1. ?Plante man oli gat wanem tingting long ol slef? ?Slef we Rom 12:11 i tokbaot i olsem wanem?

LONG tingting blong plante man, wan slef, hemia wan man we masta blong hem i wipim hem, i fosem hem blong wok, mo i mekem i strong tumas long hem. Be wan slef blong God i defren. Baebol i tokbaot se ol Kristin oli save jusum blong wok slef blong wan Masta we i kaengud. Taswe aposol Pol i talem long ol Kristin se oli mas ‘wok olsem ol slef blong Jehova.’ Hem i stap pulum olgeta blong oli mekem wok blong God from we oli lavem hem. (Rom 12:11) ?Slef blong Jehova, hem i wanem kaen slef? ?Yumi mas mekem wanem, blong yumi no kam slef blong Setan mo wol blong hem? ?Slef blong Jehova i kasem wanem pei from had wok blong hem?

2. (1) ?Wanem i save mekem se wan Hibru slef i no wantem kam fri? (2) Taem masta i stikim sora blong slef, ?hemia i soemaot wanem?

² Yumi kasem save moa long wan slef blong Jehova taem yumi ridim Loa we God i givim long ol man Isrel. Wan Hibru slef i mas wok sikis yia nomo, mo long namba seven yia, hem i kam friman. (Eks. 21:2) Be sipos wan slef i laekem masta blong hem tumas, mo i wantem gohed nomo blong wok slef, masta blong hem bambae i mekem hem i stanap long doa, no long pos blong doa, nao i tekem nil, i stikim sora blong hem i gotru blong mekem hol. (Eks. 21:5, 6) ?Hem i mekem samting ya from wanem? Sora i joen wetem fasin blong lesin, mo long lanwis Hibru, tok we i talem se man i lesin, i givim tingting se man ya i obei. Taswe, taem masta i stikim sora blong slef, hemia i soemaot se slef ya i glad nomo blong gohed blong obei long masta blong hem. Sem mak taem yumi givim laef blong yumi long Jehova. Yumi stap soemaot se yumi glad nomo blong obei long hem from we yumi lavem hem.

3. ?Wanem i pulum yumi blong givim laef blong yumi long God?

³ Bifo we yumi baptaes, yumi mekem desisen blong wok olsem wan slef blong Jehova. Taem yumi givim laef blong yumi long Jehova, yumi promes se bambae yumi obei long  hem mo mekem samting we hem i wantem. I no gat wan man i fosem yumi blong mekem desisen ya. Ol yangfala tu, taem oli baptaes, oli mekem olsem from we olgeta nomo oli wantem, be i no blong mekem papa mo mama blong olgeta i glad. Samting we i pulum yumi blong givim laef blong yumi long Jehova, Masta blong yumi long heven, hemia se yumi lavem hem. Aposol Jon i talem se: “Sipos yumi lavem God, hemia i min se yumi stap folem ol tok blong hem.”—1 Jon 5:3.

4. ?Yumi mas mekem wanem blong yumi kam slef blong stret fasin?

⁴ Yumi glad tumas we Jehova i openem rod blong yumi kam slef blong hem. Yumi bilif long sakrefaes blong Jisas, nao sin i no moa bos long yumi. Nating se yumi sinman yet, be yumi glad blong obei long Jehova mo Jisas. Long wan leta we tabu spirit i pulum Pol blong raetem, hem i eksplenem samting ya, i se: “Yufala tu i mas tingbaot yufala olsem we yufala i ded finis, mo fasin blong sin i no moa gat paoa long yufala. Yufala i stap joen long Jisas Kraes, mo yufala i stap laef blong leftemap nem blong God.” Biaen, hem i givim woning ya se: “Sipos yufala i putum yufala i stap aninit long han blong wan man blong obei long hem, be yufala i man blong wok blong hem. . . . Bifo, yufala i olsem ol man blong wok we fasin blong sin i bos blong yufala. Be naoia, long olgeta tingting blong yufala, yufala i stap obei long ol trutok ya we oli tijim yufala long hem. God i mekem yufala i fri finis, fasin ya blong sin, hem i no moa bos blong yufala nao. Naoia, stret fasin i bos blong yufala, mo yufala i olsem ol man blong wok blong hem.” (Rom 6:11, 16-18) Taem yumi givim laef blong yumi long Jehova, yumi soemaot se ‘long olgeta tingting blong yumi, yumi obei.’ Naoia, ‘stret fasin i bos blong yumi,’ hemia i min se yumi kam slef blong stret fasin.

5. ?Yumi stap faet agensem wanem samting? ?From wanem?

⁵ Taem yumi givim laef blong yumi long God, yumi mas faet agensem tu samting. Faswan, hemia sin. Pol tu i mas faet agensem sin. Hem i talem se: “Long tingting blong mi, mi glad tumas long Loa ya blong God. Be mi luk we rabis fasin ya, we i stap wok long laef blong mi, hem i . . . agens long Loa ya, we long tingting blong mi, mi glad tumas long hem. . . . Mi olsem slef blong fasin blong sin, we i stap wok oltaem long tingting blong mi.” (Rom 7:22, 23) From we yumi sinman, oltaem yumi mas faet agensem samting we tingting blong yumi nomo i wantem. Hemia ol samting we God i no laekem. Aposol Pita i talem se: “I nogud yufala i yusum fasin ya we yufala i kam fri man, blong haedem sam fasin we i no stret. Yufala i man blong wok blong God, mo fasin blong yufala i mas soemaot samting ya.”—1 Pita 2:16.

6, 7. ?Setan i mekem wanem blong ol samting blong wol oli pulum tingting blong yumi?

⁶ Namba tu samting we yumi stap faet agensem, hemia wol ya we i stap long paoa blong ol rabis spirit. Setan i rulum wol ya, mo hem i traehad blong pulumaot yumi long Jehova mo Jisas. Hem i pulum yumi blong folem fasin blong wol, nao yumi kam slef blong hem. (Ridim Efesas 6:11, 12.) Hem i mekem se ol samting blong wol oli pulum ae mo tingting blong yumi. From samting ya, aposol Jon i givim woning se: “Man we i laekem tumas ol fasin blong wol, hem i no save lavem Papa blong yumi. Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo.”—1 Jon 2:15, 16.

⁷ Tingting blong ol man long wol ya se oli wantem kam rij mo oli wantem gat plante samting. Setan nao i mekem ol man oli ting se mane i givim glad. I gat plante moa stoa i bitim bifo. Ol bisnes oli mekem plante toktok long televisin mo radio blong pulum yumi, blong yumi pem olting mo yumi gat wan isi  laef. Ol kampani blong plen oli pulum yumi blong yumi wokbaot i go long ol naesfala ples long ol narafala kantri. Long ol trip ya, yumi joen wetem ol man we oli gat tingting blong wol nomo. Yes, long evri ples raonabaot long yumi, yumi harem ol tok we i blong pulum yumi blong yumi gat wan gudfala laef. Be blong kasem samting ya, oltaem yumi mas folem tingting blong wol nomo.

8, 9. ?Sipos yumi wantem plante samting, yumi save kasem wanem trabol? ?From wanem?

⁸ Pita i givim woning long yumi taem hem i tokbaot sam Kristin bifo we oli gat tingting blong wol ya, i se: “Oli save kam sidaon blong kakae wetem yufala, be long semtaem nomo, oli stap giaman long yufala, oli stap mekem nogud. Oli stap mekem ol flas tok we i krangke nomo, blong leftemap ol rabis tingting ya we man i wantem ol samting blong bodi blong hem nomo. . . . Oli stap promes long ol man ya, se bambae oli fri, be olgeta ya oli no fri nating, oli olsem slef nomo blong ol fasin ya we i stap spolem olgeta. Olgeta oli no fri, from we taem wan fasin i winim man, we man i no save blokem, man ya i olsem slef blong fasin ya nao.”—2 Pita 2:13, 18, 19.

⁹ Taem yumi kasem samting we ‘ae blong yumi i luk,’ yumi no kam fri nating. Be yumi kam slef blong Setan, masta blong wol ya. (1 Jon 5:19) Sipos yumi wantem plante samting, yumi save kam slef blong ol samting ya. Yumi save hivimap ol sas samting gogo, i had blong yumi lego.

10, 11. ?Setan i wantem moa blong spolem hu? ?Ol kos long skul oli save mekem wanem trabol long yangfala?

¹⁰ Setan i wantem moa blong spolem olgeta we oli no gat plante save. Taswe hem i traem spolem ol yangfala. Hem i no glad taem wan yangfala, no wan narafala man, i wantem wok olsem slef blong Jehova. Hem i wantem se olgeta we oli givim laef blong olgeta long Jehova finis, oli lego hem.

¹¹ Yu traem tingbaot slef ya we masta blong hem i stikim sora blong hem. Fastaem, slef ya i mas harem i soa. Taem soa ya i finis, i gat wan mak i stap olwe, we i soemaot se hem i wok blong masta ya. Taem wan yangfala i jusum wan rod we i defren long hemia blong ol fren blong hem, hem tu i save harem i soa. Samting ya i had. Wan eksampol hemia: Setan i givim tingting ya se blong harem gud long laef, yangfala i mas gat wan gudfala wok. Be tingting ya i no tru. Sipos yumi wantem harem gud tru, yumi mas putum Jehova long fasples long laef blong yumi. Jisas i talem se: “Olgeta we oli wantem tumas blong mekem ol samting we God i wantem, oli save harem gud.” (Mat. 5:6) Ol Kristin we oli givim laef blong olgeta long Jehova, oli laef blong mekem samting  we God i wantem, be i no samting we Setan i wantem. Oli ridim Baebol mo oli stap tingting dip long hem “long dei mo long naet.” (Ridim Ol Sam 1:1-3.) Be plante kos we ol yangfala oli tekem long skul oli kakae taem blong olgeta. Nao oli no moa gat taem blong tingting dip mo fren gud wetem Jehova.

12. ?Ol yangfala oli mas jusum wanem?

¹² Long taem bifo, i no isi blong wan slef we i Kristin, i wok blong wan masta we i no Kristin. Long fas leta we Pol i raetem long ol Kristin long Korin, hem i talem se: “Taem God i singaot yu, maet yu yu slef blong wan man, be yu no wari. Be sipos yu gat janis blong kam friman, yu gohed, yu tekem janis ya.” (1 Kor. 7:21) Wan masta we i no Kristin i save mekem i strong tumas long wan Kristin slef. I moa gud sipos slef ya i save fri nomo. Tede, long plante kantri, loa i talem hamas yia wan yangfala i mas skul. Biaen, hem i mas jusum se hem i wantem gohed blong skul moa, no nogat. Ale sipos hem i jusum blong gohed blong skul, bambae samting ya i holemtaet hem, nao hem i no moa fri blong mekem wok blong God fultaem.—Ridim 1 Korin 7:23.

13. ?Ol man blong Jehova oli ting se i gud blong skul plante plante yia, no olsem wanem?

¹³ Pol i givim woning long ol Kristin long Kolosi se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long . . . wol ya . . . i no kamaot long Kraes.” (Kol. 2:8) “Rabis tok ya we i folem waes blong man,” hemia ol tingting blong wol ya we oli kamaot long ol man we oli skul gud. Taem yangfala i gohed blong skul plante plante yia, hem i fulumap plante waes blong man long hed blong hem. Be plante taem, hem i no lanem wan wok we i save givhan long laef blong hem. Ol man blong Jehova oli skul naf nomo blong oli save kasem wan wok we i sapotem olgeta long wok blong God. Oli tinghevi long tok we Pol i talem long Timoti se: “Fasin ya blong bilif . . . i rod blong man ya nomo we i save harem gud long wanem samting we hem i gat. Be sipos yumi gat kakae blong yumi mo klos blong yumi, hemia i naf, yumi save harem gud.” (1 Tim. 6:6, 8) Yumi ol tru Kristin, yumi no traehad blong kasem stefeket we i givim haenem long yumi long wol ya. Be yumi prij plante blong faenem ol man we oli wantem kam man blong Kraes.—Ridim 2 Korin 3:1-3.

14. Folem Filipae 3:8, ?wanem tingting blong Pol taem hem i wok olsem slef blong God mo Kraes?

¹⁴ Yu traem tingbaot aposol Pol. Gamaliel, we i wan tija blong Loa blong ol man Isrel, hem nao i tijim Pol. Taem Gamaliel i tijim  Pol, i olsem we Pol i skul long wan yunivesiti. ?Be Pol i tingbaot hae save ya olsem wanem? ?Hem i ting se i moa gud i winim we hem i wok slef blong God mo Kraes? Hem i raetem se: “Mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi.” Hem i gohed se: “From Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.” (Fil. 3:8) Tingting ya blong Pol i save givhan long ol yangfala Kristin wetem ol Kristin papa mo mama blong olgeta, taem oli stap jusum se bambae oli skul hamas yia. (Yu luk ol pija.)

15, 16. ?Ogenaesesen blong Jehova i givim wanem trening? ?Yumi wantem kasem trening ya from wanem?

¹⁵ ?Laef long yunivesiti i olsem wanem? Plante yangfala long ples ya oli stronghed. Oli slip olbaot mo oli dring bitim mak. (Efes. 2:2) Ogenaesesen blong Jehova i defren. Kristin kongregesen we oltaem i gat pis long hem, i givim trening we i beswan. Evri wik, yumi wanwan i gat janis blong kasem trening long Tiokratik Skul. Mo tu, i gat wan skul we i blong ol brata nomo we oli no mared be oli stap paenia (Baebol Skul Blong Ol Brata We Oli No Mared), mo skul blong olgeta we oli mared mo oli stap paenia (Baebol Skul Blong Ol Man Mo Woman Blong Olgeta). Ol trening we yumi kasem long ol skul ya, oli givhan long yumi blong yumi obei long Jehova, Masta blong yumi long heven.

¹⁶ Long Watch Tower Publications Index mo Watchtower Library long CD-ROM (Franis/Inglis), yumi save faenem plante gudfala save blong God. Yumi wantem kasem ol save ya blong yusum long wosip blong Jehova nomo. Mo tu, yumi lanem olsem wanem blong givhan long ol narafala blong oli fren wetem God. (2 Kor. 5:20) Nao olgeta tu oli save givhan long narafala bakegen.—2 Tim. 2:2.

17. ?Taem yumi jusum trening we i kam long Jehova, yumi kasem wanem blesing?

¹⁷ Long parabol blong Jisas blong trifala slef we oli holem mane blong masta blong olgeta, masta i talem gudfala toktok long tu slef we tufala i lukaot gud long wok blong tufala. Ale hem i putum plante moa wok long han blong tufala. Masta i glad, mo tufala tu i glad. (Ridim Matiu 25:21, 23.) Tede, taem yumi jusum trening we i kam long Jehova, yumi tu yumi glad, mo yumi kasem plante blesing. Yu traem tingbaot yangfala Michael. Hem i kasem ol gudfala mak long skul. Ale ol tija oli singaot hem i kam long wan miting, nao oli talem se hem i gat janis blong skul long yunivesiti. Be oli sek taem Michael i talem se hem i no save go long yunivesiti. Hem i jusum wan sotfala kos nomo we i save tijim hem long wan wok, blong sapotem hem long wok blong fultaem paenia. ?Olsem wanem? ?Michael i harem se hem i mekem wan desisen we i no stret? Nogat. Hem i talem se trening we hem i kasem long Baebol mo long wok blong elda, i beswan. Mo hem i talem tu se: “Ol blesing we mi mi kasem oli bigwan tumas, i bitim bigfala pei we mi save kasem long wan wok long wol. Mi glad tumas we mi no gohed blong skul plante moa yia.”

18. ?From wanem i gud yu jusum trening we i kam long Jehova?

¹⁸ Trening we i kam long Jehova i givim save long yumi long samting we hem i wantem, mo i givhan long yumi blong yumi wok olsem slef blong hem. Trening ya i mekem se yumi gat janis blong kam fri, yumi no moa slef blong ‘ol samting we oli stap roten nomo.’ Mo biaen, ‘bambae God i mekem yumi fri olgeta, olsem ol pikinini blong hem.’ (Rom 8:21) Antap long ol samting ya, hemia nambawan rod blong soemaot se yumi lavem tumas Jehova, Masta blong yumi long heven.—Eks. 21:5.