1. ?From wanem ol man blong God bambae oli kasem “plante trabol”?

?OLSEM wanem? ?Yu yu sek taem yu harem se bambae yumi kasem “plante trabol,” bifo we yumi kasem laef we i no save finis? Ating nogat. Nating se yumi stap longtaem long trutok, be yumi evriwan i stap kasem trabol. ?From wanem i olsem? Wan risen, hemia se yumi stap long wol blong Setan.—Revelesen 12:12.

2. (1) Antap long ol trabol we yumi evriwan i kasem, ?wanem trabol we ol Kristin oli kasem? (Yu luk pija long stat blong stadi.) (2) ?Hu i stamba blong ol trabol ya, mo yumi save samting ya olsem wanem?

² Yumi evriwan i stap kasem ol trabol long laef. Be ol Kristin oli kasem moa trabol. (1 Korin 10:13) Wan long ol trabol ya, hemia se ol man oli mekem i nogud long olgeta, from we oli no lego God. Jisas i talem long ol man blong hem se: “I no gat man blong wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20) ?Hu i stamba blong ol trabol ya? Hemia Setan. Baebol i talem se Setan hem i olsem “wan laeon we i stap singaot bigwan,” i stap ‘lukaot ol man blong God blong i kakae’ olgeta. (1 Pita 5:8) Setan bambae i traehad long evri rod blong mekem ol man blong Jehova oli no moa holemstrong long hem. Bambae yumi luk samting we i hapen long aposol Pol.

3-5. (1) ?Wanem trabol we Pol i kasem long Listra? (2) ?Olsem wanem tok we Pol i talem i mekem yumi strong?

³ Plante taem ol man oli mekem i nogud long Pol, from we hem i holemstrong long God. (2 Korin 11:23-27) Wantaem long taon ya Listra, Pol i mekem wan merikel. Hem i mekem wan man we leg blong hem i nogud, i kam gud bakegen. Taem ol man oli luk merikel ya, oli ting se Pol mo Banabas, tufala i god. !Be tufala i talem strong long ol man ya blong oli no wosipim tufala! I no longtaem, ol lida blong skul blong ol man Jiu oli kam, mo oli stat blong tok nogud long tufala. Ol man oli bilif long ol toktok blong ol lida ya. Ale, oli girap oli stonem Pol gogo oli ting se hem i ded.—Ol Wok 14:8-19.

⁴ Afta we Pol mo Banabas i go long Debe, “tufala i tanemraon, tufala i kambak long Listra, nao biaen, tufala i aot long ples ya, tufala i kambak long Ikoniam, nao biaen bakegen, tufala i kambak long Antiok ya long Pisidia. Mo long ol ples ya, tufala i stap mekem tingting blong ol man blong Jisas i strong moa, mo tufala i stap givim tok long olgeta blong mekem olgeta oli stanap strong long bilif blong olgeta. Tufala i stap talem se, ‘Long rod blong go insaed long niufala wol ya we God i king long hem, yumi save kasem plante trabol, be nating, yumi mas stanap strong.’” (Ol Wok 14:21, 22) Tok we Pol mo Banabas i talem se bambae yumi kasem “plante trabol” i no leftemap tingting nating. Taswe, ?olsem wanem tufala i “mekem tingting blong ol man blong Jisas i strong moa”?

⁵ Yumi save faenem ansa blong kwestin ya long tok we Pol i talem se: “Long rod blong go insaed long niufala wol ya we God i king long hem, yumi save kasem plante trabol, be nating, yumi mas stanap strong.” Hem i no talem nomo se: “Yumi mas “stanap strong” long ol trabol we yumi fesem. Defren olgeta, Pol i talemaot klia, ol blesing we olgeta we oli holemstrong long God bambae oli kasem. Blesing ya i no wan drim. Jisas i talem se: ‘Man we i stanap strong gogo kasem en, bambae God i sevem hem.’—Matiu 10:22.

6. ?Olgeta we oli stanap strong long ol trabol, oli save kasem wanem blesing?

⁶ Sipos yumi stanap strong long ol trabol ya, bambae yumi kasem blesing. Ol Kristin we tabu spirit i makemaot olgeta, bambae oli kasem blesing ya blong laef olwe long heven, olsem ol king wetem Jisas. Mo ol “narafala sipsip,” bambae oli kasem blesing ya blong laef olwe long wol. (Jon 10:16; 2 Pita 3:13) Be go kasem taem ya, bambae yumi kasem “plante trabol.” Bambae yumi tokbaot tu defren trabol we i save kasem yumi.

7. ?Wanem trabol we yumi save kasem we i mekem yumi sek?

⁷ Jisas i talem finis se: ‘Ol man oli save tekem  yufala i go long Kaonsel blong jajem yufala. Bambae oli save wipim yufala insaed long haos blong prea. Mo bambae yufala i mas stanap long fes blong ol haeman blong gavman, mo long fes blong ol king.’ (Mak 13:9) Taswe, Jisas i talem se sam Kristin bambae oli kasem sam trabol we i mekem olgeta oli sek from. Ol man bambae oli mekem i nogud long olgeta. Samtaem, hemia ol lida blong skul no ol man blong politik. (Ol Wok 5:27, 28) Long taem olsem, i gud blong tingbaot eksampol blong Pol. ?Yu yu ting se hem i fraet, taem ol man oli kilim hem? Nogat.—Ridim Ol Wok 20:22, 23.

8, 9. ?Pol i soemaot olsem wanem se hem i gat strong tingting blong stanap strong? ?Sam brata tede oli stanap strong long ol trabol we oli kasem olgeta stret olsem wanem?

⁸ Pol i gat strong tingting blong faet agensem ol trabol ya blong Setan we oli kasem hem stret. Hem i talem se: “Mi mi luk finis, we laef blong mi i olsem nating nomo long mi. Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem. Wok ya i blong talemaot gud nius ya we God i lavem yumi tumas, mo i stap mekem i gud tumas long yumi.” (Ol Wok 20:24) Pol i no fraet long ol trabol we ol man oli mekem long hem. Defren olgeta hem i gat strong tingting blong stanap strong. Pol i wantem “talemaot gud nius” nating se hem i safa.

⁹ Tede, plante brata mo sista oli no lego Jehova, long taem we oli kasem trabol. Long wan kantri, sam Witnes oli go long kalabus blong klosap 20 yia, we oli no pas long kot. ?From wanem i olsem? Hemia from we oli no wantem joen long politik. Taem oli stap long kalabus, ol famle blong olgeta mo ol narafala man oli no gat raet blong go luk olgeta. Sam long olgeta, ol man oli kilim olgeta, mo oli mekem olgeta oli harem nogud long bodi blong olgeta.

10. ?Sipos wan trabol i kasem yumi wantaem nomo, from wanem yumi no mas fraet?

¹⁰ Long sam narafala ples, ol brata blong yumi oli stanap strong long ol trabol we oli kasem olgeta wantaem nomo. Sipos yu kasem wan trabol olsem, yu no mas fraet. I gud yu tingbaot Josef. Wantaem nomo, ol brata blong hem oli salem hem blong i kam wan slef. Be Jehova i “tekemaot hem long olgeta trabol blong hem.” (Ol Wok 7:9, 10) Jehova i save mekem i sem mak long yu. Oltaem yu mas tingbaot se ‘Jehova i save sevem ol man we oli bilif long hem, i save tekemaot olgeta long ol samting we oli stap traem olgeta.’ (2 Pita 2:9) Yu gat gudfala risen blong trastem Jehova, mo blong stanap strong taem ol man oli mekem i nogud long yu. Yu mas trastem Jehova se hem i save sevem yu long rabis wol ya, mo i save givim laef we i no save finis long yu.—1 Pita 5:8, 9.

11. ?Olsem wanem ol trabol we oli kasem yumi stret, oli defren long ol trabol we oli kasem yumi sloslo?

¹¹ Yumi mas stanap strong tu long ol trabol we maet oli kasem yumi sloslo. ?Olsem wanem ol trabol we i save kasem yumi sloslo, oli defren long ol trabol we oli kasem yumi stret? Ol trabol we oli kasem yumi stret, oli olsem waelwin we i kasem yumi wantaem nomo, mo kwiktaem nomo hem i spolem gud ol haos. Be ol trabol we i kasem yumi sloslo, oli olsem ol waet anis we sloslo oli stap  kakae ol timba blong haos, we yu no luksave. Be taem yu faenemaot, i let finis, from we i no longtaem haos blong yu bambae i foldaon.

12. (1) ?Wanem wan long ol trabol we i kasem yumi sloslo, we Setan i yusum? ?From wanem rod ya i wok gud? (2) ?From wanem tingting blong Pol i foldaon?

¹² Setan i no wantem se yumi fren gud wetem Jehova. Taswe hem i save yusum ol trabol we oli kasem yumi stret, mo ol trabol we i kasem yumi sloslo. Wan long olgeta hemia tingting we i foldaon, mo hem i luk se rod ya we hem i yusum i wok gud. ?From wanem? From we sipos tingting blong yumi i foldaon, sloslo bambae yumi no moa fren gud wetem God. Sam samtaem, tingting blong aposol Pol i foldaon. Wantaem hem i talem se: “Mi mi no save harem gud nating.” (Ridim Rom 7:21-24.) Pol i fren gud wetem Jehova mo i luk olsem se hem i wan memba blong hed kampani. ?Be from wanem tingting blong hem i foldaon? Tingting blong Pol i foldaon from ol slak fasin blong hem. Hem i wantem mekem samting we i stret, be i no isi long hem blong mekem olsem. Sipos yu tu tingting blong yu i foldaon, ating yu glad blong save se Pol tu i kasem sem trabol.

13, 14. (1) ?From wanem tingting blong sam man blong God i foldaon? (2) ?Hu i wantem spolem bilif blong yumi, mo from wanem?

¹³ Plante brata mo sista blong yumi, samtaem tingting blong olgeta i foldaon, oli wari, mo maet oli ting se oli nogud. Eksampol, wan sista we i paenia i talem se: “Taem mi tingbaot bakegen mo bakegen mastik we mi bin mekem, mi harem nogud moa. Taem mi tingbaot evri nogud samting we mi mekem, mi harem se neva wan man bambae i lavem mi, mo mi harem se Jehova tu i no save lavem mi.”

¹⁴ Olsem sista ya, ?from wanem tingting blong sam man blong God i foldaon, nating se oli wok strong long wok blong God? I gat plante risen. Maet oli tingting nogud long olgeta bakegen, no long ol samting long laef blong olgeta. (Ol Proveb 15:15) Sam narafala, tingting blong olgeta i kam nogud from we oli sik. Nomata wanem samting i mekem se yumi gat nogud tingting, be yumi mas tingbaot se i gat wan man we i wantem se tingting blong yumi i foldaon, blong yumi no moa save mekem wok blong God. ?Man ya hem i hu? Hemia Setan. Hem bambae i ded mo hem i wantem se yu tu yu ded. (Revelesen 20:10) Setan i wantem se yumi wari, mo yumi no moa wok strong long wok blong Jehova. Taswe hem i yusum ol trabol we i kasem yumi stret, no ol trabol we i kasem yumi sloslo. Yumi mas tingbaot oltaem se ol man blong God oli stap mekem wan faet, blong oli no lego Jehova.

15. ?Folem 2 Korin 4:16, 17, yumi mas gat strong tingting blong mekem wanem?

¹⁵ Yu mas gat strong tingting blong yu no lego faet ya. Yu mas tingbaot oltaem ol blesing we bambae yu kasem. Pol i raet i go long ol Kristin long Korin se: “Neva tingting blong mifala i kam nogud long ol trabol we i kasem mifala. Maet bodi blong mifala i stap kam nogud moa oltaem, be nating. Evri dei, God i stap mekem tingting blong mifala i niuwan bakegen. Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya blong God long heven, we i no save finis samtaem.”—2 Korin 4:16, 17.

16. ?From wanem i impoten blong rere naoia from ol trabol we bambae oli kam?

¹⁶ Setan i gat plante “giaman trik,” no rabis plan, we hem i yusum agensem yumi. (Efesas 6:11) From samting ya, yumi mas folem advaes we i stap long 1 Pita 5:9, we i talem se: “Yufala i mas stanap strong long bilif blong yufala, blong blokem hem.” Sipos yumi wantem stanap strong, yumi mas rerem tingting mo hat blong yumi naoia. Olsem nao, yumi rere mo yumi glad blong mekem samting we i stret. Yu traem tingbaot. Bifo we ol ami oli go faet, oli mas kasem sam trening fastaem blong rerem olgeta long faet. Yumi tu yumi mas mekem sem mak. Yumi no save se bambae yumi kasem wanem trabol long fiuja. Taswe naoia we ples i kwaet, yumi mas trenem yumi. Aposol Pol i leftemap tingting blong ol Kristin se: ‘Olgeta nomo oli mas traem luklukgud long laef blong olgeta, mo olgeta nomo oli mas jajem olgeta.’—2 Korin 13:5.

17-19. (1) ?Yumi save jekem yumi olsem wanem? (2) ?Ol yangfala oli save mekem wanem blong oli rere blong talemaot bilif blong olgeta, taem oli stap long skul?

¹⁷ Wan rod blong jekem yu wan, hemia blong askem ol kwestin olsem se: ‘?Mi mi prea oltaem? Taem ol narafala oli pulum mi blong mekem wan samting we i nogud, ?mi mi obei long God fastaem? ?Mi mi go long ol miting oltaem? ?Mi mi no fraet blong talemaot bilif blong mi? ?Mi mi fogivim ol brata blong mi, olsem we mi wantem olgeta  oli mekem long mi? ?Mi mi obei long ol elda mo long olgeta we oli lukaot long olgeta kongregesen long fulwol?’

¹⁸ Yumi stap long medel blong ol man we oli traem pulum tingting blong yumi. Plante yangfala brata mo sista we oli stap long skul, oli no sem, mo oli no fraet, be oli gat strong tingting blong talemaot bilif blong olgeta. ?Wanem i givhan long olgeta blong oli no fraet blong toktok? Oli yusum sam save long ol magasin blong yumi. Long Wekap! blong Julae–Septemba 2009 i tokbaot sam kwestin we wan yangfala long skul i save askem long yu se: “?From wanem yu no bilif long evolusen?” Yu save ansa se: “?From wanem mi mi mas bilif long evolusen? !Ol saentis oli gat bigfala save long saed ya, be olgeta tu oli gat defdefren tingting!” Ol papa mo mama, yufala i mas tokbaot wetem ol pikinini blong yufala, sam rod we oli save folem blong oli no fraet blong talemaot bilif blong olgeta, taem oli stap long skul.

¹⁹ I tru, i no isi oltaem blong talemaot bilif blong yumi, mo blong mekem ol samting we Jehova i wantem. Taem yu kasem haos long en blong dei, yu mas fosem yu wan blong go long miting. No maet yu harem se yu no wantem girap long moning, blong go long wok blong prij. Be yu mas tingbaot se: Sipos yu lanem naoia blong mekem ol samting ya, bambae yu yu rere blong fesem ol bigfala trabol we oli save kasem yu long fiuja.

20, 21. (1) Taem yu tingting dip long sakrefaes blong Jisas, ?olsem wanem hemia i givhan long yu blong winim ol nogud tingting? (2) ?Yumi mas gat strong tingting blong mekem wanem?

²⁰ ?Be olsem wanem long ol trabol we oli kasem yumi sloslo? Yu traem tingbaot, ?olsem wanem yumi save winim tingting we i foldaon? Wan rod we i save givhan bigwan mo i nambawan blong folem, hemia blong tingting dip long sakrefaes blong Jisas. Hemia nao samting we aposol Pol i mekem. Samtaem hem i harem nogud. Be hem i save se Jisas i ded from ol sinman olsem hem. Hem i talem se: “Laef ya we mi stap long hem naoia, mi mi gat from we mi bilif long hem, we hem i Pikinini blong God. Hem i lavem mi, nao i givim laef blong hem, i ded blong sevem mi.” (Galesia 2:20) Pol i glad long sakrefaes blong Jisas, mo i bilif se Jisas i ded blong sevem hem.

²¹ Sipos yu tingbaot sakrefaes blong Jisas olsem wan presen we Jehova i givim long yu, mo yu bilif long hem, yu tu yu save kasem bigfala blesing. Be hemia i no min se, bambae tingting blong yu i no moa foldaon. Nogat. Samfala bambae oli traehad yet blong winim tingting we i foldaon gogo kasem we niufala wol i kam. Be yu mas tingbaot se: Olgeta we oli no lego Jehova, bambae oli kasem blesing. Taem ol dei oli stap pas, yumi kam klosap moa long taem ya we Kingdom blong God bambae i kam. Taem samting ya i kamtru, bambae i gat pis long wol, mo olgeta man bambae oli kam stret gud olgeta. Yu mas gat strong tingting blong go insaed long Kingdom, nating sipos yu mas kasem plante trabol.