1. ?Yumi evriwan i nidim wanem, mo hu olgeta we oli olsem ol gudfala fren blong yumi?

YUMI evriwan i nidim sam gudfala fren we yumi save stap klosap olgeta. Yes, yumi glad tumas blong gat ol gudfala fren olsem, ol famle blong yumi, mo ol fren blong yumi. Olgeta ya oli lavem yumi, oli tinghae long yumi, mo oli kasemsave long yumi. Be wan man we yumi mas fren moa wetem hem mo stap klosap moa long hem, hemia Jehova, man we i mekem yumi.—Pri. 12:1.

2. ?Jehova i mekem wanem promes long yumi? ?Be from wanem plante man oli ting se God i no save kam klosap long yumi?

² Jehova i singaot yumi blong yumi fren wetem hem. Hem i promes se sipos yumi kam klosap long hem, hem bambae i kam klosap long yumi. (Jem. 4:8) Yumi glad taem yumi save samting ya. Be plante man oli ting se God i no save kam klosap long olgeta. Oli harem se oli no save fren wetem God, mo oli ting se God i stap longwe tumas long olgeta. ?Olsem wanem? ?Yumi save kam klosap long God?

3. ?Baebol i talem wanem long saed blong Jehova?

³ Jehova “i no stap longwe long yumi.” Taswe, sipos man i lukaotem God, hem i save faenem hem. (Ridim Ol Wok 17:26, 27; Ol Sam 145:18.) Nating se yumi sinman, be Jehova i rere, mo i glad nomo we yumi kam fren blong hem. (Aes. 41:8; 55:6) Wan man blong raetem Sam i fren gud wetem Jehova, mo i luk se samting ya i tru, taswe hem i raetem se: ‘Oltaem, yu yu stap harem ol prea blong mifala. Olgeta  man long evri ples bambae oli mas kam long yu. Olgeta man we yu yu stap jusumaot olgeta, mo yu stap tekem olgeta oli kam long yu, oli save harem gud.’ (Sam 65:2, 4) Ale, i gud yumi luk long Baebol, olsem wanem King Asa i kam klosap long God, mo olsem wanem God i kam klosap long hem. *

4. ?Wanem eksampol blong King Asa we ol man Juda oli save folem?

⁴ King Asa i gat strong tingting blong mekem tru wosip. Hem i kam king long wan taem we rabis fasin i plante long Juda. I gat ol man mo ol woman we wok blong olgeta i blong slip wetem olgeta we oli go blong mekem wosip long haos blong God, mo oli mekem wosip long ol aedol tu. Be King Asa i obei long Jehova, ale i sakemaot ol god ya, mo ol man mo woman we oli mekem ol rabis fasin ya. (1 King 15:9-13) Yes, King Asa i kam klosap long Jehova, mo i obei long ol loa blong hem. Hem i soemaot gudfala eksampol, taswe, hem i talem long ol man Juda se olgeta tu oli mas lukaotem Jehova, ‘mo mekem ol samting we Hem i wantem, mo obei long ol loa blong hem.’ Ale, long ten yia we King Asa i stap klosap long Jehova, Jehova i stap blesem hem. Asa i save se Jehova nao i stap blesem hem, taswe, hem i talem long ol man Juda se kantri blong olgeta i stap gud, from we ‘oli stap mekem ol samting we Jehova i wantem.’ (2 Kron. 14:1-7) Ale, ?biaen wanem i hapen?

5. ?Wanem stori i soemaot se King Asa i dipen long Jehova, mo wanem frut i kamaot?

⁵ Yu traem tingbaot se yu yu King Asa. Mo Sera, wan man Itiopia, i kam wetem 1 milian soldia blong hem, mo 300 kat blong faet, mo i lidim olgeta oli kam blong faet agens long yu. (2 Kron. 14:8-10) Be yu yu gat 580,000 soldia nomo. ?Bambae yu yu mekem wanem? ?Bambae yu yu askem long Jehova from wanem hem i no blokem ol enemi ya? ?Bambae yu yu dipen long prapa save blong yu nomo, no yu trastem Jehova se bambae hem i lukaotgud long yu? King Asa i soemaot se hem i fren gud wetem Jehova, mo i trastem hem fulwan. Hem i prea long Jehova, i se: “Plis yu halpem mifala naoia, from we mifala i stap lukluk long yu nomo.” ?God i ansa long prea blong King Asa olsem wanem? Jehova ‘i mekem we oli winim ol man Itiopia,’ oli kilim evriwan i ded.—2 Kron. 14:11-13.

6. ?Wanem fasin blong King Asa we yumi save folem?

⁶ ?Wanem i mekem se King Asa i gat strong tingting se Jehova bambae i lukaot gud long hem, mo i lidim hem? Baebol i talem se King Asa ‘i mekem ol samting we i stret long fes blong Jehova,’ mo ‘oltaem long laef blong hem, tingting blong hem i stap strong long Jehova.’ (1 King 15:11, 14) Yumi tu, yumi mas mekem wok blong Jehova wetem fulhat blong yumi. Olsem nao, bambae yumi kam klosap long Jehova naoia mo long fiuja. Be yumi glad se Jehova i mekem rod blong pulum yumi i kam klosap long hem, mo i stap givhan long yumi blong fren gud wetem hem. I gud yumi tokbaot tu rod we hem i yusum.

7. (1) ?Jehova i mekem wanem blong pulum yumi i kam long hem? (2) ?Be wanem bigfala samting we hem i yusum?

⁷ Jehova i lavem yumi, taswe hem i mekem wol ya, wan gudfala ples we yumi save laef long hem. Hem i givim win we yumi pulum evridei blong stap laef. (Wok 17:28; Rev. 4:11) Be hem i lavem yumi moa. Hem i soemaot samting ya, taem hem i givim ol save blong Baebol, blong mekem yumi fren gud wetem hem. (Luk 12:42) Mo tu, hem i promes blong lesin long prea blong yumi. (1 Jon 5:14) Be bigfala samting we Jehova i mekem blong pulum yumi i kam klosap long hem, mo blong yumi save kam fren wetem hem, hemia lav we hem i soemaot tru long ransom sakrefaes blong Jisas. (Ridim 1 Jon 4:9, 10, 19.) Jehova i sanem pikinini blong hem i kam, blong i givim laef blong hem from yumi. Sakrefaes ya blong Jisas, i mekem se yumi gat hop blong laef  bakegen, mo yumi save kam stret man.—Jon 3:16.

8, 9. ?Jehova i yusum Jisas blong mekem wanem?

⁸ Jehova i givim ransom, blong olgeta man oli kasem laef. Olgeta we oli ded bifo we Jisas i givim laef blong hem, olgeta tu bambae oli kasem laef from ransom ya. ?From wanem yumi talem olsem? Jehova i save se ol promes we hem i talem oli mas kamtru. Taswe, long taem we hem i talemaot profet tok long saed blong Jisas, nating se i no kamtru yet, be hem i luk se profet tok ya i kam tru finis. (Jen. 3:15) Ale, plante handred yia i pas, Pol i talem tangkiu long Jehova, from we hem i letem ‘Jisas Kraes i pem rod blong olgeta man oli go fri.’ Mo i tokbaot se God i fogivim sin blong ol man we oli laef bifo long Jisas. (Rom 3:21-26) Taswe, yumi save kam klosap long Jehova tru long Jisas nomo.

⁹ Tru long sakrefaes blong Jisas nomo, Jehova i letem olgeta we oli gat tingting daon oli fren wetem hem. Baebol i talem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:6-8) Jisas i givim laef blong hem blong sevem yumi, from we hem mo Jehova i lavem yumi tumas, taswe, blesing ya i no olsem wan pei we yumi kasem. From samting ya, Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” Hem i talem tu se: “I no gat man i save kam long Papa blong mi, sipos mi mi no tekem hem i kam.” (Jon 6:44; 14:6) Tru long sakrefaes blong Jisas, Jehova i save yusum tabu spirit blong hem, blong pulum ol man oli kam klosap long hem, mo i stap givhan long olgeta blong fren wetem hem. Olsem nao, oli save kasem laef we i no save finis. (Ridim Jud 20, 21.) Bambae yumi tokbaot narafala rod we Jehova i yusum, blong pulum yumi i kam klosap long hem.

10. ?Baebol i pulum yumi i kam klosap long God olsem wanem?

¹⁰ Long ol haf we yumi lukluk finis, yumi tokbaot plante vas. Ol vas ya oli kamaot long 14 buk blong Baebol. Jehova i yusum tabu spirit blong hem blong lidim ol man oli raetem Baebol. Taswe, ol tok ya blong hem oli save pulum yumi i kam klosap long hem. Baebol i mekem se yumi save ol samting we yumi mas mekem blong kam klosap long God. Mo tu, i mekem se yumi save ransom, mo yumi save olsem wanem, Jisas i save givhan long yumi blong kam klosap long God. Mo yumi save ol gudfala fasin blong Jehova, mo stamba tingting blong hem, from we yumi gat Baebol. Wan eksampol, Jehova i tokbaot ol gudfala fasin blong hem long Eksodas 34:6, 7, se: ‘Hem i gat sore long man, mo i stap givhan long man long gladhat blong hem. Hem i no save kros kwik, mo oltaem hem i lavem man mo i stap holemstrong promes blong hem. Hem i stap kaen long plante taosen man, i stap fogivim olgeta, i stap tekemaot ol sin blong olgeta.’ Yumi evriwan i wantem stap klosap long wan man olsem. Yes, Jehova i save se sipos yumi save gud ol fasin blong hem, bambae yumi luk hem olsem wan tru fren mo yumi wantem kam klosap long hem.

11. ?Yumi mas stadi gud long ol fasin blong Jehova from wanem? (Yu luk pija long pej 16.)

¹¹ Fastok blong buk ya Draw Close to Jehovah, i talem se, taem yumi fren moa wetem wan narafala, yumi save gud hem, mo yumi laekem ol gudfala fasin blong hem. Long sem fasin, taem yumi stadi ol gudfala fasin blong Jehova long Baebol, bambae yumi fren moa wetem hem. Jehova i mekem se ol man we oli raetem Baebol, oli raetem long wan fasin we yumi kasem save. Taswe, yumi wantem talem tangkiu long Jehova.

12. ?From wanem Jehova i yusum ol man blong raetem Baebol?

¹² Sipos Jehova i wantem, hem i save yusum ol enjel blong raetem Baebol. Ol enjel oli wantem save yumi, mo samting we yumi stap mekem. (1 Pita 1:12) Yes, Jehova i save yusum ol enjel nomo blong raetem Baebol. Be ol enjel oli no olsem yumi man. Oli no kasem save se yumi harem olsem wanem, oli no save wanem  yumi nidim, mo oli no gat ol slak fasin olsem yumi. Jehova i save samting ya, taswe, hem i yusum ol man blong oli raetem Baebol. Ol man we oli raetem Baebol, oli tokbaot sam samting we i mekem tingting blong olgeta i foldaon, no sam samting we i mekem olgeta i fraet, mo tu, oli tokbaot ol mastik we oli mekem. Taem yumi ridim ol stori blong olgeta long Baebol, yumi harem save olsem wanem oli harem nogud. Mo taem yumi ridim ol samting we oli tokbaot we i mekem olgeta i harem gud, yu harem save glad we oli kasem tu. Yes, olgeta we oli raetem Baebol, oli olsem Elaeja we hem i gat tingting mo filing olsem yumi.—Jem. 5:17.

13. ?Yu yu harem olsem wanem taem yu ridim prea blong Jona?

¹³ Ale, yu traem luk wan eksampol. Jehova i askem Jona blong i mekem wan wok. Be Jona i no wantem, ale i ronwe. Sipos wan enjel i raetem stori ya blong Jona long Baebol, bambae hem i no save tokbaot stret olsem wanem Jona i harem nogud. Be i gud tumas we Jehova i jusum Jona nomo blong i raetem stori blong hem, wetem prea we hem i mekem taem hem i stap insaed long bel blong fis. Jona i prea se: ‘Jehova. Taem mi harem we klosap laef blong mi i lus, mi tingbaot yu, mi prea long yu.’—Jona 1:3, 10; 2:1-9.

14. ?From wanem yumi harem olsem Aesea, taem yumi ridim ol toktok we hem i talem?

¹⁴ Wan narafala eksampol, hemia blong Aesea. Hem i luk wan vison, mo i luk Jehova i stap long gudfala ples blong hem long heven. Aesea i harem se i no stret we hem i luk samting ya, from we hem i wan sin man nomo. Hem i se: ‘!O, mi mi harem nogud tumas! !Mi mi no moa gat rod nao! Ol tok we i stap kamaot long maot blong mi oli fulap long sin nomo, mo mi stap long medel blong ol man we ol tok blong olgeta tu oli fulap long sin, be stret long ae blong mi nomo, mi mi luk King blong mi, we hem i Jehova, mo i gat olgeta paoa.’ (Aes. 6:5) Wan enjel i no save talem ol toktok olsem we Aesea i talem. Taem yumi  ridim ol toktok ya, yumi harem olsem Aesea. ?From wanem? From we yumi tu yumi sinman.

15, 16. (1) ?Yumi kasem save filing blong ol man from wanem? Yu talem wan eksampol. (2) ?Yumi save mekem wanem blong yumi kam klosap moa long Jehova?

¹⁵ Jekob i talem se ‘hem i no wan gudfala man.’ Pita tu i talem se ‘hem i man nogud.’ ?Olsem wanem? ?Yu ting se ol enjel oli save talem ol semfala tok ya? (Jen. 32:10; Luk 5:8) Ol disaepol blong Jisas tu, samtaem oli “fraet tumas,” be ol enjel oli no stap fraet. Mo yu traem tingbaot Pol mo sam narafala we oli stap talemaot gud nius. Oli mas gat strong tingting blong mekem wok ya, from we ol man oli stap agensem olgeta. ?Be yu ting se ol enjel tu oli nidim strong tingting blong mekem wok ya? Nogat. (Jon 6:19; 1 Tes. 2:2) Yes, ol enjel oli stret gud olgeta, mo oli gat bigfala paoa. Be yumi, yumi sinman olsem olgeta we Jehova i yusum blong raetem Baebol. Taswe, yumi kasem save filing blong olgeta. Taem yumi ridim ol tok we oli raetem, yumi save ‘harem gud wetem olgeta taem oli stap harem gud, mo taem oli harem nogud, oli stap krae, be yumi tu yumi krae wetem olgeta.’—Rom 12:15.

¹⁶ Yumi save faenem plante gudfala samting long saed blong Jehova, sipos yumi tingting dip long ol fasin we Jehova i mekem long ol man blong hem bifo. I tru, ol man ya oli sinman, be bambae yumi luk olsem wanem Jehova i soemaot se i lavem olgeta, mo i mekem tingting blong hem i longfala blong i kam klosap long olgeta. Ale, taem yumi save Jehova moa, mo taem yumi lavem hem moa, bambae yumi kam klosap moa long hem.—Ridim Ol Sam 25:14.

17. (1) ?Profet Asaria i givim wanem gudfala advaes long King Asa? (2) ?King Asa i no obei long advaes ya olsem wanem, mo wanem frut i kamaot?

¹⁷ ?Yu tingbaot yet King Asa we yumi tokbaot long stat? Yumi save lanem sam moa samting long stori blong hem. Hem i winim ol man Itiopia. Ale, profet Asaria i givim wan gudfala advaes long hem, i se: ‘Sipos yu stap obei long Jehova, hem bambae i stap wetem yu oltaem nomo. Sipos yu stap lukaot hem, bambae hem i mekem we yu faenem hem, be sipos yu gowe long hem, bambae hem i lego yu tu.’ (2 Kron. 15:1, 2) Be Asa i no obei long advaes ya. Ale, taem ol king blong Isrel long not, oli kam faet agens ol man Juda, Asa i fraet tumas, i girap i go askem king blong Siria blong i givhan long hem. Be ol man Siria oli no mekem wosip long Jehova. Asa i no askem Jehova blong i givhan long hem. From samting ya, Jehova i talem long hem se: ‘Samting ya we yu yu mekem i krangke, mo i stat naoia, oltaem nomo bambae i gat faet long kantri blong yu.’ Yes, stat long taem ya, oltaem i gat faet long Juda. (2 Kron. 16:1-9) ?Yumi lanem wanem long stori ya?

18, 19. (1) ?Sipos yumi no moa stap klosap long Jehova, yumi mas mekem wanem? (2) ?Bambae yumi stap klosap long Jehova oltaem, sipos yumi mekem wanem?

¹⁸ Yes, yumi no mas lego Jehova. Sipos yumi no moa stap klosap long Jehova olsem fastaem, yumi mas mekem olsem we Hosea 12:6 i talem, i se: ‘Yufala i mas tanem tingting blong yufala, yufala i kambak long God bakegen. Tingting blong yufala i mas stap strong long hem, yufala i mas folem ol stret fasin, mo yufala i mas wet blong luk ol samting we hem bambae i mekem blong sevem yufala.’ Yumi save kam klosap we klosap long Jehova, sipos yumi tingting dip long ransom sakrefaes blong Jisas, mo yumi stadi gud long Baebol.—Ridim Dutronome 13:4.

¹⁹ Wan man blong raetem Sam i talem se: ‘Hae God, taem we mi mi kam stap klosap long yu, mi harem se i gud tumas long mi.’ (Sam 73:28) Yumi tu, yumi save harem gud sipos yumi kam klosap long Jehova. Yumi mas gohed blong lukaotem sam moa save long saed blong Jehova. Sipos yumi mekem olsem, bambae yumi lavem Jehova moa. !Yes, taem yumi kam klosap long Jehova, hem bambae i kam stap klosap long yumi, naoia mo blong olwe!