1, 2. Bifo we Jisas i mekem las trip blong hem i go long Jerusalem, ?maet sam aposol blong Jisas oli tingting olsem wanem?

‘SKAE i klia, mo mifala i save luk niu mun. Yestede, long naet, ol man long Jerusalem oli luk niu mun finis. Nao ol memba blong Sanhedrin oli talemaot se niufala manis i stat, hemia Nisan. Kwiktaem nomo ol man oli laetem faea blong talemaot nius ya, sipos no, oli ron i go talem long ol man. Ol man long ples ya tu oli kasem nius ya. Jisas bambae i wantem go long Jerusalem. Bambae hem i wantem kasem longwe bifo long Lafet blong Pasova.’

² Ating ol aposol we oli stap wetem Jisas oli gat tingting olsem, bifo we hem i aot blong mekem las trip blong hem i go long Jerusalem. Olgeta ya oli stap long Perea, long narasaed Jodan Reva. (Mat. 19:1; 20:​17, 29; Mak 10:​1, 32, 46) Taem ol man Isrel oli save se manis Nisan i stat, oli kaontem 13 dei moa, nao oli mekem Lafet blong Pasova long namba 14 dei blong Nisan, afta we san i godaon.

3. ?From wanem ol tru Kristin oli wantem save stret dei blong Pasova?

³ Yumi mekem Kakae blong Masta long dei we i laenap wetem dei blong Lafet blong Pasova. Long yia 2014, dei ya i foldaon long namba 14 Eprel, taem san i godaon. Hemia wan spesel dei blong ol tru Kristin mo ol narafala man we oli kam joen wetem olgeta. ?Hem i wan spesel dei from wanem? Yumi ridim ansa long 1 Korin 11:​23-25, se: ‘Long naet ya we biaen wan man i letem Jisas, Masta blong yumi i go long han blong ol enemi blong hem, Jisas i tekem bred. Nao hem i prea blong talem tangkiu long God from, mo hem i brekem bred ya, i talem se, “Hemia bodi blong mi, we bambae mi letem from yufala. Oltaem yufala i mas mekem samting ya blong tingbaot mi bakegen.” Mo hem i tekem kap,’ i mekem sem fasin bakegen.

4. (1) Taem yu tingbaot Memoriol, ?wanem ol kwestin we maet yu askem? (2) ?Yumi save stret dei blong Memoriol olsem wanem? (Yu luk bokis ya “Dei Blong Memoriol Long Yia 2014.”)

⁴ Jisas i tokbaot wan lafet nomo we ol man blong hem oli mas mekem evri yia, hemia Memoriol blong ded blong hem. Taswe, yu tu bambae yu wantem stap long taem ya. Be i gud yu askem se: ‘?Yumi mekem wanem blong rerem memoriol? ?Oli yusum wanem samting long Memoriol we i olsem blad mo bodi blong Jisas? ?Miting ya bambae i olsem wanem? ?Memoriol i impoten from wanem?’

5. ?Jisas i talem long ol aposol blong hem blong oli rerem wanem blong Pasova?

⁵ Taem Jisas i talem long ol aposol blong hem blong oli mekem rere wan rum blong Pasova, hem i no talem long olgeta blong oli flasem gud rum ya. Jisas i wantem nomo wan rum we i klin mo i naf long hem mo ol aposol blong hem. (Ridim Mak 14:​12-16.) Ol aposol oli mas rerem evri samting we oli nidim, olsem bred we i no gat is long hem, mo red waen. Taem oli kakae Pasova finis, Jisas i i tokbaot bred mo waen. Hemia tufala samting we ol man blong hem oli mas yusum taem oli mekem Memoriol.

6. (1) Afta we oli mekem Lafet blong Pasova, ?Jisas i talem long ol aposol blong oli mekem wanem long bred we i stap? (2) ?Yumi yusum wanem kaen bred long Memoriol?

⁶ Matiu i stap long taem ya, mo biaen hem i raetem se: “Jisas i tekem bred, i prea blong talem tangkiu long God from. Nao hem i brekem, i givim long ol man blong hem, i talem se, ‘Yufala i tekem, yufala i kakae.’ ” (Mat. 26:26) “Bred” ya i no gat is long hem, i olsem bred blong Pasova. (Eks. 12:8; Dut. 16:⁠3) Oli wokem bred ya long sid blong wit we oli graenem i kam flaoa, mo oli mik­sim wetem wota. Oli no putum is long hem, ale bred ya i no solap. Oli no putum sol long hem tu. Bred ya i olsem wan bisket nomo, mo i isi blong brekem. Long taem blong yumi, ol elda oli askem long wan long kongregesen blong i wokem sem kaen bred ya bifo long dei blong Memoriol. Bred ya oli save wokem long flaoa blong wit we oli miksim wetem smol wota, mo oli kukum long wan sospen we oli putum smol oel long hem. Long sam ples we i no gat flaoa blong wit, ol brata oli save yusum flaoa we oli wokem long raes, bale, kon, no wan narafala sid olsem.

7. ?Wanem i stap insaed long kap we Jisas i pasem i goraon long Kakae blong Masta? ?Yumi save yusum wanem kaen waen long Memoriol?

⁷ Matiu i gohed, i talem se Jisas i “tekem kap waen, i talem tangkiu long God from, nao i pasem i go long olgeta, i talem se, ‘Yufala evriwan, yufala i dring long hem.’ ” (Mat. 26:​27, 28) Jisas i holem wan kap blong red waen. ?Olsem wanem yumi save se hem i red waen, i no jus blong ol grep we oli jes pikimap nomo? Hemia from we taem blong  pikimap ol grep i pas finis. Long Ijip bifo, oli no dring waen long Lafet blong Pasova. Be Jisas i no talem se i rong blong dring waen long Pasova. Mo hem i yusum waen taem hem i stanemap Kakae blong Masta. Ale ol Kristin tede tu oli yusum waen long Memoriol. ?Wanem kaen waen nao we yumi save yusum? Waen we yumi yusum long Memoriol i no mas waen we oli ademap sam narafala samting long hem taem oli wokem, olsem brandi no sam samting blong mekem i tes gud. Hem i mas red waen we oli no ademap sam samting long hem. Maet wan man i mekem waen ya long haos blong hem nomo, no yumi save yusum waen we yumi pem long stoa, olsem waen ya Beaujolais, Burgundy, mo Cabernet.

8. ?From wanem i impoten tumas we ol Kristin oli save mining blong bred mo waen?

⁸ Ol tok blong aposol Pol i soemaot se nating we yumi no aposol, be yumi tu yumi save go long Kakae blong Masta. Pol i talem long ol Kristin blong Korin se: ‘Jisas i prea blong talem tangkiu long God, mo hem i brekem bred ya, i talem se, “Hemia bodi blong mi, we bambae mi letem from yufala. Oltaem yufala i mas mekem samting ya blong tingbaot mi bakegen.” ’ (1 Kor. 11:24) Folem tok blong Jisas, ol Kristin tede oli mas mekem Memoriol wan taem evri yia. Taswe, i impoten tumas we oli save mining blong bred mo waen.

9. ?Sam man we oli strong long skul blong olgeta oli bilif se bred ya hem i wanem? ?Bilif ya i stret?

⁹ Sam man we oli strong long skul blong olgeta, oli talem se tok ya, “hemia bodi blong mi,” i min se bred ya i prapa bodi blong Jisas. Oli bilif se wan merikel i mekem we bred ya i kam prapa bodi blong Jisas. Be bilif ya i no tru. * Jisas i stap yet wetem ol aposol blong hem. Mo bred tu we i no gat is long hem, i stap long tebol long fored blong olgeta. I klia se Jisas i wantem talem se bred ya i saen  nomo blong bodi blong hem. Jisas i yusum plante pija tok olsem taem hem i tijim ol man.​—Jon 2:​19-21; 4:​13, 14; 10:7; 15:⁠1.

10. ?Bred we yumi yusum long Memoriol i saen blong wanem samting?

¹⁰ Bred we ol aposol oli luk, mo afta oli kakae, hem i saen blong bodi blong Jisas. I gat wan taem we ol tru Kristin oli bin ting se bred ya i minim grup blong ol Kristin we tabu spirit i makemaot olgeta, we Baebol i singaot olgeta se ‘bodi blong Kraes.’ Oli gat tingting olsem from we Jisas i brekem bred ya i go long plante pis. Oli no ting se bred i minim prapa bodi blong Jisas, from we i no gat wan bun nating i brok long bodi blong hem. (Efes. 4:12; Rom 12:​4, 5; 1 Kor. 10:​16, 17; 12:27) Be ol Kristin ya oli stadi gud, nao oli luksave se bred ya i saen blong prapa bodi blong Jisas. Plante taem Baebol i tokbaot se Jisas i “harem nogud tumas long bodi blong hem,” mo i talem tu se ol man oli nilim bodi blong hem long pos blong i ded. Taswe bred we yumi yusum long Memoriol i saen nomo blong prapa bodi blong Jisas, we hem i givim olsem wan sakrefaes blong pemaot sin blong yumi.​—1 Pita 2:​21-24; 4:1; Jon 19:​33-36; Hib. 10:​5-7.

11, 12. (1) ?Jisas i tokbaot waen olsem wanem? (2) ?Waen we yumi yusum long Memoriol i saen blong wanem samting?

¹¹ Taem yumi kasem save long mining blong bred, yumi kasem save tu long ol narafala tok blong Jisas. Hem i tokbaot waen, i se: “Long sem fasin, taem olgeta oli kakae finis, hem i tekem kap, nao i talem se, ‘Kap ya i olsem niufala promes blong God, we blad blong mi bambae i ron blong mekem i stanap.’ ” (1 Kor. 11:25) Plante Baebol oli talem sem tok we Baebol blong Robert Young i talem, i se: “Kap ya, hemia niufala promes we i stap long blad blong mi.” (Mifala nomo i raetem long blak raeting.) ?Olsem wanem? ?Kap we Jisas i holem long han blong hem, hem nao i niufala promes? Nogat. Jisas i stap tokbaot waen we i stap insaed long kap ya. ?Waen ya i saen blong wanem samting? Hem i saen blong prapa blad blong hem we bambae i ron olsem wan sakrefaes.

¹² Long Gospel blong Luk, yumi ridim tok blong Jisas, se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.” (Luk 22:20) Mo long buk blong Matiu, yumi ridim se, blad blong Jisas “bambae i ron blong tekemaot ol sin blong plante man.” (Mat. 26:28) Taswe red waen ya i saen blong prapa blad blong Jisas. Blad ya i pemaot yumi long sin mo ded, nao God i save fogivim yumi, i tekemaot ol sin blong yumi.​—Ridim Efesas 1:⁠7.

13. ?Bambae yu luk wanem long Memoriol blong ded blong Kraes?

¹³ Sipos hem i fastaem blong yu blong go long Memoriol wetem ol Witnes blong Jehova, ?yu ting se bambae yu luk wanem? Memoriol ya, bambae oli mekem long wan ples we i no flas tumas, be hem i klin mo i naf blong evriwan oli save sidaon mo harem gud long miting ya. Bambae i gat sam flaoa we oli putum blong flasem ples ya, be oli no bitim mak, mo miting ya i no olsem wan lafet blong wol. Wan elda bambae i givim wan tok we i klia, mo i toktok wetem respek. Bambae hem i tokbaot Kakae blong Masta, mo i eksplenem se Kraes i ded blong pemaot yumi long sin mo ded, nao yumi gat janis blong kasem laef. (Ridim Rom 5:​8-10.) Elda ya bambae i tokbaot tu grup. Wan long tufala grup ya i kasem promes blong go long heven, narafala grup i kasem promes blong laef long wol.

14. Long Memoriol, ?elda bambae i tokbaot wanem tufala promes?

¹⁴ Grup blong ol Kristin we i kasem promes blong rul wetem Kraes long heven, i smol nomo. Ol aposol we oli stap tru long Jisas, olgeta tu oli stap long grup ya. (Luk 12:32; 22:​19, 20; Rev. 14:⁠1) Be bighaf blong ol tru Kristin oli stap long narafala grup. Oli kasem promes blong laef olwe long paradaes long wol ya. Longtaem finis i kam, ol Kristin oli prea se samting we God i wantem bambae i kamtru long wol. Hemia nao samting we bambae i hapen. (Mat. 6:10) Baebol i tokbaot gudfala laef we bambae oli kasem mo oli harem gud long hem blong olwe.​—Aes. 11:​6-9; 35:​5,6; 65:​21-23.

15, 16. Long Kakae blong Masta, ?yumi mekem wanem long bred ya?

¹⁵ Afta we brata i tokbaot  tufala nambawan promes ya, bambae hem i talem se naoia yumi mekem sem mak olsem Jisas i mekem, taem hem i stanemap Kakae blong Masta. Bred we i no gat is long hem mo red waen, bambae i stap long tebol klosap long hem. Bambae hem i ridim ol tok blong Baebol, blong talem samting we Jisas i mekem long bred. Maet hem i ridim long buk blong Matiu, we i talem se: “Jisas i tekem bred, i prea blong talem tangkiu long God from. Nao hem i brekem, i givim long ol man blong hem, i talem se, ‘Yufala i tekem, yufala i kakae. Hemia bodi blong mi.’ ” (Mat. 26:26) Jisas i brekem bred ya i go long plante pis, blong i save pasem i goraon long ol aposol blong hem. Long Memoriol long namba 14 Eprel, bambae yu luk sem kaen bred ya i stap long ol plet we oli pasem i goraon.

¹⁶ Bambae wan brata i mekem wan sot prea, nao oli pasem ol plet i goraon. Bambae i gat naf plet blong mekem se i no tekem taem tumas blong pasem bred i goraon long olgeta man we oli stap. Oli no folem sam spesel kastom blong skul blong mekem samting ya. Oli mekem long fasin we i stret long ol ples wanwan. Long Memoriol long yia 2013, long bighaf blong ol kongregesen, i no gat man i kakae bred ya.

17. Long Memoriol, ?yumi mekem wanem long waen, folem tok blong Jisas?

¹⁷ Taem oli pasem bred finis, elda bambae i ridim tok blong Jisas blong talem wanem we yumi mas mekem long waen. Baebol i talem se: “[Jisas] i tekem kap waen, i talem tangkiu long God from, nao i pasem i go long olgeta, i talem se, ‘Yufala evriwan, yufala i dring long hem, from we hemia blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.’ ” (Mat. 26:​27, 28) Folem tok ya blong Jisas, wan brata bambae i mekem prea bakegen, nao bambae oli pasem red waen i goraon.

18. Sipos i no gat man i kakae bred mo dring waen, no sam nomo i kakae mo i dring, ?be from wanem i impoten we yumi evriwan i stap long Memoriol?

¹⁸ Olgeta we bambae oli rul wetem Kraes long heven, olgeta nomo oli kakae bred mo dring waen. Taswe long taem blong Memoriol, bighaf blong ol man bambae oli no kakae bred mo dring waen, be oli pasem nomo i go long narafala we i sidaon klosap long olgeta. (Ridim Luk 22:​28-30; 2 Tim. 4:18) Nating se bighaf blong ol Kristin oli no kakae bred mo dring waen, be i impoten tumas we oli stap long Memoriol. ?From wanem? From we samting ya i soemaot se oli tinghae long sakrefaes blong Jisas. Mo tu, long taem ya we Memoriol i gohed, oli tingbaot ol blesing we sakrefaes blong Jisas i givim long olgeta. Wan long ol blesing ya, hemia se oli gat janis blong stap wetem “bigfala kampani blong man,” we bambae oli pastru long “bigfala trabol.” Olgeta ya oli bilif long sakrefaes blong Jisas, mo from samting ya, God i luk olgeta se oli stret man. I olsem we oli “wasem klos blong olgeta finis blong mekem oli waet long blad blong Smol Sipsip ya.”​—Rev. 7:​9, 14-17, NW.

19. ?Yumi save mekem wanem, blong rere from Memoriol mo blong kasem save long mining blong hem?

¹⁹ ?Ol Witnes blong Jehova long fulwol, oli mekem wanem blong rere from Memoriol? Long ol wik bifo long Memoriol, oli singaot ol man i kam joen long spesel taem ya. Mo long ol dei bifo long spesel miting ya, oli ridim ol stori blong Baebol we oli tokbaot wanem we Jisas i mekem, mo wanem we i hapen long ol dei bifo long Kakae blong Masta long yia 33. Oli mekem ol plan blong meksua se oli stap long Memoriol. Yumi mas kam eli long Haos Kingdom blong welkamem olgeta we yumi singaot olgeta, mo blong yumi no mestem haf blong miting ya. Taem oli ridim mo eksplenem ol vas blong Baebol, i gud yumi evriwan i folem long Baebol blong yumi. Olsem nao, bambae yumi kasem save gud long mining blong Memoriol. Bigfala samting, se yumi mas stap long Memoriol. Hemia i soemaot se yumi tinghae long sakrefaes blong Jisas, mo yumi obei gud long tok blong hem se: “Yufala i mas mekem samting ya blong tingbaot mi bakegen.”​—1 Kor. 11:⁠24.