1, 2. ?Jehova i toktok wetem ol man blong hem olsem wanem?

BIFO finis Jehova i stap lidim ol man blong hem. Taem hem i wantem talemaot samting we bambae i hapen long fiuja, no wok we ol man blong hem oli mas mekem, hem i yusum ol enjel blong go talem, no i talemaot long wan vison, no long wan drim. (Nam. 7:89; Esik. 1:1; Dan. 2:19) Samtaem hem i yusum sam man blong oli talemaot tok blong hem. Nating se yumi kasem tok blong God long defdefren rod, be olgeta nomo we oli folem, bambae oli kasem blesing.

² Tede, Jehova i yusum Baebol, mo tabu spirit, mo Kristin kongregesen blong givim ol advaes blong lidim yumi. (Wok 9:31; 15:28; 2 Tim. 3:16, 17) Ol advaes we hem i givim blong lidim yumi, oli isi nomo blong folem. I olsem we yumi stap harem Jehova i talem long yumi se: “Hemia rod. Yufala i folem.” (Aes. 30:21) Mo tu, Jehova i yusum Jisas blong talemaot ol tok blong hem. Hem i putumap Jisas i hed blong kongregesen. Ale, Jisas i yusum slef ya we i stret mo waes, blong i lidim kongregesen. (Mat. 24:45) Yumi mas tinghevi long ol tok mo ol advaes blong Jehova. Sipos yumi obei long olgeta, bambae yumi kasem laef we i no save finis.—Hib. 5:9.

3. ?Wanem i save mekem se yumi no wantem lesin long Jehova? (Yu luk pija long stat blong stadi.)

³ Setan i save se ol advaes we Jehova i givim bambae oli sevem laef blong yumi. Taswe, hem i pulum yumi blong yumi no lesin  long Jehova. Mo from we yumi sinman, tingting blong yumi i save pulum yumi blong no obei fulwan long Jehova. (Jer. 17:9) Long stadi ya, bambae yumi luk olsem wanem yumi save winim ol samting ya we oli traem pulum yumi, blong yumi no lesin long Jehova. Mo tu, bambae yumi luk olsem wanem fasin blong lesin mo prea long Jehova, i save givhan long yumi blong stap klosap long Jehova, nating se wan samting i traem yumi.

4. ?Setan i mekem wanem blong pulum tingting blong ol man i go rong?

⁴ Setan i yusum ol giaman toktok long niuspepa, ol buk, ol magasin, mo radio, mo televisin, mo Intenet, blong pulum tingting blong man i go rong. (Ridim 1 Jon 5:19.) Ol man oli yusum ol samting ya, blong givimaot save long olgeta ples long wol. Be plante taem, sam save we oli givimaot oli agensem ol rul blong Jehova. (Jer. 2:13) Maet oli talem se i oraet nomo we man i mared wetem man, no woman i mared wetem woman. Ale, plante man we oli ridim ol save ya, oli save ting se rul blong Baebol we i talem se fasin ya i no stret, i strong tumas.—1 Kor. 6:9, 10.

5. ?Olsem wanem yumi save blokem ol tingting blong Setan, blong oli no lidim yumi?

⁵ Ale, ?ol man we oli laekem ol loa blong Jehova, oli save mekem wanem blong ol tingting blong Setan i no lidim olgeta? ?Oli save luksave samting we i gud mo samting we i nogud olsem wanem? Baebol i ansa se: ‘Oli mas obei long ol tok blong Jehova.’ (Sam 119:9) Baebol i save givhan long yumi blong luksave trutok mo giaman toktok. (Prov. 23:23) Jisas i talem se yumi nidim “evri tok we God i talem.” (Mat. 4:4) Ol rul we Jehova i givim, oli stap long Baebol. Yumi mas letem ol rul ya oli lidim yumi taem yumi mekem ol samting long laef. Yu traem tingbaot Josef. Long taem blong hem, i no gat wan loa we i talem se fasin ya blong slip wetem man no woman blong narafala i wan sin. Nating se i olsem, Josef i save se Jehova i agensem fasin ya. Taswe, hem i no wantem slip wetem woman blong Potifa, mo hem i no wantem mekem sin long fes blong Jehova. (Ridim Jenesis 39:7-9.) Mo nating se woman blong Potifa i fosem hem plante taem, be Josef i no wantem lesin long hem, hem i lesin long voes blong Jehova nomo. Yumi tu yumi mas lesin long voes blong Jehova, yumi no mas lesin long ol tingting blong Setan.

6, 7. ?Yumi mas mekem wanem blong yumi blokem ol tingting blong Setan?

⁶ Wol ya i fulap wetem defdefren skul. Ol tijing mo bilif blong ol skul ya oli mekem tingting blong man i fasfas. From samting ya plante man oli ting se i no gat wan skul we i tru. Be sipos yumi wantem lesin long Jehova, hem bambae i givhan long yumi blong faenem skul we i tru. Sipos tu man i toktok semtaem, yumi no save lesin long voes blong tufala wantaem. Yumi mas jusum weswan bambae yumi lesin long hem. Yes, olsem ol sipsip we oli haremsave voes blong man nomo we i lukaot long olgeta, yumi tu yumi mas haremsave voes blong Jisas, hemia man we Jehova i putumap blong i lukaot long yumi.—Ridim Jon 10:3-5.

 ⁷ Jisas i talem se: “Tok ya we yufala i stap harem, yufala i mas tingting gud long hem.” (Mak 4:24) Sipos yumi laekem ol advaes blong Jehova, mo yumi lesin long hem, bambae yumi luk se ol advaes ya oli gud mo oli isi blong folem. Mo yumi mas lesin long Jehova nomo, yumi no mas lesin long ol tingting blong Setan. Yumi no mas letem ol samting olsem miusik, ol video, ol program long televisin, ol buk, ol bos, ol tija, mo ol man blong hae save, oli lidim laef blong yumi.—Kol. 2:8.

8. (1) ?From wanem i isi nomo blong Setan i lidim tingting blong yumi? (2) ?Sipos yumi no stretem tingting blong yumi kwiktaem, wanem i save hapen?

⁸ Setan i save we yumi sinman. Taswe, hem i pulum yumi blong mekem ol fasin we yumi nomo i wantem, nao yumi no moa gohed blong mekem ol samting we Jehova i wantem. (Jon 8:44-47) Maet yumi no moa prea, no yumi prij wanwan taem nomo, no yumi go long sam miting nomo. Hemia ol saen we oli soemaot wanem i stap long tingting blong yumi, mo se yumi stap long denja. Sipos yumi lego nomo, yumi no stretem tingting blong yumi, sloslo bambae yumi no moa lesin long voes blong Jehova. Ale, bambae yumi stap mekem ol samting we yumi nomo i wantem, nao yumi mekem wan rabis fasin we yumi ting se bambae yumi neva mekem. (Rom 7:15) Be yumi save blokem ol trabol ya sipos yumi luksave ol saen ya, mo yumi stretem kwiktaem. Mo tu, taem yumi lesin gud long voes blong Jehova, bambae yumi no lesin long ol tingting we ol man blong apostasi oli talem.—Prov. 11:9.

9. ?From wanem yumi mas luksave kwiktaem ol nogud tingting we yumi gat?

⁹ Sipos wan man i kasem wan rabis sik, hem i mas go tekem tritmen kwiktaem, bifo we sik ya i kam bigwan tumas. Long sem fasin, sipos yumi gat sam nogud tingting, yumi mas stretem tingting blong yumi kwiktaem. Sipos no, Setan bambae i kasem yumi long trap blong hem, mo i fosem yumi blong mekem ol samting we hem i wantem. (2 Tim. 2:26) Be, ?olsem wanem sipos yumi stap folem finis sam tingting blong Setan? Yumi mas kambak kwiktaem long Jehova. Mo tu, yumi mas stadi long ol advaes blong hem, mo yumi folem. (Aes. 44:22) I tru, nating se yumi kambak finis long Jehova, be bambae yumi kakae yet frut blong ol nogud desisen we yumi mekem. Taswe, i moa gud we yumi no lego Jehova.

10, 11. (1) ?Man we i flas hem i olsem wanem? (2) ?Yumi lanem wanem long stori blong Kora, mo Datan, mo Abiram?

¹⁰ Tingting blong yumi tu i save pulum yumi i gowe long Jehova. Maet yumi flas, no  yumi griri. Tufala fasin ya i save mekem wan man i kasem bigfala trabol. Yu traem tingbaot. Wan man we i flas, hem i ting se hem i gud moa long narafala, mo se hem i save mekem eni samting nomo. Hem i no wantem wan narafala Kristin, no wan elda, i talem wanem hem i mas mekem. Mo hem i no wantem folem ol advaes we ogenaesesen i givim. Man olsem i save go longwe tumas long Jehova, nao i no moa harem voes blong hem.

¹¹ Jehova i putumap Moses mo Eron blong tufala i lidim ol man Isrel long draeples. Be Kora, mo Datan, mo Abiram oli flas nao oli agensem Moses mo Eron, mo oli no wantem joen wetem tufala blong mekem wosip long Jehova. ?Jehova i stretem bisnes ya olsem wanem? Hem i kilim trifala i ded. (Nam. 26:8-10) ?Yumi lanem wanem? Sipos yumi lego Jehova mo agensem hem, bambae yumi kasem bigfala trabol. Baebol i talem se: ‘Man we i flas bambae i kasem trabol we i spolem gud hem.’—Prov. 16:18; Aes. 13:11.

12, 13. (1) Yu talem wan stori we i soemaot olsem wanem fasin ya we man i griri i save spolem laef blong man. (2) Yu eksplenem olsem wanem nogud tingting ya i save gru hareap, sipos man i no sakemaot kwiktaem.

¹² Sipos yumi griri, yumi save gowe long Jehova. Man we i gat fasin ya, hem i ting se ol advaes we Jehova i givim oli no stret long hem, mo i ting se hem i gat raet blong karem samting we i no blong hem. Stori blong Gehasi i soemaot samting ya. Taem Neman, wan komanda blong ol ami blong Siria i kasem rabis sik long skin, Elisa we i wan profet blong God, i mekem Neman i gud bakegen. Nao Neman i givim mane mo klos olsem presen blong talem tangkiu long hem. Elisa i no tekem presen ya, be Gehasi we i man blong wok blong hem, i wantem ol presen ya. Nao hem i resis biaen long Neman, mo i giaman long hem blong hem i save karem ol presen ya. Be Elisa i no save samting ya. Ale ?wanem i hapen long Gehasi? Hem i kasem sik blong Neman.—2 King 5:20-27.

¹³ Man i save gat tingting ya tu sipos hem i stat sloslo blong laekem wan samting. Tingting ya i save gru hareap. Sipos hem i no sakemaot kwiktaem, bambae i spolem gud laef blong hem. Stori blong Akan long Baebol i soemaot olsem wanem fasin ya i gru kwiktaem long tingting blong hem. Akan i se: ‘Taem mi faenem wan flas klos we oli wokem long Babilonia, mo sam silva we hevi blong hem i kasem tu kilo, mo wan pis gol we hevi blong hem i moa long haf kilo, mi mi laekem tumas ol samting ya, nao mi karem olgeta.’ I klia se Akan i stap finis long denja, mo hem i mas sakemaot tingting ya kwiktaem. Be hem i girap i stilim ol samting ya mo i go haedem long haos blong hem. Jehova i mekem sin blong Akan i kam long klia ples, mo sam dei biaen, Hem i talem blong oli stonem Akan mo famle blong hem oli ded. (Jos. 7:11, 21, 24, 25) Nogud tingting ya i save kasem eni man nomo. Taswe, ‘yumi mas blokem olgeta fasin ya we yumi stap wantem samting blong narafala man.’ (Luk 12:15) Mo tu, fasin ya we man i griri hem i sem mak long rabis fasin blong man wetem woman. Taswe, maet samtaem yumi save gat rabis tingting, be yumi mas bos long tingting blong yumi, blong i no lidim yumi blong mekem sin.—Ridim Jemes 1:14, 15.

14. ?Sipos yumi wantem mekem wan fasin we i no stret from we yumi flas no yumi griri, yumi mas tingbaot wanem?

¹⁴ Olsem we yumi tokbaot finis, fasin ya blong flas mo griri, oli save lidim yumi blong kasem trabol. Sipos yumi tingting blong mekem wan nogud samting, i gud yumi tingbaot nogud frut we i save kamaot. Olsem nao, bambae yumi blokem, mo yumi gohed blong lesin long Jehova. (Dut. 32:29) Long Baebol, Jehova i talem gudfala frut we i kamaot taem yumi mekem samting we i stret, mo nogud frut we i save kamaot taem yumi jusum blong mekem samting we i no stret. Taswe, sipos yumi wantem mekem wan fasin we i no stret  from we yumi flas no yumi griri, yumi mas tingbaot frut we bambae i kamaot. ?Bambae yumi kasem wanem trabol? ?Bambae ol famle blong yumi oli harem olsem wanem? ?Bambae yumi fren yet wetem Jehova?

15. ?Yumi lanem wanem long eksampol blong Jisas?

¹⁵ Jehova i wantem se yumi harem gud long laef blong yumi. (Sam 1:1-3) Hem i givim advaes blong i lidim yumi long stret taem we yumi nidim. (Ridim Hibrus 4:16.) Jisas i stret gud olgeta, be hem i luksave se oltaem hem i mas toktok long Jehova mo hem i prea oltaem. Ale, Jehova i yusum ol nambawan rod blong givhan long hem mo i lidim hem. Hem i sanem ol enjel blong oli lukaot gud long hem, i givim tabu spirit long hem, mo i lidim hem blong i jusum ol 12 aposol blong hem. Jisas i harem voes blong Jehova we i talem se hem i glad long hem, mo i stap givhan long hem. (Mat. 3:17; 17:5; Mak 1:12, 13; Luk 6:12, 13; Jon 12:28) Olsem Jisas, yumi mas prea oltaem. Mo yumi mas talemaot ol tingting blong yumi long Jehova. (Sam 62:7, 8; Hib. 5:7) Yes, prea i mekem se yumi stap klosap long Jehova, mo yumi wantem obei long hem.

16. ?Jehova i givhan long yumi olsem wanem blong yumi lesin long hem?

¹⁶ I tru, Jehova i no fosem yumi blong folem ol advaes blong hem. Be ol advaes blong hem oli klia nomo, mo hem i save givhan long yumi blong faenem. Hem i save givim tabu spirit long yumi, sipos yumi askem long hem. (Ridim Luk 11:10-13.) Taem yumi askem advaes long Jehova, yumi mas lukaotgud olsem wanem yumi stap lesin long ol advaes ya. (Luk 8:18) Yu traem tingbaot wan eksampol. Yu askem long Jehova blong i givhan long yu blong yu sakemaot ol nogud tingting. Be nao yu girap yu gohed blong lukluk rabis pija. Sipos yu mekem olsem, yu soemaot se yu no rili wantem we Jehova i givhan long yu. Be Jehova i save givhan long yumi sipos yumi mekem ol samting we i stret, mo sipos yumi stap long ples we tabu spirit i stap, olsem long ol miting blong kongregesen. Plante brata mo sista, oli lesin long ol advaes blong Jehova we i kamaot long miting, mekem se oli blokem sam bigfala trabol we i save kasem olgeta. Taem oli luksave se oli stat blong gat wan nogud tingting, kwiktaem oli sakemaot mo oli stretem tingting blong olgeta.—Sam 73:12-17; 143:10.

17. ?From wanem yumi no mas trastem yumi wan?

¹⁷ Eksampol blong King Deved i save tijim yumi. Deved i naf blong mekem ol bigbigfala wok, from we hem i stap lukluk long Jehova blong i givhan long hem, hem i no trastem hem wan. Hem i wan yangfala nomo taem i kilim Golaeat. Mo biaen hem i kam wan soldia mo wan king, mo wok blong hem i blong lukaot gud long ol man Isrel, mo hem i mas mekem ol desisen we i gud long neson ya. Be taem Deved i trastem hem wan, tingting blong hem i pulum hem i gorong. Hem i mekem wan bigfala sin wetem woman ya Batseba, mo i kilim man blong woman ya tu i ded. Be taem Jehova i stretem Deved, Deved i mekem tingting blong hem i stap daon, i talemaot mastik blong hem, nao hem i fren gud wetem Jehova bakegen.—Sam 51:4, 6, 10, 11.

18. ?Wanem i save givhan long yumi blong yumi lesin oltaem long voes blong Jehova?

¹⁸ Ale, i gud yumi folem advaes long 1 Korin 10:12 se, yumi no mas trastem yumi wan. Baebol i talem klia se yumi no save win, sipos yumi nomo i lidim yumi. Sipos i olsem, naoia yumi mas jusum se bambae yumi lesin long voes blong Jehova no blong Setan. (Jer. 10:23) I gud yumi prea oltaem, mo yumi letem tabu spirit i lidim yumi, olsem nao, bambae yumi lesin oltaem long voes blong Jehova.