1. ?Wanem ol samting we yumi naf blong mekem from we yumi tekem fasin blong God?

PLANTE taem, yumi harem toktok ya se: “!Boe ya i sem mak nomo long papa blong hem!” I tru se evri pikinini oli tekem fasin blong papa mo mama blong olgeta. Jehova, Papa blong yumi long heven, i givim laef long yumi. (Sam 36:9) Yumi ol pikinini blong hem. Hem i wokem yumi blong yumi “tekem fasin” blong hem. From samting ya, yumi naf blong tingting gud mo mekem ol desisen, mo blong fren gud wetem narafala.—Jen. 1:26.

2. ?From wanem Jehova i save kam besfren blong yumi?

² Jehova i save kam besfren blong yumi, from we hem i lavem yumi, mo yumi bilif long hem mo long Pikinini blong hem. Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) I gat plante man bifo we oli fren gud wetem Jehova. I gud yumi luk tu stori.

3, 4. ?From wanem Ebraham i fren gud wetem Jehova, be neson blong Isrel i no mekem olsem?

³ Jehova i tokbaot Ebraham we i bubu blong ol man Isrel, se ‘hem  i fren blong hem.’ (Aes. 41:8) Mo long 2 Kronikel 20:7, Baebol i talem se Ebraham i fren blong God. ?Wanem i mekem se Ebraham i fren gud wetem God? Hemia bilif blong hem.—Jen.15:6; ridim Jemes 2:21-23.

⁴ Jehova i olsem Papa mo fren blong ol bubu blong Ebraham tu, hemia neson blong Isrel. Be sore tumas, taem ol yia oli pas, neson ya i no moa fren gud wetem Jehova. ?From wanem? From we oli no moa bilif long ol promes blong hem.

5, 6. (1) ?Jehova i kam fren blong yu olsem wanem? (2) ?Wanem kwestin we i gud yumi askem?

⁵ Taem yu gohed blong savegud Jehova, bambae yu bilif strong long hem, mo yu lavem hem moa. Yu traem tingtingbak long taem ya we yu jes save se God i rili stap, mo se yu save kam fren blong hem. Mo tu, yu lanem se yumi evriwan yumi bon wetem sin. Mo yu kasem save tu se olgeta man oli stap longwe long God. (Kol. 1:21) Biaen, yu luksave se Papa blong yumi long heven, i no stap longwe long yumi mo hem i kea long yumi. Taem yumi lanem se Jehova i lavem yumi nao i givim Jisas blong pemaot yumi, mo biaen yumi bilif long sakrefaes ya, yumi stat blong fren wetem Jehova.

⁶ Taem yumi tingtingbak long ol samting ya, i gud yumi askem se: ‘?Mi mi stap traehad blong fren moa wetem God? ?Mi mi trastem Jehova mo mi lavem hem moa evri dei?’ Wan narafala gudfala fren blong Jehova, hemia Gideon. I gud yumi luk stori blong hem blong yumi save folem eksampol blong hem.

7-9. (1) ?Gideon i luk wanem merikel, mo samting ya i mekem wanem long hem? (Yu luk pija long pej 21.) (2) ?Yumi save mekem wanem blong yumi fren moa wetem Jehova?

⁷ Jaj Gideon i stap mekem wok blong Jehova, long taem ya we plante kantri oli kam mekem faet long ol man Isrel. Ol man Isrel oli go insaed long Promes Lan finis. Ol man Midian oli stap traem spolem ol man Isrel mo plante taem finis oli stap tekem ol graon blong olgeta. Hemia nao from wanem Gideon i haed long ples blong mekem waen, taem hem i stap kilim ol hed blong wit blong tekemaot kakae blong hem. Olsem nao, sipos ol enemi oli kam, be hem i save haedem kwiktaem. Jajes japta 6 i talem se taem Gideon i stap long Ofraha, wan enjel blong Jehova i kam luk hem. Gideon i sapraes taem enjel ya i kamtru mo i talem long hem se: “!Strong man blong faet!” Gideon i save se Jehova i bin tekemaot ol man Isrel long Ijip, be hem i no ting se Jehova bambae i givhan long olgeta naoia. Ale, enjel ya i talemaot tok blong Jehova long Gideon se Jehova bambae i givhan long hem.

⁸ Be Gideon i no save se bambae hem i mekem olsem wanem blong ‘sevem ol man Isrel.’ Ale Jehova i yusum enjel ya blong i talem long Gideon se: “Mi bambae mi stap givhan long yu. Bambae yu flatem ol man Midian ya olsem we yu flatem wan man nomo.” (Jaj. 6:11-16) Be Gideon i no sua yet se samting ya bambae i hapen olsem wanem, ale hem i askem blong Jehova i givim wan saen long hem. I gud blong makem se taem Gideon i stap toktok wetem enjel ya, hem i sua fulwan se Jehova i rili stap.

⁹ Samting we i hapen afta, i mekem bilif blong Gideon i strong mo i mekem hem i kam klosap long God. Gideon i rerem wan kakae mo i givim long enjel ya. Taem enjel ya i pusum stik blong hem i go kasem ol kakae ya, wantaem nomo faea i laet mo i bonem ol kakae ya. Taem Gideon i luk samting ya, hem i luksave se enjel ya i stap karem tok blong Jehova. Ale hem i fraet tumas nao hem i talem se: “Hae God, yu yu Masta blong mi. Mi mi harem nogud tumas, from we mi luk man blong karem tok blong yu, stret long ae blong mi.” (Jaj. 6:17-22) ?Olsem wanem? ?Samting ya i blokem Gideon blong i no moa fren gud wetem Jehova? !Nogat! Hem i mekem se Gideon i haremsave se hem i gat pis wetem Jehova. Yumi save samting ya from we nem blong olta we Gideon i stanemap long ples ya, hem i ‘Jehova i Givim Pis.’ (Ridim Jajes 6:23, 24.) Yes, sipos yumi tingting dip long ol samting we Jehova i stap mekem blong yumi evri dei, bambae yumi luksave  se hem i wan tru fren. Taem yumi prea oltaem long Jehova, bambae yumi harem se yumi gat pis wetem hem mo bambae yumi fren moa wetem hem.

10. Folem Ol Sam 15:3, 5, ?wanem tufala rul we yumi mas folem?

¹⁰ Sipos yumi wantem kam fren blong Jehova, i gat ol rul we yumi mas folem. Long Ol Sam 15, Deved i mekem wan singsing long saed blong ol rul we yumi mas folem blong yumi save stap ‘long haos tapolen blong Jehova,’ hemia i min se blong yumi save kam fren blong God. (Sam 15:1) Bambae yumi tokbaot tu long ol rul ya. Faswan se, yumi no mas giaman blong spolem nem blong ol narafala. Mo namba tu se, yumi no mas giaman mo stil. Deved i talem se man we i save kam fren blong Jehova, hem i man we ‘i no save giaman blong spolem nem blong ol man,’ mo ‘hem i no save tekem mane long man we i wantem pem hem blong i tok agens long man we i mekem i stret nomo.’—Sam 15:3, 5.

11. ?From wanem yumi no mas giaman blong spolem nem blong narafala?

¹¹ Long wan narafala Sam, Deved i givim woning ya se: ‘Yufala i no mas tok nogud.’ (Sam 34:13) Sipos yumi no folem advaes ya, bambae yumi no save fren gud wetem Papa blong yumi long heven. Fasin blong Setan, we i bigfala enemi blong Jehova, hemia blong talem giaman tok blong spolem nem blong narafala. Sipos yumi lukaotgud long samting we yumi talem long ol narafala, mo long samting we yumi talem long saed blong olgeta, bambae yumi save gohed blong stap klosap long Jehova. Yumi mas lukaotgud se yumi no gat nogud tingting long olgeta we oli lukaot kongregesen.—Ridim Hibrus 13:17; 1 Tesalonaeka 5:12.¹² Ol man oli save gud se ol man blong Jehova oli no giaman mo oli no stil. Aposol Pol i talem se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo. Plis, oltaem yufala i mas prea from mifala.” (Hib. 13:18) Yumi wantem se ‘oltaem yumi stap mekem i stret nomo,’ taswe yumi no stilim ol brata mo sista blong yumi. Sipos oli wok blong yumi, yumi mas meksua se yumi pem olgeta, stret olsem we yumi promes long olgeta. From we yumi Kristin, yumi no giaman long ol man we oli wok blong yumi mo yumi no stilim olgeta. Yumi mekem olsem long ol narafala man tu. Mo sipos yumi wok blong wan Kristin, yumi mas lukaot se yumi no yusum janis ya blong askem long hem, blong i mekem i gud moa long yumi i bitim ol narafala wokman.

12, 13. (1) ?From wanem yumi no mas giaman mo stil? (2) ?Wanem gudfala samting i save kamaot taem yumi no giaman mo yumi no stil?

¹³ Plante taem yumi harem ol man blong wol oli talem ol gudfala toktok long saed blong ol Witnes blong Jehova from we oli no giaman mo oli no stil. Wan bos blong wan bigfala kampani i luk se ol Witnes blong Jehova oli holem promes blong olgeta, ale hem i talem se: “Oltaem yufala i stap mekem ol samting we yufala i promes blong mekem.” (Sam 15:4) Yes, taem yumi no giaman mo yumi no stil, bambae Jehova i besfren blong yumi oltaem, mo yumi leftemap nem blong hem.

14, 15. Taem yumi prij, ?olsem wanem yumi save givhan long ol narafala blong oli kam fren blong Jehova?

¹⁴ Plante man we yumi prij long olgeta, oli bilif se God i stap, be oli no luk hem olsem besfren blong olgeta. ?Yumi save givhan long ol man ya olsem wanem? Yumi traem luk samting we Jisas i talem long sam disaepol blong hem, taem hem i sanem olgeta oli go prij. Hem i talem long olgeta se: “Taem yufala i go stap long wan haos, yufala i mas tok gud long olgeta se ‘Pis i stap wetem yufala.’ Sipos olgeta long haos ya oli gudfala man, tok ya blong yufala blong pis i save stap long olgeta. Be sipos olgeta oli no gudfala man, tok ya blong yufala i mas kambak long yufala bakegen.”  (Mat. 10:12, 13, Niutesteman wetem Ol Sam long Bislama) Yumi save givhan long ol man blong oli save trutok, sipos yumi fren gud wetem olgeta. Sipos yumi toktok kaen long ol man we oli kros long yumi, bambae kros blong olgeta i godaon, nao maet bambae oli glad blong lesin long wan Witnes taem i prij long olgeta long wan narafala taem.

¹⁵ Taem yumi mitim ol man we oli strong long skul blong olgeta, no we oli folem ol kastom blong ol giaman skul, yumi mas gohed blong soemaot se yumi fren wetem olgeta mo yumi gat pis wetem olgeta. Yumi toktokgud long ol man we oli kam long ol miting, speseli ol man we oli harem nogud from ol samting we oli stap hapen long wol tede, mo we oli wantem save God ya we yumi stap wosipim. Yumi save faenem plante stori blong ol man olsem long ol Wajtaoa blong yumi, aninit long haf ya, “Baebol i Jenisim Laef Blong Man.”

16. ?Long wanem rod, yumi save kam fren blong Jehova mo man blong “mekem wok blong hem”?

¹⁶ Plante taem, ol man we oli wok wanples oli kam ol gud fren. Taem yumi joen long wok blong prij mo blong pulum ol man oli kam disaepol, yumi kasem save moa long ol nambawan fasin blong Papa blong yumi long heven. Yumi luksave se tabu spirit blong hem i givhan long yumi, blong yumi naf gud blong talemaot gud nius. Taswe, taem yumi givim laef blong yumi long Jehova, yumi kam ol man we oli wok wetem hem blong “mekem wok blong hem,” mo yumi kam ol fren blong hem tu.—Ridim 1 Korin 3:9.

17. ?Olsem wanem ol asembli blong yumi oli soemaot se Jehova i besfren blong yumi?

¹⁷ Sipos yumi spenem moa taem long wok blong prij, bambae yumi luk olsem wanem Jehova i stap blokem ol man we oli wantem stopem wok blong prij. Samting ya bambae i mekem yumi kam klosap moa long Jehova. Wan narafala samting hemia se Jehova i stap lidim yumi. Yumi sapraes bigwan blong luk olsem wanem hem i stap tijim yumi long ol miting mo ol buk. Ol samting we yumi lanem long ol asembli, oli soemaot se Jehova i lavem yumi, hem i kasem save long ol trabol we yumi fesem, mo hem i save ol samting we yumi nidim. Wan famle i tokbaot asembli we oli go long hem, i se: “Ol tok long asembli ya oli rili tajem hat blong mifala. Mifala i haremsave se Jehova i lavem mifala wanwan. Hem i wantem se yumi harem gud long laef blong yumi.” Wan Kristin brata mo woman blong hem, we tufala i blong Jemani, tufala i joen long wan spesel asembli long Aealan. Afta, tufala i talem se ol brata mo ol sista oli welkamem gud tufala mo oli kea long tufala. Mo tu, tufala i talem se: “Mitufala i talem tangkiu moa long Jehova mo King Jisas Kraes. Tufala i singaot mitufala blong mitufala i joen long ogenaesesen ya blong Jehova we ol man blong hem oli joen gud. Yumi no stap tokbaot nomo fasin joen gud ya, be yumi harem gud long fasin ya. Bambae mitufala i no save fogetem ol samting we mitufala i harem long spesel asembli ya long Dublin. Ol samting ya i mekem mitufala  i tingbaot bakegen nambawan janis ya we mitufala i gat blong wok wetem yufala evriwan, blong mekem wok ya blong God.”

18. ?Wanem kwestin we yumi mas askem long saed blong fasin blong yumi blong toktok wetem Jehova?

¹⁸ Taem ol fren oli toktok gud, oli fren gud moa. Tede, plante man oli stap yusum Intenet oltaem no oli sanem mesej long mobaelfon blong toktok wetem ol fren blong olgeta. ?Be olsem wanem long fasin blong yumi? ?Yumi toktok plante wetem besfren blong yumi, Jehova? God i “stap harem ol prea.” (Sam 65:2, NW) ?Be hamas taem yumi toktok wetem hem?

19. ?Wanem i save givhan long yumi sipos yumi harem se i had blong talemaot ol tingting blong yumi long Jehova?

¹⁹ Sam man blong Jehova oli harem se i had blong oli talemaot ol tingting blong olgeta long Jehova. Be hemia nao samting we Jehova i wantem se yumi mekem taem yumi prea long hem. (Sam 119:145; Krae 3:41) Sipos yumi faenem i had blong mekem olsem, be i gat sam samting we i save givhan long yumi. Pol i talem long ol Kristin long Rom, se: “Long sem fasin, spirit blong God i joen tu blong halpem yumi long samting we yumi no naf blong mekem. Problem se, yumi no save wanem we yumi mas prea from. Be spirit ya i toktok long saed blong yumi, i krae long fasin we yumi no save harem. Be hem we i skelem hat blong man i save wanem we spirit i traem blong talem, from we spirit i stap toktok long saed blong ol man we oli tabu, stret olsem we God i wantem.” (Rom 8:26, 27, NW) Taem yumi ridim mo tingting dip long ol tok long buk blong Job, Ol Sam, mo Ol Proveb, yumi save faenem sam tingting we oli save givhan long yumi blong yumi talemaot ol tingting blong yumi long Jehova.

20, 21. ?Ol tok blong Pol long Filipae 4:6, 7, oli leftemap tingting blong yumi olsem wanem?

²⁰ Taem yumi kasem hadtaem, i gud yumi folem advaes we Pol i givim long ol Kristin long Filipae, se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.” Taem yumi prea long Jehova olsem, yumi harem gud. Pol i talem se: “Pis we [God] i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Fil. 4:6, 7) Oltaem yumi mas talem tangkiu long Jehova from “pis we hem i givim,” we i stap lukaot gud long hat mo tingting blong yumi.

²¹ Prea i halpem yumi blong yumi fren gud wetem Jehova. Taswe, i gud we ‘oltaem yumi prea.’ (1 Tes. 5:17) Yumi mas gohed blong fren moa wetem Jehova, mo mekem ol samting we hem i askem yumi blong mekem. Mo i gud yumi tekem taem blong tingting dip long ol blesing we yumi kasem from we Jehova hem i Papa blong yumi, hem i God blong yumi, mo hem i Fren blong yumi.