MIFALA i laef long Finlan, long wan fam we i stap long not blong taon ya Ostrobothnia. Long famle, mifala i ten pikinini. Mifala i yangfala taem Wol Wo Tu i stap gohed. Nating se faet i stap longwe long ples blong mifala, be mifala i save se faet ya i stap mekem ol man oli harem nogud tumas. Wan naet, ol plen blong faet oli sakem bom long tufala taon ya Oulu mo Kalajoki, mekem se bigfala faea i laet mo skae i kam red. Papa mo mama i tijim mifala se taem mifala i luk ol plen blong faet oli flae, mifala i mas go haed kwiktaem. Bigfala brata blong mifala we nem blong hem Tauno, i tokbaot long mifala se bambae i no gat man i save harem nogud taem paradaes i stap long wol. Taem mifala i harem samting ya, mifala i wantem save moa.

Taem Tauno i gat 14 yia, hem i ridim ol buk blong ol Witnes blong Jehova mo i kasem save se oli tokbaot trutok. Save we hem i kasem long Baebol i mekem se hem i no wantem joen long ami taem Wol Wo Tu i stat. Ale, oli putum hem long presin mo ol man oli mekem i nogud long hem. Be samting ya i mekem se hem i wantem moa blong mekem wok blong Jehova. Taem hem i kamaot long presin, hem i spenem moa taem long wok blong prij. Taem mifala i luk gudfala eksampol blong brata blong mifala long ol hadtaem ya, mifala i wantem go long miting blong ol Witnes we i stap long wan narafala vilej klosap. Mifala i wok mo mifala i putum gud mane blong mifala, blong mifala i save go long asembli. Mifala i somap klos blong ol man we oli stap klosap long haos blong mifala, mifala i planem ol anian, mo mifala i pikimap ol frut ya beri. Mifala i gat plante wok blong mekem long fam, taswe ful famle blong mifala i no save go long asembli wantaem.

Samting we mitufala i lanem long saed blong Jehova mo stamba tingting blong hem, i mekem se mitufala i lavem hem tumas, ale mitufala i baptaes long 1947. (Long taem ya Annikki i gat 15 yia mo Aili i gat 17 yia.) Sista blong mitufala, nem blong hem Saimi, i baptaes tu long sem yia ya. Mo mitufala i mekem Baebol stadi blong narafala sista blong mitufala, Linnea. Hem tu wetem famle blong hem, oli kam Witnes blong Jehova. Afta we mitufala i baptaes, mitufala i mekem desisen se long sam manis bambae mitufala i mekem wok blong haftaem paenia.

Long 1955, mitufala i muv i go long not, long wan taon we nem blong hem Kemi. Mitufala tugeta i wok fultaem blong kasem mane. Nating se i olsem, mitufala i wantem mekem wok blong paenia. Be mitufala i fraet se sipos mitufala i wok sam dei nomo, bambae mitufala i no gat inaf mane blong pem laet mo wota, mo ol narafala samting olsem. Mitufala i ting se mitufala i mas putum gud mane blong mitufala fastaem. Long taem ya nao, fren blong mitufala i talem toktok ya we i stap long stat blong stori ya. Fren ya i wan paenia, mo hem i wantem givhan long mitufala blong luksave se mitufala tu i save mekem wok blong paenia. Mitufala i no mas trastem mitufala nomo, no famle blong mitufala. Be mitufala i mas trastem Jehova se hem i save givhan long mitufala blong kasem samting we mitufala i nidim.

 Long taem ya, mitufala i putum gud mane we i naf blong mitufala i save paenia blong tu manis. Ale, long Mei 1957, mitufala i fulumap pepa blong mitufala i go paenia tu manis long taon blong Pello, hemia antap moa long not. Mitufala i wari tumas. Be afta long tu manis, olgeta mane we mitufala i putumgud, oli stap nomo. Ale mitufala i askem blong paenia tu manis bakegen. Afta long tufala manis ya, olgeta mane blong mitufala i stap yet. Naoia mitufala i save se Jehova bambae i lukaot gud long mitufala. !Mitufala i paenia 50 yia finis, be ol mane ya oli stap yet! Mitufala i harem olsem se Jehova i holem han blong mitufala mo i talem long mitufala se: ‘!Yutufala i no fraet! !Mi bambae mi givhan long yutufala!’—Aes. 41:13.

Long 1958, eria elda blong mifala i askem sipos mitufala i save go mekem wok blong spesel paenia long taon ya Sodankylä, we i stap moa long not. Long taem ya, i gat wan sista nomo long taon ya. Sista ya i kasem trutok long wan rod we i defren. Smol boe blong hem i go wetem ol narafala studen long klas blong hem, blong visitim taon ya Helsinki, we i kapital blong Finlan. Taem oli stap wokbaot long taon ya, wan olfala sista i givim wan Wajtaoa long boe ya, mo i talem long hem blong i go givim long mama blong hem. Taem mama blong hem i ridim Wajtaoa ya, hem i luksave wantaem se i stap tokbaot trutok blong Baebol.

Long Sodankylä i gat wan faktri we oli stap katem ol bigfala tri blong mekem timba. Antap long faktri ya, i gat wan rum we mitufala i stap long hem, mo mitufala i mekem ol miting long rum ya. Fastaem, mifala fo nomo i stap long ol miting ya, hemia mitufala wetem sista ya mo wan gel blong hem. Long taem blong miting, mifala i ridim nomo ol save we oli stap long program blong miting. Sam taem biaen, wan man we i stap stadi Baebol wetem ol Witnes blong Jehova, hem i kam wok long faktri ya. Hem mo famle blong hem oli kam long ol miting, mo biaen, hem mo woman blong hem, tufala i baptaes. Naoia i gat wan brata we i save lidim ol miting. Sam narafala man tu we oli wok long faktri ya, oli joen long ol miting mo oli kam long trutok. I no longtaem afta, grup blong mifala i kam wan kongregesen.

Ol ples we mitufala i go prij long hem oli stap longwe. Long hot taem, mitufala i wokbaot, mitufala i ron long baskel, mo samtaem mitufala i go long bot, blong faenem ol man long teritori. Ol baskel blong mitufala i givhan gud long mitufala. Mitufala i yusum blong go long ol asembli, mo blong go luk papa mo mama blong mitufala we oli stap plante handred kilometa longwe. Long taem blong kolkol, mitufala i tekem bas long eli moning blong go long wan vilej, mo mitufala  i wokbaot i go long ol haos wanwan blong prij. Taem mitufala i finisim ol haos, mitufala i wokbaot i go long narafala vilej. Samtaem sno we i stap long rod i dip tumas. Sipos wan man i pas long rod ya finis, i isi blong mifala i folem rod we hem i pas long hem. Be sipos sno i foldaon bakegen, bambae hem i kavremap rod ya bakegen. Taem ol tri oli stat blong karem flaoa, sno i kam sofsof mo i ronaot, ale i hadwok blong man i wokbaot long hem.

Mitufala i mas lan blong werem ol klos we oli wom long taem blong sno. Mitufala i werem ol longfala stokin we oli wokem long wul, wetem fo no sikis narafala smosmol stokin bakegen antap long hem, mo ol longfala but. Be taem mitufala i wokbaot, plante taem sno i go insaed long ol but blong mitufala. Taem mitufala i kasem wan haos, mitufala i mas tekemaot ol but mo seksekem blong sno i kamaot. Mo tu, mitufala i werem ol kot we oli longfala kasem leg blong mitufala. Be taem mitufala i wokbaot, sno i fas long en blong ol kot ya ale oli wetwet mo oli kam aes. Wan dei, mitufala i wokbaot bitim 11 kilometa blong go long haos blong wan woman, ale woman ya i sek mo i talem se: ‘Yutufala i gat strong bilif from we yutufala i wokbaot i kam long rabis weta ya.’

Plante taem mitufala i slip long haos blong sam famle long vilej. Taem mitufala i prij gogo sapa i kam, mitufala i stat blong askem long ol man sipos mitufala i save slip long haos blong olgeta. Ol haos blong ol man long vilej oli no flas, be ol man oli kaen mo oli mekem i gud long mitufala. Oli givim sam kakae mo ples blong slip long mitufala. Plante taem mitufala i slip long mat we oli mekem wetem skin blong anamol. Sam famle oli gat wan rum blong ol visita we mitufala i save yusum. Wan taem, wan woman we i gat wan stori haos, i tekem mitufala i go long wan rum antap. I gat wan bed long rum ya we oli kavremap wetem ol naesfala waet kaliko. Plante taem mitufala i storian long Baebol wetem ol famle ya gogo kasem let long naet. Long wan haos, i gat wan rum nomo. Man blong haos ya wetem woman blong hem, tufala i slip long wan saed blong rum, mo mitufala i slip long narasaed. Man ya wetem woman blong hem tufala i gohed blong askem plante kwestin, mo mitufala i tokbaot Baebol long tufala gogo kasem long eli moning.

Ol eria long not blong Finlan oli naes tumas. Be ol man we oli glad blong save Jehova, oli naes moa. Sam long ol man ya oli muv i kam stap long ples ya blong katem ol tri. Taem mitufala i prij long ol haos wanwan, samtaem mitufala i faenem ol man nomo, i no gat ol woman. Ol man ya oli glad tumas blong harem ol tok blong Baebol mo blong ridim ol buk blong yumi.

Mitufala i gat plante gudfala stori blong prij. Wan dei mitufala i let, nao mitufala i mestem bas we mitufala i mas tekem blong go long wan vilej. Ale mitufala i tekem wan bas we i go long wan narafala vilej. Mitufala i neva prij long vilej ya, be taem mitufala i go long fas haos, wan woman i talem long mitufala se: ‘!Mi mi stap wet long yutufala ya!’ Mitufala i stap mekem Baebol stadi long sista blong woman ya. Mo woman ya i talem long sista blong hem blong mitufala i go luk  hem long dei ya. Be sista blong hem i no talemaot samting ya long mitufala. Mitufala i statem stadi blong woman ya mo ol famle blong hem we oli stap klosap long haos blong hem. I no longtaem afta, mitufala i joenem olgeta evriwan long wan grup nomo blong stadi, mo i gat twelef man long grup ya. Stat long taem ya, plante man mo woman long famle ya oli kam Witnes blong Jehova.

Long 1965, oli askem long mitufala blong mitufala i muv i go long kongregesen blong Kuusamo. Long taem ya, i gat smol pablisa nomo long kongregesen ya. Fastaem, i had blong prij long teritori ya. Ol man oli strong long jos blong olgeta mo oli no laekem wok blong yumi. Be i gat plante man we oli tinghae long Baebol. Ale mifala i traem blong kasem save moa long ol man ya, mo samwe afta long tu yia, i isi moa blong mifala i statem ol Baebol stadi.

Tede, mitufala i no moa naf blong stap long wok blong prij long wan fuldei. Nating se i olsem, mitufala i prij klosap evri dei. Mo naoia, i moa isi blong mitufala i go prij long ol ples we i longlongwe, from we Aili i save draevem trak. Nefiu blong mitufala i talem long hem se hem i mas lanem blong draevem wan trak. Ale long 1987, taem Aili i gat 56 yia, hem i kasem laesens blong hem blong draevem trak. Mo tu, naoia mitufala i stap long wan rum we i joen wetem niufala Haos Kingdom blong mifala.

Mitufala i glad tumas from we plante man long not blong Finlan, oli bilif long trutok. Taem mitufala i stat blong paenia long ples ya, i gat smol pablisa nomo. Be naoia, i gat plante kongregesen long wan eria. Taem mitufala i joen long wan bigfala asembli, plante taem wan man i kam long mitufala, i talem nem blong hem, mo i eksplenem se mitufala i stadi wetem famle blong hem taem hem i smol. Jehova i blesem wok blong mitufala.—1 Kor. 3:6.

Long 2008, hem i 50 yia we mitufala i mekem wok blong spesel paenia. Mitufala i talem tangkiu long Jehova from we mitufala i naf blong givgivhan long mitufala blong mitufala i gohed blong mekem wok blong hem. Mitufala i no gat plante samting, be oltaem mitufala i gat ol samting we mitufala i nidim. (Sam 23:1) Naoia mitufala i save se mitufala i no sud wari taem mitufala i stat blong paenia. Long olgeta yia ya, Jehova i givim paoa long mitufala olsem promes ya blong hem we i talem se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala! !Mi bambae mi blokemgud yufala, mi sevem yufala!”—Aes. 41:10.