefaes we ol pris oli mekem from we oli griri tumas. Oli stap askem man blong pem olgeta taem oli mekem wan wok long tempol, nating we wok ya i smol nomo olsem wok blong satem doa mo laetem faea blong olta. I impoten tumas se tingting we i pusum yumi long wosip blong yumi mo Kristin wok blong prij, i stanap long trufala lav we yumi gat long God mo ol man. Neva, yumi mas ting se yumi mekem ol wok ya blong winim mane.—Matiu 22:37-39; 2 Korin 11:7.

1:14; 2:17. Jeova i no glad nating long fasin ya blong gat tu fes.

2:7-9. Olgeta we oli gat wok blong tij insaed long kongregesen oli mas meksua se wanem we oli stap tijim i laenap wetem Tabu Tok blong God, mo ol buk we oli stanap long Baebol we “man blong wok we i gat hed” i givim.—Luk 12:42; Jemes 3:11.

2:10, 11. Jeova i wantem we ol man blong hem oli tinghae long advaes ya blong mared long “man blong Masta” nomo.—1 Korin 7:39.

2:15, 16. Ol trufala man blong God oli mas gat bigfala respek long promes blong mared we oli mekem long ol waef blong olgeta.

‘TRU MASTA BAMBAE I KAM LONG HAOS BLONG HEM’

(Malakae 3:1–4:6)

“Wantaem nomo, tru Masta [Jeova God] . . . bambae i kam long haos blong Hem” wetem “man ya blong karem tok blong kontrak [Jisas Kraes].” God bambae i “kamtru long ol man blong [hem] blong jajem olgeta” mo bambae hem i hareap blong witnes agens long olgeta man we oli mekem ol rabis fasin. Mo tu, oli “stat raetem tok long buk blong rimemba,” we i blong tingbaot olgeta we oli fraetgud long Jeova.—Malakae 3:1, 3, 5, 16, NW.

Dei ya we i “hot olsem faea” (NW) bambae i kam mo i bonem olgeta rabis man. Bifo we dei ya i kamtru, wan profet i mas kam fastaem blong “mekem we ol papa wetem ol pikinini blong olgeta we oli stap seraot, oli joen gud bakegen.”—Malakae 4:1, 5, 6.

Ansa Blong Sam Kwestin Long Saed Blong Baebol:

3:1-3, NW—?Wetaem “tru Masta” mo “man ya blong karem tok blong kontrak” tufala i  kam long tempol, mo hu i kam fastaem long tufala? Long Nisan 10, yia 33 K.T., Jeova i yusum wan man we i wok long nem blong hem blong go long tempol blong Hem mo klinim tempol ya. Samting ya i hapen taem Jisas i sakemaot ol man we oli stap mekem maket long haos tempol. (Mak 11:15) Hemia tri mo haf yia afta we Jisas i stap olsem King we God i makemaot finis. Long sem fasin, tri mo haf yia afta we Jisas i kam King long heven, Jisas i go wetem Jeova long tempol long saed blong spirit mo i faenem se i gat nid blong mekem ol man blong God oli kam klin. Long faswan handred yia, Jeova i sanem Jon Baptaes i go rerem ol man Jiu blong taem we Jisas Kraes bambae i kam. Long taem blong yumi, Jeova i sanem wan man i kam fastaem blong openem rod blong Hem i kam long tempol blong hem long saed blong spirit. Long ol yia bifo 1880, wan grup blong ol Baebol studen (hemia nem blong ol Witnes blong Jeova bifo), oli stat blong joen long wok ya blong tijim trutok long ol man we oli rili wantem save trutok.

3:10—?Fasin ya blong givim “olgeta taet,” no ten hip blong sam samting, i minim se yumi givim olgeta samting blong yumi i go long Jeova? Taem Jisas i ded, Loa blong Moses i finis. Taswe tede, fasin blong givim taet i no wan loa we Baebol i talem se yumi mas folem long saed blong wosip. Be, fasin blong givim taet i gat wan narafala mining tu. (Efesas 2:15) Hem i no minim se yumi givim olgeta samting we yumi gat i go long Jeova. Long Isrel bifo, oli givim ten hip blong ol samting blong olgeta evri yia. Be long saed blong yumi, yumi givim olgeta laef blong yumi i go long Jeova wan taem nomo, hemia taem yumi givim laef blong yumi i go long hem mo yumi soemaot samting ya taem yumi baptaes long wota. Stat long taem ya, olgeta samting we yumi gat oli blong Jeova. Nating se i olsem, Jeova i letem yumi jusum sam samting we yumi gat—we i olsem taet—blong yusum long wok blong hem. Hemia ol samting we yumi naf blong mekem, mo we hat blong yumi i pusum yumi blong yusum. Taem blong yumi, paoa, mo olting blong yumi we yumi yusum blong sapotem wok blong talemaot Kingdom mo tijim man, oli olsem sakrefaes we yumi mekem i go long Jeova. Mo sam narafala rod bakegen hemia taem yumi joen long olgeta Kristin miting, yumi visitim ol brata mo sista we oli sik no oli olfala, mo yumi yusum mane blong yumi blong sapotem trufala wosip.

4:3—?Olsem wanem ol man blong Jeova bambae oli ‘purumpurumbut long ol man nogud’? Tok ya i no minim se ol man blong Jeova nao bambae oli ‘purumpurumbut long ol man nogud’ no bambae oli joen wetem Jeova blong mekem jajmen blong hem i kasem ol man ya. Nogat. Tok ya i minim nomo se ol man blong Jeova we oli stap long wol ya bambae oli joen long lafet blong glad from we Jeova i win taem hem i spolem rabis wol ya blong Setan.—Ol Sam 145:20; Revelesen 20:1-3.

4:4—?From wanem yumi ‘no mas fogetem loa blong Moses’? Baebol i no talem se ol Kristin oli mas folem Loa ya, from we Loa ya i olsem wan “sado nomo blong ol gudgudfala samting, we bambae i kamtru.” (Hibrus 10:1) Be, taem yumi lesin long ol tok blong Loa ya, samting ya i save halpem yumi blong luk olsem wanem ol samting we Loa ya i bin talem oli stap kamtru. (Luk 24:44, 45) Mo tu, i gat sam samting long Loa ya we “oli olsem pija blong ol samting ya we oli stap long heven.” Sipos yumi wantem kasem save long ol Kristin tijing mo fasin, yumi mas stadi long ol samting ya we oli stap long Loa ya.—Hibrus 9:23.

4:5, 6—?“Profet Elaeja” i pija blong hu? Vas ya i talem se “Elaeja” ya bambae i mekem wok blong rerem hat blong ol man, tekem olgeta oli kambak long God. Long faswan handred yia, Jisas Kraes i talem se Jon Baptaes i olsem “Elaeja.” (Matiu 11:12-14; Mak 9:11-13) Sem samting tede, Jeova i sanem wan man olsem “Elaeja” i kam bifo we ‘bigfala dei blong Jeova bambae i kamtru we olgeta man bambae oli fraet long hem.’ “Elaeja” ya hemia “slef ya we i stret mo waes.” (Matiu 24:45, NW) Grup ya blong ol Kristin we tabu spirit i makemaot olgeta, i traehad blong mekem wok ya blong halpem ol man blong oli kam fren blong God bakegen.

 Ol Lesen Blong Yumi:

3:10. Sipos yumi no givim bes blong yumi long wok blong Jeova, samting ya i save blokem yumi blong yumi no kasem ol blesing blong Jeova.

3:14, 15. From we ol pris oli no soemaot gudfala eksampol, ol man Isrel oli stat blong luk wok blong God olsem wan wok we i no impoten. Olgeta we oli gat wok insaed long kongregesen oli mas soem gudfala eksampol.—1 Pita 5:1-3.

3:16. Jeova i no save fogetem olgeta we oli fraetgud mo we oli stap tru long hem. Bambae hem i tingbaot olgeta oltaem mo bambae hem i sevem olgeta long taem we hem i finisim rabis wol ya blong Setan. From samting ya, yumi neva mas kam slak long fasin blong holemstrong long Jeova.—Job 27:5.

4:1, NW. Long dei blong jajmen blong Jeova, “branj” mo “rus” tugeta bambae tufala i lus. Hemia i minim se ol pikinini oli kasem sem jajmen olsem ol papa mo mama blong olgeta. Samting ya i soemaot se ol papa mo mama oli gat wan bigfala wok we oli mas mekem blong givhan long ol pikinini blong olgeta. Ol Kristin papa mo mama oli mas wokhad blong mekem se God i glad long olgeta mo blong oli gat gudnem wetem hem.—1 Korin 7:14.

“Fraetgud Long Trufala God”

?Hu bambae i sef long ‘bigfala Dei blong Jeova, we olgeta man bambae oli fraet long hem’? (Malakae 4:5) Jeova i talem se: “Yufala we i fraetgud long nem blong mi, bambae san blong stret fasin i saenaot i go long yufala, wetem meresin long wing blong hem. Nao bambae yufala i go wokbaot long graon ya olsem ol yangfala buluk we oli fatfatgud.”—Malakae 4:2, NW.

“San blong stret fasin” hemia Jisas Kraes we i saen long ol man we oli fraet gud long nem blong God, mo we God i glad long olgeta. (Jon 8:12) San ya i gat wan “meresin long wing blong hem” we i minim se Jisas i hilim olgeta ya long saed blong spirit naoia, mo long fiuja tu, hemia long niufala wol, taem bambae hem i hilim olgeta fulwan long saed blong bodi, tingting mo filing. (Revelesen 22:1, 2) Olgeta ya oli glad we oli glad olsem “ol yangfala buluk we oli fatfatgud.” Taem yumi tingbaot ol blesing ya we bambae oli kamtru, i gud we yumi tingting dip long tok ya blong King Solomon se: “Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.”—Prija 12:13, NW.

[Tok blong pija long pej 28]

Profet Malakae, wan man we i wok strong long wok blong God

[Tok blong pija long pej 31]

Wanem we yumi stap tijim i mas laenap wetem Baebol

[Tok blong pija long pej 31]

Ol man blong Jeova oli tinghevi long promes blong mared blong olgeta