1, 2. ?Wanem i mekem se evriwan insaed long famle oli no sem mak? ?Wanem sam defren rod we yumi kasem trutok long hem?

JEHOVA i stanemap rod ya we ol man oli save gat famle blong olgeta. (Efes. 3:14, 15) Be insaed long wan famle, evriwan i no sem mak. Fasin mo laef blong olgeta i defdefren. Maet samfala oli gruap wetem papa mo mama blong olgeta. Maet sam narafala, papa mo mama blong olgeta oli ded from sik, aksiden, no from sam narafala trabol olsem. Be i gat sam narafala we oli no save papa mo mama blong olgeta nating.

² Yumi evriwan we i wosipim Jehova, yumi stap long famle blong hem, mo yumi kasem trutok long defdefren rod. Maet yu yu gruap long trutok from we taem yu smol, papa mo mama blong yu oli tijim yu blong yu folem ol rul blong Baebol. (Dut. 6:6, 7) No maet yu yu wan long ol taosen man we oli kasem trutok, from we ol man blong Jehova oli prij long olgeta.—Rom 10:13-15; 1 Tim. 2:3, 4.

3. ?Wanem sam samting we i mekem se yumi evriwan i sem mak?

³ Nating se fasin mo laef blong yumi i defdefren, be i gat sam samting we i mekem se yumi evriwan i sem mak. Yumi evriwan yumi no stret gud, yumi kasem sin blong Adam. (Rom 5:12) Nating se i olsem, from we yumi wosipim Jehova, yumi save singaot hem se, “Papa blong  mifala.” Bifo, ol man we God i jusumaot olgeta oli talem ol tok we i stap long Aesea 64:8, se: “Hae God [Jehova], yu yu Papa blong mifala.” Mo tu, Jisas i statem prea blong hem wetem ol tok ya se: “Papa blong mifala. Yu yu stap long heven. Nem blong yu i tabu.”—Mat. 6:9.

4, 5. ?Wanem tri samting we bambae oli givhan long yumi blong lavem Jehova moa?

⁴ Papa blong yumi long heven, i givim ol samting we ol man blong hem oli nidim, mo hem i lukaot gud long olgeta. Man blong raetem Sam i talem ol tok blong Jehova i se: “Mi bambae mi sevem olgeta [ol man blong mi] we oli stap lavem mi, mo bambae mi lukaot gud long olgeta we oli save we mi mi Hae God, [“oli save nem blong mi,” NW].” (Sam 91:14) Jehova i sevem ol man blong hem long ol enemi blong olgeta, mo i lukaot gud long olgeta blong oli no lus evriwan.

⁵ Bambae yumi tokbaot tri samting we oli save givhan long yumi blong yumi lavem Jehova moa. (1) Jehova i givim samting we yumi nidim, (2) hem i lukaot gud long yumi, mo (3) hem i besfren blong yumi. Taem yumi stap tokbaot trifala samting ya, i gud yumi jekem sipos yumi fren gud wetem Jehova, mo yumi luksave samting we yumi mas mekem blong ona long hem. Mo tu, i gud yumi tingbaot ol blesing we Jehova i promes blong givim long ol man we oli kam klosap long hem.—Jem. 4:8.

6. ?Wanem wan long ol ‘nambawan presen’ we Jehova i givim?

⁶ Disaepol Jemes i raetem se: “Evri samting we oli gud mo evri presen we oli nambawan we yumi kasem, oli kamaot long heven nomo. God i mekem olgeta laet blong skae, mo hem i stap givim ol gudgudfala samting ya long yumi.” (Jem. 1:17) Laef i wan nambawan presen we Jehova i givim long yumi. (Sam 36:9) Sipos yumi yusum laef blong yumi blong mekem samting we Jehova i wantem, bambae yumi kasem plante blesing naoia, mo bambae yumi laef olwe long niufala wol. (Prov. 10:22; 2 Pita 3:13) Be yumi evriwan i no stret gud, yumi gat sin, mo yumi stap ded. ?Taswe, olsem wanem bambae yumi kasem ol blesing ya?

7. ?God i mekem wanem blong yumi save fren gud wetem hem?

⁷ Jehova i stap givim samting we ol man oli nidim, long plante defren rod. Hem i kaengud long yumi mo hem i wantem sevem yumi. Yu traem tingbaot, yumi evriwan i no stret gud, yumi kasem sin blong Adam. (Rom 3:23) Be Jehova i lavem yumi, taswe hem i mekem wan rod blong yumi save fren gud wetem hem. Aposol Jon i raetem se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi. Stamba blong fasin ya i no we yumi lavem God, be we God i lavem yumi, nao i sanem Pikinini blong hem, blong i ded blong mekem rod blong God i tekemaot ol sin blong yumi.”—1 Jon 4:9, 10.

8, 9. Long taem blong Ebraham mo Aesak, ?olsem wanem Jehova i givim samting we man i nidim? (Yu luk pija long pej 16.)

⁸ Samwe long yia 1893 bifo Jisas i bon, i gat wan samting i hapen long laef blong Ebraham, we i soemaot olsem wanem bambae Jehova i givim laef olwe long olgeta man we oli obei long hem. Hibrus 11:17-19 i talem se: “Ebraham i stap bilif strong long God, taswe taem God i traem hem, hem i rere blong kilim pikinini blong hem Aesak, blong givim i go long God. God i mekem ol promes ya long Ebraham, mo Ebraham i gat wan pikinini nomo, be hem i rere blong kilim hem blong givim i go long God. God i talemaot long hem finis se, ‘Long Aesak ya, bambae laen blong yu oli plante we plante, blong oli holem nem blong yu.’ Be Ebraham i stap tingbaot we God i save mekem man i laef bakegen long ded. Mo hem i kasem pikinini ya blong hem bakegen, klosap olsem we hem i laef bakegen long ded.” Ebraham i glad blong givim boe blong hem Aesak olsem wan sakrefaes. Long sem fasin, Jehova tu i glad blong givim boe blong hem Jisas Kraes, blong i ded blong sevem olgeta man.—Ridim Jon 3:16, 36.

⁹ !I sua se Aesak i harem gud tumas taem papa  blong hem i no kilim hem i ded! Ating Aesak i talem tangkiu bigwan long Jehova from we hem i givim wan man sipsip blong i tekem ples blong hem. (Jen. 22:10-13) Ebraham i putum nem blong ples ya se: “Hae God [Jehova] i stap givim evri samting.”—Jen. 22:14.

10, 11. ?Hu i stap mekem ‘wok ya blong pulum ol man oli kam fren blong God,’ mo oli mekem wok ya olsem wanem?

¹⁰ Taem yumi tingting dip long olgeta samting we Jehova i givim long yumi, yumi luksave se sipos Jisas i no ded from yumi, bambae yumi no save kam fren blong Jehova. Pol i talem se: “Mifala i luksave se hem wan nomo we hem i ded blong sevem olgeta man. Nao from samting ya i olsem we olgeta man oli ded finis wetem hem. Hem i ded blong sevem olgeta man, blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem, we hem i ded, mo i laef bakegen, blong i sevem olgeta.”—2 Kor. 5:14, 15.

¹¹ Ol Kristin bifo oli lavem God mo oli glad long blesing ya blong mekem wok blong hem. From samting ya, oli wantem mekem ‘wok ya blong pulum ol man oli kam fren blong God.’ Wok ya, hemia wok blong prij we i givim janis long ol man blong oli stap long pis wetem God, oli kam ol fren blong hem, mo biaen oli save kam ol pikinini blong hem long heven. Tede, ol tabu Kristin oli mekem semfala wok blong prij. Oli wok olsem ol ambasada blong God mo Kraes. Wok blong prij we oli mekem, i givim janis long ol man we oli gat tingting daon mo oli wantem save trutok, blong Jehova i pulum olgeta oli kam long hem mo oli mekem wok blong hem.—Ridim 2 Korin 5:18-20; Jon 6:44; Wok 13:48.

12, 13. ?Olsem wanem blong soemaot se yumi glad long ol samting we Jehova i givim long yumi?

¹² Olgeta Kristin we bambae oli laef olwe long wol ya, oli talem tangkiu bigwan long Jehova from we hem i stap givim ol samting we oli nidim. From samting ya, oli sapotem ol tabu Kristin long wok blong talemaot gud nius. Taem yumi prij, yumi yusum nambawan presen we God i givim, hemia Baebol. (2 Tim. 3:16, 17) Mo taem yumi yusum gud Baebol, yumi stap givim janis long ol man blong oli save kasem laef we i no save finis. Jehova i givim tabu spirit blong hem tu. Blong yumi save mekem gud wok ya, yumi mas dipen long tabu spirit blong Jehova. (Sek. 4:6; Luk 11:13) Frut we i kamaot from wok ya i bigwan tumas, olsem we ol Yearbook blong yumi oli soemaot evri yia. !I wan bigfala ona blong yumi joen long wok ya blong presem Papa blong yumi we i stap givim samting we yumi nidim!

¹³ God i givim plante samting long yumi, taswe i gud yumi askem se: ‘?Mi mi stap mekem evri samting we mi naf blong mekem long wok blong prij, blong talem tangkiu long Jehova? ?Mi mas mekem wanem blong mi kamgud moa long wok blong talemaot gud nius?’ Yumi save soemaot se yumi glad long ol samting we Jehova i givim long yumi, taem yumi putum Kingdom long fasples long laef blong yumi. Taem yumi mekem olsem, Jehova bambae i meksua se yumi gat ol samting we yumi nidim. (Mat. 6:25-33) Jehova i lavem yumi, taswe yumi wantem mekem olgeta samting we i save mekem hem i glad.—Prov. 27:11.

14. ?Jehova i stap sevem ol man blong hem olsem wanem?

¹⁴ Deved i singsing se: “Mi mi pua, mi no gat paoa, be yu yu no fogetem mi nating, oltaem yu stap tingbaot mi. Oltaem yu yu stap sevem mi.” (Sam 40:17) Plante taem, Jehova i stap sevem ol man blong hem, speseli taem ol enemi blong olgeta oli ronem mo kilim olgeta. Yumi talem tangkiu bigwan long Jehova from we oltaem hem i givhan long yumi blong holemstrong long hem.

15. Yu talem stori blong wan papa we i lavem pikinini blong hem, nao i lukaot gud long hem.

¹⁵ Wan papa we i lavem pikinini blong hem, hem i givim samting we pikinini i nidim, mo hem i lukaot gud long hem tu. Sipos pikinini i stap long denja, kwiktaem nomo papa ya bambae i traem  blong sevem hem. Wan brata i tingbaot wan taem we hem i stap long denja, nao papa blong hem i sevem hem. Long taem ya, hem i wan smol boe nomo. Hem wetem papa blong hem tufala i stap gobak long haos, afta long wok blong prij. Tufala i mas krosem wan smol reva. Long dei ya i gat bigfala ren, mekem se reva i ron bigwan. Wan rod nomo blong tufala i save krosem reva ya, hemia blong jam long wan ston i go long narawan, kasem narasaed blong reva. Boe ya i go fastaem long papa blong hem, mo taem hem i jam i go long wan ston, be wantaem nomo, hem i mestem, nao i foldaon i go long reva, mo reva i pulum hem i go aninit tu taem. Taem papa blong hem i luk samting ya, kwiktaem nomo hem i holem solda blong boe ya, mo i pulumaot hem long wota. !Boe ya i glad tumas from we papa blong hem i sevem hem! Long sem fasin, Papa blong yumi long heven i lukaot gud long yumi taem Setan mo wol blong hem oli traem spolem yumi. !Tru ya, i no gat wan narafala man we i save lukaot gud long yumi olsem Jehova!—Mat. 6:13; 1 Jon 5:19.

16, 17. ?Olsem wanem Jehova i lukaot gud long ol man Isrel, taem oli stap faet agensem ol laen blong Amalek?

¹⁶ Jehova i lukaot gud long ol man blong hem long yia 1513 bifo Kraes. Hem i tekemaot finis ol man Isrel blong oli no moa wok slef long Ijip mo i mekem oli gokros long Red Si. Taem ol man Isrel oli stap wokbaot long draeples blong go long hil ya Sinae, oli kasem ples ya Refidim.

¹⁷ Folem profet tok blong Jenesis 3:15, Setan i wantem tumas blong spolem ol man blong God. Taswe, hem i lukaot wan janis blong spolem ol man Isrel we i luk olsem se i isi nomo blong spolem olgeta. Taem oli stap yet long Refidim, Setan i yusum ol laen blong Amalek, we olgeta oli enemi blong ol man Isrel, blong faet agensem olgeta. (Nam. 24:20) I gud yumi luk olsem wanem Jehova i yusum Josua, Moses, Eron, mo Huru, blong lukaot gud long ol man blong hem. Taem Josua mo ol man blong hem oli stap faet agensem ol man Amalek, Moses wetem Eron mo Huru, oli stap long wan hil klosap mo oli stap wajem faet. Taem Moses i leftemap han blong hem, ol man  Isrel oli winim ol enemi blong olgeta. Taem han blong Moses i taed, Eron mo Huru tufala i holem han blong hem i stap antap. Ale Jehova i lukaot gud long olgeta, nao “Josua olgeta oli winim ol laen blong Amalek ya, mo oli kilim plante long olgeta oli ded.” (Eks. 17:8-13) Afta, Moses i wokem wan olta long ples ya mo i putum nem blong hem se: “Hae God [Jehova] i Olsem Flaeg blong Mi.”—Ridim Eksodas 17:14, 15.

18, 19. Long ol yia we oli jes pas, ?Jehova i lukaot gud long yumi olsem wanem?

¹⁸ Jehova i lukaot gud long ol man we oli lavem hem mo oli obei long hem. Olsem ol man Isrel long Refidim, yumi tu yumi dipen long Jehova blong i sevem yumi long ol enemi blong yumi. Plante taem Jehova i lukaot gud long yumi mo i sevem yumi taem Setan i wantem spolem yumi. Yumi save tingbaot we plante taem Jehova i lukaot gud long ol brata blong yumi, taem ol man oli ronem mo oli kilim olgeta from we oli no wantem joen long faet. Hemia nao samting we i hapen long Jemani mo long ol narafala kantri, long ol yia we gavman blong Nasi i gat paoa. Ol laef stori blong ol brata mo sista mo ol stori long ol Yearbook, oli soemaot se Jehova i lukaot gud long ol man blong hem long taem blong trabol. Taem yumi ridim mo yumi tingting dip long ol stori ya, yumi trastem Jehova moa.—Sam 91:2.

¹⁹ Mo tu, Jehova i yusum ogenaesesen blong hem mo ol buk we ogenaesesen i wokem blong talem bakegen mo bakegen ol tok, blong lukaot gud long yumi. Yu traem tingbaot olsem wanem Jehova i lukaot gud long yumi long ol yia we oli jes pas. Wol ya i fulap long ol rabis fasin blong man wetem woman, ol strong dring, mo ol rabis pija. Be Jehova i givim ol advaes bakegen mo bakegen, mo i givim ol stret samting we yumi nidim, blong yumi no mekem wan samting we i save spolem yumi nao yumi no moa fren wetem hem. Yumi save tingbaot se i no longtaem i pas, Papa blong yumi long heven i givim advaes se yumi mas lukaot long ol rabis fren we yumi faenem olgeta long Intenet. *—1 Kor. 15:33.

20. ?Yumi stap kasem wanem long kongregesen?

²⁰ ?Yumi soemaot olsem wanem se yumi stap letem Jehova ‘i tijim’ yumi? Hemia taem yumi obei gud long ol tok blong hem. (Aes. 54:13) Long ol kongregesen blong yumi, yumi stap kasem ol gudfala advaes we yumi nidim blong lukaot gud long yumi. Long kongregesen, ol elda oli yusum Baebol blong givhan long yumi mo blong givim advaes long yumi. (Gal. 6:1) Jehova i yusum ‘ol man ya we oli olsem presen,’ blong lukaot gud long yumi. (Efes. 4:7, 8, NW) ?Taswe yumi mas mekem wanem taem ol elda oli givim advaes long yumi? Yumi mas glad blong obei. Sipos yumi mekem olsem, Jehova bambae i blesem yumi.—Hib. 13:17.

21. (1) ?Yumi mas gat strong tingting blong mekem wanem? (2) ?Bambae yumi tokbaot wanem long nekis stadi?

²¹ Yumi mas gat strong tingting blong letem tabu spirit i givhan long yumi, mo yumi letem Papa blong yumi long heven i lidim yumi. Mo yumi mas tingting dip long laef blong Jisas mo yumi traehad blong folem eksampol blong hem. Jisas i kasem bigfala blesing from we hem i “obei long God gogo i ded.” (Fil. 2:5-11) Yumi tu yumi save kasem blesing sipos yumi trastem Jehova wetem fulhat blong yumi. (Prov. 3:5, 6) From samting ya, i gud we oltaem yumi dipen long Jehova, from we hem nomo i stap givim samting we yumi nidim mo hem i stap lukaot gud long yumi. I no gat wan narafala man we i olsem hem. !Hemia wan bigfala ona blong mekem wok blong Jehova! Bambae yumi lavem Jehova moa taem yumi tingting dip long namba tri samting we i soemaot se Jehova i kea long yumi. Namba tri samting ya, hemia se hem i besfren blong yumi. Long nekis stadi bambae yumi tokbaot olsem wanem Jehova i besfren blong yumi.