1, 2. (1) ?Taem Moses i gat 40 yia, hem i mekem wanem desisen? (Yu luk pija long stat blong stadi.) (2) ?From wanem Moses i jusum blong harem nogud wetem ol man blong God?

MOSES i save samting we bambae hem i kasem sipos hem i stap long Ijip. Hem i luk ol naesfala haos blong ol rijman. Famle blong king i adoptem hem. Mo oli “tijim hem long waes blong ol man Ijip,” blong wokem ol samting, stadi long ol sta, matematik, mo ol narafala save blong saens. (Wok 7:22) !I isi nomo blong hem i kam rijman, mo blong hem i gat paoa mo haenem!

² Be taem Moses i gat 40 yia, hem i mekem wan desisen we Fero mo famle blong hem oli no kasem save long hem. Hem i lego laef blong ol man Ijip, mo i jusum blong harem nogud wetem ol man blong God. ?From wanem? From we hem i bilif long God. (Ridim Hibrus 11:24-26.) Moses i no stap putum tingting blong hem long ol samting blong wol, be hem i bilif. I olsem we hem i luk “God ya we man i no save luk,” mo hem i putum tingting blong hem long ol promes blong hem.—Hib. 11:27.

3. ?Wanem ol kwestin we stadi ya bambae i ansa long olgeta?

³ Yumi tu, yumi no mas putum tingting blong yumi long ol samting we yumi save luk. Yumi mas ol “man blong bilif.” (Hib. 10:38, 39) Sipos yumi wantem se bilif blong yumi i strong, yumi mas stadi long ol tok long Hibrus 11:24-26, we oli tokbaot Moses, mo yumi traem faenem ansa blong ol kwestin ya: ?Bilif i givhan olsem wanem long Moses, blong hem i lego ol flas samting blong Ijip? ?Taem ol man oli daonem  hem, olsem wanem bilif i givhan long hem blong hem i tinghae long wok we Jehova i givim? ?Mo from wanem “hem i stap luk long pei we God bambae i givim long hem”?

4. ?Moses i luksave wanem?

⁴ Bilif i givhan long Moses blong i luksave se fasin blong ‘harem gud long sin’ i blong smoltaem nomo. Maet ol narafala man oli luk se i gat fulap giaman god mo wok blong rabis spirit long Ijip. Be kantri ya i kam wan strong politik paoa long wol, mo ol man blong Jehova oli stap wok slef nomo. Be Moses i save se God i naf blong jenisim samting ya. Hem i bilif strong se ol rabis man bambae oli lus. Taswe hem i no wantem ‘harem gud long sin.’

5. ?Wanem i save givhan long yu blong yu no wantem ‘harem gud long sin’?

⁵ ?Yu mas mekem wanem blong yu no wantem ‘harem gud long sin’? Yu no mas fogetem se fasin ya i blong smoltaem nomo. Bilif bambae i givhan long yu blong yu luksave se “wol ya wetem ol samting we ol man blong hem oli wantem, oli stap lus.” (1 Jon 2:15-17) Yu mas tingting dip long samting we bambae i hapen long ol man we oli no wantem tanem tingting blong olgeta. Olgeta ya oli stap ‘long ples we i glis, mo bambae God i spolem olgeta kwiktaem nomo.’ (Sam 73:18, 19) Sipos wan samting i pulum yu blong yu mekem sin, i gud yu askem se: “?Mi mi wantem se laef blong mi long fiuja i olsem wanem?”

6. (1) ?From wanem Moses i no wantem we ol man oli singaot hem se “pikinini blong gel blong Fero”? (2) ?From wanem desisen blong hem i gud?

⁶ Bilif i pulum Moses blong hem i jusum wan gudfala wok. “Moses i stap bilif strong long God, taswe taem hem i kam bigman, hem i no wantem we olgeta oli talem se hem i pikinini blong gel blong Fero.” (Hib. 11:24) Moses i no ting se bambae hem i stap nomo wetem famle blong Fero mo i mekem wok blong God, olsemia, hem i save yusum haenem mo ol rij samting blong hem, blong givhan long ol man Isrel. Be hem i lavem Jehova long olgeta hat, laef, mo paoa blong hem. (Dut. 6:5) Desisen blong hem i gud, from we i halpem hem blong i no harem nogud long ol yia we oli kam biaen. !Plante long ol sas samting blong Ijip, ol man Isrel nao oli go tekemaot olgeta! (Eks. 12:35, 36) Jehova i daonem flas blong Fero mo i kilim hem i ded. (Sam 136:15) Be hem i yusum Moses blong i lidim wan bigfala neson i go long sefples.

7. (1) Folem Matiu 6:19-21, ?from wanem yumi no mas wantem ol samting blong wol ya? (2) Yu talem wan stori we i soemaot samting ya.

⁷ Sipos yu yu wan yangfala Kristin, ?bilif i save givhan long yu olsem wanem blong yu jusum wan wok? Yu mas tingbaot fiuja blong yu. Sipos yu bilif long ol promes blong God, bambae yu tingbaot wan fiuja we i blong stap olwe, be i no wan fiuja we i blong stap smoltaem nomo. (Ridim Matiu 6:19-21.) Wan woman we i stap danis, nem blong hem Sophie, hem i mekem desisen ya. Wan kampani blong danis ya ballet long Amerika, i givim wan skolasip mo wan gudfala wok long hem. Sophie i talem se: “Mi mi laekem tumas taem ol man oli glad blong wajem mi mi danis mo oli leftemap mi. Mi harem se mi hae moa long ol fren blong mi. Be nating se i olsem, mi mi no glad.” Sam taem biaen, Sophie i wajem DVD ya, Young People Ask—What Will I Do With My Life? Hem i talem se: “Wol ya i givim gudfala wok long mi mo i mekem ol man oli laekem mi, be mi mi no moa wosipim Jehova long fulhat blong mi.” Ale, Sophie i prea long Jehova wetem fulhat blong hem, mo biaen hem i lego danis. ?Hem i harem olsem wanem tede? Hem i talem se: “Mi mi no sore we mi lego olfala laef blong mi. Tede mi mi glad tumas. Mi mo man blong mi, mitufala i mekem wok blong paenia. I tru se mitufala i no gat haenem mo ol sas samting, be mitufala i wantem mekem wok blong Jehova. Mitufala i stap klosap long Jehova mo mitufala i gat ol Baebol stadi. Mi mi no sore nating from samting we mi lego.”

8. ?Wanem advaes blong Baebol i save givhan long wan yangfala blong i jusum wan wok?

⁸ Jehova i save samting we i gud long yu. Moses i talem se: “Hae God i God blong yumi, mo ol samting we hem i wantem blong yumi mekem i olsem. Yumi mas tinghevi long hem, mo yumi mas ona long hem, mo yumi mas folem  ol fasin blong hem, mo yumi mas lavem hem, mo yumi mas mekem ol samting we hem i talem long yumi, long olgeta tingting blong yumi, mo long olgeta laef blong yumi, mo yumi mas obei long olgeta loa blong hem. Mi mi stap talemaot ol tok ya long yufala tede blong i save givhan long yufala.” (Dut. 10:12, 13) Naoia we yu yangfala yet, i gud yu jusum wan wok we bambae i sapotem yu blong yu mekem wok blong Jehova, mo blong yu lavem hem ‘long olgeta tingting mo laef blong yu.’ Yu save trastem se wok ya bambae i ‘givhan long yu.’

9. Yu eksplenem from wanem maet i had blong Moses i mekem wok we God i givim long hem.

⁹ Moses i “stap ting se sipos ol man oli laf long hem from Mesaea ya we God bambae i sanem hem i kam, be hem bambae i no save sem. Hem i harem gud moa long samting ya, i winim we i harem gud long ol gudfala samting blong laef long Ijip.” (Hib. 11:26) Long vas ya, Baebol i tokbaot Moses se hem i mekem wok olsem “Mesaea,” no “man we God i jusumaot hem.” Hemia i min se Jehova i jusumaot hem blong hem i lidim ol man Isrel oli aot long Ijip. Moses i save se wok ya i no isi. Mo ol man oli save mekem hem i “sem.” Sam yia bifo, wan man Isrel i daonem hem, i se: “?Hu i putumap yu blong yu kam bos long mifala, yu stap jajem mifala?” (Eks. 2:13, 14) Biaen, taem Moses i mas go luk king blong Ijip, hem i askem long Jehova se: “?Bambae king ya i harem mi olsem wanem?” (Eks. 6:12) Nating se i olsem, hem i wantem mekemrere tingting blong hem mo i wantem stanap strong taem ol man bambae oli mekem hem i sem. Ale hem i talemaot ol wari blong hem long Jehova. ?Jehova i givhan long hem olsem wanem?

10. ?Wanem fo samting we Jehova i mekem blong givhan long Moses?

¹⁰ Jehova i mekem fo samting blong givhan long Moses. Faswan, Jehova i promes long hem se: “Mi bambae mi stap wetem yu.” (Eks. 3:12) Nambatu, Jehova i wantem se Moses i trastem hem, ale hem i eksplenem mining blong nem blong hem, se: “Bambae Mi Mi Jenis i Kam Olsem We Mi Mi Wantem.” * (Eks. 3:14, NW) Namba tri, hem i givim paoa long Moses blong i mekem merikel, blong pruvum se hem nao i sanem Moses. (Eks. 4:2-5) Namba fo, Jehova i jusum Eron blong i toktok long bihaf blong Moses mo blong givhan long hem. (Eks. 4:14-16) Ol samting ya oli mekem Moses i bilif strong se God i stap givhan long ol man blong hem, blong oli mekem evri wok we hem i givim long olgeta. Taswe, hem i talem long Josua se: ‘Jehova bambae i no save gowe long yu. Hem bambae i no save lego yu samtaem. Nao from samting ya, tingting blong yu bambae i no mas foldaon, mo yu yu no mas fraet. Jehova bambae i stap lidim yu, mo oltaem, hem bambae i stap wetem yu.’—Dut. 31:8.

11. ?From wanem Moses i tinghae long wok we hem i mas mekem?

¹¹ Moses i tinghae long wok we Jehova i givim long hem, from we hem i save se Jehova bambae i givhan long hem. Long tingting blong Moses, wok blong Jehova i gud moa i bitim we hem i wok blong king blong Ijip. !Mo wok blong prins i nating nomo long wok we God i givim long hem! Moses i gat stret tingting, taswe hem i fren gud wetem Jehova, mo Jehova i givim paoa long hem blong i “mekem ol bigbigfala samting,” taem hem i lidim ol man Isrel oli go long Promes Lan.—Dut. 34:10-12.

12. ?Jehova i givim wanem wok we yumi mas tinghae long hem?

¹² Yumi tu, yumi gat wan wok blong mekem. Jehova i talem se yumi mas go talemaot gud nius, olsem we hem i bin talem long aposol Pol mo ol narafala. (Ridim 1 Timoti 1:12-14.) Yumi evriwan i gat janis blong talemaot gud nius. (Mat. 24:14; 28:19, 20) Sam Kristin oli prij fultaem. Sam brata we oli bigman long Kristin fasin oli mekem wok blong elda mo man blong givhan. Be maet ol famle blong yu we oli no bilif, mo sam narafala man, oli no tinghae long ol wok olsem. Maet oli tok nogud long yu from  we yu lego sam samting, blong yu save mekem wok we Jehova i givim. (Mat. 10:34-37) Sipos oli mekem tingting blong yu i foldaon, maet yu stat blong ting se i blong nating nomo we yu lego ol samting ya. No maet bambae yu ting se yu no naf blong mekem wok we Jehova i givim. Sipos i olsem, ?bilif i save givhan long yu olsem wanem?

13. ?Wanem fo samting we Jehova i mekem blong givhan long yu?

¹³ Yu mas plis long Jehova blong hem i givhan long yu. Yu talemaot ol wari blong yu long hem, from we hem nao i givim wok ya long yu, mo bambae hem i givhan long yu. ?Bambae hem i givhan olsem wanem? Bambae hem i mekem sem mak olsem we hem i mekem long Moses. Faswan, Jehova i talem se: ‘!Mi bambae mi mekem yu strong! !Mi bambae mi givhan long yu! !Mi bambae mi blokemgud yu, mi sevem yu!’ (Aes. 41:10) Nambatu, hem i mekem yu tingbaot bakegen se yu save trastem ol promes blong hem. Hem i se: “Mi mi talemaot finis se bambae i olsem, mo ol samting ya bambae oli kamtru olsem we mi mi talem.” (Aes. 46:11) Namba tri, Jehova i givim “paoa ya we i bigwan tumas,” long yu. (2 Kor. 4:7) Namba fo, hem i givim ol brata mo sista blong givhan long yu blong yu stanap strong. Ol brata mo sista ya oli stap ‘toktok gud long yu blong mekem tingting blong yu i strong, mo oli stap givhan long yu.’ (1 Tes. 5:11) Taem yu luk se Jehova i stap givim olgeta samting ya long yu, bilif blong yu bambae i kam strong moa. Ale bambae yu laekem ol wok we hem i givim long yu, i bitim ol samting blong wol ya.

14. ?From wanem Moses i save se Jehova bambae i givim pei long hem?

¹⁴ Oltaem Moses i “stap luk long pei we God bambae i givim long hem.” (Hib. 11:26) Moses i gat smol save nomo long saed blong fiuja, be save ya i pulum hem blong mekem gudfala desisen long laef blong hem. Olsem Ebraham bifo, Moses i bilif se Jehova bambae i mekem ol dedman oli laef bakegen. (Luk 20:37, 38; Hib. 11:17-19) Moses i bilif se ol promes blong God bambae oli kamtru. Taswe, hem i no ting se hem i westem taem blong hem long ol 40 yia we hem i stap long Midian, mo ol 40 yia we hem i stap long draeples. Nating se hem i no save se Jehova bambae i mekem ol promes blong hem oli kamtru olsem wanem, be hem i bilif strong se Jehova bambae i givim pei long hem.

15, 16. (1) ?From wanem yumi mas putum tingting i stap oltaem long pei we God bambae i givim? (2) ?Wanem ol blesing blong Kingdom we yu yu wantem tumas blong luk?

¹⁵ ?Olsem wanem? ?Yu tu yu putum tingting  blong yu ‘long pei we God bambae i givim’? Olsem Moses, yumi no save stret se ol promes blong God bambae oli kamtru olsem wanem. Yumi no “save taem ya we bambae” bigfala trabol i kam. (Mak 13:32, 33) Be yumi gat moa save i bitim Moses. Yumi save plante promes we oli tokbaot laef aninit long Kingdom blong God. Samting ya i mekem se yumi save gat wan klia tingting long niufala wol, mo i mekem se yumi lukaot Kingdom fastaem. Yu traem tingbaot: ?Bambae yu yu pem wan haos sipos yu no save se haos ya i olsem wanem? !Nogat! Long sem fasin, bambae yumi no yusum laef blong yumi long wan rod we yumi no save se i lidim yumi i go wea. Bilif i mas pulum yumi blong yumi gat wan klia tingting blong laef long niufala wol.

¹⁶ Sipos yu wantem gat wan klia tingting blong rul blong Kingdom, yu mas lukluk “oltaem” i go long laef blong yu long Paradaes. Yu traem tingbaot se laef blong yu long Paradaes bambae i olsem wanem. Taem yu stadi long stori blong ol man blong God we oli laef bifo long taem blong Jisas, i gud yu tingbaot ol kwestin we bambae yu askem long olgeta, taem oli laef bakegen. Mo yu traem tingbaot ol kwestin we maet bambae oli askem, long saed blong laef blong yu long ol las dei ya. Long tingting blong yu, yu traem luk taem ya we bambae yu mitim ol bubu blong yu we oli laef plante handred yia bifo. Bambae yu glad tumas blong luk olgeta, mo yu tijim olgeta long ol samting we God i mekem, blong oli save laef bakegen. Yu traem tingbaot glad blong yu taem yu wajem mo yu kasem save long ol wael anamol. Yu traem tingbaot olsem wanem bambae yu lavem Jehova moa taem yu stap kam stret gud.

17. ?Sipos yumi tingbaot pei we God bambae i givim, hemia i save givhan long yumi olsem wanem?

¹⁷ Sipos yumi gat wan klia tingting long pei we God bambae i givim, bambae yumi gohed strong, yumi stap glad, mo yumi mekem ol desisen we oli stanap long promes ya blong laef olwe. Pol i raet i go long ol tabu Kristin se: “Sipos yumi stap putum tingting blong yumi long God, blong kasem samting we i no kamtru yet, bambae yumi save wet long hem, we tingting blong yumi bambae i longfala.” (Rom 8:25) Toktok ya i stret tu long ol Kristin we bambae oli laef olwe long wol. Nating se yumi no kasem yet ‘pei we God bambae i givim,’ be from we yumi bilif strong, ale yumi gat longfala tingting blong wet. Olsem Moses, yumi no ting se yumi westem ol yia we yumi mekem wok blong Jehova. Be yumi save gud se “ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.”—Ridim 2 Korin 4:16-18.

18, 19. (1) ?From wanem yumi mas traehad moa blong holemtaet bilif blong yumi? (2)  ?Bambae yumi tokbaot wanem long nekis stadi?

¹⁸ Bilif i givhan long yumi blong yumi luksave se ‘olgeta samting ya we yumi stap putum tingting blong yumi i strong long hem, oli tru.’ (Hib. 11:1) Ol man we oli putum tingting blong olgeta long ol samting blong wol, oli no kasem save se wok blong Jehova i gud tumas. Long tingting blong olgeta, wok ya i wan ‘krangke samting.’ (1 Kor. 2:14) Yumi stap tingting strong blong kasem laef we i no save finis, mo blong luk ol dedman oli laef bakegen. Be ol man blong wol oli no stap tingbaot ol samting ya nating. Long taem blong Pol, ol man we oli gat fulap waes blong wol, oli talem se Pol i no gat hed mo i stap “pikimap tok olbaot nomo.” Sem mak tede, plante man oli ting se ol promes ya we yumi stap talemaot, oli krangke samting nomo.—Wok 17:18.

¹⁹ Ol man blong wol oli no gat bilif nating, taswe yumi mas traehad blong holemtaet bilif blong yumi. Yumi mas askem strong long Jehova ‘blong bilif blong yumi i no foldaon.’ (Luk 22:32) Yumi mas tingbaot oltaem, trabol we man i kasem taem hem i mekem sin. Yumi tingbaot se wok blong Jehova i gud moa i bitim eni narafala wok long wol, mo yumi mas tingbaot promes ya blong laef olwe. ?Olsem wanem? ?I gat sam narafala samting moa we yumi save lanem long eksampol blong Moses? Yes i gat. Long nekis stadi, bambae yumi tokbaot se bilif i givhan long Moses blong hem i luk “God ya we man i no save luk.”—Hib. 11:27.