Long wan singsing blong presem God, king blong Isrel bifo, Deved, i talem se: “Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” (Sam 40:8) Deved i gat plante trabol mo wari long laef blong hem. Nating se i olsem, hem i harem gud tumas blong mekem samting we God i wantem. I tru, i no Deved nomo we i harem gud blong wosipim tru God, i gat plante narafala tu.

Aposol Pol i talem bakegen ol tok blong Ol Sam 40:8 taem hem i tokbaot Mesaea, i se: “Long taem ya we Kraes i rere blong kam long wol, hem i talem long God se, ‘Yu yu no wantem we ol man oli stap mekem sakrefaes, mo we oli stap tekem presen i kam blong givim long yu. Be yu yu mekem wan bodi blong mi i stap rere finis blong mi go long wol.’ Mo hem i talem bakegen se, ‘God, mi mi rere blong mekem ol samting ya we yu yu wantem, stret olsem we oli raetem long buk blong Loa blong yu, blong tokbaot mi.’”—Hib. 10:5-7.

Taem Jisas i stap long wol, hem i laekem blong lukluk ol naes samting we God i mekem, mo blong joen wetem ol fren, mo blong kakae wetem ol narafala. (Mat. 6:26-29; Jon 2:1, 2; 12:1, 2) Be hem i laekem moa blong mekem wok blong Papa blong hem, mo i harem gud tumas from. Hem i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34; 6:38) Taem ol disaepol blong Jisas oli wokbaot wetem hem, oli luksave se wok blong talemaot Kingdom i givim glad long hem. Taswe, olgeta tu oli wantem tumas blong mekem wok ya.—Luk 10:1, 8, 9, 17.

Jisas i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem  yufala oltaem, gogo wol ya i finis.” (Mat. 28:19, 20) Blong mekem wok ya, yumi mas go long evri ples we i gat man long hem, yumi gobak bakegen blong luk olgeta we oli intres, mo yumi mekem ol Baebol stadi. Ol wok ya oli mekem yumi harem gud tumas.

Nating se ol man oli intres no nogat, samting we i mekem yumi harem gud tumas long wok blong prij, hemia tingting we yumi gat long wok ya. ?From wanem yumi gohed blong talemaot gud nius, nating se plante man oli no intres? From we yumi save se taem yumi talemaot Kingdom long ol man, yumi stap soemaot se yumi lavem God mo yumi lavem ol man. Yumi save se laef blong yumi mo laef blong ol man i stap long denja. (Esik. 3:17-21; 1 Tim. 4:16) Naoia, bambae yumi tokbaot sam samting we oli givhan long plante brata mo sista we oli wok long ol had teritori, blong oli holemtaet strong tingting, no oli mekem tingting blong olgeta i strong bakegen.

Sipos yumi askem ol gudfala kwestin long ol man we yumi prij long olgeta, plante taem yumi save pulum tingting blong olgeta. Wan sista, nem blong hem Amalia, i mekem olsem. Wan dei, hem i luk wan man i sidaon long ples blong spel, i stap ridim niuspepa. Hem i go klosap long man ya, mo i askem long hem sipos i gat sam gud nius long niuspepa. Man ya i talem se ‘nogat.’ Nao Amalia i talem se: “Mi mi gat wan gud nius blong talem long yu, hemia gud nius blong Kingdom blong God.” Tok ya i pulum tingting blong man ya, nao hem i wantem stadi Baebol. Amalia i statem stadi wetem tu narafala man bakegen long ples blong spel.

Wan narafala sista, nem blong hem Janice, i mekem ples we hem i wok long hem i kam olsem teritori blong hem blong prij. Ale wan sekiuriti mo wan woman we i wok wetem Janice tufala i intres long Wajtaoa. Nao Janice i talem se, taem ol niufala magasin oli kamaot, bambae hem i karem olgeta oli kam long tufala. Hem i mekem sem mak long wan narafala man tu we i wok wetem hem. Man ya i laekem Wajtaoa mo Wekap! from we tufala i tokbaot plante defdefren samting. Smoltaem biaen, wan narafala man bakegen i askem sam magasin. I no longtaem, i gat 11 man mo woman long wok blong Janice we oli ridim ol magasin. Hem i talem se: “!Mi mi kasem wan bigfala blesing long Jehova!”

Wan eria elda i talem long ol pablisa se taem oli storian finis wetem wan man, oli no mas talem nomo se bambae oli kam luk hem bakegen samtaem. I moagud oli askem long hem se: “?Yu yu glad sipos mi soem long yu olsem wanem mifala i mekem Baebol stadi wetem ol man?” Sipos no, oli save askem se: “?Wanem dei nao we i stret blong mi kam luk yu bakegen?” Eria elda ya i talem se long wan kongregesen, ol brata mo sista oli yusum lastok ya long ful wik we hem i stap, nao oli statem 44 Baebol stadi.

I gud yumi gobak kwiktaem, maet sam dei nomo afta we yumi mitim wan man. ?From wanem? From we sipos yumi mekem olsem, man i luksave se yumi wantem tumas blong givhan long hem blong i kasem  save long Baebol. Wan woman i talem from wanem hem i wantem stadi wetem ol Witnes, i se: “Mi mi luk se ol Witnes oli tingbaot mi mo oli wantem tumas blong givhan long mi.”

Wan sista, nem blong hem Madai, i joen long Paenia Skul. Smoltaem biaen, hem i gat 15 Baebol stadi mo i givimaot 5 moa i go long ol narafala pablisa. Mo tu, plante long ol stadi ya oli kam long ol miting. ?Wanem i mekem se Madai i naf blong statem plante Baebol stadi olsem? Long Paenia Skul, hem i lanem se, taem i had blong faenem ol visit, hem i no mas lego kwiktaem. Hem i mas gohed nomo gogo hem i faenem olgeta. Wan narafala Witnes we i givhan long plante man, i talem se: “Mi luk se sipos yumi wantem givhan long plante man blong oli save Jehova, yumi mas go luk olgeta bakegen mo bakegen.”

I no isi blong mekem ol visit mo Baebol stadi oltaem, yumi mas traehad. Nating se i olsem, hadwok blong yumi bambae i karem gudfala frut. Taem yumi traehad, yumi givhan long ol narafala blong “oli save trutok,” nao bambae oli save kasem laef blong olwe. (1 Tim. 2:3, 4) Antap long samting ya, yumi kasem bigfala glad.