María Isabel i wan yangfala pablisa we i laekem wok blong talemaot gud nius. Hem i stap long taon ya San Bernardo long kantri blong Chile long Saot Amerika. María Isabel mo famle blong hem, oli ol Mapuche, hemia ol Indian blong Amerika. Famle ya i stap wok had wetem ol narafala brata mo sista blong traem statem wan niufala kongregesen long lanwis blong ol Mapuche. Lanwis ya nem blong hem Mapudungun.

Taem María Isabel i harem nius se ol brata oli gat plan blong mekem Memoriol long lanwis ya Mapudungun, mo se ol brata oli printim 2,000 pepa long lanwis ya blong singaot ol man oli kam long Memoriol ya, hem i glad tumas. Hem i tingbaot se hem i save mekem wanem blong givhan long wok ya. Hem i tingbaot ol narafala yangfala Witnes blong Jehova we oli prij long ol fren mo ol tija long skul blong olgeta, mo i gat gudfala frut i kamaot from. Ale, hem i toktok wetem papa mo mama blong hem, mo tufala i talem long hem se hem i mas mekem wan plan blong serem ol pepa blong Memoriol long skul blong hem. ?Hem i mekem wanem plan?

Fastaem, María Isabel i toktok wetem olgeta we oli bos long skul. Hem i askem long olgeta sipos hem i gat raet blong pinim wan pepa blong Memoriol long get blong skul. Olgeta oli letem hem i mekem olsem, mo oli talem gudfala toktok long hem from samting ya we hem i wantem mekem. Ale, long wan moning, taem tija i stap singaot nem blong olgeta studen wanwan, hedmasta tu i toktok long laod spika, i talemaot pepa ya blong Memoriol.

Biaen, María Isabel i askem long ol tija sipos hem i save go long olgeta klasrum wanwan. Oli givim raet long hem. Ale hem i go mo i askem sipos i gat sam studen we oli Mapuche from we hem i wantem givim wan pepa long olgeta. María Isabel i stori se: “Mi mi ting se long skul blong mi, maet i gat samwe long 10 no 15 studen nomo we oli Mapuche. !Be mi sek se oli plante moa! !Mi givimaot 150 pepa!”

Wan woman i luk pepa blong Memoriol long get blong skul. Ale hem i talem se hem i wantem toktok wetem olgeta we oli putum pepa ya. !Woman ya i sek bigwan taem oli talem long hem se wan smol gel we i gat 10 yia nomo i putum pepa ya! María Isabel i smael, mo i talem se: “Woman ya i ting se bambae hem i toktok wetem wan bigman, be hem i sek taem hem i luk mi.” María Isabel i givim wan pepa long woman ya, mo i storian smoltaem wetem hem. Biaen hem i talem long woman ya, se hem i save kam wetem papa mama blong hem blong luk woman ya long haos blong hem blong tokbaot Kingdom blong God. Ale woman ya i talem ples we hem i stap long hem. Olgeta 20 pablisa we oli prij long ol man long lanwis ya Mapudungun, oli glad tumas blong luk woman ya mo 26 narafala man mo woman we oli kam long Memoriol. !Ol pablisa ya oli glad tumas long niufala kongregesen blong olgeta we i stap kam bigwan moa!

?Olsem wanem long yu? ?Yu ting se yu tu yu save singaot sam studen long klas blong yu no sam man we yu wok wetem olgeta, oli kam long Memoriol, long miting, no long wan asembli? I gud yu traem faenem sam stori long ol buk blong yumi we oli tokbaot olsem wanem ol brata mo sista oli mekem samting ya. Maet ol stori ya bambae oli givim ol gudfala tingting long yu. Mo tu, i gud yu prea long Jehova blong i givim tabu spirit long yu. Olsem nao bambae yu no fraet blong tokbaot hem long ol man. (Luk 11:13) Sipos yu mekem olsem, bambae yu sek we yu tu yu save gat ol gudfala stori olsem María Isabel. Mo bambae yu glad tumas from we gudfala plan we yu mekem i karem gudfala frut.