1, 2. ?Jehova i luk ol man blong hem se oli olsem wanem?

TAEM ol papa mo mama oli wajem pikinini blong olgeta i pleplei, plante taem oli sapraes long ol samting we pikinini ya i save mekem. Ating yu tu yu luk samting ya. Long wan famle, maet wan pikinini i gud long spot, be brata blong hem maet i laekem blong droem pija, no blong mekem sam narafala samting. Nomata se i olsem, papa mo mama blong tufala bambae i givhan long tufala, blong tufala i kam gud moa long ol samting ya.

² Jehova tu i intres long ol man blong hem. Hem i luk olgeta olsem “ol gudgudfala samting,” from we oli holemstrong long hem. (Hag. 2:7) Ating yu luk se ol brata mo sista oli gat gudhan long plante samting. Maet sam brata oli gat nambawan fasin blong givim tok, mo sam narafala oli gat gudhan blong mekem plan blong ol wok oli gohed gud. Plante sista oli kwik blong lanem ol defren lanwis, mo sam narafala oli gat gudfala fasin blong lukaot long ol sikman, no blong leftemap tingting blong olgeta we oli harem nogud. (Rom 16:1, 12) Yumi glad tumas blong joen wetem olgeta brata mo sista ya long kongregesen.

3. ?Wanem ol kwestin we bambae yumi tokbaot long stadi ya?

³ Be maet ol yangfala brata mo ol brata we oli jes baptaes, oli no save se bambae oli mekem wanem wok long kongregesen. ?Yumi  save pulum olgeta olsem wanem, blong oli mekem bes blong olgeta? ?From wanem yumi mas folem fasin blong Jehova, blong traehad blong faenem ol gudfala fasin blong olgeta?

4, 5. ?Jehova i luk wanem long Gideon? ?Fasin blong Jehova i tijim wanem long yumi?

⁴ Baebol i soemaot se Jehova i luk ol gudfala fasin blong ol man blong hem mo ol gudfala wok we oli naf blong mekem, sipos oli mekem bes blong olgeta. Yu traem tingbaot Gideon bifo. Taem Jehova i jusum hem blong i sevem ol man Isrel, maet hem i sapraes long tok we enjel i talem long hem, se: “!Strong man blong faet! !Naoia Hae God i stap wetem yu!” I klia se long taem ya, Gideon i no harem se hem i “strong.” Mo hem i ting se hem i nating nomo, hem i no naf blong sevem ol man blong God. Be Jehova i gat defren tingting long hem. Hem i luksave samting we Gideon i naf blong mekem, mo hem i kasem save se hem i save yusum Gideon blong sevem ol man Isrel.—Ridim Jajes 6:11-16.

⁵ Jehova i luk ol wok we Gideon i mekem, ale hem i trastem hem. Enjel blong Jehova i luk Gideon i stap kilim ol hed blong wit wetem ful paoa blong hem, nao hem i save se Gideon i strong. Mo tu, plante taem ol man Isrel oli stap kilim hed blong wit long wan open ples. Be Gideon i wok long ples we oli stap mekem waen long hem. Olsem nao, sipos ol man Midian oli kam, hem i save haedem ol kakae blong hem kwiktaem nomo. !Man ya i waes! Taswe, Jehova i no luk nomo se Gideon i wan strong man. Be Jehova i luksave se hem i waes gud, mo hem i naf blong kasem save long samting we i hapen, mo mekem desisen kwiktaem blong ronwe long trabol. Yes, Jehova i luk ol samting we Gideon i naf blong mekem, ale hem i trenem hem.

6, 7. (1) ?Tingting blong Jehova long profet Amos, i defren olsem wanem long tingting blong sam man Isrel? (2) ?Olsem wanem yumi save se Jehova i jusum wan man we i stret blong mekem wok?

⁶ Long sem fasin, Jehova i luk wok we profet Amos i naf blong mekem. Maet ol man oli ting se Amos i wan kwaet man mo i wan man olbaot nomo. Amos i wan man blong lukaot long ol sipsip mo i wok long plantesen. Be Jehova i givim wok long hem blong i go talemaot jajmen blong hem long ol ten laen blong Isrel we oli no moa wosipim hem. Maet sam man Isrel oli ting se Jehova i jusum wan man we i no stret blong mekem wok ya. ?From wanem?—Ridim Amos 7:14, 15.

⁷ Amos i kamaot long wan taon we i stap longwe long Jerusalem. Be hem i save gud ol kastom blong ol man long taem blong hem, mo hem i save hu ol king we oli rul long ol narafala kantri. Maet from we ol bisnesman we oli pas long taon blong Amos, oli talemaot ol save ya long hem. Yu traem tingbaot. Amos i save gud ol samting we oli hapen long ol neson raonabaot long hem, mo hem i save ol rabis samting we oli stap hapen long Isrel. (Amos 1:6, 9, 11, 13; 2:8; 6:4-6) Amos i wan gudfala man blong raetem buk. Hem i yusum ol tok we oli gat paoa mo man i naf blong kasem save long olgeta. Mo hem i no fraet blong talemaot jajmen blong God long pris Amajia. I tru tumas, Jehova i jusum wan man we i stret blong talemaot tok blong hem. Hem i luk ol gudfala fasin blong Amos we ol narafala oli no luk.—Amos 7:12, 13, 16, 17.

8. (1) ?Jehova i talem wanem promes long Deved? (2) ?From wanem ol tok long Ol Sam 32:8 i givhan long olgeta we oli ting se oli no naf?

⁸ Jehova i luk samting we yumi naf blong mekem, mo hem i wantem givhan long yumi blong yumi gohed gud. Hem i bin promes long Deved se bambae hem i lidim hem mo i givim advaes we hem i nidim. (Ridim Ol Sam 32:8.) ?From wanem samting ya i save leftemap tingting blong yumi?  Maet yumi ting se yumi no naf blong gohed gud. Be Jehova i save givhan long yumi blong yumi mekem ol samting we yumi no tingbaot nating. Wan gudfala tija bambae lidim wan studen we i no gat save, blong hem i kam gud moa long evri samting we hem i stap mekem. Long sem fasin, Jehova i lidim yumi blong yumi gohed gud. Mo hem i save yusum ol brata mo sista blong oli givhan long yumi. ?Oli givhan long yumi olsem wanem?

9. ?Yumi mas mekem wanem taem yumi luk gudfala wok we ol brata mo sista oli mekem?

⁹ Pol i pulum olgeta Kristin blong oli lukluk ol brata mo sista blong olgeta, mo givhan long olgeta. (Ridim Filipae 2:3, 4.) Advaes ya i givim tingting se yumi mas luk samting we ol brata mo sista oli naf blong mekem, mo yumi talem long olgeta se yumi glad long wok we oli mekem. ?Yu yu harem olsem wanem taem narafala i luk se yu stap gohed gud, mo i kam talem long yu? Plante taem, samting ya i pulum yu blong yu gohed moa. Hemia i sem mak long ol brata blong yumi. Sipos yumi tekem taem blong luk wok we oli stap traehad blong mekem, samting ya bambae i pulum olgeta blong oli gohed strong moa long wok blong Jehova.

10. ?Hu i nidim moa we yumi luk wok we oli mekem?

¹⁰ Samtaem, yumi evriwan i nidim we narafala i luk wok we yumi mekem. Be ol yangfala brata mo ol brata we oli jes baptaes, oli nidim moa we yumi luk wok blong olgeta. Oli mas harem se oli gat wok long kongregesen. Samting ya bambae i mekem oli kasem save se yumi nidim olgeta long kongregesen. Baebol i talem long ol brata blong oli gohed gud, olsem nao oli save mekem sam moa wok. Be sipos oli harem se ol narafala oli no tinghae long wok blong olgeta, tingting blong olgeta bambae i foldaon, ale oli no moa wantem gohed.—1 Tim. 3:1.

11. (1) ?Wan elda i givhan olsem wanem long Julien? (2) ?Yu yu lanem wanem long stori ya?

¹¹ Wan elda, nem blong hem Ludovic, i talem se taem yumi soemaot long wan brata se yumi intres long hem, kwiktaem nomo hem i gohed gud. Julien i olsem. Ludovic i luk se hem i wan man blong sem. Mo taem hem i traem blong mekem sam wok long kongregesen, hem i ting se hem i no naf, ale hem i no mekem gud wok ya. Ludovic i talem se: “Be mi luk se Julien i kaen we i kaen, mo hem i wantem tumas blong givhan long ol narafala.” Ludovic i no tokbaot ol slak fasin blong Julien, be hem i tokbaot ol gudfala fasin blong hem mo i leftemap tingting blong hem. Gudfala samting we i kamaot se Julien i kam man blong givhan, mo biaen hem i mekem wok blong fultaem paenia.

12. ?Sipos yumi wantem givhan long ol brata, yumi mas mekem wanem? Yu talem wan eksampol.

¹² Sipos yumi wantem givhan long ol brata blong oli mekem bes blong olgeta, yumi mas intres long wok we oli mekem. Yumi no mas lukluk ol slak fasin blong olgeta, be yumi intres long ol gudfala fasin blong olgeta mo long samting we oli naf blong mekem. Hemia nao samting we Jisas i mekem long aposol Pita. Samtaem, i luk olsem se Pita i no strong. Be Jisas i luk ol gudfala fasin blong hem, mo hem i givim nem ya “Kefas,” no Pita, long hem, we i minim “Ston.” Long rod ya, Jisas i soemaot se Pita bambae i stanap strong olsem wan bigfala ston.—Jon 1:42.

13, 14. (1) ?Banabas i gat wanem tingting long Mak? (2) ?Wan elda i givhan olsem wanem long Alexandre? (Yu luk pija long stat blong stadi.)

¹³ Yumi save luk eksampol blong Banabas mo Mak. (Wok 12:25) Taem Pol mo Banabas i mekem fas misinari trip blong tufala, Mak i folem tufala, maet blong “givhan” long tufala.  Be taem oli kasem Pamfilia, wantaem nomo Mak i lego tufala. Tufala nomo tufala i mas pastru long wan ples we i gat ol rabis man long hem, blong go long not. (Wok 13:5, 13) ?Biaen, Banabas i mekem wanem? Hem i luk ol gudfala fasin blong Mak, i no slak fasin blong hem. Ale hem i trenem gud Mak, nao Mak i gohed gud long wok blong Jehova. (Wok 15:37-39) Sam yia afta, Mak i stap long Rom blong givhan long Pol, long kalabus. Mo taem Pol i raetem leta i go long ol Kristin long Kolosi, hem i talem ol gudfala toktok long saed blong Mak. (Kol. 4:10) Yu traem tingbaot. !Banabas i mas harem gud tumas taem Pol i askem se Mak i go givhan long hem!—2 Tim. 4:11.

¹⁴ Wan elda, nem blong hem Alexandre, i tingbaot taem we wan brata i givhan long hem. Hem i talem se: “Taem mi yangfala, i had blong mi prea long fored blong ol narafala. Ale wan elda i givhan long mi blong mi rerem ol prea blong mi, mo blong mi mekem tingting blong mi i kwaet. Sipos elda ya i wantem, hem i save talem se mi no moa prea long miting, be hem i no mekem olsem. Hem i givim janis long mi evritaem blong mi prea long miting blong prij. Ale sloslo, mi no moa fraet blong prea.”

15. ?Pol i soemaot olsem wanem se hem i tinghae long ol brata mo sista?

¹⁵ ?Taem yu luk wan gudfala fasin blong wan Kristin, yu mekem wanem? ?Yu talemaot long hem se yu laekem fasin blong hem? Long Rom japta 16, Pol i talemaot nem blong bitim 20 brata mo sista, from ol gudfala fasin blong olgeta we hem i laekem tumas. (Rom 16:3-7, 13) Long japta ya, Pol i tokbaot Andronikas mo Junias, se tufala i mekem wok blong Kraes fastaem long hem. Hemia i blong soemaot se tufala i gat fasin blong stanap strong longtaem. Pol i tokbaot mama blong Rufas tu se hem i bin lukaot gud long hem.

16. ?Wanem i hapen taem yumi talem gudfala toktok long ol yangfala?

¹⁶ Gudfala frut i save kamaot taem yumi talem gudfala toktok long ol narafala. Traem tingbaot Rico, wan smol boe long Franis, we papa blong hem i no stap long trutok. Papa ya i no wantem se Rico i baptaes. Ale, Rico i harem nogud mo i ting se hem i mas wet kasem we hem i gat 18 yia blong i baptaes. Hem i harem nogud tu from we ol pikinini long skul oli jikim hem from bilif blong hem. Be wan elda, nem blong hem Frederic, i talem long Rico se ol narafala oli agensem hem from we hem i no fraet blong prij long olgeta, mo hemia i wan gudfala samting. Ol tok ya oli mekem Rico i gat strong tingting blong gohed, mo blong fren gud wetem papa blong hem. Hem i baptaes taem hem i gat 12 yia nomo.

17. (1) ?Yumi save givhan olsem wanem long ol brata blong oli mekem bes blong olgeta? (2) ?Wan misinari i givhan olsem wanem long ol yangfala brata? ?Wanem frut i kamaot?

¹⁷ Evritaem we yumi talem gudfala toktok long ol brata blong yumi from samting we oli mekem, samting ya i pulum olgeta blong oli mekem bes blong olgeta long wok blong Jehova. Sylvie, * we i bin wok plante yia long  Betel long Franis, i talem se ol sista tu oli save talem gudfala toktok long ol brata. Hem i harem se hemia wan samting we hem i mas mekem. (Prov. 3:27) Plante taem, ol sista oli luk ol smosmol samting we ol brata oli no luk. Taswe, taem ol sista oli talem gudfala toktok long ol brata from wok we oli traehad blong mekem, hemia i sapotem gudfala toktok we ol elda oli talem, blong givhan long ol brata ya. Jérôme, wan misinari long Franis Guyana, i bin givhan long plante yangfala brata blong oli kam misinari. Hem i talem se taem hem i talem gudfala toktok long ol yangfala brata from sam gudfala samting we oli mekem long wok blong prij, no from ansa we oli givim long miting, oli no moa fraet mo oli kam gud moa.

18. ?From wanem i gud blong wok wetem ol yangfala?

¹⁸ Mo tu, yumi save pulum ol Kristin blong oli gohed gud, taem yumi wok wetem olgeta. Maet wan elda i askem long wan yangfala brata blong i printim sam save long Websaet ya jw.org, we bambae i givhan long ol olfala we oli no gat kompiuta. Sipos no, elda ya i save askem long hem blong i givhan long hem blong klinim mo fiksimap sam samting long Haos Kingdom. Taem yu traehad blong wok wetem ol yangfala, bambae yu gat janis blong luk wok we oli naf blong mekem, mo blong talem ol gudfala toktok long olgeta, mo blong lesin long tingting blong olgeta.—Prov. 15:23.

19, 20. ?From wanem yumi mas givhan long ol narafala blong oli gohed gud?

¹⁹ Jehova i jusum Josua blong hem i lidim ol man Isrel. Mo hem i talem long Moses blong hem i trenem Josua, i “toktok gud” long hem, mo i “mekem tingting blong hem i strong.” (Ridim Dutronome 3:28.) Tede plante man oli joen wetem yumi blong wosipim Jehova. Yumi nidim ol brata we oli naf gud, blong oli lidim ol wok long ogenaesesen blong Jehova. Taswe, evriwan long kongregesen oli mas pulum ol yangfala brata mo ol brata we oli jes baptaes, blong oli mekem bes blong olgeta. Samting ya bambae i mekem se plante moa brata oli joen long wok blong fultaem paenia, mo plante long olgeta bambae “oli naf blong tijim ol narafala.”—2 Tim. 2:2.

²⁰ Nomata se yumi joen long wan bigfala kongregesen no long wan smol grup, be yumi save givhan long ol brata blong oli gohed gud, blong oli save mekem wok long fiuja. Blong mekem olsem, yumi mas folem fasin blong Jehova, blong traem faenem ol gudfala fasin blong ol narafala.