?Yu bin ridim ol Wajtaoa long ol manis we oli pas? Ale, yu traem ansa long ol kwestin ya:

?Yu mas mekem wanem blong blokem tingting ya blong wantem lukluk ol rabis pija?

Fo samting we i save givhan, hemia (1) Yu prea long God. (2) Yu askem long narafala blong i givhan long yu. (3) Yu mas luksave mo blokem ol samting we oli save pulum yu. (4) Yu mas traehad blong fren gud wetem God.—Oktoba–Disemba, pej 7.

?Wanem taem stret long Nisan 14, oli mas kilim smol sipsip blong Pasova?

Long sam Baebol, oli talem se ol man Isrel oli kilim sipsip ya “long medel blong tu sapa.” Taswe, hemia i min se oli mekem olsem long taem we san i godaon be i delaet yet. (Eks. 12:6)—15/12, pej 18.

?Wanem trifala rul blong Baebol we oli save givhan long wan yangfala blong i mekem ol gudfala desisen?

Trifala rul ya hemia (1) Yu lukaot Kingdom mo stret fasin blong hem fastaem. (Mat. 6:19-34) (2) Yu save harem gud taem yu givhan long ol narafala. (Wok 20:35) (3) Yu mas glad blong mekem wok blong Jehova long yangtaem blong yu. (Pri. 12:1)—15/1, pej 19-20.

?Smol sipsip bambae i mared wetaem stret? (Rev. 19:7)

Smol sipsip bambae i mared afta we King Jisas Kraes i winim faet blong hem. Hemia afta we Bigfala Babilon i lus, mo afta long faet blong Amagedon.—15/2, pej 10.

?From wanem ol man Isrel long taem blong Jisas oli stap wet blong luk Mesaea? (Luk 3:15)

I no gat pruf we i soemaot se ol man Isrel ya oli kasem save long profet tok blong Daniel long saed blong Mesaea, olsem we yumi kasem save long hem tede. (Dan. 9:24-27) Nating se i olsem, maet oli harem nius blong samting we enjel i talem long ol man blong lukaot sipsip, no oli harem tok we profet Ana i talem taem hem i luk pikinini Jisas long tempol, no oli harem se ol man we oli waes long fasin blong sta oli stap lukaot ‘pikinini ya we hem i king blong ol laen blong Isrel.’ (Mat. 2:1, 2) Mo Jon Baptaes tu i soemaot se Kraes bambae i kamtru i no longtaem.—15/2, pej 26-27.

?Yumi mas mekem wanem blong yumi no talem Yes, be biaen yumi talem No? (2 Kor. 1:18)

I save gat sam samting i hapen we yumi no save bos long hem, ale maet yumi mas kanselem plan we yumi mekem finis. Be sipos yumi mekem wan promes, yumi mas holem promes blong yumi.—15/3, pej 32.

?Kristin papa i mas mekem wanem blong evriwan i glad long famle wosip?

I gat tri samting we hem i save mekem: (1) Hem i mas jenisim mo mekem ol defdefren samting. (2) Hem i mas rere gud. (3) Hem i mas traehad blong mekem famle wosip evri wik.—15/3, pej 17-19.

?Wanem i save kamaot sipos wan Kristin i lego famle blong hem blong go wok long narafala ples?

Taem papa no mama i lego famle blong go wok long narafala ples, ol pikinini oli save harem nogud tumas. Maet pikinini i no moa laekem papa no mama ya. Mo sipos man no woman i stap longwe long tufala, maet tufala i save mekem rabis fasin.—15/4, pej 19-20.

?Wanem ol fo kwestin we yumi mas tingbaot taem yumi stap prij?

?Mi mi prij long hu? ?Mi mi prij long weples? ?I moagud mi prij wetaem? ?Mi mi talem wanem toktok?—15/5, pej 12-14.

?Wanem ol fo hos we oli stat blong ron stat long 1914?

Jisas i sidaon long waet hos. Hem i mekem fas wok blong hem, taem hem i sakemaot Setan mo ol rabis enjel blong hem oli aot long heven. Hos we i red i pija blong ol faet we oli kilim i ded plante man. Bak hos i pija blong kakae i sot. Hos we kala blong hem i lus, i karem sik mo ded long ol man. (Rev. 6:2-8) —Eprel–Jun, pej 6-7.

?From wanem God i letem ol man oli spolem ol narafala man?

God i no save giaman. (Taet. 1:2) Hem i talem finis se sam man we oli gat paoa, be ol narafala man we oli stap aninit long olgeta, oli stap harem nogud. (Pri. 8:9) Be God i mekem strong promes se bambae hem i panisim ol man nogud.—Eprel–Jun, pej 15.