I gat plante samting we oli hapen we oli mekem yumi save harem nogud. Oli save spolem tingting blong yumi, oli save mekem yumi kam slak, mo oli save mekem yumi gat nogud tingting long saed blong laef. King Deved long Isrel bifo i harem nogud bigwan from plante trabol we hem i kasem. ?Hem i mekem wanem blong i save winim ol trabol ya? Long wan Sam we hem i raetem, hem i talem se: “Mi mi krae i go long Hae God [Jehova] blong hem i givhan long mi. Mi stap askem long hem blong hem i sore long mi. Mi talemaot olgeta samting long hem we i mekem mi mi harem nogud, mi talemaot olgeta trabol blong mi long hem. Taem mi mi harem nogud tumas, we tingting blong mi i foldaon from, be hem i save wanem samting we bambae mi mas mekem.” Yes, Deved i putum hem i stap daon mo i prea long God blong i givhan long hem.—Sam 142:1-3.

Long wan narafala Sam, Deved i singsing se: “Mi mi askem wan samting long Hae God, wan samting nomo we mi mi wantem. Mi wantem tumas blong mi save stap long haos blong hem oltaem long laef blong mi, blong mi stap lukluk ol gudgudfala fasin blong hem, mi stap tingting gud long olgeta, mo blong mi save askem long hem blong i lidim mi oltaem.” (Sam 27:4) Deved i no wan Livaet. Be hem i stap stanap afsaed long yad, klosap long haos tapolen, we hemia stamba ples blong mekem tru wosip long Jehova long taem ya. Ating hat blong hem i fulap long glad mo hem i wantem talem tangkiu long Jehova from we hem i wantem spenem laef blong hem long ples ya, nao hem i save “lukluk ol gudgudfala fasin” blong Jehova.

Hibru tok we oli tanem i kam “gudgudfala fasin,” i givim tingting ya blong wan samting we “man i glad long hem, no i mekem man i harem gud long tingting mo filing blong hem.” Oltaem Deved i talem tangkiu long Jehova from ol samting we Jehova i stanemap long saed blong tru wosip. I gud we yumi askem se: ‘?Mi tu mi harem olsem Deved?’

Tede, Jehova i mekem wan rod blong yumi save kam klosap long hem. Rod ya hemia bigfala tempol long saed blong spirit, we i minim olgeta samting we Jehova i stanemap long saed blong tru wosip. * Sipos yumi “tingting gud” long ol samting ya, yumi tu yumi save “lukluk ol gudgudfala fasin” blong Jehova.

Yu traem tingbaot olta we oli wokem blong bonem sakrefaes, we i stap long doa blong haos tapolen. (Eks. 38:1, 2; 40:6) Olta ya i pija blong fasin ya we God i agri blong Jisas i givim laef blong hem olsem wan sakrefaes. (Hib. 10:5-10) ?Samting ya i tijim yumi long wanem? Aposol Pol i raetem se: “Fastaem yumi ol enemi blong hem, be from we Pikinini blong hem i ded, hem i mekem yumi kam ol fren blong hem.” (Rom 5:10) Taem yumi bilif long blad blong Jisas we i ron olsem wan sakrefaes, yumi save kam ol fren blong God. (Sam 25:14) Ale, yumi harem gud from we hem i glad long yumi mo i trastem yumi.

From we God “i tekemaot ol sin” blong yumi, i olsem we God i ‘givim niufala paoa long yumi,’ nao yumi harem gud bakegen. (Wok 3:19-20) Hemia i sem mak long wan presina we hem i stap wet blong oli kilim hem i ded. Hem i harem nogud mo i sore from ol samting we hem i mekem bifo, nao hem i jenisim olgeta rabis fasin blong hem. Taem jaj i luk ol jenis long laef blong presina ya, samting ya i pulum hem blong i ravemaot no i tekemaot ol ripot we oli raetem long saed blong presina ya, ale presina ya i no moa save kasem panis ya blong ded. !Ating presina ya bambae i harem gud tumas! Jehova i olsem jaj ya. Taem wan man i tanem tingting from sin blong hem, Jehova i kaen long hem mo i fogivim hem.

Sam long ol samting ya we Deved i luk taem hem i stap stanap long haos blong Jehova, hemia: Hem i luk wan bigfala hip blong ol man Isrel we oli hivap wanples, ol man oli stap ridim mo eksplenem Loa we God i givim, oli stap bonem insens, mo ol pris mo ol Livaet oli stap mekem wan tabu wok. (Eks. 30:34-38; Nam. 3:5-8; Dut. 31:9-12) Ol samting ya we oli joen  wetem wosip long taem blong ol man Isrel bifo, oli laenap wetem tru wosip tede.

Long taem blong yumi, “i gud tumas taem ol man blong God oli stap wanples, we oli gat wan tingting nomo.” (Sam 133:1) Long fulwol, plante man oli stap joen “long kampani blong ol brata.” (1 Pita 2:17, NW) Long ol miting, yumi harem ol brata oli ridim mo eksplenem ol tok blong Baebol. Jehova i yusum ogenaesesen blong hem blong mekemrere ol program blong tijim yumi. Mo i gat plante kakae long saed blong spirit we oli kamaot long ol buk we yumi stap yusum long prapa Baebol stadi blong yumi, mo long famle stadi blong yumi. Wan memba blong Hed Kampani i talem se: “Mi mi tingting dip long Tok blong Jehova, mi tingbaot mining blong hem, mi lukaot sam moa save blong traem kasem save long hem. Ale taem mi stap long wok, mi harem gud long ol rij kakae ya blong spirit.” Yes, save blong Baebol i ‘save mekem yumi harem gud.’—Prov. 2:10.

Tede, Jehova i stap harem ol prea we ol man blong hem oli mekem i go long hem evri dei. Ol prea ya oli olsem gudfala smok blong insens we i smel gud i go long hem. (Sam 141:2) Jehova i glad long yumi taem yumi prea long hem wetem tingting daon. Samting ya i mekem yumi harem gud tumas.

Moses i prea se: “God [Jehova], yu yu Masta blong mifala. Plis yu givim ol gudgudfala samting blong yu long mifala, mo yu mekem we bambae mifala i stap win oltaem long olgeta samting we mifala i stap mekem.” (Sam 90:17) Taem yumi wok strong long wok blong prij, Jehova i blesem wok blong yumi. (Prov. 10:22) Maet yumi bin givhan long samfala blong oli save trutok. Maet yumi mekem wok blong prij blong plante yia, nating se yumi harem nogud, yumi sik, tingting blong yumi i foldaon, no ol man oli agensem yumi. (1 Tes. 2:2) Nomata se i olsem, yumi glad tumas blong “lukluk ol gudgudfala fasin” blong Jehova, mo yumi luksave se Papa blong yumi long heven, i glad tumas taem yumi traehad long wok blong hem.

Long wan sing we Deved i mekem, hem i talem se: “Hae God. Yu nomo yu stamba blong olgeta laef blong mi, yu yu stap givim olgeta samting ya long mi we mi mi sot long hem. Laef blong mi long fiuja i stap long han blong yu. Olgeta samting we yu yu givim long mi oli gud tumas.” (Sam 16:5, 6) Deved i talem tangkiu long Jehova from “olgeta samting” we hem i gat. Olgeta samting ya, hemia se hem i save fren gud wetem Jehova mo mekem wok blong hem. Olsem Deved, maet yumi harem nogud from sam hadtaem, be yumi gat plante blesing long saed blong spirit. I gud yumi gohed blong tingting gud long tru wosip we yumi mekem, mo oltaem yumi mas glad blong lukluk haos tempol blong Jehova long saed blong spirit.