PAPA blong mi i bon long 1899, hemia long Graz long Ostria. Long taem blong Wol Wo Wan, papa blong mi i wan yangfala. Mo smoltaem afta we Wol Wo Tu i stat long 1939, hem i joen long ami blong Jemani. Ale long 1943 taem oli go faet long Rasia, hem i ded. Long taem ya mi mi gat tu yia nomo. Mi harem nogud tumas we mi no gat janis blong save gud hem, antap moa taem mi luk we ol narafala boe long skul oli gat ol papa blong olgeta. Biaen taem mi yangfala, mi harem gud blong save Papa blong yumi long heven. Hem i bigfala Papa blong yumi we i no save ded samtaem.

Taem mi gat seven yia mi joen wetem Ol Boe Skaot (Boy Scouts youth movement). Grup ya, hem i wan bigfala ogenaesesen long fulwol we bos blong ami blong Inglan, Robert Stephenson Smyth Baden-Powell, i stanemap long Briten, long 1908. Long yia 1916, hem i mekemap wan grup (Wolf Cubs) blong ol smol boe we oli gat sem yia long mi.

Mi mi laekem tumas taem mifala i go slip long bus long wiken. Mifala i slip long ol haos tapolen, mifala i werem yunifom, mo mifala i maj folem noes blong ol dram we oli kilkilim. Mi mi laekem tumas blong joen wetem ol narafala Skaot, mifala i pleplei long bus, mo long naet mifala i laetem wan bigfala faea nao mifala i stap singsing. Mo tu taem mifala i lukluk ol samting long bus, mifala i lanem plante samting. Hemia i mekem se mi laekem tumas ol samting we God i mekem.

Evri dei olgeta we oli stap lidim Skaot ya, oli leftemap tingting blong ol boe blong oli gat ol gudfala fasin. Wan toktok we oltaem mifala i stap talem, taem mifala i mitim mifala se: “Yu mas rere oltaem.” Mi mi glad long toktok ya. Long grup blong mifala i gat bitim wan handred boe, haf oli Katolik, haf oli Protestan, mo i gat wan we hem i Budis.

Stat long yia 1920, mifala i stat blong mekem sam intenasnal miting, no ol lafet blong mifala. Be mifala i no mekem evri yia. Long Ogis 1951, mi mi go long namba seven World Scout Jamboree long Bad Ischl wan taon long Ostria. Mo long Ogis 1957, mi go long namba naen World Scout Jamboree long pak blong Sutton klosap long Birmingham long Inglan. Long las lafet ya we mi go long hem, i gat samwe long 33,000 boe we oli kamaot long 85 kantri. Mo tu, klosap 750,000 man oli kam visitim mifala long taem ya, wan long olgeta hem i Kwin Elisabet blong Inglan. Longtaem ya mi ting se mi stap joen long wan bigfala kampani blong ol brata long fulwol. Be mi mi no save se i no longtaem bambae mi save wan bigfala kampani blong ol brata mo sista long fulwol we i gud moa.

Samwe long manis Maj no Eprel 1958, klosap mi finisim trening blong mi long Grand Hotel Wiesler  long Graz, long Ostria. Mi mi wok wetem Rudolf Tschiggerl, we hem i wan man blong mekem kek. Mi mi neva harem trutok, be Rudolf nao i prij long mi fastaem. Hem i tokbaot tijim blong Triniti, mo hem i talem se Baebol i no tijim samting ya. Mi mi no agri long samting we hem i talem, mo mi wantem pruvum long hem se hem i rong. Mi mi laekem Rudolf mo mi wantem pulum hem blong i folem skul blong Katolik bakegen.

Rudolf, we mifala i singaot hem se Rudi, i givim wan Baebol long mi. Be mi mi ting se Baebol ya hem i blong ol Katolik. Ale mi stat blong ridim mo mi faenemaot se Rudi i putum wan traket insaed long Baebol ya. Traket ya Watchtower Society nao i printim. Mi mi no laekem traket ya from we mi ting se ol toktok insaed long hem oli saon gud, be maet oli no stret. Nating se i olsem, mi mi glad blong tokbaot Baebol wetem hem. Rudi i kasem save mo hem i no moa givim ol buk long mi. Wanwan taem mitufala i tokbaot Baebol, mo long ol taem ya mitufala i storian gogo kasem let long sapa. Mitufala i mekem olsem blong tri manis.

Afta we mi finisim trening blong mi long taon ya we mi stap long hem, mama blong mi i pem skul fi blong mi long wan narafala skul, blong mi skul blong kam wan maneja blong hotel. Ale mi muv i go long wan skul long taon ya Bad Hofgastein, we i stap long medel blong ol hil. Skul ya i joen wetem Grand Hotel we i stap long taon ya, taswe samtaem mi go wok long ples ya blong yusum ol save we mi lanem.

Rudi i sanem adres blong mi i go long branj ofis blong Vienna, mo branj ofis i sanem i go long tu misinari sista we nem blong tufala, Ilse Unterdörfer mo Elfriede Löhr. * Wan dei, man we i wok long ofis blong hotel ya i singaot mi mo i talem long mi se i gat tu woman i wantem luk mi afsaed. Tingting blong mi i fasfas from mi no save tufala. Nating se i olsem, mi go luk tufala. Biaen, mi kasem save se tufala ya nao i stap prij bifo long Wol Wo Tu, taem Nasi Gavman i putum tabu long wok blong prij. Be bifo long bigfala faet ya, ol polis blong Jemani oli holemtaet tufala, mo oli sanem tufala i go kalabus long Lichtenburg. Biaen taem faet i stap gohed, oli muvum tufala i go long wan narafala kalabus bakegen long Ravensbrück, klosap long Berlin.

Tufala sista ya, yia blong tufala i klosap sem mak long yia blong mama blong mi, taswe mi respektem tufala. Mi no wantem westem taem blong tufala, mo mi mi tingbaot se afta we sam wik no manis i pas, bambae mi jes talem long tufala se tufala i no moa kam luk mi. Ale mi askem long tufala blong karem lis blong ol vas blong pruvum sipos tijing ya se laen blong ol pop i stat long aposol Pita i giaman. Mi talem long tufala se bambae mi go luk pris, blong mitufala i tokbaot ol vas ya. Long rod ya mi ting se bambae mi jes faenemaot trutok.

Jos blong Roman Katolik i tijim ol man se laen blong ol pop i stat long aposol Pita i kam kasem tede. (Skul ya i no gat stret tingting long ol tok blong Jisas long Matiu 16:18, 19.) Ol Katolik oli singaot  pop se Tabu Papa. Mo oli talem se taem hem i tijim ol man hem i neva giaman. Mi mi bilif long samting ya, taswe mi ting se tijing blong Triniti i tru. Plante narafala tijing blong Katolik oli kamaot long stamba tijing ya, se laen blong ol pop i stat long aposol Pita. From samting ya, plante man we oli Katolik oli tinghae long tijing ya.

Taem mi go luk pris, hem i no save ansa long ol kwestin blong mi, be hem i givim wan buk long mi, we i tokbaot tijing ya se laen blong ol pop i stat long aposol Pita i kam kasem tede. Mi karem i go long haos be afta we mi ridim, mi gat plante moa kwestin. Ale mi go luk pris bakegen, be hem i no save ansa long ol kwestin blong mi. Hem i talem nomo se: “Mi no save jenisim tingting blong yu, mo yu yu no save jenisim tingting blong mi. . . . !Mi save talem long yu nomo se gudlak!” Pris ya i no moa wantem storian wetem mi.

Long taem ya nao, mi mi agri blong stadi Baebol wetem Ilse mo Elfriede. Tufala i tokbaot plante samting long saed blong Jehova God we hem i Tabu Papa long heven. (Jon 17:11) Long ples blong mifala, i no gat kongregesen yet, mifala i stap mekem miting long haos blong wan famle we i intres, mo tufala sista ya nao tufala i stap lidim ol miting. Long taem ya, mifala i no plante. I no gat wan brata we i save lidim miting, taswe tufala sista ya i mekem miting olsem we tufala i stap storian. Wanwan taem, wan brata blong defren kongregesen i kam mo i mekem pablik tok long wan ples we oli rentem.

Long Oktoba 1958, mi stadi Baebol wetem tufala sista ya. Mo tri manis biaen, mi mi baptaes, hemia long Jenuware 1959. Be bifo we mi baptaes, mi askem long tufala sista ya sipos mi save folem tufala long wok blong prij blong luk se wok ya i olsem wanem. (Ol Wok 20:20) Taem mifala i kambak, mi askem long tufala blong givim wan teritori long mi. Tufala i talem long mi blong mi go prij long wan vilej, ale mi go prij mo mi mekem ol visit mi wan nomo. Fas brata we mi prij wetem hem, hemia wan eria elda we i kam visitim mifala.

Long yia 1960, taem mi finis long skul, mi gobak long ples blong mi, from we mi wantem givhan long ol famle blong mi, blong oli save trutok. Kam kasem naoia i no gat wan long olgeta we i kam long trutok, be i gat samfala we oli intres smol.

Long yia 1961, kongregesen blong mifala i ridimaot wan leta blong branj ofis, we i leftemap tingting blong evriwan blong oli mekem wok blong paenia. Long taem ya, mi mi yangfala mo mi strong, taswe mi no gat eskius blong talem se mi no save paenia. Mi tokbaot wok blong mi long Kurt Kuhn we hem i eria elda blong mifala, mo mi talem long hem se bambae mi wok sam moa manis, olsem nao mi save pem wan trak, blong mi yusum long wok blong paenia. ?Wanem tingting blong elda ya? Hem i talem long mi se: “?Yu ting se Jisas mo ol aposol blong hem oli nidim wan trak blong oli save mekem wok blong God fultaem?” !Tok ya i jenisim tingting blong mi! Ale mi mekem plan blong mi stat blong paenia. Be fastaem mi mas jenisim program blong mi, from we mi mi wok 72 aoa evri wik long wan hotel.

Mi askem long bos blong mi, sipos mi save wok 60 aoa nomo long wan wik. Ale hem i letem, mo i pem mi sem mak nomo. Smoltaem biaen, mi askem long hem bakegen, blong mi wok 48 aoa nomo long wan wik. Hem i letem mo hem i pem mi sem mak yet. Biaen mi askem blong wok 36 aoa nomo long wan wik, hemia i min se 6 aoa long 6 dei, mo hem i  letem. Nating se ol aoa blong wok blong mi oli jenis, be mi mi sapraes blong luk se hem i pem mi sem mak nomo olsem fastaem. !I luk olsem se hem i no wantem lusum mi! Afta long hemia, mi luk se program blong mi i stret, nao mi stat blong mekem wok blong fultaem paenia. Long taem ya, ol fultaem paenia oli mas kasem 100 aoa long wan manis.

Fo manis biaen, mi mekem wok blong spesel paenia mo mi jeaman blong kampani blong ol elda long wan smol kongregesen long provins ya Carinthia, long taon ya Spittal an der Drau. Long taem ya, ol spesel paenia oli mas kasem 150 aoa long wan manis. Mi wan nomo mi mekem wok blong paenia, be mi glad se sista Gertrude Lobner i sapotem gud mi long wok blong prij. Hem i mekem wok blong sekretari long kongregesen.

Long yia 1963, mi mekem wok blong eria elda. Samtaem, mi pas long tren blong go long ol defdefren kongregesen mo mi karem ol bokis we oli hevi. Plante brata long ol kongregesen long taem ya oli no gat trak, taswe oli no save kam from mi. Mi no wantem we ol man oli luk se mi “flas,” ale mi karem olting blong mi, mo mi wokbaot nomo kasem ples we bambae mi slip long hem.

Long yia 1965, mi kasem wan leta blong joen long namba 41 klas blong Skul blong Gilead. Long taem ya, mifala plante we i no mared yet. Afta long skul ya, mi sapraes we oli sanem mi mi gobak long kantri blong mi long Ostria blong mi gohed long wok blong eria elda. Be bifo mi gobak, oli askem long mi blong mi folem brata Anthony Conte i go long Cornwall, long not blong New York, blong fo wik. Hem i mekem wok blong eria elda, mo mi mi glad tumas blong wok wetem hem. Hem i lavem ol man mo i laekem tumas blong prij mo hem i gat gudhan blong mekem wok ya.

Taem mi gobak long kantri blong mi, oli sanem mi mi go long wan eria, mo long ples ya nao mi faenem Tove Merete. Hem i wan naesfala sista, hem i save trutok taem hem i gat faef yia nomo. Ale long Eprel 1967, mitufala i mared, mo biaen mitufala i gohed bakegen blong visitim ol kongregesen. Taem ol brata mo sista oli askem long mitufala se olsem wanem mitufala i faenem mitufala, mitufala i mekem plei long olgeta se, “Branj ofis nao i mekem plan ya.”

Wan yia biaen, mi luksave se Jehova i kaen tumas, nao hem i adoptem mi blong mi kam wan spirit pikinini blong hem. Naoia fasin blong mi blong fren gud wetem Papa blong mi long heven, hem i spesel, i olsem olgeta ya we Rom 8:15 i tokbaot olgeta se oli stap singaot long God se: “Papa blong mifala.”

Mi wetem woman blong mi, mitufala i gohed blong mekem wok blong eria elda mo distrik elda gogo kasem yia 1976. Samtaem long koltaem, rum blong mitufala i kolkol we i kolkol. Taem mitufala i girap long moning, mitufala i luk se en blong blangket blong mitufala i strong olsem aes finis. Ale mitufala i tingbaot blong karem wan smol masin blong mekem rum i hot long koltaem. Long sam ples, sipos mitufala i wantem swim long naet, mitufala i mas go afsaed blong go long batrum we win i kolkol tumas. Mitufala i no gat prapa haos blong mitufala. Taswe evri wik mitufala i stap long haos we kongregesen i givim, mo evri Tusde moning mitufala i muv go long wan narafala kongregesen.

 Mi mi glad tumas blong talem se long olgeta yia ya, woman blong mi i givhan bigwan long mi long wok ya. Hem i laekem tumas wok blong prij, mo mi neva tingbaot wan taem we mi talem long hem blong i go prij. Hem i lavem ol man mo hem i tingbaot olgeta. Fasin blong hem i givhan long mi bigwan.

Long yia 1976, mitufala i kasem wan leta blong go wok long branj ofis long Vienna, mo oli putumap mi, mi kam wan memba blong Branj Komiti. Long taem ya, branj ofis blong Ostria i lukaot long ol kantri long Is Yurop, mo i lukaot long wok blong karem ol buk i go long ol kantri ya. Brata Jürgen Rundel i gat gudhan blong mekem wok ya, mo hem nao i lukaot long wok ya. Mi mi glad blong wok wetem hem, be biaen oli askem long mi blong mi lukaot long wok ya blong tanem ol tok i go long ten lanwis blong ol man long Is Yurop. Jürgen mo woman blong hem Gertrude, tufala i gohed blong mekem spesel paenia long Jemani. Stat long 1978, branj ofis blong Ostria i tanem ol magasin long sikis lanwis mo oli printim long wan smol masin. Mifala i sanem sabskripsen i go long ol defren kantri tu. Brata Otto Kuglitsch i lukaot long ol wok ya. Be naoia hem wetem woman blong hem Ingrid, tufala i stap long branj ofis long Jemani.

Ol brata long Is Yurop, olgeta tu oli wokem prapa magasin blong olgeta. Oli yusum sam olfala masin blong bifo. Be nating se i olsem, oli nidim yet we ol narafala kantri oli givhan long olgeta. Jehova lukaot gud long wok ya mo mifala long branj ofis, mifala i lavem tumas ol brata we oli mekem wok long ol ples we i had, mo ol ples we oli putum tabu long hem blong plante yia.

Long yia 1989, mi folem Brata Theodore Jaracz we i wan memba blong Hed Kampani, blong go long Romania. Mitufala i go blong mekem wan impoten samting, hemia blong givhan long wan bigfala grup blong ol brata mo sista blong oli joen wanples bakegen wetem ogenaesesen blong Jehova. Stat long yia 1949, i gat plante risen we i mekem se samfala oli lego ogenaesesen blong Jehova mo oli stanemap prapa kongregesen blong olgeta. Be olgeta ya oli gohed blong prij mo oli baptaesem ol man. Mo tu, oli go long kalabus from we oli no wantem joen long faet. Olgeta oli mekem sem mak olsem ol  brata mo sista we oli stap insaed long ogenaesesen blong Jehova. Long taem ya, wok blong prij i tabu yet long Romania, ale mifala i go long haos blong Brata Pamfil Albu, blong mekem wan smol miting. Long miting i gat Brata Theodore Jaracz wetem mi mo fo elda blong kongregesen ya mo ol brata we oli kam long nem blong Branj Komiti blong Romania. Rolf Kellner tu i kam wetem mitufala, blong hem i save tanem ol tok blong mifala.

Long nambatu naet we mifala i storian, Brata Albu i talem wan tok blong pulum ol fo elda ya we oli fren blong hem, blong oli kambak joen wetem mifala. Hem i talem se: “Sipos yumi no gobak long ogenaesesen naoia, maet bambae yumi no moa gat narafala janis bakegen.” Biaen, i gat klosap 5,000 brata oli kambak insaed long ogenaesesen blong Jehova. !Jehova i win bigwan be Setan i no glad nating!

Bifo we Komunis gavman long Is Yurop i foldaon long en blong yia 1989, Hed Kampani i askem long mi mo woman blong mi, blong mitufala i go long Hedkwota blong ol Witnes blong Jehova long New York. Mitufala i sapraes bigwan long samting ya. Long Julae 1990, mitufala i go wok long Betel long New York. Ale long yia 1992, oli putumap mi blong mi givhan long Seves Komiti blong Hed Kampani. Mo stat long Julae 1994, mi mi kasem bigfala blesing ya blong wok long Hed Kampani.

Taem ya we mi wok long hotel, i pas finis. Mo naoia mi mi glad tumas we mi joen long wok ya blong rerem ol kakae blong spirit mo mi stap givimaot ol kakae ya long olgeta brata mo sista long fulwol. (Mat. 24:45-47) Naoia 50 yia finis we mi mekem wok blong Jehova fultaem. Taem mi tingtingbak long laef blong mi, mi save talem se mi glad we mi glad long ol blesing we Jehova i stap givim long olgeta brata mo sista long fulwol. Mi mi laekem tumas blong go long ol intenasnal asembli, from we long ples ya nao yumi kasem save gud long Papa blong yumi long heven, Jehova, mo long ol trutok blong Baebol.

Mi mi stap prea blong bambae plante milian man oli stadi long Baebol, oli laekem trutok, mo oli joen wanples blong mekem wok blong Jehova wetem olgeta Kristin brata mo sista long fulwol. (1 Pita 2:17) Mi mi stap tingbaot taem ya we bambae mi stap long heven mo mi luk we olgeta man long wol oli laef bakegen mo bambae mi faenem stret papa blong mi. Mi sua se papa mo mama blong mi, mo ol famle blong mi, bambae olgeta evriwan oli wosipim Jehova long Paradaes.