1. Yu tokbaot wan stori we i soemaot rong tingting blong sam man blong God. (Yu luk pija long stat blong stadi.)

WAN grup blong man i stanap long fored blong haos tapolen blong Jehova, oli rere blong bonem insens blong givim i go long Jehova. Long wansaed, i gat Eron we i hae pris blong Isrel, mo long narasaed i gat Kora mo ol 250 man blong hem. (Nam. 16:16-18) I luk olsem se olgeta man ya oli man blong Jehova, be nogat. Kora mo ol man blong hem oli flas, oli agensem Jehova, mo oli tingbaot olgeta nomo. Oli wantem mekem wok blong pris olsem Eron. (Nam. 16:1-11) Oli ting se Jehova bambae i glad long wosip blong olgeta, be tingting ya i rong olgeta. Blong talem stret, oli stap jikim Jehova, we hem i luk tingting blong olgeta. Jehova i luksave se olgeta oli gat tu fes mo oli wantem we ol man oli leftemap olgeta.—Jer. 17:10.

2. ?Moses i bin talem wanem, mo tok blong hem i kamtru olsem wanem?

² Long dei bifo, Moses i talem se: “Hae God bambae i soemaot long yumi se hu nao i tabu, i man blong hem.” (Nam. 16:5) Mo tok blong hem i kamtru taem Jehova i sanem faea i kam, nao i bonem Kora mo ol 250 man ya, blong soemaot se hu i man blong hem, mo hu i no man blong hem. (Nam. 16:35;  26:10) Eron nomo i stanap i stap. Yes, Jehova i soemaot klia se Eron i stap wosip long hem mo hem nao i hae pris.—Ridim 1 Korin 8:3.

3. (1) ?Wanem i hapen long Kristin kongregesen? (2) ?Pol i lanem wanem long samting we Jehova i mekem long Kora olgeta?

³ Samwe 1,500 yia biaen, wan samting olsem i hapen long Kristin kongregesen. Pol i talem se samfala we oli talem se oli Kristin oli stap leftemap ol giaman tijing, mo oli gohed blong stap long kongregesen. Maet ol man oli ting se olgeta ya oli ol gudfala man blong Jehova, be nogat. Olgeta oli olsem wael dog stret, mo oli stat blong spolem bilif blong sam Kristin. Oli ol man blong apostasi. (2 Tim. 2:16-18) ?Olsem wanem? ?Jehova i luk samting ya? Yes. Pol i save samting we Jehova i mekem long Kora mo ol man blong hem. Taswe, hem i save se Jehova i luk samting we i stap hapen long kongregesen long taem blong hem. Bambae yumi luk ol tok we Pol i raetem i go long Timoti, blong luk olsem wanem yumi save folem fasin blong hem blong trastem Jehova.

4. ?Pol i save se Jehova i luk wanem, mo hem i talem wanem long Timoti?

⁴ Pol i save se Jehova i stap luk ol man we oli gat tu fes long wosip blong olgeta. Mo hem i save se Jehova i luk ol man we oli rili wosipim hem. Yumi luksave samting ya long ol toktok we tabu spirit i pulum hem blong i talem long Timoti. Pol i tokbaot ol samting we ol man blong apostasi oli mekem blong spolem bilif blong ol Kristin. Afta hem i talem long Timoti se: “Be strongfala fandesen blong bilif we God i putum finis, hem i no muf. Mo tok we i stap long fandesen ya i talem se, ‘Jehova i save ol man blong hem.’ Mo i talem se, ‘Olgeta man we oli stap talem se oli man blong Hae God, oli mas livim ol fasin ya we i no stret.’”—2 Tim. 2:18, 19.

5, 6. ?Pol i yusum tok ya “strongfala fandesen blong bilif we God i putum” blong tokbaot wanem samting? ?Tok ya i givhan long Timoti olsem wanem?

⁵ Baebol i yusum tok ya “fandesen” blong tokbaot plante defren samting. Samtaem hem i yusum tok ya blong tokbaot Jerusalem, taon blong Isrel bifo. (Sam 87:1, 2) Mo samtaem hem i yusum tok ya blong tokbaot wok we Jisas i mekem, blong stamba tingting blong God i kamtru. (1 Kor. 3:11; 1 Pita 2:6) Be tok ya “strongfala fandesen blong bilif we God i putum” i kamaot wan taem nomo long Baebol. ?Taswe, Pol i yusum tok ya taem hem i stap tokbaot wanem samting?

⁶ Pol i yusum tok ya taem hem i stap talem bakegen ol tok blong Moses long Namba japta 16:5, we i tokbaot Kora mo ol man blong hem. Long fasin ya, Pol i stap mekem Timoti i tingbaot bakegen se Jehova i save samting we i hapen long kongregesen. Bambae Jehova i no save letem ol man blong apostasi oli spolem kongregesen, sem mak olsem we hem i no letem Kora i spolem ol man blong hem bifo. Pol i no eksplenem fulwan mining blong tok blong hem. Nating se i olsem, samting we hem i talem i givhan long Timoti blong hem i trastem Jehova mo i no fraet.

7. ?From wanem yumi save se oltaem Jehova bambae i holem ol promes blong hem mo i mekem gudfala fasin?

⁷ Ol rul blong Jehova oli neva jenis. Ol Sam 33:11 i talem se: “Ol plan blong hem oli stap stanap strong oltaem. Tingting blong hem i stap we i stap, i no save finis samtaem.” Jehova i King oltaem, hem i lavem man, hem i gat gudfala fasin mo oltaem hem i holem ol promes blong hem. (Eks. 15:18; Sam 106:1; 112:9; 117:2) Malakae 3:6 i talem se: ‘Mi mi Jehova, mo  mi no save jenis samtaem.’ Mo tu Jemes 1:17 i talem se fasin blong Jehova “i no save jenis.”

8, 9. ?Tufala tok long 2 Timoti 2:19, i tijim yumi long wanem?

⁸ Bifo, taem ol man oli wokem wan haos, oli stap raetem ol tok long fandesen blong hem, blong soemaot hu man we i bildim haos, no se haos ya i blong hu. Long olgeta we oli raetem Baebol, Pol i faswan blong tokbaot fasin ya long wan pijatok. * Long 2 Timoti 2:19, Pol i tokbaot “strongfala fandesen blong bilif we God i putum,” mo hem i talem se i gat tu tok i stap long fandesen ya: (1) “Hae God [Jehova], hem i save finis ol man blong hem” mo, (2) “Olgeta man we oli stap talem se oli man blong Hae God, oli mas livim ol fasin ya we i no stret.” Tufala tok ya i mekem yumi tingbaot bakegen ol tok long buk blong Namba 16:5.—Ridim.

⁹ ?Tufala tok ya i tijim yumi long wanem? Tufala i tijim yumi se ol loa mo ol rul blong Jehova oli stanap long tu impoten trutok: (1) Jehova i lavem ol man we oli holemstrong long hem, mo (2) Jehova i no laekem nating ol fasin we i no stret. ?Be tingting ya i joen olsem wanem wetem ol man blong apostasi long kongregesen?

10. ?Rabis fasin blong ol man blong apostasi i spolem tingting blong ol Kristin olsem wanem?

¹⁰ Timoti mo ol narafala Kristin oli harem nogud tumas from rabis fasin blong ol man blong apostasi. Maet sam Kristin oli no kasem save from wanem kongregesen i no putumaot ol man ya. Maet sam Kristin oli stap tingting sipos Jehova i luk ol wok we oli mekem blong holemstrong long hem, mo sipos hem i luk olgeta ya we oli stap giaman nomo se oli wosipim hem.—Wok 20:29, 30.

11, 12. ?Olsem wanem tok blong Pol i mekem bilif blong Timoti i strong?

¹¹ Tok blong Pol i mekem bilif blong Timoti i strong. Pol i mekem Timoti i tingbaot bakegen se bifo, Jehova i soemaot klia se Kora mo ol man blong hem oli gat tu fes. Jehova i kilim i ded olgeta, be hem i glad long Eron. Long sem fasin, nating se i gat sam giaman Kristin, be Jehova bambae i soemaot klia ol man blong hem.

¹² Jehova i neva jenis. Taswe, yumi save trastem hem. Hem i no laekem ol  fasin we oli no stret mo bambae hem i panisim ol man we oli mekem rabis fasin mo oli no tanem tingting blong olgeta. Pol i talem long Timoti se hem i mas sakemaot ol rabis fasin blong ol giaman Kristin, from we man we i talem se hem i “man blong Hae God,” i mas livim ol fasin we oli no stret. *

13. ?Yumi save bilif fulwan long wanem samting?

¹³ Tok blong Pol i save mekem bilif blong yumi tu i strong. ?Hem i mekem samting ya olsem wanem? Jehova i savegud se yumi holemstrong long hem. Be i no hemia nomo. Hem i intres bigwan long yumi. Baebol i talem se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kron. 16:9) Yumi save bilif fulwan se Jehova bambae i neva fogetem wosip we yumi traehad blong mekem long hem.—1 Tim. 1:5; 1 Kor. 15:58.

14. ?Jehova i no laekem wanem kaen wosip?

¹⁴ Jehova i no laekem nating ol man we oli wosipim hem, be oli gat tu fes. Hem i luk hat mo tingting blong olgeta man mo hem i save ol man we oli no “ona long hem long olgeta tingting” blong olgeta. Jehova i no laekem nating ol man we long fored blong ol narafala man, oli mekem olsem se oli stap obei long God, be oli stap haedem ol sin blong olgeta. (Prov. 3:32) Maet ol man olsem oli trikim ol narafala, be oli no save trikim Jehova. Baebol i talem se: “Sipos yu stap traem haedem ol sin blong yu, bambae yu no save win long laef blong yu.” Tok ya i tru from we Jehova i gat bigfala paoa mo hem i laekem stret fasin.—Prov. 28:13; ridim 1 Timoti 5:24; Hibrus 4:13.

15. ?Yumi no mas mekem wanem, mo from wanem?

¹⁵ Bighaf blong ol man blong Jehova tede oli wosipim hem wetem fulhat blong olgeta. I no oltaem we wan Kristin i gat tu fes. Be sipos ol man oli gat fasin ya long taem blong Moses mo ol fas Kristin, tede tu ol man oli save gat fasin ya. (2 Tim. 3:1, 5) ?Be yu ting se i stret blong jajem sam brata mo sista se oli gat tu fes? Nogat. Tingting olsem i no stret nating, antap moa sipos yumi no gat pruf blong samting ya. (Ridim Rom 14:10-12; 1 Korin 13:7.) Mo tu, sipos yumi gat tingting olsem, bambae yumi no save fren gud wetem Jehova.

16. (1) ?Wanem i save givhan long yumi blong luk sipos tingting blong yumi i stret? (2) ?Yumi lanem wanem long bokis ya ‘ Yufala i Traem Luklukgud Mo Faenemaot’?

¹⁶ Ol Kristin wanwan “oli mas traem ol wok we olgeta nomo oli mekem.” (Gal. 6:4) Yumi sinman, taswe maet yumi no luksave se yumi no moa wosipim Jehova wetem wan gudfala tingting. (Hib. 3:12, 13) Taswe, sam samtaem yumi mas jekem yumi wan, blong luk sipos tingting we i pusum yumi blong mekem wok blong Jehova i stret. I gud yumi askem se: ‘?Mi mi stap wosipim Jehova from wanem? ?From we mi lavem hem mo mi wantem se hem i King blong mi? ?Mi mi wosipim hem nomo from mi wantem gat wan gudfala laef long Paradaes?’ (Rev. 4:11) Ol kwestin olsem oli save givhan long yumi blong lukaotgud se yumi no gat tu fes.

17, 18. ?From wanem yumi mas traehad blong wosipim Jehova wetem fulhat blong yumi?

¹⁷ Taem yumi traehad blong wosipim Jehova wetem gudfala tingting, yumi kasem plante blesing. Man blong raetem  Sam i talem se: “Man we Hae God i no moa jajem hem from ol samting nogud we hem i mekem, mo we i no moa giaman long laef blong hem, hem i save harem gud.” (Sam 32:2) Yes, sipos yumi wosipim Jehova wetem fulhat blong yumi, bambae yumi glad naoia mo long fiuja.

¹⁸ I no longtaem, Jehova bambae i soemaot klia ol man we oli stap mekem ol rabis fasin mo oli no wantem tanem tingting blong olgeta, mo ol man we oli stap haedem ol sin blong olgeta. Bambae hem i soemaot klia hu ‘ol stret man we oli stap mekem wok blong hem’ mo hu ‘ol man nogud we oli no stap mekem wok blong hem.’ (Mal. 3:18) Be gogo kasem taem ya, yumi glad blong save se Jehova “i stap lukluk long ol stret man, mo i stap lesin blong harem ol prea blong olgeta.”—1 Pita 3:12.