1. ?Wanem tingting blong Pol long olgeta we oli wok strong blong talemaot gud nius?

APOSOL Pol i tinghae long ol brata mo sista blong hem we oli wok strong blong talemaot gud nius. Hem i talem se: “Mifala i stap tingbaot we fasin blong yufala i soemaotgud bilif blong yufala, mo hadwok blong yufala i soemaot we yufala i lavem God tumas. Mo mifala i stap tingbaot we yufala i stap stanap strong yet from we tingting blong yufala i stap strong long Jisas Kraes, Masta blong yumi.” (1 Tesalonaeka 1:3) Jehova tu i tingbaot olgeta, mo i tinghae long evri samting we ol man blong hem oli mekem, nating se i bigwan no i smol.—Hibrus 6:10.

2. ?Long stadi ya bambae yumi tokbaot wanem?

² Ol Kristin long taem bifo, mo tede tu oli lego plante samting blong oli mekem moa long wok blong Jehova. Long stadi ya, bambae yumi tokbaot sam samting we ol Kristin long taem blong Jisas oli mekem long wok blong Jehova. Mo tu, bambae yumi tokbaot sam wok we olgeta we oli mekem wok blong God fultaem, oli mekem tede, mo sam samting we yumi save mekem blong givhan long olgeta.

3, 4. (1) ?Ol brata mo sista long taem blong Jisas, oli mekem wok blong Jehova olsem wanem? (2) ?Olsem wanem ol man blong talemaot Kingdom long taem blong Jisas, oli kasem mane blong pem ol samting we oli nidim?

³ Afta we Jisas i baptaes, hem i stat blong talemaot gud nius blong Kingdom, mo hem i tijim ol narafala tu blong oli mekem wok ya. (Luk 3:21-23; 4:14, 15, 43) Afta we Jisas i ded, ol aposol blong hem oli lidim wok blong prij, mo wok ya i gohed blong kam bigwan moa. (Ol Wok 5:42; 6:7) Sam Kristin oli lego haos blong olgeta blong oli save mekem wok blong misinari. Wan long olgeta, hemia Filip. Hem i prij long ol defdefren ples long Palestaen. (Ol Wok 8:5, 40; 21:8) Wan narafala misinari, hemia Pol. Hem i talemaot gud nius long ol ples we oli stap longwe long haos blong hem. (Ol Wok 13:2-4; 14:26; 2 Korin 1:19) Sam narafala olsem Mak, Luk, mo Silvanas (Saelas), oli raetem sam buk blong Baebol, no oli mekem wok olsem sekretari blong ol man blong raetem Baebol. (1 Pita 5:12) I gat plante sista we oli wok wetem ol brata ya. (Ol Wok 18:26; Rom 16:1, 2) Yumi save ridim ol gudfala stori blong ol brata mo sista ya long Grik haf blong Baebol. Ol stori blong olgeta oli mekem yumi tingbaot bakegen se, Jehova i tinghae long wok we ol man blong hem oli mekem, mo i stap givim samting we oli nidim.

⁴ ?Olsem wanem ol man blong talemaot Kingdom long taem blong Jisas, oli kasem mane blong pem ol samting we oli nidim? Olgeta oli no askem long ol brata blong olgeta blong oli givhan long olgeta. Taswe, samtaem oli mas wok smol blong kasem mane. (1 Korin 9:11-15) Be oli glad taem ol narafala oli givhan long olgeta. Ol narafala oli singaot olgeta blong kakae, oli givim ples blong slip long olgeta, mo oli givhan long sam narafala rod tu. Olgeta brata mo sista wanwan, mo ful kongregesen tu oli wantem givhan long olgeta.—Ridim Ol Wok 16:14, 15; Filipae 4:15-18.

5. ?Wan man mo woman blong hem we tufala i mekem wok blong God fultaem, tufala i talem wanem?

⁵ Tede tu, plante brata mo sista oli wok strong blong mekem wok blong Jehova fultaem long plante defren rod. (Yu luk bokis ya “ Ol Defdefren Wok Blong God Fultaem.”) ?Wanem tingting blong olgeta long desisen we oli mekem? Sipos yu askem kwestin ya long sam brata mo sista, ansa blong olgeta bambae i leftemap tingting blong yu. Wan brata i go long wan narafala kantri blong mekem wok blong fultaem paenia, biaen hem i mekem wok blong spesel paenia, misinari mo i wok long Betel. Hem i talem se: “Mi harem  se mi mekem wan gudfala desisen blong mekem wok blong Jehova fultaem. Taem mi gat 18 yia, mi gat wan bigfala desisen blong mekem. Mi mas jusum se bambae mi go long yunivesiti, no mi wok fultaem, no mi mekem wok blong paenia. I gat plante stori we oli soemaot se Jehova i no fogetem ol samting we yumi lego, blong mekem wok blong hem fultaem. Mi mi naf blong yusum gudhan we Jehova i givim long mi long plante defren rod, be sipos mi wok blong wan masta, bambae mi no save yusum ol save ya.” Woman blong hem i talem se: “Evri wok we Jehova i givim long mi, oli mekem bilif blong mi i kam strong moa. Mitufala i luksave we Jehova i lukaot gud long mitufala, mo i lidim mitufala bakegen mo bakegen. Be sipos mitufala i no traem blong mekem ol wok ya, bambae mitufala i no luksave samting ya. Evri dei, mi mi stap talem tangkiu long Jehova we mitufala i save mekem wok blong hem fultaem.” ?Olsem wanem? ?Yu tu yu wantem gat wan laef olsem?

6. ?Wanem tingting blong Jehova long wok we yumi mekem?

⁶ I tru, samfala oli no naf blong mekem wok blong Jehova fultaem. Be oli mekem samting we oli naf blong mekem long wok blong Jehova. Yumi save se Jehova i tinghae long wok blong olgeta. Wan eksampol. Long Filimon 1-3, Pol i talem halo long ol brata mo sista long Kolosi, mo i talem nem blong samfala. (Ridim.) Pol i tinghae long wok we oli mekem, mo Jehova tu i tinghae long wok blong olgeta. Long sem fasin, Jehova tu i tinghae long wok we yu yu mekem. ?Yu save mekem wanem blong givhan long olgeta we oli mekem wok blong Jehova fultaem?

7, 8. ?Wanem wok we ol fultaem paenia oli mekem? ?Mo olsem wanem ol narafala long kongregesen oli givhan long olgeta?

⁷ Ol paenia tede oli wok strong olsem ol Kristin long taem blong Jisas. Oli leftemap tingting blong Kongregesen bigwan. Plante long olgeta oli stap kasem 70 aoa evri manis long wok blong prij. ?Yu save givhan long olgeta olsem wanem?

⁸ Shari, wan sista we i mekem wok blong paenia i talem se: “I luk olsem se ol paenia oli strong, from we evri dei oli prij. Nating se i olsem, oli nidim we yumi leftemap tingting blong olgeta.” (Rom 1:11, 12) Wan narafala sista we i mekem wok blong paenia plante yia finis, i tokbaot ol paenia long kongregesen blong hem i se: “Oltaem oli wok strong. Oli glad tumas taem narafala i tekem olgeta long trak blong olgeta blong go long wok blong prij, i askem olgeta blong kam kakae wetem olgeta, i givim smol mane blong bensin no blong pem sam samting blong olgeta. Taem yu mekem olsem, yu soemaot se yu tingbaot olgeta.”

9, 10. ?Samfala oli mekem wanem blong givhan long ol paenia long kongregesen?

⁹ Wan narafala rod blong givhan long ol paenia, hemia blong prij wetem olgeta. Tu sista we i paenia, tufala i talem se tufala i nidim sam moa brata mo sista blong oli joen wetem tufala blong prij, long ol dei blong wik mo long ol aftenun. Wan sista we naoia hem i wok long Betel long Brooklyn, i tingbaot samting we ol narafala oli mekem blong givhan long hem long wok blong paenia. Hem i talem se: “Wan sista we i gat trak i talem long mi se, ‘sipos yu no gat wan fren blong prij wetem hem, yu save ring long mi enitaem blong mi kam wetem yu.’ Sista ya i givhan long mi bigwan long wok blong paenia.” Shari we  yumi tokbaot finis, i talem se: “Ol paenia we oli no mared oli stap olgeta nomo, afta we oli prij. Maet wanwan taem yu save askem long olgeta blong oli joen wetem yufala long famle wosip. Taem oli joen wetem yufala blong mekem ol narafala samting, hemia i givhan long olgeta blong oli gohed strong.”

¹⁰ Wan sista we i mekem wok blong Jehova fultaem klosap 50 yia, i tokbaot samting we ol narafala oli mekem blong givhan long hem, mo ol narafala sista we oli no mared, i se: “Ol elda long kongregesen blong mifala, oli visitim ol paenia klosap evri tu manis. Samtaem oli askem sam kwestin long mifala, blong luk sipos evri samting i oraet, no mifala i wari long sam samting. Oli wantem tumas blong givhan long mifala. Oli kam luk haos blong mifala, blong save sipos mifala i nidim we oli givhan long mifala.” Ol elda ya mo ol narafala, oli folem eksampol blong Onesiforas. Hem i lukaot long famle blong hem, be hem i lukaot long Pol tu, i givim ol samting we hem nidim.—2 Timoti 1:18.

11. ?Wanem wok we ol spesel paenia oli mekem?

¹¹ Wan narafala wok blong God fultaem, hemia spesel paenia. Ol spesel paenia oli stap kasem 130 aoa evri manis long wok blong prij. Mo oli bisi blong mekem ol narafala wok long kongregesen tu. Evri manis, branj ofis i givim smol mane nomo long olgeta, from we oli no gat taem blong wok from mane. Smol mane ya i givhan long olgeta blong pem ol samting we oli nidim, long rod ya oli gat moa taem blong prij.

12. ?Ol elda mo ol narafala, oli save givhan long ol spesel paenia olsem wanem?

¹² ?Yumi save mekem wanem blong givhan long ol spesel paenia? Wan elda we i wok long branj ofis, mo i stori wetem plante spesel paenia finis. Hem i talem se: “Ol elda oli mas toktok wetem olgeta blong faenemaot se laef blong olgeta i olsem wanem, mo oli traem faenem rod blong givhan long olgeta. Sam brata mo sista oli ting se ol spesel paenia oli naf blong lukaot long olgeta nomo, from we oli stap kasem smol mane. Be ol brata mo sista long kongregesen oli save givhan long olgeta long plante defren rod.” Ol spesel paenia tu oli glad taem ol brata mo sista oli joen wetem olgeta long wok blong prij. ?Olsem wanem? ?Yu yu save prij wetem olgeta?

13, 14. (1) ?Wanem samting we yumi mas tingbaot long ol eria elda mo woman blong olgeta? (2) ?Yu save mekem wanem blong givhan long ol eria elda mo woman blong olgeta?

¹³ Ol eria elda mo woman blong olgeta, oli stap longtaem long trutok mo oli gat strong bilif, mo oli save talem gudfala toktok blong leftemap tingting blong yumi. Be yumi mas tingbaot se olgeta tu oli nidim we yumi leftemap tingting blong olgeta. Mo tu, oli nidim ol brata mo sista blong oli prij wetem olgeta. Oli glad taem ol brata mo sista oli singaot olgeta blong mekem sam samting wanples, olsem blong pleplei, laf mo sam narafala samting olsem. Taem ol eria elda mo woman blong olgeta oli stap long hospital, no maet oli stap kamgud long sik blong olgeta, i gud yumi go visitim olgeta mo yumi givim ol samting we oli nidim. ‘Dokta Luk, we ol man oli lavem hem tumas,’ i givim ol samting we Pol mo ol narafala Kristin we oli stap go visitim ol kongregesen oli nidim.—Kolosi 4:14; Ol Wok 20:5–21:18.

¹⁴ Ol eria elda mo woman blong olgeta oli nidim we ol gudfala fren blong olgeta oli lavem olgeta, mo oli leftemap tingting blong olgeta. Wan eria elda i talem se: “I olsem we ol fren blong mi oli save gud wetaem mi nidim olgeta blong oli leftemap tingting blong mi. Oli askem ol gudfala kwestin mo oli givhan long mi blong mi talemaot ol wari blong mi. Oli givhan bigwan taem oli lesin gud long mi.” Ol eria elda oli glad taem ol brata mo sista oli intres long olgeta, mo oli wantem fren gud wetem olgeta.

15, 16. ?From wanem wok we olgeta long Betel, mo olgeta we oli bildim ol Haos Asembli oli mekem, oli impoten? ?Yumi save givhan long olgeta olsem wanem?

¹⁵ Olgeta we oli wok long Betel mo olgeta we oli mekem wok blong lukaot gud long ol Haos Asembli, oli mekem wan impoten wok blong sapotem wok blong talemaot gud nius. Sipos olgeta we oli wok long Betel oli stap long kongregesen blong yu, no long eria blong yu, ?yu save mekem wanem blong soem se yu tingbaot olgeta?

¹⁶ Taem oli jes kam long Betel, maet oli harem nogud from oli stap olgeta nomo, longwe long ol famle mo ol fren blong olgeta. Taswe taem ol narafala long Betel, mo long kongregesen oli wantem save gud olgeta, mo oli fren gud wetem olgeta, hemia i mekem olgeta oli glad. (Mak 10:29, 30) Program blong olgeta long Betel i mekem se oli save go long ol miting, mo oli save joen evri wik long wok blong prij. Be samtaem olgeta oli gat sam narafala wok tu blong mekem. Taswe, i gud we olgeta long kongregesen oli kasem save long samting ya, mo oli tinghae long wok we olgeta oli mekem.—Ridim 1 Tesalonaeka 2:9.

17, 18. ?Ol man we oli mekem wok blong God fultaem, oli go long narafala kantri blong mekem wanem?

¹⁷ Samtaem sam brata mo sista oli glad blong go long wan narafala kantri blong mekem wok blong God fultaem. Oli mas lanem blong kakae sam niu kakae, oli lanem wan niu lanwis, mo oli mas jenisim fasin blong olgeta folem kastom, mo fasin blong laef blong ol man long kantri ya. ?Ol man we oli mekem wok blong God fultaem, oli go long narafala kantri blong mekem wanem?

¹⁸ Sam long olgeta oli mekem wok blong misinari, mo oli spenem plante taem long wok blong prij. Olgeta oli gat gudhan blong prij mo tij, mo oli serem save blong olgeta wetem ol narafala long kongregesen. Branj ofis i givim wan ples blong slip long olgeta, mo smol mane nomo blong oli save pem ol samting we oli nidim. Sam narafala oli go long narafala kantri blong wok long branj ofis, no oli givhan blong bildim ol branj ofis, ol ofis  blong translesen, ol Haos Asembli, no ol Haos Kingdom. Branj ofis, no ol brata mo sista long kongregesen oli save givim kakae mo ples blong slip. Olgeta we oli mekem wok blong bildim ol Haos Kingdom tu oli go long olgeta miting, mo oli joen long wok blong prij olsem olgeta we oli wok long Betel. Eksampol blong ol brata mo sista ya oli givhan bigwan long kongregesen.

19. ?Yu save givhan long olgeta we oli mekem wok blong God fultaem long kantri blong yu olsem wanem?

¹⁹ ?Yu save givhan long olgeta we oli mekem wok blong God fultaem long kantri blong yu olsem wanem? I gud yu tingbaot se taem oli jes kam, oli no save kakae sam kaen kakae blong yumi. Taswe taem yu singaot olgeta blong oli kam kakae, yu save askem long olgeta sipos oli wantem testem wan niu kakae, no sipos i gat wan kakae we oli no laekem. Mo tu, bambae i tekem taem blong oli lanem lanwis mo kastom blong ples blong yu. Taswe yu mas gat longfala tingting long olgeta, mo yu mas kaen, taem yu givhan long olgeta. !Olgeta oli wantem lanem samting!

20. ?Yumi save mekem wanem blong givhan long olgeta we oli mekem wok blong God fultaem?

²⁰ Olgeta we oli mekem wok blong God fultaem, oli stap longwe long ol papa mo mama blong olgeta. Taem ol yia oli stap pas, olgeta oli mas mekem wan desisen se bambae oli lukaot long olfala papa mo mama blong olgeta olsem wanem. Ol papa mo mama we oli Witnes, oli wantem tumas we ol pikinini blong olgeta oli gohed long wok blong olgeta. (3 Jon 4) I tru olgeta oli mas mekem olgeta samting we oli naf blong mekem blong lukaot long papa mo mama blong olgeta, mo oli mas go visitim olgeta plante taem. Be ol brata mo sista we oli stap klosap long tufala, oli save givhan tu. Oli glad nomo blong givhan long tufala, sipos tufala i nidim. Yumi mas tingbaot se ol man we oli mekem wok blong God fultaem, oli bisi blong sapotem wok prij, we hemia wan impoten wok long wol tede. (Matiu 28:19, 20) ?Olsem wanem? ?Yu yu tingbaot blong givhan long olgeta we oli mekem wok fultaem, taem yu lukaot long papa mo mama blong olgeta?

21. ?Olgeta we oli mekem wok fultaem, oli harem olsem wanem taem ol narafala oli givhan mo leftemap tingting blong olgeta?

²¹ Plante man oli wok strong from we oli wantem kam rij. Be olgeta we oli jusum blong mekem wok blong God fultaem, oli wok strong from we oli wantem mekem bes blong olgeta long wok blong Jehova, mo oli wantem givhan long ol narafala man. Taswe oli glad tumas we ol narafala oli mekem eni samting blong givhan long olgeta. Wan sista we i mekem wok blong Jehova fultaem, mo i go long wan narafala kantri i talem se: “Taem ol brata mo sista oli raetem wan smol toktok nomo blong talem tangkiu long yu, hemia i soemaot se olgeta oli stap tingbaot yu, mo oli glad long samting we yu stap mekem.”

22. ?Wanem tingting blong yu long wok blong God fultaem?

²² Olgeta we oli mekem wok blong God fultaem, oli jusum wan laef we i mekem olgeta oli harem gud mo oli glad. Hemia nao wan laef tede we i beswan. Olgeta ya oli lanem ol fasin mo ol tijing we i givhan long olgeta naoia, mo bambae i givhan long olgeta long niufala wol tu. I no longtaem ol man blong Jehova bambae oli mekem ol wok we bambae oli harem gud long hem evri dei. I gud yumi gohed blong tingbaot olgeta ya we oli mekem wok blong God fultaem. Yumi tingbaot ‘fasin blong olgeta blong soemaot bilif,’ mo fasin blong olgeta we i ‘soemaot we oli lavem God tumas.’—1 Tesalonaeka 1:3.