1, 2. (1) ?Olgeta long heven bambae oli glad tumas long mared blong hu? (2) ?Wanem ol kwestin we bambae yumi tokbaot?

TAEM wan man i wantem mared, bambae hem i tekem plante taem blong mekemrere from mared blong hem. Bambae yumi tokbaot mared blong wan King. !Oli stap mekemrere from mared ya klosap 2,000 yia finis! I no longtaem, King ya bambae i mared long woman blong hem. Miusik bambae i fulumap bigfala haos blong King, mo ol man long heven bambae oli glad tumas, nao oli singaot bigwan oli se: “Hae God [Jehova] ya we i Masta blong yumi, mo i gat olgeta paoa, yumi presem hem, from we hem nomo i King. Yumi harem gud tumas, yumi sing from we yumi glad we yumi glad, mo yumi leftemap nem blong God i go antap, from we taem i kam finis blong Smol Sipsip blong hem i mared. Mo woman ya we hem i promes blong mared long hem, hem i rere finis.”—Rev. 19:6, 7.

² “Smol Sipsip” ya hem i Jisas Kraes. (Jon 1:29) Mared blong hem bambae i mekem olgeta long heven oli glad tumas. ?Hem i werem wanem klos long taem blong mared? ?Hu ya woman blong hem? ?Hem i mekem wanem blong rere from mared ya? ?Mared ya i hapen wetaem? Mared ya bambae i mekem olgeta long heven oli glad  tumas. ?Be olsem wanem long olgeta we bambae oli laef olwe long wol ya? ?Olgeta tu bambae oli harem gud long taem ya? Yumi wantem tumas blong save ansa blong ol kwestin ya. From samting ya, i gud yumi tokbaot ol vas blong Ol Sam 45.

3, 4. (1) ?Baebol i talem se ol klos blong King oli olsem wanem? ?Wanem i mekem se King i glad tumas? (2) ?Hu ya “kwin” mo hu ya “ol dota blong ol king”?

³ Ridim Ol Sam 45:8, 9. King ya we i mared, Jisas Kraes, i putum ol klos blong mared. Long klos blong hem, oli putum ol senta olsem ‘mir mo kasia,’ we ol man Isrel bifo oli stap yusum blong mekem tabu oel.—Eks. 30:23-25.

⁴ Ol miusik oli fulumap haos blong King long heven, ale King i glad tumas from we mared blong hem i stap kam klosap moa. “Kwin” tu i glad. Kwin ya hem i ogenaesesen blong God long heven. Long ogenaesesen ya i gat “ol dota blong ol king” we hemia ol tabu enjel. I gud tumas blong harem ol voes long heven we oli talem se: ‘Yumi harem gud tumas, yumi sing from we yumi glad we yumi glad. Taem i kam finis blong Smol Sipsip i mared.’

5. ?Woman ya hem i hu?

⁵ Ridim Ol Sam 45:10, 11. Naoia yumi save se King ya we bambae i mared, hem i Jisas Kraes. ?Be woman ya hem i hu? Woman ya i no wan prapa woman. Hem i pija nomo blong grup blong ol 144,000 man we tabu spirit i makemaot olgeta. Jisas i hed blong kongregesen blong ol tabu Kristin ya. (Ridim Efesas 5:23, 24.) Ol tabu Kristin bambae oli rul wetem Kraes long Kingdom long heven. (Luk 12:32) Mo olgeta oli “stap biaen long Smol Sipsip ya long evri ples we hem i pas long hem.” (Rev. 14:1-4) Olgeta oli kam ‘woman blong Smol Sipsip,’ mo oli stap wetem hem long haos blong hem long heven.—Rev. 21:9; Jon 14:2, 3.

6. ?From wanem Baebol i talem se ol tabu Kristin oli “gel blong king”? ?From wanem oli mas ‘fogetem ol man ples blong olgeta’?

⁶ Baebol i tokbaot woman ya we bambae i mared long King se hem i “gel blong king.” (Sam 45:13, NW) ?Hu ya narafala “king” ya we Ol Sam 45:13 i tokbaot? King ya hem i Jehova. Jehova i adoptem ol tabu Kristin oli kam ol “pikinini” blong hem. (Rom 8:15-17) Baebol i talem se oli mas ‘fogetem ol man ples blong olgeta mo ol famle blong olgeta.’ Olgeta nao oli olsem woman ya we bambae i mared long heven. From samting ya, oli mas putum tingting blong olgeta i stap ‘long ol samting blong heven, mo no moa tingbaot ol samting blong wol.’—Kol. 3:1-4.

7. (1) ?Kraes i mekem wanem blong rerem woman ya we bambae hem i mared long hem? (2) ?Wanem tingting blong woman ya long man we bambae hem i mared long hem?

⁷ Blong plante yia, Kraes i stap mekem sam samting blong rerem woman ya we bambae hem i mared long hem. Aposol Pol i talem se Kraes ‘i lavem kongregesen ya. Taswe hem i letem laef blong hem, blong sevem kongregesen ya, mo blong mekem i tabu, i blong God. Kraes i yusum tok blong God blong mekem kongregesen ya i klin, i olsem we hem i wasem long wota. Hem i mekem olsem, blong bambae kongregesen ya i tabu, we olgeta laef blong hem i gud we i gud. Bambae kongregesen ya i olsem wan gel we i klin gud, i no gat samting we i spolem hem, mo i no gat samting long hem we i no stret. Hem i stret gud olgeta.’ (Efes. 5:25-27) Pol i talem long ol tabu Kristin long Korin, se: “Mi mi stap lukaot long yufala, mo mi wantem tumas, blong yufala i man blong God nomo, stret olsem we hem i wantem. Mi stap luk yufala olsem wan gudfala yang gel, we i klin, mo we mi mi stretem bisnes blong mared blong hem finis. Mo man ya we mi stap tingbaot, we mi mi promes se bambae yufala i mared long hem, hemia Kraes nomo.” (2 Kor. 11:2) King Jisas Kraes i glad tumas long woman ya we bambae hem i mared long hem.  Jisas Kraes i luk se woman ya i ‘naes we i naes’ from we wosip we hem i mekem long God i klin. Woman ya i luk King ya olsem “masta” blong hem, mo i ona long hem.

8. ?From wanem yumi save se woman ya i mas “naes we i naes”?

⁸ Ridim Ol Sam 45:13, 14. * Woman ya i naes we i naes. Oli “flasemgud hem blong i go mitim man blong hem.” Long Revelesen 21:2, Baebol i tokbaot wan taon, hemia niufala Jerusalem, se hem i olsem woman ya we bambae i mared. Taon ya i stap long heven, mo i gat bigfala laet we i kamaot long God i stap saenaot i kam long taon ya, nao hem i “saen olsem wan gudfala ston, olsem gudfala ston ya jaspa we i klia gud, i olsem glas.” (Rev. 21:10, 11) Buk blong Revelesen i tokbaot niufala Jerusalem se hem i naes tumas. (Rev. 21:18-21) !Tru ya, woman ya i “naes we i naes”! Yumi save se i mas olsem from we mared ya i stap long heven.

9. ?Oli tekem woman ya i go long hu, mo klos blong woman ya i olsem wanem?

⁹ Oli tekem woman ya i go long man blong hem, hemia Mesaea King. King i rerem woman ya blong i mared long hem, taem hem i yusum ‘tok blong God’ blong mekem hem i klin. Nao, woman ya i ‘tabu, mo i no gat samting we i spolem hem.’ (Efes. 5:26, 27) Oli mas flasem gud woman ya tu. Ol klos blong hem oli “somap long ol tred we i gat plante kala long hem, blong flasem gud,” mo “oli tekem hem i go long king.” Ol klos ya oli “klin gud, oli saen.” Ol gudfala klos ya, hemia ol gudfala fasin we ol man blong God oli mekem.—Rev. 19:8.

10. ?Smol Sipsip bambae i mared wetaem?

¹⁰ Ridim Revelesen 19:7. ?Smol Sipsip ya bambae i mared wetaem? Nating se Revelesen 19:7 i talem se “woman ya we hem i promes blong mared long hem, hem i rere finis” blong mared, be ol narafala vas biaen oli no tokbaot mared ya. Defren olgeta, oli tokbaot lashaf blong bigfala trabol. (Rev. 19:11-21) ?Olsem wanem? ?Hemia i min se King ya bambae i mared bifo we hem i go faet blong i win bakegen? Nogat. Vison long buk blong Revelesen i no tokbaot ol samting we oli stap hapen, wan afta long narawan. Ol tok blong Ol Sam 45 i soemaot se mared blong King Jisas, bambae i hapen afta we hem i ‘go blong winim’ ol enemi blong hem.—Sam 45:3, 4.

11. ?Kraes bambae i mekem wanem bifo we hem i mared?

¹¹ Yes, yumi lanem long Baebol se bifo we Kraes i mared, bambae hem i mekem sam samting. Fastaem, “woman ya blong rod,” no Bigfala Babilon, we hemia olgeta giaman skul long wol, bambae i lus. (Rev. 17:1, 5, 16, 17; 19:1, 2) Afta, Kraes bambae i spolem ol narafala haf blong wol blong Setan long Amagedon, we i ‘faet blong God ya we i gat olgeta paoa.’ (Rev. 16:14-16; 19:19-21) Mo biaen, King bambae i finisim faet blong hem, taem hem i sakem Setan mo ol rabis enjel blong hem oli go long bigfala hol ya we i godaon we i godaon. Bambae i olsem we oli ded.—Rev. 20:1-3.

12, 13. (1) ?Smol Sipsip bambae i mared wetaem stret? (2) ?Hu olgeta long heven we bambae oli glad taem Smol Sipsip i mared?

¹² Long ol las dei ya, ol tabu Kristin we oli holemstrong long Jehova gogo kasem we oli ded, bambae oli laef bakegen long heven. Samtaem afta we Bigfala Babilon i lus, be bifo we Amagedon i stat, Jisas bambae i mekem se olgeta tabu Kristin oli stap wetem hem long heven. (1 Tes. 4:16, 17) Ale, afta long Amagedon, Smol Sipsip bambae i mared. !Hemia wan hapi taem ya! Revelesen 19:9 i talem se: “Olgeta we God i singaot olgeta blong oli kam long kakae blong mared blong Smol Sipsip ya, oli save harem gud.” Yes, ol 144,000 man ya bambae oli glad we oli glad. Mo King tu bambae i glad tumas from we olgeta  tabu Kristin we bambae oli rul wetem hem, oli stap wetem hem long heven. (Luk 22:18, 28-30) Be i no King nomo wetem woman blong hem we bambae tufala i glad long taem ya.

¹³ Olsem we yumi tokbaot finis, plante enjel oli joen wanples mo oli stap singsing, oli se: “Yumi harem gud tumas, yumi sing from we yumi glad we yumi glad, mo yumi leftemap nem blong God i go antap, from we taem i kam finis blong Smol Sipsip blong hem i mared. Mo woman ya we hem i promes blong mared long hem, hem i rere finis.” (Rev. 19:6, 7) ?Olsem wanem long ol man blong Jehova long wol? ?Olgeta tu bambae oli joen long hapi taem ya, no nogat?

14. ?“Ol gel” we Ol Sam 45 i tokbaot, oli hu?

¹⁴ Ridim Ol Sam 45:12, 14, 15. Profet Sekaraea i talemaot se long taem blong en, plante man long evri ples long wol bambae oli glad tumas blong joen wetem ol tabu Kristin we oli stap yet long wol. Hem i talem se: “Long dei ya, bambae i gat ten man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, ‘Mifala i wantem kam fren blong yufala, from we mifala i harem nius se God i stap givhan long yufala.’” (Sek. 8:23) “Ol man Taea” mo “ol rijman” we Ol Sam 45:12 i tokbaot, oli sem mak olsem ol “ten man” ya. Olgeta ya oli kam long ol tabu Kristin blong sapotem mo wok gud wetem olgeta. Mo biaen, ol tabu Kristin oli glad long olgeta mo oli givhan long olgeta tu blong mekem wok blong Jehova. Long 1935, ol tabu Kristin oli givhan long plante milian man blong oli save “stret fasin,” i min se oli save trutok long saed blong Jehova. (Dan. 12:3) Ol “ten man” ya oli wok gud wetem ol tabu Kristin mo oli mekem laef blong olgeta i klin, taem oli no moa mekem wosip long  ol giaman god. From samting ya, oli olsem “ol gel” ya we oli biaen long woman ya we i mared. Olgeta oli givim laef blong olgeta i go long Jehova, mo oli pruvum se oli ol man blong wok blong King Jisas Kraes.

15. ?“Ol gel” ya oli wok wetem ol tabu Kristin long wol olsem wanem?

¹⁵ Ol tabu Kristin we oli stap yet long wol oli glad tumas long “ol gel” ya, from we oli givhan bigwan long olgeta blong mekem se wok blong “talemaot gud nius” blong Kingdom i kasem olgeta ples long wol. (Mat. 24:14) ‘Tabu spirit wetem woman blong Smol Sipsip, tufala i talem se, “Yu kam.”’ Be i no tufala nomo. Olgeta tu we oli harem tok ya, oli talem se: “Yu kam.” (Rev. 22:17) Yes, ol “narafala sipsip” oli harem ol tabu Kristin oli talem se: “Yu kam,” ale oli joen wetem olgeta blong talem long olgeta man long wol se: “Yu kam.”—Jon 10:16.

16. ?Jehova i givim wanem janis long ol narafala sipsip?

¹⁶ Ol tabu Kristin oli lavem ol narafala sipsip. Oli glad tumas se Jehova i givim janis long ol narafala sipsip tu, blong oli glad long taem blong mared. Baebol i talem se bambae oli tekem “ol gel” ya “oli go insaed long haos blong king, we oli glad we oli glad.” Yes, ol narafala sipsip tu bambae oli glad taem Smol Sipsip i mared long heven. Buk blong Revelesen i talem se ol memba blong bigfala kampani oli “stap stanap long fran blong bigfala jea blong king, mo long fes blong smol Sipsip ya.” Olgeta oli stap mekem wosip long Jehova long yad blong haos tempol long saed blong spirit, hemia long wol ya.—Rev. 7:9, 15.

17, 18. ?Olsem wanem ol blesing bambae oli kamaot from mared blong Smol Sipsip? ?Hu ol man we Kraes bambae i kam papa blong olgeta?

¹⁷ Ridim Ol Sam 45:16. * “Ol gel” ya we oli biaen long woman blong Kraes, bambae oli glad we oli glad, taem oli luk ol blesing long niufala wol, we oli kamaot from mared blong King ya mo woman blong hem. King Jisas bambae i mekem “ol olfala bubu” blong hem long wol oli laef bakegen. Ale olgeta ya bambae oli kam “ol pikinini” blong hem. (Jon 5:25-29; Hib. 11:35) Kraes bambae i jusumaot sam long olgeta blong oli “prins long olgeta ples long wol.” Mo yumi save sua se bambae hem i jusum sam long ol elda we oli stap long ol kongregesen tede, blong oli lidim ol man long niufala wol.—Aes. 32:1, NW.

¹⁸ Long taem we Kraes i rul blong 1,000 yia, bambae hem i kam papa blong ol narafala man tu. ?Hem i kam papa olsem wanem? Olgeta man we oli bilif long sakrefaes blong Jisas bambae oli laef long wol ya gogo i no save finis. (Jon 3:16) Ale, Kraes bambae i kam “Papa” blong olgeta blong olwe.—Aes. 9:6, 7, NW.

19, 20. ?Ol samting we Ol Sam 45 i tokbaot, oli impoten long ol tru Kristin olsem wanem?

¹⁹ Ridim Ol Sam 45:1, 17. Tru ya, ol samting we Ol Sam 45 i tokbaot, oli impoten long olgeta tru Kristin. Ol tabu Kristin we oli stap yet long wol oli glad tumas from we i no longtaem bambae oli go long heven blong joen wetem ol brata blong olgeta, mo wetem King Jisas Kraes, we i olsem man blong olgeta. Ol narafala sipsip oli wantem tumas blong stap aninit long King blong olgeta. Mo tu, oli glad tumas blong joen wetem ol narafala tabu Kristin we oli stap yet long wol. Afta we Kraes mo woman blong hem tufala i mared, bambae oli mekem plante gudfala blesing i kamaot long wol.—Rev. 7:17; 21:1-4.

²⁰ Taem yumi stap wet blong luk ol profet tok ya long saed blong Mesaea King oli kamtru, yumi wantem tumas blong presem nem blong hem. I gud yumi ‘presem nem blong King, gogo i no save finis.’