Ol Tul Blong Faet We Man i Stanemap Agensem Yu Oli No Save Win
Ol Tul Blong Faet We Man i Stanemap Agensem Yu Oli No Save Win
“Eni tul blong faet we bambae ol man oli stanemap agensem yu bambae oli no save win.”—Aesea 54:17, NW.
1, 2. ?Olsem wanem stori blong ol Witnes blong Jeova long Albania i soemaot se ol tok blong Aesea 54:17 oli tru?
SAM yia bifo, long wan smol kantri blong saot-is Yurop, i gat wan grup blong ol Kristin we oli no fraet nating. Gavman blong kantri ya i Komunis mo i sakemaot bilif long God, mo hem i traem evri rod blong spolem smol grup ya. Be, nating se oli kilim ol Kristin ya, oli putum olgeta long ol kamp blong oli wok strong, no oli raetem mo talemaot plante giaman stori long saed blong olgeta long niuspepa mo radio, oli no naf blong stopem olgeta. ?Hu ya ol Kristin ya? Hemia ol Witnes blong Jeova long Albania, we i hadwok long olgeta blong mekem miting wanples mo blong prij tu. Be oli gohed nomo blong mekem miting mo blong prij. Fasin ya i leftemap trufala Kristin skul mo i givim ona long nem blong Jeova. Las yia, oli dediketem niufala branj ofis blong olgeta long kantri ya. Long taem ya wan brata we i Witnes longtaem finis, i talem se: “!Setan i save traem yumi hamas, be hem i stap lus nomo mo Jeova i stap win!”
2 Hemia wan pruf we i soemaot se promes we God i mekem long ol man blong hem, long Aesea 54:17 (NW), i tru tumas se: “Eni tul blong faet we bambae ol man oli stanemap agensem yu bambae oli no save win, mo ol tok we ol man bambae oli talemaot agensem yu long jajmen bambae yu winim olgeta.” Histri i soemaot se i no gat wan samting we wol blong Setan i save mekem we bambae i naf blong stopem wosip we ol trufala man blong Jeova God oli stap givim i go long hem.
Setan i Wokem Ol Tul Be Hem i No Save Win
3, 4. (a) ?Wanem ol tul we Setan i yusum? (b) ?Olsem wanem ol tul ya blong Setan oli no save win?
3 Ol gavman oli putum tabu long wok blong ol man blong Jeova, ol hip man oli kam blong kilim mo ronem olgeta, ol polis oli sakem samfala i go long kalabus, mo ol man oli “mekem ol loa” blong blokem olgeta. Hemia nao sam tul we Setan i yusum agensem ol man blong Jeova. (Ol Sam 94:20) Yes, naoia we yu yu stap ridim Wajtaoa ya, i gat sam Witnes blong Jeova samples long wol we Setan i stap ‘traem olgeta’ bigwan blong traem mekem we oli lego God.—Revelesen 2:10.
4 I gat wan branj ofis blong ol Witnes blong Jeova we i sanem ripot se long wan yia nomo, i gat 32 defren taem we ol man oli bin kilim sam brata no sista we oli stap long wok blong prij. Antap long hemia, i gat 59 taem we ol polis oli arestem ol Witnes—ol yangfala, ol olfala, ol man mo woman—from we oli stap prij long ol haos wanwan. Sam long olgeta ya, polis i tekem mak blong fingga blong olgeta, foto blong olgeta, mo oli putum olgeta long presin olsem we oli rabis man blong brekem loa. Samfala oli givim kil long ol Witnes ya blong traem mekem oli fraet. Long wan narafala kantri bakegen, naoia i gat 1,100 kes i stap blong ol Witnes blong Jeova we polis i arestem olgeta, i putum faen long olgeta, no i kilim olgeta. Bitim 200 long ol kes ya i hapen long semfala dei nomo, hemia long dei we ol Witnes ya oli kam wanples blong tingbaot ded blong Jisas. Be spirit blong Jeova i mekem we ol man blong hem long ol kantri ya mo long ol narafala kantri tu, oli naf blong stanap strong nating se oli fesem samting we i nogud olgeta. (Sekaraea 4:6) Nomata ol enemi oli kros olsem wanem, bambae oli no save satem maot blong ol man we oli wantem presem Jeova. Yes, yumi trastem se i no gat wan tul nating we i save win blong blokem stamba tingting blong God.
Ol Giaman Tok We Oli Talemaot Agensem Yufala Oli No Save Win
5. ?Wanem giaman toktok i goraon agensem ol man blong Jeova long faswan handred yia?
5 Profet tok blong Aesea i talem se toktok we ol man oli talemaot agensem ol man blong God bambae i no save win. Long faswan handred yia, plante taem ol man oli bin talem ol giaman stori blong pulum ol narafala blong ting se ol Kristin oli rabis man. Hemia wanem we Ol Wok 16:20, 21 i soemaot: “Tufala i stap mekem tumas trabol long ples blong yumi. Tufala i stap talem se yumi mas folem ol narafala fasin, be ol fasin ya oli no stret long loa blong yumi. Yumi sitisen blong Rom, yumi no save mekem olsem.” Long wan narafala taem bakegen, ol lida blong skul oli traem pulum ol haeman blong wan taon blong oli agensem ol man blong Kraes, oli talem se: “Tufala man ya, . . . tufala i stap mekem tumas trabol long olgeta ples . . . tufala ya i stap brekem ol loa blong Sisa, we i stap rulum olgeta kantri.” (Ol Wok 17:6, 7) Ol man oli kolem aposol Pol se ‘wan rabis man we i stamba blong plante trabol,’ mo oli talem se hem i lida blong wan krangke grup blong man we oli stap girap olbaot mo mekem trabol “olbaot long wol.”—Ol Wok 24:2-5.
6, 7. ?Wanem wan rod we ol Kristin oli save winim ol tok we man i sakem agensem olgeta?
6 Taswe, yumi no sapraes we tede tu plante man oli talem ol nogud stori long saed blong ol trufala Kristin, oli spolem gudnem blong olgeta, mo oli mekem plante giaman nius i goraon long saed blong olgeta. ?Olsem wanem yumi winim olgeta tok we man i talemaot agensem yumi?—Aesea 54:17.
7 Plante taem, ol gudfala fasin blong ol Witnes blong Jeova nomo i soemaot klia se ol toktok mo stori ya oli giaman nomo. (1 Pita 2:12) Taem ol Kristin oli folemgud loa, oli gat ol gudfala klin fasin, mo oli soem se oli rili kea long ol man raonabaot long olgeta, oli pruvum se ol tok we man i sakem agensem olgeta oli giaman nomo. Gudfala fasin blong yumi nomo i stap toktok from yumi. Taem ol man oli wajem we yumi gohed strong nomo blong mekem ol gudfala wok, plante taem, samting ya i pulum olgeta blong leftemap Papa blong yumi long heven, mo blong luksave se fasin blong laef blong ol man blong hem i moagud i bitim ol narafala man.—Aesea 60:14; Matiu 5:14-16.
8. (a) ?Samtaem i nidim wanem blong soemaot we bilif blong yumi i laenap wetem Baebol? (b) ?Folem fasin blong Jisas, olsem wanem yumi winim ol nogud stori mo toktok we man i talem agensem yumi?
8 Samtaem ol trufala Kristin oli luksave se gudfala fasin we oli mekem, i no naf blong blokem rong no giaman tok we narafala i talem. Ale, oli toktok blong soemaot olsem wanem bilif blong olgeta i laenap wetem Baebol. Oli mekem olsem taem oli putum trabol blong olgeta i go long gavman no long kot. (Esta 8:3; Ol Wok 22:25-29; 25:10-12) Taem Jisas i stap long wol, wanwan taem hem i tokbaot blong stretem ol man we oli jikim hem, mo hem i pruvum we toktok we oli talem agensem hem i rong. (Matiu 12:34-37; 15:1-11) Olsem Jisas, yumi tekem eni janis we yumi gat, blong eksplenem wanem samting we yumi bilif long hem wetem fulhat blong yumi. (1 Pita 3:15) Yumi neva mas letem tok jik we man i sakem long yumi long skul, long wok, no long famle, i stopem yumi blong talemaot trutok blong Baebol.—2 Pita 3:3, 4.
Jerusalem—“Wan Hevi Ston”
9. ?Weswan Jerusalem ya we Sekaraea 12:3 i talem se hem i olsem “hevi ston,” mo hu olgeta we oli mekem wok long nem blong Jerusalem ya long wol?
9 Profet tok blong Sekaraea i givim moa save long yumi se from wanem ol neson oli agensem ol trufala Kristin. Makemgud tok ya long Sekaraea 12:3 se: “Taem dei ya i kamtru, bambae mi mekem Jerusalem i kam olsem wan hevi ston we sipos wan kantri i wantem muvum, kantri ya bambae i harem nogud tumas from.” ?Profet tok ya i stap tokbaot weswan Jerusalem? Profet tok ya blong Sekaraea long saed blong Jerusalem hem i long saed blong “Jerusalem ya we i stap long heven,” hemia Kingdom we ol tabu Kristin bambae oli go rul long hem. (Hibrus 12:22) Wan smol haf blong olgeta ya we oli blong go long Kingdom wetem Mesaea Jisas, oli stap yet long wol. Olgeta ya wetem ol fren blong olgeta, hemia “ol narafala sipsip,” oli stap talem long olgeta man se naoia i taem blong jusum blong stap aninit long Kingdom blong God bifo we i let tumas. (Jon 10:16; Revelesen 11:15) ?Ol man long olgeta kantri long wol oli mekem wanem taem oli harem tok ya? ?Mo olsem wanem Jeova i soem se hem i stap wetem ol man blong hem tede? Bambae yumi faenem ansa blong ol kwestin ya taem yumi ridim Sekaraea japta 12. Taem yumi mekem olsem, bambae tingting blong yumi i sua moa se, i no gat wan “tul” nating we i save win agensem ol tabu man blong God mo ol narafala sipsip.
10. (a) ?From wanem ol man oli stap mekem i nogud long ol man blong God? (b) ?Ol man we oli traem karemaot “hevi ston” ya long rod blong olgeta oli kasem wanem?
10 Sekaraea 12:3 i soemaot se ol kantri oli “harem nogud tumas” taem oli traem muvum ston ya. ?Oli harem nogud olsem wanem? God i talem se gud nius blong Kingdom i mas goaot long evri ples. Ol Witnes blong Jeova oli tinghevi long wok ya we i kamaot long God. Be ol man blong olgeta “kantri” oli harem se gud nius ya we i talem se Kingdom nomo hem i hop blong olgeta man, hem i wan “hevi ston.” Oli traem karemaot ston ya we i blokem rod blong olgeta taem oli traem stopem ol man we oli stap talemaot Kingdom. Be, taem oli mekem samting ya, oli stap “harem nogud tumas from,” i olsem we oli kasem kil olbaot from ston ya. Oli no naf blong karemaot ston ya, ale oli stap sem bigwan from, i olsem we ston ya i givim kil long olgeta bakegen. Yes, oli no save satem maot blong ol trufala man blong God we oli tinghae long janis ya we oli gat blong talemaot “gud nius ya we i blong stap oltaem nomo, gogo i no save finis.” Gud nius ya hem i long saed blong Kingdom blong God we Mesaea i rul long hem, mo oli mas talemaot nius ya bifo we rabis fasin blong wol ya i lus. (Revelesen 14:6) Wan gad long wan kalabus long Afrika i luk olsem wanem ol man oli stap mekem i nogud tumas long ol man blong Jeova, nao hem i talem se: ‘Yufala i stap westem taem nomo blong kilim ol man ya. Bambae oli neva save jenisim bilif blong olgeta. Oli stap kam plante moa oltaem.’
11. ?Olsem wanem God i holem promes we hem i mekem long Sekaraea 12:4?
11 Ridim Sekaraea 12:4. Taem ol man oli agensem ol man blong Jeova we oli wok strong blong talemaot nius blong Kingdom, Jeova i mekem promes se bambae hem i blaenem tingting blong olgeta ya mo bambae i mekem we “oli lusum hed.” Mo, tru tumas, Jeova i holem promes blong hem. Long wan kantri we gavman i putum tabu long wok blong ol Witnes, ol man oli no naf nating blong blokem ol Witnes blong oli no moa kasem ol buk long saed blong Baebol. Wan niuspepa i talem se ating ol Witnes blong Jeova oli stap hangem ol buk long ol balun we oli stap sanem i kam insaed long kantri. Yes, Jeova i holem promes blong hem se: “Ol enemi ya blong olgeta, mi bambae mi mekem ol hos blong olgeta oli blaen.” Kros i mekem ol enemi blong Kingdom oli blaen, oli no moa save wanem rod blong tekem. Be ol man blong Jeova tugeta olsem wan grup, oli save se bambae oli neva lus from we Jeova bambae i lukaot long olgeta i mekem we oli stapgud.—2 King 6:15-19.
12. (a) ?Olsem wanem Jisas i statem faea long wol? (b) ?Olsem wanem ol tabu Kristin long wol ya tu oli statem wan faea, mo wanem i kamaot from?
12 Ridim Sekaraea 12:5, 6. “Ol laen blong Juda,” we sam narafala Baebol oli talem se “ol lida blong Juda,” hemia i minim olgeta we oli gat wok blong lukaot long ol man blong God. Jeova i mekem tingting blong olgeta ya i strong, olsem faea we i laet, nao oli wok strong blong lukaot ol wok blong Kingdom long wol ya. Wan taem, Jisas i talem long ol disaepol blong hem se: “Mi mi kam blong putum faea long wol.” (Luk 12:49) Tru, yumi save talem se Jisas i laetem wan faea taem hem i stap long wol. Hem i strong blong prij, mo from samting ya hem i soemaot klia long fes blong ol man se Kingdom blong God i wan impoten samting tumas. Wok ya blong hem i wekemap tingting blong olgeta man long neson ya blong Isrel, olsem we i laetem wan faea long olgeta, nao ol man oli stap raorao mo oli stap seraot. (Matiu 4:17, 25; 10:5-7, 17-20) Tede tu, ol man we oli biaenem Kraes oli mekem wok we i olsem “faea we i kakae bigfala bus, no i olsem faea we i kakae ol wit we kakae blong hem i rere finis.” Long 1917, buk ya The Finished Mystery * i tok strong mo klia agensem fasin blong ol skul we oli talem se oli Kristin be oli gat tu fes. Samting ya i mekem we ol lida blong jos oli kros we oli kros tumas. I no longtaem i pas, i gat Kingdom Nius No. 37, “!Klosap Nao Ol Giaman Skul Oli Lus!”, we yumi seremaot long fulwol. Pepa ya i pulum plante man blong soemaot sipos oli stap sapotem Kingdom blong God no oli stap agensem hem.
Hem i “Sevem Ol Haos Tapolen Blong Juda Fastaem”
13. ?Wanem mining blong tok ya “ol haos tapolen blong Juda,” mo from wanem Jeova i sevem olgeta ya fastaem?
13 Ridim Sekaraea 12:7, 8. Haf blong vas ya we long Baebol long Bislama oli talem “ol soldia blong Juda,” ol hanraet blong bifo oli talem “ol haos tapolen blong Juda.” Long Isrel bifo, ol man oli yusum haos tapolen plante, antap moa ol man blong lukaot long sipsip mo ol man blong wokem garen. From we ol man ya oli laef long ol haos tapolen afsaed long taon, sipos i gat wan ami i kam agensem Jerusalem, olgeta ya nao bambae oli faswan we ol ami ya oli kilim. Taswe tok ya “ol haos tapolen blong Juda” i soemaot se ol tabu Kristin long taem blong yumi, i olsem se oli no stap insaed long ol strong haos be oli stap long open ples nomo, ples we i isi blong man i kasem olgeta. Oli no fraet nating blong mekem ol wok blong sapotem Kingdom blong Mesaea long open ples nomo. Jeova blong ol ami bambae i sevem “ol haos tapolen blong Juda fastaem,” from we olgeta ya nao ol faswan we Setan bambae i wantem kilim.
14. ?Olsem wanem Jeova i lukaotgud long olgeta we oli stap long “ol haos tapolen blong Juda” mo i blokem olgeta blong oli no foldaon?
14 Ol samting we oli hapen long histri oli pruvum se taem ol tabu Kristin we bambae oli go rul long Kingdom, oli stap long ol “haos tapolen” blong olgeta long open ples nomo, Jeova i stap lukaotgud long olgeta. * Jeova i blokem olgeta blong oli no foldaon taem hem i mekem oli “strong,” olsem we hem i givim paoa mo strong tingting long King Deved we i wan strong man blong faet.
15. ?From wanem Jeova i wantem ‘kilim ol man blong ol narafala kantri oli ded evriwan,’ mo wetaem bambae hem i mekem samting ya?
15 Ridim Sekaraea 12:9. ?From wanem Jeova i talem se bambae hem i ‘kilim ol man blong ol narafala kantri oli ded evriwan’? From we ol man ya oli gohed nomo oltaem blong agensem Kingdom blong Mesaea. Oli mas kasem panis from we oli mekem trabol long ol man blong God mo oli spolem olgeta. I no longtaem ol man blong Setan long wol ya bambae oli girap laswan blong faet agensem ol trufala man blong God. Taem oli mekem olsem nao, Baebol i talem se faet ya Amagedon bambae i kasem ful wol. (Revelesen 16:13-16) Long taem ya, Jaj ya we i Hae Olgeta, bambae i girap, i protektem ol man blong wok blong hem mo bambae i soemaot long olgeta neson se nem blong hem i tabu.—Esikel 38:14-18, 22, 23.
16, 17. (a) ?Wanem ya presen we ‘ol man blong Jeova oli kasem’? (b) ?Taem Setan i agensem yumi be yumi stanap strong, samting ya i pruvum wanem?
16 I no gat wan tul blong Setan we i naf blong slakem bilif no kilimdaon strong tingting blong ol man blong God long ful wol. Pis we yumi gat long hat mo tingting blong yumi i kamaot from we yumi save se Jeova i gat paoa blong sevem yumi. Pis ya i olsem wan presen ‘we ol man blong Jeova oli kasem.’ (Aesea 54:17, NW) I no gat wan man we i save blokem yumi blong gat pis long tingting mo blong gat fulap samting long saed blong spirit. (Ol Sam 118:6) Setan bambae i gohed blong pulum ol man blong oli girap agensem yumi mo bambae i gohed blong lukaot rod oltaem blong stap spolem yumi. Fasin blong yumi blong stanap strong longtaem nomata se yumi kasem ol trabol ya, i pruvum se spirit blong God i stap wetem yumi. (1 Pita 4:14) Long evri ples long wol, ol man oli stap talemaot gud nius blong Kingdom ya we Jeova i stanemap finis. Ol man oli agensem bigwan ol man blong God, i olsem we oli stap ‘sakem ol ston’ i kam long olgeta. Nating se i olsem, Jeova i givim paoa long ol man blong hem blong oli blokem ol ston ya blong oli no givim kil long olgeta. (Sekaraea 9:15, NW) !Yes i no gat samting i save kilimdaon wok we ol tabu Kristin oli stap mekem wetem ol fren blong olgeta blong bigfala kampani!
17 Yumi wantem tumas blong luk taem ya we bambae yumi fri olgeta nao Setan i no moa save faet agensem yumi. Yumi save sua fulwan se ‘eni tul blong faet we ol man oli stanemap agensem yumi bambae oli no save win, mo ol tok we ol man oli talemaot agensem yumi long jajmen bambae yumi winim olgeta.’ !Save ya i mekem yumi harem gud tumas!
[Ol futnot]
^ Wan buk we ol Witnes blong Jeova oli wokem be oli no moa printim naoia.
^ Blong save sam long ol samting ya we i hapen long histri, yu save ridim buk ya Jehovah’s Witnesses—Proclaimers of God’s Kingdom (long Franis hemia Les Témoins de Jéhovah : Prédicateurs du Royaume de Dieu), pej 675-676, we ol Witnes blong Jeova oli wokem.
?Bambae Yu Yu Ansa Olsem Wanem?
• ?Wanem i soem se ol tul blong Setan oli no save win?
• ?Olsem wanem Jerusalem long heven i kam olsem wan “hevi ston”?
• ?Olsem wanem Jeova i sevem “ol haos tapolen blong Juda”?
• ?Taem Amagedon i kam klosap, yu yu sua long wanem samting?
[Kwestin]
[Tok blong pija long pej 23]
Ol man blong Jeova long Albania oli stanap strong nomata wanem trabol we Setan i mekem long olgeta
[Tok blong pija long pej 26]
Eni tul we man i wokem blong blokem gud nius bambae i no save win