PITA i harem nogud mo i krae we i krae, taem i giaman se hem i no save Jisas. Nating se i olsem, Pita i mas traehad blong mekem bilif blong hem i strong bakegen. Mo Jisas i wantem yusum hem blong i givhan long ol narafala. Taswe, hem i talem long Pita se; ‘taem yu kambak, yu mas mekem tingting blong ol brata blong yu i strong.’ (Luk 22:32, 54-62) Pita i wok had nao i kam wan gudfala man blong lidim Kristin kongregesen. (Gal. 2:9) Long sem fasin, ol brata we oli bin mekem wok blong elda, oli save mekem wok ya bakegen, mo mekem tingting blong ol narafala Kristin i strong. Bambae oli glad sipos oli mekem olsem.

Plante brata we oli mekem wok blong elda, maet kongregesen i karemaot wok ya long olgeta. Long taem olsem, oli harem olsem se oli no moa save mekem wan gudfala wok. Yu traem tingbaot Julio, wan brata long Saot Amerika, we i mekem wok ya bitim 20 yia. * Hem i talem se: “Fasin ya blong rerem ol tok, mo visitim ol brata, mo lukaot long ol brata mo sista long kongregesen, i kam olsem wan bigfala samting long laef blong mi. !Be wantaem nomo mi no moa mekem ol wok ya! Mi harem olsem se mi no moa gat wok long ogenaesesen blong Jehova. Long taem ya, mi harem nogud we mi harem nogud.” Tede, Julio i mekem wok blong elda bakegen.

Disaepol Jemes i raetem se: ‘Ol brata mo sista. Taem ol samting oli stap kam blong traem yufala, bambae yufala i save luk olgeta olsem samting blong harem gud.’ (Jem. 1:2) Jemes i stap tokbaot ol trabol we ol man blong agens oli stap mekem long yumi, mo sin we i stap long yumi. Hem i tokbaot fasin ya we man i wantem tumas ol fasin nogud, mo fasin ya we man i mekem i gud long wan man, be i luk ol narafala olsem rabis nomo, mo sam narafala fasin olsem. (Jem. 1:14; 2:1; 4:1, 2, 11) Mo tu, taem Jehova i stretem yumi, samting ya i save mekem yumi harem nogud. (Hib. 12:11) Be ol samting olsem we oli kam traem yumi, oli no mas mekem se yumi no moa glad.

Nating se yumi no moa holem wok insaed long kongregesen, be yumi gat janis yet blong lukluk bilif blong  yumi, mo mekem i strong bakegen. Mo yumi yusum janis ya tu blong soemaot lav we yumi gat long Jehova. Yumi mas tingbaot bakegen risen we i pulum yumi blong mekem wok ya. ?Olsem wanem? ?Yumi mekem wok blong mekem i gud long yumi nomo, no yumi mekem from we yumi lavem Jehova? ?Yumi lukaot long kongregesen from yumi bilif se hem i blong Jehova, no yumi stap lukaot long ol brata mo sista from narafala risen? (Wok 20:28-30) Sam brata we oli no moa mekem wok ya, oli gohed nomo blong mekem ol narafala wok we i sapotem Kingdom. Ol brata ya oli soemaot long ol man mo long Setan, se oli rili lavem Jehova.

Taem King Deved i mekem wan bigfala sin, wan profet i stretem hem. Mo hem i akseptem, nao Jehova i fogivim hem. Biaen Deved i singsing se: “Man we Hae God i fogivim hem, mo i tekemaot ol sin blong hem, hem i save harem gud. Man we Hae God i no moa jajem hem from ol samting nogud we hem i mekem, mo we i no moa giaman long laef blong hem, hem i save harem gud.” (Sam 32:1, 2) Yes, from we oli stretem Deved, tingting blong hem i klin bakegen, mo i kam wan gudfala man blong lukaotgud long ol man blong God.

Plante taem, ol brata we oli mekem wok blong elda bakegen, oli lukaotgud moa long ol man blong Jehova, i bitim we oli mekem bifo. Wan brata we i mekem wok ya bakegen i talem se: “Naoia mi kasem save moa olsem wanem blong givhan long olgeta we oli mekem sin.” Wan narafala elda i talem se: “Naoia mi jes luksave from wanem i impoten tumas we mi mekem gud wok ya blong givhan long ol brata mo sista.”

Man blong raetem Sam i talem se: ‘Jehova i no save gohed oltaem blong faenem poen long ol man.’ (Sam 103:9) Taswe, sipos wan man i mekem bigfala sin, yumi no mas ting se God bambae i no moa save trastem hem. Yu traem tingbaot Ricardo. Hem i mekem wok blong elda plante yia, be biaen kongregesen i karemaot wok ya long hem. Hem i talem se: “Mi kros long mi wan bakegen, from we mi no bin mekem gud wok ya.” Hem i gohed se: “Mi harem olsem se mi no moa naf blong mekem wok ya. Ale blong plante yia, tingting ya i blokem mi blong kasem mak ya bakegen. Mo tu, mi harem se mi no moa save mekem ol brata mo sista oli trastem mi bakegen. Be mi mi glad blong givhan long ol narafala. Taswe, mi leftemap tingting blong ol brata mo sista long Haos Kingdom, mo mi go prij wetem olgeta, mo mi statem plante Baebol stadi. Ol samting ya oli mekem tingting blong mi i strong, mo naoia, mi mekem wok olsem elda bakegen.”

 Sipos wan brata i stap holem kros mo i wantem givimbak, bambae hem i no save mekem wok olsem elda. I gud ol brata oli folem fasin blong Deved, man blong wok blong Jehova. King Sol i jalus long Deved mo i wantem kilim hem, be Deved i ronwe i go haed. Nating se Deved i gat plante janis blong givimbak nogud fasin ya long Sol, be i no mekem. (1 Saml. 24:4-7; 26:8-12) Hem i krae taem i harem nius se King Sol i ded long faet. Taem hem i stap krae, hem i tokbaot King Sol mo pikinini blong hem Jonatan se, “tufala i gud tumas, mo ol man oli laekem tufala tumas.” (2 Saml. 1:21-23) Yes, Deved i no wantem givimbak fasin nogud we King Sol i mekem.

Sipos samfala oli mekem wan samting long yu we i no stret, yu no mas givimbak long olgeta. Yu traem tingbaot William blong Inglan. Hem i mekem wok blong elda blong 30 yia, be biaen hem i lusum wok ya. William i kam kros mo i wantem givimbak long sam elda. ?Wanem i givhan long William blong i no mekem fasin ya? Hem i talem se: “Samting we i givhan long mi, hemia taem mi ridim buk blong Job.” Hem i gohed se: “!Sipos Jehova i save givhan long Job blong i mekem pis wetem trifala fren blong hem, hem i save givhan long mi tu blong mekem pis wetem ol elda!”—Job 42:7-9.

Sipos yu nomo yu jusum blong lego wok ya, i gud yu tingbaot bakegen from wanem yu lego. ?Hemia from we yu bin kasem wan bigfala problem? ?No yu stap traehad blong kasem sam samting long laef, nao yu no moa tinghevi long wok ya? ?No yu harem nogud from wan fasin we narafala i mekem long yu? Nating se yu lego wok ya from wanem risen, yu no mas foget se taem yu wan elda, yu stap givhan long ol narafala long plante rod. Ol tok we yu givim, oli leftemap tingting blong olgeta, ol gudfala wok we yu mekem, i pulum olgeta blong oli mekem sem mak, mo taem yu visitim olgeta, yu stap givhan long olgeta blong winim ol traem we oli kasem. Taem yu mekem gud wok ya, yu mekem Jehova i glad mo yu tu yu glad.—Prov. 27:11.

Jehova i stap givhan long ol man blong hem, nao oli glad bakegen mo oli wantem blong lukaot long kongregesen bakegen. Sipos yu nomo yu jusum blong lego wok ya, no kongregesen i karemaot wok ya long yu, yu save traehad blong kasem mak ya bakegen. (1 Tim. 3:1) ‘Oltaem Pol i stap prea’ from ol Kristin long Kolosi blong oli kasem stret save blong God, nao oli ‘save mekem laef blong olgeta i kam stret olsem we God i wantem.’ (Kol. 1:9, 10) Sipos yu mekem wok ya bakegen, yu mas askem long Jehova blong i givim paoa, mo i mekem yu gat longfala tingting, mo i mekem yu glad. Long ol las dei ya, ol man blong God oli nidim ol gudfala man we oli save lukaot long olgeta, mo mekem oli stap fren wetem Jehova. ?Olsem wanem? ?Yu yu naf, mo yu glad blong mekem tingting blong ol brata blong yu i strong?