Wan samting we i save givhan long yumi, hemia ol gudfala toktok we ol famle, mo ol fren, mo ol Kristin brata mo sista blong yumi, oli talem blong mekem yumi harem gud.

Wan fren we i lavem yumi, toktok blong hem i olsem wan gudfala oel we man i ravem long bodi blong narafala man blong mekem hem i harem gud. (Prov. 16:24; 18:24; 25:11) Be ol tru Kristin oli no wet nomo blong narafala i leftemap tingting blong olgeta. Olgeta tu, taem oli luk we ‘ol narafala man oli gat trabol, oli go givhan long olgeta, blong mekem olgeta oli harem gud long sem fasin, from we God i givhan finis long olgeta.’ (2 Kor. 1:4; Luk 6:31) Antonio i wan distrik elda long Meksiko. Samting we i hapen long laef blong hem, i tijim hem olsem wanem blong givhan long narafala.

Antonio i kasem wan strong sik, hemia kansa blong blad. Hem i harem nogud bitim mak. Nating se i olsem, hem i traehad blong winim nogud tingting blong hem. ?Hem i mekem wanem? Hem i tingbaot ol singsing blong Kingdom, mo i singsing long olgeta, blong hem i save harem mo i tingting dip long ol tok blong olgeta. Hem i prea long bigfala voes mo i ridim Baebol. Samting ya i givhan bigwan long hem.

Antonio i luksave tu se ol Kristin brata mo sista blong hem oli givhan bigwan long hem, blong mekem hem i harem gud. Hem i talem se: “Taem mi mo woman blong mi, mitufala i harem nogud, mitufala i askem long wan elda we i famle blong mitufala, blong i kam prea wetem mitufala. Hemia i mekem tingting blong mitufala i kwaet, mo i mekem mitufala i harem gud.” Antonio i gohed i talem se: “Taem ol famle mo ol brata mo sista oli kam givhan long mitufala, smoltaem afta, mitufala i harem gud bakegen.” Antonio i glad tumas we i gat ol fren we oli lavem hem mo oli tingbaot hem.

Wan narafala samting we i save givhan long yumi, hemia tabu spirit we Jehova i promes blong givim. Aposol Pita i talem se tabu spirit i wan presen we God i “stap givim fri nomo i go long ol man.” (Wok 2:38, NW) Samting ya i kamtru long lafet blong Pentekos long yia 33, taem tabu spirit i kamdaon long plante man. Be yumi evriwan i save kasem tabu spirit. Hem i wan paoa we i no save finis samtaem, taswe i gud yumi askem long Jehova blong i givim fulap long yumi.—Aes. 40:28-31.

Aposol Pol i kasem plante trabol, mo klosap hem i ded tu. (2 Kor. 1:8-10) Be Pol i no fraet. Hem i save se God i stap givhan long hem, mo tingting ya i mekem hem i harem gud. Hem i raetem se: “I gud yumi stap talem tangkiu long God ya we i God mo Papa blong Jisas Kraes, Masta blong yumi. Hem i Papa blong yumi we i gat sore, hem i God we i stamba blong fasin blong givhan. Hem i stap givhan long mifala long olgeta trabol blong mifala.” (2 Kor. 1:3, 4) Pol i no letem ol trabol ya oli winim hem. Be trabol ya we hem i kasem i tijim hem blong i gat sore long ol narafala we oli kasem trabol. Mo from samting ya, hem i naf blong mekem olgeta oli harem gud bakegen.

Naoia sik blong Antonio i finis. Mo hem i mekem wok blong visitim ol kongregesen bakegen. Bifo finis, hem i traehad blong givhan long ol brata mo sista, be naoia hem mo woman blong hem, tufala i tinghevi moa long olgeta we oli sik, nao tufala i go leftemap tingting blong olgeta. Wan taem, Antonio i go luk wan brata we i sik bigwan nao i no moa go long ol miting. Antonio i talem se: “Brata ya i lavem yet Jehova mo ol brata mo sista. Be sik i mekem hem i harem nogud tumas, nao hem i ting se hem i nogud, from we hem i no save mekem wan gudfala samting.”

Wan dei, ol brata mo sista oli joen wanples blong kakae, nao Antonio i askem long brata ya blong i prea. Brata ya i harem se hem i no naf blong prea, be hem i mekem. Samting ya i leftemap tingting blong hem. Antonio i talem se: “Prea blong hem i nambawan. Mo biaen, tingting blong hem i jenis. Hem i harem gud bakegen, from we hem i luk se hem i naf blong mekem wan gudfala samting.”

Yes, yumi evriwan i bin harem nogud samtaem, nating se from wan smol trabol no from wan bigfala trabol. Be olsem Pol i talem, ol trabol ya oli save mekem se yumi naf blong givhan long narafala we i kasem trabol. Taswe, yumi mas rere oltaem blong givhan long ol Kristin brata mo sista blong yumi we oli harem nogud. Yumi mas folem fasin blong God blong yumi, Jehova, we hem i Stamba blong fasin ya blong givhan.