Wan Kwestin

?I stret we wan Witnes blong Jeova i go long mared blong wan famle no fren we i no Witnes?

Mared i wan taem blong glad mo i stret nomo we wan Kristin i wantem joen long glad taem ya. Long saed blong ol yangfala, sipos oli singaot olgeta blong go long wan mared, i klia se oli mas obei fastaem long papa mo mama no man we i lukaot long olgeta. Olgeta ya nao bambae oli talem long yangfala sipos hem i save go long mared ya no nogat. (Efesas 6:1-3) ?Be, olsem wanem sipos wan man we i no wan Witnes blong Jeova i askem Kristin waef blong hem blong go wetem hem long wan mared we oli mekem insaed long wan jos? Maet voes blong hat blong Kristin waef ya i letem hem i go jes blong wajem nomo, be tingting blong hem i strong blong no tekpat long eni samting blong giaman skul we i joen wetem seremoni ya.

Yes, wanwan man i mekem prapa desisen blong hem sipos hem i wantem go long wan mared olsem no nogat. Be, wanwan Kristin i mas tingbaot se wanem desisen we hem i mekem, hem i mekem long fored blong Jeova mo hem i mas skelem sam rul blong Baebol taem hem i mekem desisen blong go long mared blong wan man we i no Witnes.

Wan Kristin i mas tingbaot se samting we i moa impoten hemia blong wantem mekem God i glad long hem. Jisas i talem se: “God hem i wan Spirit, mo olgeta we oli mekem wosip long hem, oli mas wosip long spirit mo trutok.” (Jon 4:24, NW) Taswe, ol Witnes blong Jeova oli no joen long enikaen wok blong ol giaman skul olsem, ol prea, ol kastom mo ol seremoni we oli no laenap wetem ol trutok blong Baebol.—2 Korin 6:14-17.

Wan Kristin i luksave se desisen we hem i tekem i save mekem i gud no mekem i nogud long ol narafala. ?Sipos yu tekem desisen blong go long mared, bambae ol famle blong yu oli harem nogud sipos yu yu no joen long evri samting we i hapen long taem blong mared? Wan Kristin i mas tingbaot sipos desisen blong hem i no spolem ol Kristin brata mo sista blong hem. (Rom 14:13) ?Nating sipos yu, no wan long famle, i plan blong go long mared blong wan man we i no Witnes, ol narafala bambae oli tingting olsem wanem long saed blong yu? ?Desisen ya bambae i mekem ol Kristin brata mo sista blong yu oli harem nogud? ?Fasin ya i save stikim tingting blong sam long olgeta?

I save gat sam bigfala traem long ol seremoni blong mared blong ol famle we oli no Witnes. ?Olsem wanem sipos tufala ya we i mared, i askem blong yu stanap wetem tufala long mared blong tufala? ?Olsem wanem sipos man no woman blong yu we i no Witnes, i wantem joen fulwan long seremoni blong mared? Sipos wan jaj no wan man blong gavman i mekem seremoni blong mared ya long wan ofis blong gavman, olsem taon hol, ating bambae i no gat bigfala samting tumas, mo man we i go long taem ya i lukluk mared nomo.

Be, i wan wari nao sipos oli mekem seremoni blong mared insaed long wan jos haos, nao wan lida blong skul i mekem mared ya. Maet yu tekem desisen blong no go long wan mared olsem from we yu wantem folem tingting blong yu we yu trenemgud folem Baebol mo yu wantem blokem ol samting we i no laenap wetem bilif blong yu. Mo tu, yu no wantem mekem samting we maet i save mekem tufala we i mared mo famle we i stap, oli sem no oli harem nogud. (Ol Proveb 22:3) Sipos yu eksplenem bilif blong yu long famle blong yu plante taem bifo long mared, samting ya bambae i givhan long yu mo olgeta tu blong yufala i no wari mo no harem nogud. Talemaot long olgeta wanem haf blong mared we bambae yu joen long hem mo wanem haf we bambae yu no joen nating long hem.

Sam Kristin oli tingtinggud fastaem long ol samting we bambae i hapen long mared blong wan man we i no Witnes, mo biaen maet oli tekem desisen se i oraet nomo blong go lukluk mared ya be bambae oli no joen long eni samting we i hapen long taem ya. Be sipos wan Kristin i luksave se hem i save lego ol rul blong Baebol, nating sipos hem i stap lukluk nomo, maet hem i no wantem go from we hem i luksave se bambae hem i foldaon. Sipos hem i jus blong no go long seremoni blong mared be blong go nomo long kakae blong mared from we oli singaot hem blong joen long kakae, hem i mas tingbaot blong ‘leftemap nem blong God long olgeta samting we hem i mekem.’ (1 Korin 10:31) Wanwan man nao bambae i mas tekem prapa desisen blong hem long saed ya from we “evri man i gat basket blong hem blong karem.” (Galesia 6:5, Nyutesteman wetem Ol Sam long Bislama) From samting ya, nomata wanem desisen we yu tekem, tingbaot se impoten samting hemia blong gat wan voes blong hat we i stret long fes blong Jeova.