STORI ya i hapen long Swasilan long Ogis 1936. Robert mo George Nisbet tufala i go insaed long yad blong King Sobhuza 2 wetem wan trak we i gat laodspika long hem. Mo tufala i putum rikod blong ol miusik blong Kingdom, wetem rikod blong ol tok blong Brata J.F Rutherford, blong ol man oli lesin long hem. King ya i glad tumas. George i talem se: “!Mitufala i sem from we King ya i wantem pem masin blong rikod, wetem ol rikod, mo laodspika tu!”

Robert i talem long king se sore, ol samting ya oli no blong salem. ?From wanem? From we oli no blong tufala, oli blong wan narafala man. Ale king i wantem save se hu ya man ya.

Robert i ansa long King i se: “Oli blong wan narafala King.” Ale Sobhuza 2 i askem se King ya hem i hu. Robert i se: “Hem i Jisas Kraes, King blong Kingdom blong God.”

Wetem bigfala respek, King i talem se: “A yes, hem i wan hae King ya, mi no save tekem wan samting we i blong hem.”

Robert i raetem se: ‘Fasin blong King ya i mekem mi mi sapraes. Hem i wan Paramaon Jif mo i toktok gud Inglis, be hem i no soemaot long toktok blong hem se i praod. Taem hem i toktok, hem i no haedem wan samting, mo i isi nomo blong man i toktok wetem hem. Mi mi stap wetem hem long ofis blong 45 minit, mo George i stap mekem miusik i plei afsaed.’

Robert i gohed se: ‘Long sem dei ya, mifala i go prij long wan sekendri skul we nem blong hem, The Swazi National School. Mifala i gat wan nambawan taem long ples ya. Mifala i prij long hedmasta blong skul ya mo hem i glad nomo blong lesin. Taem mifala i askem blong plei ol miusik mo ol tok ya long ol pikinini long skul, hedmasta i agri mo hem i singaot klosap wan handred pikinini blong oli sidaon long gras mo oli lesin. Oli talem long mifala se sekendri skul ya i tijim ol boe long saed blong agrikalja, wok long garen, kapenta, bildim haos, Inglis, mo matematik. Mo i tijim ol gel long wok blong nes, haos gel, mo plante narafala gudfala wok olsem.’ Bubu woman blong Paramaon Jif nao i givim mane blong statem skul ya.

Stat long 1933, King Sobhuza 2 i lesin oltaem long ol paenia we oli stap go prij long yad blong hem. Wan taem, hem i singaot 100 bodigad blong hem oli kam wanples, blong oli lesin long ol tok blong Baebol we oli rikodem. Mo tu long evri manis, hem  i kasem ol magasin mo ol buk blong yumi. !From samting ya, King i gat klosap evri buk blong yumi! Antap long hemia, hem i lukaot gud long ol buk ya nating se gavman blong Inglan we i rulum olgeta long taem ya, i putum tabu long ol buk blong yumi long Wol Wo Tu.

King Sobhuza 2 i gohed blong tekem ol Witnes oli kam long yad blong king long Lobamba, mo hem i singaot tu ol lida blong jos blong oli kam lesin long ol tok blong Baebol we ol Witnes oli givim. Taem wan Witnes, we nem blong hem Helvie Mashazi, i stap tokbaot buk blong Matiu japta 23, sam lida blong jos oli kros tumas, nao oli fosem hem blong sidaon. Be King i blokem olgeta mo i talem long Brata Mashazi blong i gohed nomo. Mo hem i talem long ol man we oli stap lesin blong oli raetemdaon ol vas blong Baebol we oli kamaot long tok ya.

Long wan narafala taem, wan paenia i givim wan tok, mo i gat fo lida blong jos we oli stap. Taem paenia ya i finisim tok blong hem, fofala lida blong jos ya oli tekemaot saen long sot blong olgeta we i soemaot se oli lida blong jos, nao oli talem long fes blong ol man se: “Mifala i no moa ol lida blong jos, be naoia mifala i kam ol Witnes blong Jehova.” Ale oli askem long paenia ya sipos hem i gat sam buk olsem ol buk ya we King i gat.

Stat long 1930 go kasem ded blong King long 1982, hem i soemaot respek oltaem long ol Witnes blong Jehova, mo i no letem ol man blong oli agensem olgeta from we oli no folem kastom blong Swasilan. Taswe, ol Witnes oli tinghae long King ya, mo oli harem nogud tumas taem hem i ded.

Long stat blong 2013, i gat bitim 3,000 Witnes blong Jehova long Swasilan. From we i gat bitim wan milian man long kantri ya, i min se wan pablisa i save prij long 384 man. I gat bitim 260 paenia we oli stap long 90 kongregesen. Mo long 2012, i gat 7,496 man oli kam long memoriol. I klia se namba blong ol Witnes bambae i go antap long kantri ya long ol yia we oli stap kam. I tru se ol brata ya we oli bin visitim Swasilan long ol yia 1930, oli putum wan strong fandesen.—Stori ya i kamaot long ol buk mo pepa we ol brata oli kipimgud long Saot Afrika.