BLONG talem stret, mi mi glad se i gat faef man nomo i stap long pablik tok ya long yia 1957. ?From wanem? From we mi mi man blong sem stret. Taem mi mi smol mo man i kam long haos blong mifala, mi mi go haed, nating se mi save man ya.

Taswe, maet yu sapraes taem mi talem se, plante wok we ogenaesesen blong Jehova i givim long mi, mi mas joen wetem ol man blong mekem. Sam long olgeta oli fren, be sam oli strenja nomo. Long ful laef blong mi, mi sem mo mi ting se mi nating nomo. Mi mi wok had blong winim fasin ya. Taswe, ol wok we mi mekem long ogenaesesen blong Jehova, mi no mekem long paoa blong mi nomo. Mi luk we promes blong Jehova i kamtru long mi, se: ‘!Mi bambae mi mekem yu yu strong! !Mi bambae mi givhan long yu! !Mi bambae mi blokemgud yu, mi sevem yu!’ (Aes. 41:10) Plante taem Jehova i yusum ol gudfala brata mo sista blong givhan long mi. Bambae mi eksplenem olsem wanem hem i mekem olsem, stat long taem we mi mi pikinini nomo.

Long wan Sande moning afta long yia 1940, Elsie Huntingford i kam long plantesen blong mifala long  saotwes Ontario. Hem i kilkilim doa, ale Mama i go openem. Papa i stap insaed wetem mi, mitufala i stap lesin nomo. Papa tu i man blong sem. Be hem i girap i go long doa, from we hem i ting se Elsie i wantem salem sam samting long Mama. Ale hem i wantem talem long Elsie se mifala i no wantem samting we hem i stap salem. Be hem i sek we Elsie i askem se: “?Yutufala i no wantem stadi Baebol?” Papa i talem se: “!Si, mitufala i wantem samting ya!”

Sista Elsie i kam long stret taem nomo. Fastaem, Papa mo Mama i strong blong folem Yunaeted Jos blong Kanada. Be tufala i jes tekem desisen blong aot long jos ya. ?From wanem? From we pasta i stap pinim wan lis insaed long jos, we i talemaot nem blong ol man we oli givim mane. Fas nem long lis ya, hemia man we i givim moa. Papa mo mama blong mi, tufala i pua, ale nem blong tufala i stap long en blong lis evritaem. Ol elda blong jos oli stap fosem tufala blong tufala i givim moa mane. Mo tu, i gat wan narafala pasta we i talem se hem i no bilif long ol tijing blong jos, be hem i no wantem se oli sakemaot hem long wok ya, ale hem i gohed nomo blong prijimaot ol tijing ya. Taswe mifala i aot long jos ya, be mifala i lukaot rod yet blong kasem ol stret save blong God.

Long taem ya, gavman blong Kanada i putum tabu long wok blong ol Witnes blong Jehova. Taswe, taem Sista Elsie i mekem stadi wetem mifala, hem i yusum Baebol nomo wetem wan smol blak buk we hem i raetem sam not long hem. Sloslo, hem i luksave se mifala i no save talemaot hem long ol polis, ale hem i karem sam buk we oli tokbaot Baebol. Taem mifala i stadi finis, mifala i haedem gud ol buk ya. *

Nating se plante man oli agensem Sista Elsie, mo hem i gat ol narafala trabol tu we oli save blokem hem, be hem i gohed strong blong talemaot gud nius. Mi mi laekem tumas strong tingting we hem i soemaot, mo samting ya i givhan long mi blong mi bilif long trutok. Long namba 27 Februari 1949, mi mi baptaes. Hemia wan yia afta we papa mo mama blong mi i baptaes. Mi baptaes long wan bigfala dram we ol buluk oli stap dring wota long hem. Mi mi gat 17 yia, mo mi gat strong tingting blong mekem wok blong God fultaem.

Afta we mi mi baptaes, mi wok long wan bang mo long wan ofis, from we mi ting se i moagud mi winim sam mane bifo we mi stat long wok blong paenia. Be mi mi westem mane ya nomo, olsem ol narafala yangfala. Ale Brata Ted Sargent i givim advaes long mi se mi no mas fraet, be mi mas trastem Jehova nomo. (1 Kron. 28:10) Smol tok ya hem i naf blong pusum mi blong mi stat long wok blong paenia long Novemba 1951. Mi mi gat 4,000 vatu, mo wan sekenhan baskel, mo wan niu basket blong prij, hemia nomo. Be oltaem Jehova i givim samting we mi mi nidim. !Mi glad tumas we Ted i pulum mi blong mi stat long wok blong paenia! Hemia i mekem se mi mi kasem fulap blesing.

Long wan naet long en blong Ogis 1952, wan brata blong branj ofis long Toronto i ring long mi. Hem i wantem se mi stat blong wok long Betel long manis Septemba. Nating se mi sem mo mi neva go long Betel, be mi mi glad from we mi harem ol paenia oli tokbaot wok long Betel se i gud tumas. Kwiktaem nomo, mi harem se Betel i hom blong mi.

Tu yia afta we mi go long Betel, mi tekem ples blong Bill Yacos, brata we i lukaot long wan kongregesen long Toronto (naoia yumi kolem kodineta blong ol elda). Mi mi gat 23 yia, mo mi harem se mi wan smol man bus nomo. Be Brata Yacos i kaen tumas mo i gat tingting daon, ale hem i soemaot long mi ol samting we mi mas mekem. Mo Jehova i givhan bigwan long mi.

Brata Bill i wan sot man we i gat bigfala bodi, mo i stap smael oltaem. Hem i traehad blong save gud evri man. Hem i lavem ol brata, mo oli lavem hem. Hem i go luk ol brata oltaem, i no long taem we oli gat trabol nomo. Bill i pulum mi blong mi mekem sem mak, mo blong mi prij plante wetem ol brata mo sista. Hem i talem se: “Ken, yu mas soemaot long ol brata se yu laekem olgeta. Nao bambae oli no luk ol mastik blong yu.”

Long Jenuware 1957, Jehova i givhan long mi long wan spesel rod. Long manis ya, mi mi mared long Evelyn. Hem i wan sista we i joen long namba 14 klas blong Gilead. Bifo we mitufala i mared, hem i stap prij long Quebec, long wan ples we ol man oli toktok Franis. Long taem ya, Katolik Jos i gat bigfala paoa long Quebec. Taswe Evelyn i fesem hadtaem, be hem i fasgud long Jehova mo long wok blong hem.

Evelyn i soemaot tu se hem i lavem mi tru. (Efes. 5:31) !Samting we i hapen jes afta we mitufala i mared i traem lav ya! Mitufala i mekem plan blong go spel long Florida, Amerika. Be wan dei nomo afta we mitufala i mared, branj ofis i askem long mi blong mi kam long wan miting long Betel long Kanada. Miting ya i blong wan wik. Hemia i spolem plan blong mitufala. Be mitufala tugeta i wantem mekem samting we Jehova i askem. Ale mitufala i lego spel ya. Evelyn i spenem wik ya long wok blong prij long wan ples klosap long Betel. Ol man oli defren long ol man Quebec, be hem i gohed nomo.

Long en blong wik ya, mi mi sapraes taem oli talem long mi se bambae mi mekem wok blong  eria elda long not Ontario. Mi mi jes mared, mi gat 25 yia nomo, mo mi no gat plante save. Nating se i olsem, mitufala i trastem Jehova, ale mitufala i go. Long medel blong koltaem, mitufala wetem sam narafala eria elda we oli mekem wok ya longtaem finis, mifala i jam long tren blong go long ol ples we mifala i wok long hem. !Ol narafala ya oli leftemap tingting blong mitufala bigwan! Mitufala i pem jea nomo long tren, be wan brata i givim smol rum blong hem long tren, blong mitufala i save slip long hem. Long nekis moning, hemia 15 dei nomo afta we mitufala i mared, mitufala i visitim smol grup blong Hornepayne, olsem mi eksplenem long stat blong stori ya.

I gat plante moa jenis tu long ol yia biaen. Long en blong yia 1960, mi mi stap mekem wok blong distrik elda, nao oli singaot mi mi go long namba 36 klas blong Gilead long Brooklyn, New York. Kos ya i blong ten manis, mo i stat long Februari 1961. Mi mi glad tumas, be mi sore tu, from we oli no singaot Evelyn i go. Hem i mas raetem wan leta, olsem plante narafala sista tu, blong talem se hem i agri se mi go long trening ya blong ten manis. Hem i krae, be hem i wantem tu se mi mi kasem gudfala trening ya long Gilead. Afta we mitufala i tokbaot, mitufala i agri se mi mas go.

Ale Evelyn i go wok long Betel long Kanada. Hem i serem wan rum wetem wan sista we tabu spirit i makemaot hem, nem blong hem Margaret Lovell. Mitufala i harem nogud tumas blong stap longwe long mitufala. Be Jehova i givhan long mitufala blong mitufala i harem gud long defdefren wok we mitufala i mekem. Mi mi lavem Evelyn moa, taem hem i agri se mi mas go kasem trening, blong Jehova i save yusum mi moa long ogenaesesen blong hem.

Afta we tri manis i pas long Gilead, Brata Nathan Knorr, we long taem ya hem i lukaot long wok long fulwol, i askem wan narakaen kwestin long mi. Hem i askem sipos mi mi glad blong gobak long Kanada blong tijim ol brata long Kingdom Ministri Skul. Hem i talem se sipos mi no wantem, i oraet nomo. Mi save finisim Skul blong Gilead, mo afta, maet oli sanem mitufala i go samples blong mekem wok blong misinari. Hem i talem tu se sipos mi gobak long Kanada, maet oli no singaot mi bakegen blong mi mekem Skul blong Gilead. Ating bambae mi gohed blong mekem wok blong prij long Kanada nomo. Mitufala nao i mas mekem desisen.

Mi mi save finis tingting blong Evelyn long ol wok we Jehova i givim. Ale mi talem wantaem long Brata Knorr se: “Samting we ogenaesesen blong Jehova i wantem, mitufala i glad blong mekem.” Oltaem mitufala i holem tingting ya, se nating we mitufala i wantem mekem wanem, be mitufala i mas go nomo long ples we ogenaesesen blong Jehova i sanem mitufala long hem.

Ale, long Eprel 1961, mi mi aot long Brooklyn, mo mi gobak long Kanada blong tijim ol brata long Kingdom Ministri Skul. Biaen, mitufala i joen long famle blong Betel. Long yia 1965, mi mi sapraes  bakegen, taem oli singaot mi blong mi joen long namba 40 klas blong Gilead. Bakegen, Evelyn i mas raetem wan leta blong talem se hem i agri. Be sam wik biaen, mitufala i glad tumas, taem oli singaot hem tu i go long skul ya.

Taem Skul blong Gilead i stat, Brata Knorr i talem se olgeta we oli stap lanem lanwis Franis, olsem mitufala, bambae oli go long Afrika. !Be long en blong kos, oli sanem mitufala i gobak long Kanada! Oli talem se mi bambae mi lukaot long branj ofis (naoia yumi kolem kodineta blong Branj Komiti). Mi mi gat 34 yia nomo, taswe mi talem long Brata Knorr se: “Mi mi yang tumas.” Be hem i mekem tingting blong mi i strong. Ale, taem mi mekem ol desisen, oltaem mi askem advaes long ol brata long Betel we oli olfala moa long mi, mo we oli mekem wok blong Jehova longtaem.

Mi lanem plante samting long Betel. Mi mi gat bigfala respek long ol brata long Branj Komiti. Mi lanem plante samting long ol gudfala yangfala mo olfala we mitufala i joen wetem olgeta long Betel, mo long ol kongregesen we mitufala i wok long olgeta.

Wok long Betel i givim janis tu blong mi tijim plante narafala mo blong mi mekem bilif blong olgeta i strong. Aposol Pol i talem long Timoti se: “Yu mas holemstrong ol samting ya we mifala i tijim yu long hem bifo.” Mo bakegen, hem i talem se: “Yu harem finis ol samting we mi stap tijim yufala long hem long fes blong plante man. Naoia yu mas putum ol tok ya blong mi long han blong ol man we yu save trastem olgeta, se oli naf blong tijim ol narafala man bakegen.” (2 Tim. 2:2; 3:14) Samtaem, ol brata mo sista oli askem long mi se mi lanem wanem long ol 57 yia we mi wok long Betel. Mi mi talem long olgeta se: “Mi lanem se yumi mas rere oltaem blong mekem samting we ogenaesesen blong Jehova i wantem, mo yumi mas trastem Jehova blong i givhan long yumi.”

Ol yia we mitufala i stap long Betel oli pas hareap nomo. Taem mi tingting bak long dei we mi kam long Betel fastaem, mi mi wan yangfala we mi fraet mo mi no gat save. Be long ol yia we i pas, Jehova i ‘mekem mi mi strong.’ Mo hem i stap yusum ol brata mo sista yet blong oli givhan long mi long stret taem. Long rod ya, i olsem we hem i stap talem long mi se: ‘!Yu no fraet! !Mi bambae mi givhan long yu!’—Aes. 41:13.