1, 2. ?Wanem profet tok long saed blong ol las dei we i mekem ol disaepol oli wari, mo from wanem?

JISAS i jes talem long ol man blong hem se bambae ol man oli brekemdaon haos blong God. Tok blong hem i mekem Pita, Jemes, Jon, mo Andru oli wari. (Mak 13:1-4) Ale, taem oli stap olgeta nomo wetem Jisas, oli askem long hem se: “Plis yu talemaot long mifala. ?Bambae ol samting ya oli kamtru wetaem? ?Mo wanem saen we bambae i soemaot we yu bambae yu kambak bakegen, mo wol ya i finis?” (Mat. 24:1-3) Ale Jisas i ansa long olgeta mo hem i tokbaot ol samting we bambae oli hapen, bifo we oli spolem Jerusalem. Be i no hemia nomo. Hem i tokbaot ol samting tu we bambae oli hapen long ol las dei blong wol blong Setan. Hem i tokbaot sam nogud samting, olsem ol faet, kakae i sot, mo plante rabis fasin we bambae oli hapen. Be hem i tokbaot wan gudfala samting tu. Hem i talem se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.”—Mat. 24:7-14.

² Ol disaepol oli stap talemaot gud nius blong Kingdom finis wetem Jisas. (Luk 8:1; 9:1, 2) Mo maet oli tingbaot tok blong Jisas we i talem se: “Tru, i gat plante kakae tumas i stap long garen we i rere finis, be smol man nomo oli stap blong karem i kam. Yufala i mas askem strong long masta blong garen ya, blong hem i sanem sam moa man oli go karem kakae blong hem i kam.” (Luk 10:2) Be maet oli stap tingting se: ‘?Bambae yumi mekem olsem wanem blong prij long “olgeta ples long wol,” mo blong ‘witnes long fes blong olgeta man’? ?Ol man blong mekem wok ya bambae oli kam long weples?’ Ol disaepol oli no save nating se ol tok blong Matiu 24:14 bambae oli kamtru olsem wanem.

3. ?From wanem ol tok blong Jisas long Luk 21:34, oli impoten long yumi tede? ?Wanem kwestin we i gud blong askem?

 ³ Profet tok blong Jisas i stap kamtru long taem blong yumi. Plante taosen man oli stap talemaot gud nius blong Kingdom long olgeta ples long wol. (Aes. 60:22) Be Jisas i soemaot se bambae i had long samfala, blong oli putum wok blong prij long fas ples long laef blong olgeta. Bambae oli bisi tumas long ol narafala samting, nao bambae tingting blong olgeta i kam slak, no oli “westem taem” blong olgeta. (Ridim Luk 21:34.) Ol tok blong Jisas oli impoten long yumi tede, from we sam man blong God oli no putum ol samting we oli moa impoten long fas ples long laef blong olgeta. Oli soemaot samting ya long ol desisen we oli mekem long saed blong wok, hae skul, mo ol sas samting. Sam narafala oli spenem plante taem long spot mo pleplei. Samfala oli wari long laef blong olgeta evri dei, ale oli no moa prij plante, olsem we oli naf blong mekem. I gud yu askem se: ‘?Mi mi stap mekem wanem? ?Mi mi putum wok blong God long fas ples long laef blong mi?’

4. (1) ?Aposol Pol i prea blong bambae ol Kristin long Filipae oli mekem wanem? ?From wanem? (2) ?Bambae yumi tokbaot wanem long stadi ya mo long nekis stadi? ?Ol stadi ya bambae oli givhan long yumi olsem wanem?

⁴ Ol Kristin long fas handred yia, oli mas wok had blong putum wok blong God long fas ples blong laef blong olgeta. Hemia nao from wanem aposol Pol i prea, blong bambae ol Kristin long Filipae oli ‘jusumaot ol samting we oli impoten moa.’ (Ridim Filipae 1:9-11.) Plante Kristin oli mekem olsem Pol. Oli “no moa fraet, mo oltaem oli stap mekem tingting blong olgeta i strong moa blong talemaot tok ya blong God.” (Fil. 1:12-14) Long sem fasin, plante long yumi i gat strong tingting blong talemaot Tok blong God. Long stadi ya, bambae yumi tokbaot olsem wanem Jehova i yusum ogenaesesen blong hem tede, blong mekem ol tok blong Matiu 24:14 i kamtru. Olsem nao, bambae yumi gat strong tingting blong talemaot gud nius. ?Ogenaesesen blong Jehova i stap mekem wanem? ?Mo samting ya i leftemap tingting blong yumi mo famle blong yumi olsem wanem? Long nekis stadi bambae yumi tokbaot samting we i save givhan long yumi blong yumi stanap strong mo mekem wok blong God, mo blong obei long samting we ogenaesesen blong Jehova i talem.

5, 6. (1) ?Wanem ol save we Jehova i jusum blong talem long ol man blong hem? (2) ?Esikel i luk wanem vison?

⁵ Long Baebol, i gat plante samting we Jehova i jusum blong no talem long yumi. Wan long ol samting ya hemia se, hem i no givim plante save long yumi long saed blong bren blong yumi, no long saed blong olgeta samting we oli stap long skae. Be, hem i givim ol save we yumi nidim blong yumi kasem save long wanem we Jehova i wantem, mo blong yumi obei long hem. (2 Tim. 3:16, 17) I gud tumas we Jehova i jusum blong talemaot ol save long yumi, long saed blong ogenaesesen blong hem long heven. Yumi harem gud tumas blong ridim ol save ya long buk blong Aesea, Esikel, Daniel mo Revelesen. (Aes. 6:1-4; Esik. 1:4-14, 22-24; Dan. 7:9-14; Rev. 4:1-11) ?From wanem Jehova i letem we yumi save sam samting we oli stap hapen long heven?

⁶ Jehova i wantem we oltaem yumi rimemba se yumi joen long wan ogenaesesen nomo long heven mo wol. Ogenaesesen blong Jehova we i stap long heven, hem i stap wok had blong mekem samting we Jehova i wantem. Yu traem tingbaot vison we Esikel i luk. Hem i luk wan bigfala kat blong faet. Bigfala kat ya hem i pija blong ogenaesesen blong Jehova long heven. Kat ya i spid mo ol wil blong hem oli save go long ol fo saed, we oli no save tanem olgeta. (Esik.  1:15-21) Esikel i luk Man ya tu we i sidaon long kat ya. Esikel i talem se: “Man ya, . . . bodi blong hem i saen olsem bras we i stap bon insaed long faea.” Hem i talem se: “Bigfala laet ya i soemaot we Hae God i stap.” (Esik. 1:25-28) Ating vison ya i mekem Esikel i sapraes. Hem i luk Jehova we i bos long ogenaesesen, mo i yusum tabu spirit blong hem blong lidim ogenaesesen ya. Kat ya we i stap muv i soemaot olsem wanem ogenaesesen blong Jehova i stap wok.

7. ?Vison we Daniel i luk, i mekem yumi trastem Jehova olsem wanem?

⁷ Daniel tu i luk wan vison we i mekem se yumi save trastem Jehova. Hem i luk Jehova, “Olfala we i stap fastaem bifo olgeta, mo bambae i stap gogo i no save finis.” Olfala ya i stap sidaon long bigfala jea blong king we i gat ol wil blong hem. (Dan. 7:9) Jehova i wantem se Daniel i luksave se ogenaesesen blong hem i stap muv i go fored. Hemia i min se ogenaesesen ya i stap wok had blong mekem samting we Jehova i wantem. Biaen, Daniel i luk “wan man we i olsem man blong wol ya.” Man ya hemia Jisas. Jehova i givim paoa long Jisas, blong hem i lidim ogenaesesen blong hem long wol. Jisas bambae i no rulum ol man blong sam yia nomo. Paoa blong hem bambae “i stap oltaem nomo, mo rul blong hem bambae i no save finis samtaem.” (Dan. 7:13, 14) Vison ya i pulum yumi blong trastem Jehova mo blong luksave samting we hem i stap mekem. Mo from we Jehova i givim paoa long Jisas, vison ya i pulum yumi tu blong trastem Jisas olsem lida blong yumi.

8. ?Ol vison blong ogenaesesen blong Jehova, oli mekem Esikel mo Aesea tufala i harem olsem wanem? ?Ol vison ya oli mekem yumi harem olsem wanem?

⁸ Ol vison ya long saed blong ogenaesesen  blong Jehova, oli mekem yumi harem olsem Esikel. Yumi sapraes long ol samting we Jehova i stap mekem. (Esik. 1:28) Profet Aesea tu i luk wan vison blong samting we i stap hapen long heven. Hem i glad blong talemaot samting ya long ol narafala, olsem we Jehova i talem long hem. (Ridim Aesea 6:5, 8.) Jehova i stap givhan long Aesea. Taswe, Aesea i save se i no gat wan samting i save stopem hem blong mekem wok olsem wan profet. Olsem Aesea, yumi tu yumi mekem moa long wok blong Jehova, from we yumi wantem sapotem ogenaesesen blong hem. Yumi glad tumas blong save se yumi joen long wan ogenaesesen we i bisi oltaem blong mekem wok blong Jehova.

9, 10. ?From wanem i nidim wan ogenaesesen blong Jehova long wol?

⁹ Jehova i yusum Jisas blong stanemap wan ogenaesesen blong hem long wol, we i wok wetem ogenaesesen blong hem long heven. ?From wanem i nidim wan ogenaesesen long wol, blong mekem se wok we Matiu 24:14 i tokbaot, i gohed? Bambae yumi tokbaot tri risen.

¹⁰ Faswan risen se, Jisas i talem se ol disaepol blong hem bambae oli prij long “olgeta ples long wol.” (Wok 1:8) Nambatu risen se, olgeta we bambae oli prij, oli nidim ol save blong Baebol mo ol tok blong leftemap tingting blong olgeta. (Jon 21:15-17) Nambatri risen se, bambae oli nidim ol miting blong oli save joen blong wosipim Jehova, mo blong oli lanem blong prij. (Hib. 10:24, 25) Ol disaepol blong Jisas oli mas mekem gud plan fastaem, blong ol samting ya oli gohed gud.

11. ?Yumi save mekem wanem blong sapotem ogenaesesen blong Jehova?

¹¹ ?Yumi save mekem wanem blong sapotem ogenaesesen blong Jehova? Wan rod, hemia blong trastem ol brata we oli lidim wok blong prij. Jehova mo Jisas tufala i trastem ol brata ya, taswe yumi tu yumi mas trastem olgeta. Ol brata ya oli save yusum paoa blong olgeta blong traem stretem ol trabol long wol ya. Be oli no mekem olsem. Bambae yumi tokbaot samting we ogenaesesen blong Jehova long wol i stap mekem, longtaem finis i kam.

12, 13. ?Ol elda oli mekem wok blong olgeta olsem wanem? ?From wanem samting ya i leftemap tingting blong yu?

¹² Ol elda raon long wol we oli stap longtaem long trutok, oli mekem ol plan blong prij mo oli lidim wok ya long ples we oli stap long hem. Taem oli mekem ol desisen, oli lukaot ol advaes long Baebol we i olsem ‘wan tos we i tosem ples we oli putum leg blong olgeta long hem, mo wan laet we i saenem rod’ blong olgeta. Mo oli prea long Jehova blong i lidim olgeta.—Sam 119:105, NW; Mat. 7:7, 8.

¹³ Ol elda tede, oli folem fasin blong ol elda long fas handred yia. Oli putum wok blong “talemaot tok blong God” long fas ples. (Wok 6:4) Oli glad tumas taem oli luk we wok blong prij i stap gohed long ples blong olgeta mo long fulwol. (Wok 21:19, 20) Oli no stanemap plante rul blong ol man blong God oli folem. Be oli putum tingting blong olgeta i stap long samting we oli mas mekem wetem help blong Baebol mo tabu spirit. Olsem nao, wok blong talemaot gud nius i save kasem olgeta ples long wol. (Ridim Ol Wok 15:28.) Long rod ya, oli soemaot wan nambawan eksampol, blong olgeta long kongregesen oli save folem.—Efes. 4:11, 12.

14, 15. (1) ?Wanem ol wok we ol brata sista oli mekem, we i givhan long yumi blong talemaot gud nius long olgeta ples long wol? (2) ?Yu yu harem olsem wanem long samting we yu stap mekem blong sapotem wok blong prij?

¹⁴ Plante long ol brata blong yumi oli stap  wok had evri dei blong mekem ol buk, rerem ol miting mo ol asembli. Olgeta ya oli no kasem pei from ol wok blong olgeta. Plante taosen brata mo sista oli wok had blong tanem ol buk i go long bitim 600 lanwis. From samting ya, plante man oli kasem save “ol bigbigfala wok ya we God i mekem,” long prapa lanwis blong olgeta. (Wok 2:7-11) Ol yangfala brata mo sista oli wok had blong printim ol magasin mo ol buk. Biaen, oli sanem ol buk ya i go long ol kongregesen farawe.

¹⁵ Mo plante brata sista long ol ples blong yumi, oli stap wok blong givhan long yumi, blong yumi putum tingting blong yumi i stap long wok blong talemaot gud nius. Yu traem tingbaot plante taosen brata sista we oli glad nomo blong bildim ol niufala Haos Kingdom mo ol Haos Asembli. Samfala oli go givhan long olgeta we oli kasem trabol from wan disasta, mo oli givim meresin long olgeta we oli gat problem long saed blong helt. Sam narafala oli mekemrere ol program blong asembli. Sam narafala oli tijim ol save blong Baebol, long ol skul we ogenaesesen blong Jehova i stanemap. ?From wanem oli mekem ol wok ya? Hemia blong givhan long yumi blong yumi talemaot gud nius, yumi gohed gud long trutok, mo blong yumi givhan long plante moa man blong oli kam ol man blong Jehova. !Tru ya, ogenaesesen blong Jehova long wol ya, i stap putum ol impoten samting long fas ples!

16. ?Wanem ol save we yu save lukaotem mo biaen, yu tokbaot olgeta long famle wosip no taem yu mekem prapa stadi blong yu?

¹⁶ ?Olsem wanem? ?Samtaem yu yu stap tingbaot samting we ogenaesesen blong Jehova i mekem? Yu save lukaot ol save long saed blong ogenaesesen ya, mo yu tokbaot olgeta long famle wosip blong yu, no taem yu mekem prapa stadi blong yu. Mo i gud we yu tingting dip long samting we yu lanem. Bambae i gud tumas sipos yu stadi long vison we Jehova i soemaot long Aesea, Esikel, Daniel mo Jon. Buk ya Jehovah’s Witnesses—Proclaimers of God’s Kingdom mo ol narafala buk no DVD, olgeta tu oli tijim plante gudfala samting long saed blong ogenaesesen blong Jehova.

17, 18. (1) ?Stadi ya i givhan long yu olsem wanem? (2) ?Wanem ol kwestin we i gud we yumi askem?

¹⁷ Yumi glad tumas we stadi ya i givhan long yumi blong yumi tingting dip long fasin we Jehova i stap yusum ogenaesesen blong hem blong sapotem wok blong prij. Yumi mas wok wetem nambawan ogenaesesen ya. Yumi mas putum ol samting we oli impoten moa, long fas ples long laef blong yumi. Ale, bambae yumi harem olsem Pol we i raetem se: “God i gat sore long mifala, mo hem i givim wok ya long mifala blong mifala i mekem, mo from samting ya, tingting blong mifala i no save foldaon, [“mifala i no lego,” NW].” (2 Kor. 4:1) Pol i leftemap tingting blong ol Kristin brata blong hem tu se: “Yumi no kam slak blong mekem ol gudfala fasin, from we sipos yumi mekem olsem, bambae long stret taem blong hem, yumi save kasem kakae from ol hadwok ya blong yumi.”—Gal. 6:9.

¹⁸ ?Olsem wanem? ?Yu mo famle blong yu i mas jenisim sam samting, blong yufala i save putum ol impoten samting long fas ples long laef? ?Yu yu save mekem laef blong yu i no fasfas, blong yu mekem moa long wok blong prij? Long nekis stadi, bambae yumi tokbaot faef samting we oli save givhan long yumi, blong yumi folem eksampol blong ogenaesesen blong Jehova, mo blong yumi wok strong long wok blong hem.