1. ?Wanem niufala ogenaesesen i tekem ples blong neson blong Isrel? (Yu luk pija long stat blong stadi.)

TEDE ol man blong Jehova oli mekem wosip we Hem i glad long hem. Fastaem, Jehova i jusum neson blong Isrel se oli man blong hem. Be oli tanem baksaed long hem. Ale, hem i statem wan niufala neson, we hemia ol man blong Kraes. Olgeta nao oli kam ogenaesesen we i tekem nem blong Jehova. Long yia 70, ami blong Rom i spolem Jerusalem, be i no spolem ogenaesesen ya. (Luk 21:20, 21) Long ol las dei ya, ogenaesesen ya i wok yet folem plan we i leftemap nem blong Jehova. Bambae hem i no lus taem Jehova i spolem wol blong Setan. (2 Tim. 3:1) ?Yumi save samting ya olsem wanem?

2. ?Jisas i talem se “bigfala trabol” bambae i olsem wanem, mo bambae i stat wetaem?

² Jisas i tokbaot samting we bambae i hapen long ol las dei, i se: “Bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Mat. 24:3, 21) Bigfala trabol ya bambae i stat  taem Jehova i spolem ‘Bigfala Babilon,’ hemia ol giaman skul. Bambae hem i yusum ol gavman blong mekem samting ya. (Rev. 17:3-5, 16) ?Wanem bambae i hapen afta we Bigfala Babilon i lus?

3. Afta we ol giaman skul oli lus, ?wanem bambae i hapen long ol man blong Jehova?

³ Taem ol giaman skul oli lus, wan skul nomo bambae i stap, hemia ol Witnes blong Jehova. Nao Setan mo ol man blong hem long wol, bambae oli agensem ol man ya blong Jehova. Long taem ya, bambae i luk olsem se Setan i save spolem ol man blong Jehova isi nomo, i no gat wan samting we i protektem olgeta. Baebol i tokbaot taem ya olsem faet we ‘King Gogo blong kantri ya Magog’ i mekem, i se: “Bambae yu wetem ol soldia blong yu mo ol man blong ol narafala kantri we bambae oli go wetem yu, yufala i go faet blong spolem ples blong olgeta olsem wan hariken, mo bambae yufala i kavremapgud ples ya olsem klaod.” !Be sore tumas, oli mestem bigwan!—Esik. 38:1, 2, 9-12.

4, 5. Taem Setan i agensem ol man blong Jehova, ?bambae Jehova i mekem wanem?

⁴ Taem Setan mo ol man blong hem oli agensem ol man blong Jehova, hemia i olsem we oli agensem Jehova stret. (Ridim Sekaraea 2:8.) ?Jehova bambae i mekem wanem? Wantaem nomo, King ya blong heven mo wol bambae i sanem ol enjel blong hem blong oli sevem ol man blong hem. Bambae hem i no letem ol man blong hem oli lus. Afta long hemia, Jehova bambae i statem faet ya blong Amagedon, mo bambae i spolem wol blong Setan blong olwe.—Rev. 16:14, 16.

⁵ Jeremaea i talem se, long Amagedon, Jehova nao bambae i faet agensem ol neson, i se: “Mi bambae mi jajem olgeta man, mo olgeta we oli man nogud, bambae oli ded long faet. Mi mi Hae God, mo hemia tok blong mi. I gat bigfala trabol i stap kam, we bambae i spolem olgeta kantri. I gat bigfala hariken i aot finis long narasaed wol, i stap kam blong spolem olgeta. Long taem ya, ol dedbodi blong ol man ya we mi bambae mi kilim olgeta, bambae oli finisim olgeta ples long wol. Bambae i no moa gat man i stap blong krae from olgeta, mo blong berem olgeta. Bambae oli stap olbaot long graon nomo olsem sitsit blong buluk.” (Jer. 25:31-33) Faet ya blong Amagedon bambae i finisim gud wol blong Setan. Be ogenaesesen blong Jehova bambae i stap.

6, 7. (1) ?Hu i stap long “bigfala kampani”? (2) ?Ogenaesesen blong Jehova i kam bigwan olsem wanem long taem blong yumi?

⁶ Tede ogenaesesen blong Jehova long wol i stap kam bigwan moa, from we God i glad long ol man we oli joen long hem. Baebol i talem se: ‘Jehova i stap lukluk long ol stret man mo i stap lesin blong harem ol prea blong olgeta.’ (1 Pita 3:12) Plante long ol stret man ya bambae oli stap laef long taem blong “bigfala trabol.” Olgeta oli plante we plante, taswe Baebol i singaot olgeta se “bigfala kampani.” (Rev. 7:9, 14, NW) Sipos yu yu wan long olgeta ya, ?bambae yu harem olsem wanem taem bigfala trabol i finis? !Bambae yu glad bitim mak!

⁷ Ol man long bigfala kampani ya oli kamaot long olgeta kantri. Wok blong prij nao i hivimap olgeta. Jisas i tokbaot wok ya se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Mat. 24:14, NW) Hemia nao bigfala wok we ol man blong  Jehova oli stap mekem. Wok ya nao i mekem se i gat plante milian man we oli wosipim Jehova “long spirit mo trutok.” (Jon 4:23, 24, NW) Yu traem tingbaot. Long yia 2003 kasem 2012, bitim 2,707,000 man oli givim laef blong olgeta i go long Jehova mo oli baptaes. Tede, i gat klosap eit milian Witnes, mo evri yia plante milian narafala man oli kam joen wetem olgeta blong tingbaot ded blong Kraes. Jehova nao i mekem se bigfala kampani i stap kam bigwan moa. Yumi glad tumas long samting ya.—1 Kor. 3:5-7.

8. ?From wanem plante moa man oli stap joen long ogenaesesen blong Jehova?

⁸ Evri yia, plante moa man oli joen long ogenaesesen blong Jehova, from we hem i stap wetem ol Witnes blong hem. (Ridim Aesea 43:10-12.) Aesea i tokbaot samting we bambae i hapen long ol las dei, se: “Smol man bambae i kam taosen, mo smol grup bambae i kam wan strong neson. Mi, Jehova, bambae mi mekem wok ya i spid long stret taem blong hem.” (Aes. 60:22, NW) Ol tabu man, hemia “Isrel blong God,” fastaem oli “smol” nomo, be Jehova i blesem wok blong talemaot gud nius we oli mekem. Ale plante narafala man oli joen wetem olgeta, mo oli kam tabu man tu, nao ogenaesesen blong Jehova i kam bigwan moa. (Gal. 6:16) Taem ol yia oli pas, plante milian man we oli gat janis blong laef long niufala wol, olgeta tu oli bilif long trutok we ol tabu man oli talemaot.

9. ?Sipos yumi wantem kasem nambawan laef long fiuja, yumi mas mekem wanem?

⁹ Jehova i promes finis se yumi save gat wan nambawan fiuja. Nating se bambae yumi laef long heven no long wol, be yumi evriwan i mas obei long ol loa blong Jehova, sipos yumi wantem kasem nambawan fiuja ya. (Aes. 48:17, 18) Yu traem tingbaot ol man Isrel bifo. Jehova i wantem se oli obei long Loa we hem i givim long olgeta. Loa ya i lukaot gud long olgeta, mo i tijim olgeta blong oli mekem famle i hapi, mo blong oli faenem ol gudfala fren. Mo tu, Loa ya i givhan long olgeta blong oli mekem bisnes long rod we i stret, mo blong oli mekem gudfala fasin long narafala. (Eks. 20:14; Lev. 19:18, 35-37; Dut. 6:6-9) Tede tu, ol loa blong Jehova oli protektem yumi, mo oli givhan long yumi. Oli no strong tumas blong yumi folem. (Ridim 1 Jon 5:3.) Sipos yumi obei long ol loa blong Jehova, bambae yumi harem gud, mo bilif blong yumi bambae i kam strong moa.—Taet. 1:13.

10. ?Yumi mas makemaot taem blong stadi Baebol mo mekem Famle Wosip from wanem?

¹⁰ ?Ogenaesesen blong Jehova i stap muv olsem wanem? Hem i stap muv long plante defren fasin. Wan long olgeta, hemia taem hem i givhan long yumi, blong yumi kasem klia moa ol tijing blong Baebol. Hemia nao samting we Baebol i promes, i se: “Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud.” (Prov. 4:18) Be yumi wanwan i mas tingbaot se: ‘?Mi mi save ol jenis we oli kamaot i no longtaem long mining blong sam vas blong Baebol? ?Mi mi ridim Baebol evri dei? ?Mi mi wantem tumas blong kasem ol niufala buk mo magasin? ?Mi mi makemaot wan dei evri wik blong mekem Famle Wosip?’ I no had blong mekem ol samting ya. Yumi nidim nomo wan gudfala program. Bigfala trabol i klosap tumas, taswe, oltaem yumi mas stadi Baebol mo folem long laef blong yumi, mo yumi mas muv wetem ogenaesesen blong Jehova.

11. ?Ol miting mo asembli oli givhan long yumi olsem wanem?

 ¹¹ Oltaem ogenaesesen blong Jehova i pulum yumi blong yumi folem advaes we Pol i talem, se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong jos, olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” (Hib. 10:24, 25) Ol man Isrel bifo oli glad blong joen wanples blong wosipim Jehova mo blong Jehova i tijim olgeta. Long taem blong Nehemaea, oli mekem Lafet blong ol Wansaed Haos, mo hemia tu i wan taem blong glad. (Eks. 23:15, 16; Neh. 8:9-18) Tede, yumi gat ol miting mo ol asembli, we oli givhan long yumi blong yumi fren gud wetem Jehova, mo blong yumi glad blong mekem wok blong hem. Yumi no mas mestem ol miting ya.—Taet. 2:2.

12. ?Yumi mas gat wanem tingting long wok ya blong talemaot gud nius?

¹² Taem yumi joen wetem ogenaesesen blong Jehova, yumi gat bigfala blesing ya blong mekem “tabu” wok blong talemaot gud nius. (Rom 15:16) Taem yumi prij, yumi joen wetem “tabu” God ya Jehova, blong mekem wok blong hem. (1 Pita 1:15; 1 Kor. 3:9) Mo tu, yumi stap mekem nem blong hem i tabu. Yes, yumi glad tumas taem yumi talemaot ‘gud nius blong Jehova, God ya we i stap harem gud oltaem.’—1Tim. 1:11.

13. ?Sipos yumi wantem fren gud wetem Jehova mo kasem laef, yumi mas mekem wanem?

¹³ Jehova i wantem se yumi gat wan gudfala laef. Taswe, hem i wantem we yumi fren gud wetem hem mo yumi stap klosap long ogenaesesen blong hem. Yumi mas jus, olsem ol man Isrel we Moses i talem long olgeta se: “?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? . . . Yufala i mas jus. !Mi mi wantem tumas blong yufala i jusumaot laef! Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, bambae yufala wetem ol pikinini blong yufala . . . yufala evriwan i laef.” (Dut. 30:19, 20) Sipos yumi jusum laef, bambae yumi lavem Jehova, mo yumi mekem olgeta samting we hem mo ogenaesesen blong hem i wantem.

14. ?Wan brata i tokbaot ogenaesesen blong Jehova olsem wanem?

¹⁴ Yu traem tingbaot Brata Pryce Hughes, we i kasem trutok bifo long yia 1914. Hem i fasgud long Jehova mo ogenaesesen blong hem go kasem we hem i ded. Long laef stori blong hem, hem i talem bigfala samting we hem i lanem se, yumi mas stap klosap long ogenaesesen blong Jehova, mo yumi no mas folem tingting blong man. Samting ya i givhan long hem blong i winim ol samting we oli traem bilif blong hem. Brata Hughes i gohed se, sipos yumi wantem we oltaem Jehova i glad long yumi, yumi mas folem ol advaes we ogenaesesen blong hem i talem.

15. Taem i gat sam jenis i kamaot, ?yumi save folem eksampol blong hu?

¹⁵ Jehova i wantem se yumi wok gud wetem ogenaesesen blong hem. Hem i wantem se yumi folem ol jenis we oli kamaot blong mekem trutok blong Baebol i klia moa, mo blong talemaot gud nius long ol defren rod. Long taem blong ol fas Kristin, sam long olgeta oli wantem  folem yet Loa we God i givim long ol man Isrel. (Wok 21:17-20) Be Pol i stretem olgeta, mo i mekem olgeta oli tingbaot se sakrefaes blong Jisas nao i mekem se Jehova i save fogivim man, i no sakrefaes blong ol anamol. (Hib. 10:5-10) Ale, plante oli lesin mo oli jenisim tingting blong olgeta. ?Yumi lanem wanem? Yumi lanem se, yumi mas stadi gud long Baebol mo ol buk blong yumi. Mo sipos ogenaesesen blong Jehova i jenisim sam samting, yumi mas mekem tingting blong yumi i stap daon mo yumi folem.

16. (1) ?Laef long Paradaes bambae i olsem wanem? (2) ?Yu yu wantem mekem wanem long niufala wol?

¹⁶ Olgeta we oli stap mekem ol samting we Jehova mo ogenaesesen blong hem i wantem, bambae oli kasem blesing. Ol tabu man bambae oli rul wetem Kraes long heven. (Rom 8:16, 17) Ol narafala bambae oli laef olwe long paradaes long wol ya. Yumi gat janis blong talemaot nambawan promes ya long ol man. (2 Pita 3:13) Baebol i talem se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud.” (Sam 37:11) Bambae oli harem gud long wok we oli mekem. Baebol i talem se: “Man we i wokem haos blong hem, hem bambae i save stap gud long hem.” (Aes. 65:21, 22) Bambae i no moa gat ol man nogud. Bambae i gat naf kakae blong evri man, mo oli no save sot long wan samting. (Sam 72:13-16) Bambae i no moa gat ol giaman tijing, from we ol giaman skul oli lus finis. (Rev. 18:8, 21) Ol dedman bambae oli laef bakegen, mo bambae oli gat janis blong laef olwe. (Aes. 25:8; Wok 24:15) Yumi save kasem ol nambawan blesing ya nomo sipos yumi stap fren gud wetem Jehova, mo yumi muv wetem ogenaesesen blong hem.

17. ?Wanem tingting we yumi mas gat long Jehova mo ogenaesesen blong hem?

¹⁷ Klosap nao wol blong Setan bambae i lus. Sipos yumi wantem stap laef, yumi mas mekem bilif blong yumi i strong, mo yumi mas joen wetem ogenaesesen blong Jehova blong mekem wosip long Hem nomo. Yumi gat sem tingting olsem Deved, we i talem se: “Mi mi askem wan samting long Hae God, wan samting nomo we mi mi wantem. Mi wantem tumas blong mi save stap long haos blong hem oltaem long laef blong mi, blong mi stap lukluk ol gudgudfala fasin blong hem, mi stap tingting gud long olgeta, mo blong mi save askem long hem blong i lidim mi oltaem.” (Sam 27:4) Yes, yumi wanwan i mas fren gud wetem Jehova, mo yumi mas muv wetem ogenaesesen blong hem.