1, 2. (1) ?Wanem i save mekem se man i no luksave samting, olsem we hem i blaen? (2) ?Wanem samting we yumi save long saed blong Kingdom blong God?

MAET yu makem finis se ol man oli no stap rimemba sem samting long saed blong wan samting we i hapen. Long sem fasin, sipos wan sikman i pas long dokta nao dokta i talemaot long hem se hem i gat wan sik, maet afta long samting ya, i had blong man ya i rimemba wanem tok stret we dokta i talem long hem. No maet wan man i no faenem ki no glas blong ae blong hem, nating se oli stap long fored blong hem nomo. ?From wanem i olsem? Ol man blong stadi oli talem se man we i mekem olsem, i olsem we hem i blaen. Samting ya i hapen from we yumi traem blong mekem plante samting long sem taem. Tru ya, bren blong yumi i save tingbaot wan samting nomo, i no plante samting wantaem.

² Plante man tede oli no kasem save mining blong ol samting we oli stap hapen long wol. I olsem we oli blaen. Maet oli talem se wol i jenis bigwan long 1914 i kam, be oli no kasem save se from wanem i olsem. Yumi we yumi stadi long Baebol, yumi save se Kingdom blong God i stanap long 1914 taem God i putumap Jisas i kam King long heven. Mo yumi save se Jehova i no ansa fulwan yet long  prea ya se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Mat. 6:10, NW) Jehova bambae i ansa fulwan long prea ya, taem hem i finisim rabis wol ya. Taem samting ya i hapen finis, ale samting we God i wantem bambae i kamaot long wol ya olsem we i kamaot finis long heven.

3. ?Stadi we yumi mekem long Baebol i givhan long yumi blong luksave wanem?

³ From we yumi stadi oltaem long Baebol, yumi luksave se ol profet tok oli stap kamtru tede. !Yumi defren olgeta long ol narafala man! Olgeta oli bisi tumas long laef blong olgeta, nao oli no luksave ol samting we oli pruvum klia se Kraes i rul finis long 1914, mo klosap nao bambae hem i spolem rabis wol ya. I gud yu askem se: ‘?Mi mi bilif yet se ol samting we oli stap hapen long wol oli pruvum se en i klosap?’ Nating sipos yu jes baptaes nomo, ?yu yu putum tingting blong yu long wanem? I gud yumi tokbaot trifala impoten risen we oli pulum yumi blong trastem se i no longtaem, samting we God i wantem bambae i kamaot long wol ya.

4, 5. (1) ?Jisas i mekem wanem stat long 1914? (Yu luk pija long stat blong stadi.) (2) ?Ol trifala man we oli ron long hos mo oli stap biaen long Jisas, oli saen blong wanem? ?Profet tok ya i kamtru olsem wanem?

⁴ Long 1914, Jisas Kraes i kam King long Kingdom blong God. Hemia i olsem we hem i kasem hat blong king long heven. Profet tok long Revelesen japta 6 i tokbaot Jisas se hem i stap ron long wan waet hos. Afta we Jisas i kam King, kwiktaem nomo hem i stat blong resis i go blong i winim faet blong hem agensem rabis wol blong Setan. (Ridim Revelesen 6:1, 2.) Profet tok ya i talem se afta we Kingdom blong God i stat rul, ol samting long wol ya bambae oli kam nogud kwiktaem nomo, mo bambae oli kam mowas i bitim bifo. Bambae i gat faet, kakae i sot, sik, mo ol narafala samting we oli mekem man i ded. Long pijatok ya, ol trifala man we oli ron long hos mo oli stap biaen long Jisas Kraes, oli saen blong ol samting ya we oli stap hapen long wol.—Rev. 6:3-8.

⁵ Olsem Baebol i talem, ol faet oli mekem se “pis i finis long wol,” nating se ol haeman oli mekem plante promes blong tokbaot pis mo blong traem mekem we ol kantri oli wok tugeta. Fas bigfala faet long wol, i faswan long plante nogud faet we i karemaot pis long wol. Nating se stat long 1914, ol kantri oli wok had blong oli gat mane, mo ol saentis oli traehad blong faenemaot ol niufala save, be namba blong ol man we oli no gat kakae i stap kam antap moa. Evri man oli agri se ol sik, ol disasta, mo ol narafala trabol, oli stap kam antap mo oli mekem plante milian man oli ded evri yia. Ol trabol olsem oli kamaot plante taem, oli kam nogud moa, mo oli kilim i ded moa man i bitim bifo. ?Yu yu luksave se ol samting ya oli minim wanem?

6. ?Hu i stap wet blong luk profet tok blong Baebol i kamtru, mo oli mekem wanem taem profet tok ya i kamtru?

⁶ Taem fas bigfala faet blong wol i stat mo flu blong Spen i kilim i ded plante man, samting ya i pulum tingting blong plante man. Be ol tabu Kristin oli no olsem. Olgeta oli wet blong luk se “taem blong ol hiten man” i finis long 1914. (Luk 21:24, Nyutesteman wetem Ol Sam Long Bislama) Ol tabu Kristin oli no save stret se profet tok ya bambae i kamtru olsem wanem, be oli save se long 1914, wan impoten samting bambae i hapen long Kingdom blong God. Be taem oli kasem save gud se profet tok blong Baebol i kamtru, oli talemaot wetem strong tingting long ol man se rul blong God i stat. Plante man oli agensem strong ol man we oli talemaot Kingdom blong God. Be fasin agens ya we oli kasem, i wan long ol profet tok blong Baebol we i kamtru. Blong plante yia, ol enemi blong Kingdom oli yusum loa blong kantri blong olgeta, blong stopem wok blong talemaot Kingdom. Mo tu  oli kilim nogud ol brata blong yumi, oli putum olgeta long kalabus, mo oli kilim olgeta i ded.—Sam 94:20; Rev. 12:15.

7. ?From wanem plante man oli no luksave mining blong ol samting we oli stap hapen tede?

⁷ Yes, i gat plante samting we i pruvum se Kingdom blong God i stap rul finis long heven. ?Be from wanem plante man oli no luksave mining blong ol samting ya? ?From wanem oli no luksave se ol samting we oli hapen long wol, oli mekem ol profet tok blong Baebol oli kamtru, olsem we ol man blong God oli stap talemaot plante yia finis? ?Yu ting se hemia from we oli putum tingting blong olgeta long samting nomo we oli save luk wetem prapa ae blong olgeta? (2 Kor. 5:7) ?Oli bisi tumas long laef blong olgeta, nao oli no luksave samting we God i stap mekem? (Mat. 24:37-39) ?Ol giaman tingting blong wol blong Setan oli pulum tingting blong olgeta? (2 Kor. 4:4) Yumi mas gat bilif, mo yumi mas naf blong yusum tingting blong yumi blong luksave samting we yumi no save luk wetem prapa ae blong yumi, blong yumi kasem save long samting we Kingdom blong God i stap mekem. !Yumi glad tumas se yumi luksave samting we i stap hapen!

8-10. (1) ?Profet tok blong 2 Timoti 3:1-5 i kamtru olsem wanem? (2) ?From wanem yumi talem se rabis fasin i stap kam moa nogud mo i kam mowas?

⁸ I gat wan nambatu risen we i pruvum se i no longtaem, Kingdom blong God bambae i rul long wol ya. Fasin blong ol man i stap kam nogud we i nogud, mo i stap kam mowas i bitim bifo. Klosap 100 yia nao, yumi stap luk profet tok blong 2 Timoti 3:1-5 i kamtru. Ol rabis fasin we ol vas ya oli tokbaot, oli kasem evri ples long wol. ?Yu tu yu luk samting ya? I gud yumi tokbaot sam eksampol we i soemaot samting ya.—Ridim 2 Timoti 3:1, 13.

⁹ Yu traem skelem ol fasin we ol man long ol yia 1940 mo 1950 oli luk se oli rabis, wetem ol fasin we i stap hapen tede long ples blong wok, long ol muvi mo miusik, long spot, mo long ol stael blong klos mo hea. Long evri ples, raf fasin i kam antap mo ol rabis fasin blong man wetem woman tu i kam antap. Ol man oli wantem mekem se ol narafala i sek long raf fasin blong olgeta, long ol rabis fasin we oli mekem wetem man no woman, mo long fasin blong olgeta blong givim kil long narafala. Ol program blong televisin we plante man long ol yia 1950 oli ting se oli  nogud, naoia oli olsem wan samting we famle i save harem gud blong wajem. Plante man oli luk se ol man we oli slip wetem man bakegen, no ol woman we oli slip wetem woman bakegen, oli yusum ol muvi, ol miusik, mo ol niufala stael blong klos, blong leftemap fasin blong laef blong olgeta long fes blong ol man. !Yumi glad tumas se yumi save tingting blong God long saed blong ol samting ya!—Ridim Jud 14, 15.

¹⁰ Mo tu, yu traem skelem fasin blong ol yangfala bifo wetem ol yangfala tede. Long ol yia 1950, ol papa mo mama oli wari se pikinini blong olgeta bambae i smok, i drong, no i danis long fasin we i no stret. Bifo, sipos pikinini i mekem ol fasin ya, hemia i soemaot se hem i stronghed. Be tede i defren olgeta. Plante taem yumi harem ol nius we oli mekem yumi sek. Hemia sam nius olsem: Wan studen we i gat 15 yia i sutum ol fren blong hem long skul, nao i kilim i ded 2, mo i givim kil long 13 narafala studen. Wan grup blong ol yangfala we oli drong oli kilim nogud wan smol gel blong naen yia gogo hem i ded, mo oli faetem papa blong hem mo kasen brata blong hem. Wan narafala nius i talem se long wan kantri long Esia, ol yangfala nao oli stamba blong haf blong ol rabis fasin we oli hapen long ol ten yia we oli pas. ?Yu ting se wan man i save talem se ol samting tede oli stap sem mak nomo?

11. ?From wanem plante man oli no luksave se ol samting oli stap kam mowas?

¹¹ Aposol Pita i talem stret se: ‘Long taem blong ol las dei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, oli talem se, “?Olsem wanem nao? ?Hem i promes finis blong kam, be hem i stap wea? Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.”’ (2 Pita 3:3, 4) ?From wanem sam man oli gat tingting olsem? I luk olsem se, taem wan trabol i stap kamaot plante taem, yumi no moa sek long hem. Be ating bambae yumi sek sipos wantaem nomo, wan gudfala fren blong yumi i mekem wan narakaen fasin we yumi neva luk. Taem fasin blong ol man i stap kam nogud sloslo olsem, hemia i denja tumas.

12, 13. (1) ?From wanem yumi no mas harem nogud from ol samting we oli stap hapen long wol? (2) ?Wanem bambae i givhan long yumi blong stanap strong long ol las dei ya we ‘laef i kam strong tumas’?

¹² Aposol Pol i givim woning long yumi se long ol las dei, “laef long wol ya bambae i kam strong tumas.” (2 Tim. 3:1) Be yumi no nid blong ronwe long ol samting we oli stap hapen. Yumi save stanap strong long ol trabol ya we oli mekem yumi harem nogud mo yumi fraet, from we Jehova, tabu spirit blong hem, mo kongregesen, oli stap givhan long yumi. Taswe, yumi save holemstrong long Jehova from we “paoa ya we i bigwan tumas” i blong hem, i no blong yumi.—2 Kor. 4:7-10.

¹³ I gud blong makem se taem Pol i talemaot profet tok ya long saed blong ol las dei, hem i statem toktok blong hem olsem: “Yu mas save samting ya.” Ol tok ya oli olsem wan strong tok blong makem se profet tok ya i mas kamtru. Yumi save se laef long wol ya i stap kam moa nogud mo ol man bambae oli mekem i mowas olgeta, gogo kasem taem we Jehova i finisim ol rabis fasin. Ol man we oli stadi long histri oli bin talemaot se sam neson oli kam nogud olgeta, from we ol man blong olgeta oli no moa luksave wanem fasin i stret mo wanem fasin i no stret. Taem yumi stadi long ol buk blong histri, yumi lanem se neva bifo, wol i olsem hemia long taem blong yumi, we ol man oli kam mowas olgeta. Maet plante man oli no wantem luksave samting ya. Be ol samting we oli hapen stat long 1914 i kam, oli pruvum long yumi se i no longtaem Kingdom blong God bambae i finisim ol rabis fasin.

14-16. ?Wanem namba tri risen we i mekem yumi bilif se Kingdom blong God bambae i “kam” i no longtaem?

¹⁴ I gat wan namba tri risen we i pruvum se en i klosap, hemia histri blong ol man blong God. Bifo we Kingdom blong God i stat rul long heven, wan grup blong ol tabu Kristin oli stap mekem wok blong God. Taem ol profet tok oli no kamtru long 1914 olsem we oli bin tingbaot, ?oli mekem wanem? Bighaf blong olgeta oli gohed blong mekem wok blong Jehova, mo oli stanap strong taem oli kasem trabol mo taem ol man oli agensem olgeta. Long ol yia we oli pas, plante long ol tabu Kristin oli holemstrong long Jehova gogo kasem we oli ded.

¹⁵ Long profet tok blong Jisas long saed blong ol las dei, hem i talem se: “Ol man we oli stap laef naoia, bambae oli no save ded evriwan, gogo olgeta samting ya i kamtru.” (Ridim Matiu 24:33-35.) Yumi kasem save se taem Jisas i talem tok ya “ol man we oli stap laef naoia,” hem i stap tokbaot tu grup blong ol tabu Kristin. Fas grup, hemia ol tabu Kristin we oli laef long taem ya we Kraes i stat rul long 1914, mo tabu spirit i makemaot olgeta long 1914 no bifo long 1914.—Rom 8:14-17.

¹⁶ Olgeta we oli stap long seken grup blong “ol man we oli stap laef naoia,” hemia ol man we tabu spirit i makemaot olgeta long taem we sam tabu Kristin blong fas grup ya oli laef yet long wol. Taswe, i no evri tabu Kristin tede we oli “ol man we oli stap laef naoia” we Jisas i tokbaot. Ol tabu Kristin long seken grup ya oli kam moa olfala naoia. Nating se i olsem, ol tok blong Jisas long Matiu 24:34 oli mekem yumi trastem se samfala long “ol man we oli stap laef naoia, bambae oli no save ded evriwan,” gogo oli luk stat long bigfala trabol. Save ya i mas mekem yumi bilif strong moa se i no longtaem, King blong Kingdom blong God bambae i finisim ol rabis fasin long wol, mo i mekem wan niufala wol we stret fasin nomo bambae i stap long hem.—2 Pita 3:13.

17. ?Yumi lanem wanem long ol samting we yumi tokbaot long trifala profet tok ya?

¹⁷ ?Yumi lanem wanem long ol samting we yumi tokbaot long trifala profet tok ya? Jisas i talem se yumi no save stret dei mo taem we en i kam. (Mat. 24:36; 25:13) Be Pol i talem se yumi savegud “taem ya we yumi stap long hem naoia.” (Ridim Rom 13:11.) Taem ya hemia ol las dei we yumi stap laef long hem naoia. Sipos yumi tingting gud long ol profet tok blong Baebol, mo long samting we Jehova God mo Jisas Kraes tufala i stap mekem, bambae yumi luksave klia nomo se yumi stap laef klosap tumas long en blong rabis wol ya.

18. ?Wanem bambae i hapen long olgeta we oli no wantem se Jisas i rul long olgeta?

¹⁸ I no longtaem, olgeta we oli no wantem se Jisas Kraes we i stap raed long waet hos, i rul long olgeta, bambae oli mas luksave se oli rong. Bambae oli no save ronwe long jajmen blong olgeta. Taem samting ya i hapen, plante man bambae oli krae from we oli fraet mo oli talem se: “?Hu nao bambae i naf blong stanap long Dei ya?” (Rev. 6:15-17) Revelesen japta 7 i ansa long kwestin ya. Olgeta we bambae oli “stanap” long dei ya, hemia ol tabu Kristin mo “bigfala kampani” blong ol narafala sipsip, from we God i glad long olgeta. Biaen “bigfala kampani” ya we i no ded long bigfala trabol, bambae oli go insaed long niufala wol blong God.—Rev. 7:9, 13-15.

19. Naoia we yu yu trastem se en i klosap, ?yu yu wantem tumas blong luk wanem i hapen?

¹⁹ Sipos yumi luksave mining blong ol profet tok blong Baebol we oli stap kamtru long taem blong yumi, bambae yumi no letem wol blong Setan i spolem yumi. Bambae yumi no olsem ol man we oli “blaen,” we oli no luksave mining blong ol samting we oli stap hapen long wol. I no longtaem, Kraes bambae i mekem faet laswan blong i win olgeta mo i spolem rabis wol ya long Amagedon. (Rev. 19:11, 19-21) !Yu traem tingbaot, afta we samting ya i hapen, bambae yumi glad tumas!—Rev. 20:1-3, 6; 21:3, 4.