1. ?Wanem tingting blong Jehova long wok blong hem? ?Taswe hem i mekem wanem?

JEHOVA i laekem wok blong hem. (Sam 135:6; Jon 5:17) Hem i wantem tu se ol enjel mo ol man oli laekem wok blong olgeta. Taswe hem i givim wok long olgeta we oli save harem gud long hem. Taem Jehova i mekem evri samting, fasbon Pikinini blong hem i wok wetem hem. (Ridim Kolosi 1:15, 16.) Baebol i talem se bifo we Jisas i kam long wol, hem i stap wetem God long heven, mo hem i “nambawan man blong wok” blong God.—Prov. 8:30, NW.

2. ?Yumi save olsem wanem se God i stap givim impoten wok long ol enjel?

² Stat long Jenesis go kasem Revelesen, Baebol i soemaot se Jehova i stap givim wok long ol enjel. Buk blong Jenesis i talem se, taem Adam mo Iv tufala i mekem sin mo tufala i aot long Paradaes, God “i putum ol jerubim oli stap gad long gudfala ples ya long Iden, long saed i go long is. Mo hem i putum wan longfala naef blong faet i stap long ples ya tu, blong i gad long hem. Naef ya, faea i stap laet long hem, mo hem nomo i stap saksakem hem i go olbaot. Hae God i mekem olsem blong blokem rod, blong ol man bambae oli no save go klosap long tri ya we frut blong hem i save givim laef.” (Jen. 3:24) Mo tu, buk  blong Revelesen i talem se Jehova ‘i sanem enjel blong hem, blong i soemaot long ol man blong hem ol samting we bambae oli kamtru i no longtaem.’—Rev. 22:6.

3. Taem Jisas i stap long wol, ?hem i folem wanem fasin blong Papa blong hem?

³ Taem Jisas i stap long wol, hem i glad blong mekem wok we Jehova i givim long hem. Mo tu, hem i folem fasin blong Papa blong hem blong givim wok long narafala. Taswe, hem i givim wok long ol disaepol blong hem. Hem i mekem olgeta oli glad long wok ya, taem hem i talem se: “Tru mi talem long yufala. Man we i bilif long mi, hem bambae i save mekem ol wok ya we mi mi stap mekem. Yes, hem bambae i save mekem plante wok moa i winim ol wok ya we mi mi mekem, from we bambae mi mi go long Papa blong mi.” (Jon 14:12) Jisas i givhan long ol disaepol blong hem blong oli luksave se oli mas wok hareap, i se: “Taem delaet i stap yet, yumi mas mekem ol wok blong God we hem i sanem mi mi kam. Bambae tudak i kam, we man i no save wok.”—Jon 9:4.

4-6. (1) ?From wanem yumi glad se Noa mo Moses tufala i mekem stret olsem Jehova i talem? (2) ?Wok we God i givim, i mekem wanem tufala samting?

⁴ Bifo we Jisas i kam long wol, Jehova i givim gudfala wok long ol man. Adam mo Iv tufala i no finisim wok blong tufala, be plante man oli finisim wok we God i givim long olgeta. (Jen. 1:28) Jehova i talem long Noa blong i bildim wan bigfala sip. Olsemia, Noa wetem ol famle blong hem oli save stap sef taem bigfala wota i ron. Noa i mekem evri samting stret olsem Jehova i talem. Tede yumi laef from we Noa i folem gud ol tok blong Jehova.—Jen. 6:14-16, 22; 2 Pita 2:5.

⁵ Jehova i talem long Moses olsem wanem blong wokem haos tapolen mo olsem wanem blong givim wok long ol pris. Moses i mekem evri samting stret olsem Jehova i talem. (Eks. 39:32; 40:12-16) ?Yumi lanem wanem long hadwok blong Moses mo fasin blong hem blong obei long Jehova? Aposol Pol i eksplenem se, haos tapolen mo ol pris oli pija blong “ol gudgudfala samting, we bambae i kamtru.”—Hib. 9:1-5, 9; 10:1.

⁶ Taem stamba tingting blong God i stap kamtru, hem i givim defdefren wok long ol man blong hem. Nating se wok blong olgeta i jenis, be oltaem wok ya i leftemap nem blong Jehova mo i givhan long ol man. Sem mak long wok we Jisas i mekem bifo we hem i kam long wol mo taem hem i stap long wol. (Jon 4:34; 17:4) Tede tu, taem yumi glad blong mekem wok we Jehova i givim long yumi, hemia i leftemap nem blong hem. (Mat. 5:16; ridim 1 Korin 15:58.) ?Wok ya i leftemap nem blong hem olsem wanem?

7, 8. (1) Yu tokbaot wok we ol Kristin tede oli gat janis blong mekem. (2) ?Yumi mekem wanem, taem ogenaesesen i askem long yumi blong yumi go long narafala ples no jenisim wok blong yumi?

⁷ Yu traem tingbaot: Jehova i singaot ol sinman blong oli joen wetem hem blong mekem wok. !Hemia wan bigfala ona! (1 Kor. 3:9) Olsem Noa mo Moses bifo, sam Kristin tede oli gat janis blong joen long wok blong bildim haos. Samfala oli wokem ol Haos Asembli, ol Haos Kingdom, mo ol branj ofis. Sam oli wokem gud bakegen  Haos Kingdom blong olgeta, sam narafala oli stap givhan blong bildim hedkwota long Warwick, New York. !Nating se yu joen long wanem wok, yu mas tinghae long janis ya! (Yu luk pija long stat blong stadi.) Olgeta wok ya oli tabu. I tru, sam Kristin nomo oli save mekem wok ya blong bildim ol haos, be yumi evriwan i save joen long wok blong prij. Wok ya i leftemap nem blong Jehova mo i givhan long ol man. (Wok 13:47-49) Ogenaesesen blong Jehova i lukaot long wok ya blong prij. Taswe, samtaem oli askem long yumi blong yumi go long narafala ples no yumi jenisim wok we yumi stap mekem.

⁸ Ol man blong Jehova oli glad blong folem samting we hem i talem. (Ridim Hibrus 13:7, 17.) Maet yumi no kasem save fulwan from wanem oli jenisim wok blong yumi, no from wanem yumi mas muv i go long narafala ples. Be yumi glad blong obei long Jehova, from we yumi save se hem nao i mekem ol jenis ya, mo bambae gudfala frut i kamaot from.

9. ?Ol elda oli soemaot wanem gudfala eksampol long kongregesen?

⁹ Taem ol elda oli lidim gud kongregesen, oli soemaot se oli glad tumas blong mekem samting we Jehova i wantem. (2 Kor. 1:24; 1 Tes. 5:12, 13) Ol elda oli wok had, oli folem advaes, mo oli kwik blong lanem ol niufala rod blong prij. Oli luk se gudfala frut i kamaot taem oli folem ol niufala rod ya, nating se maet fastaem oli ting se i no save wok gud. Hemia ol rod olsem, yusum telefon blong prij, prij long ol sip long wof, mo prij long pablik ples. Long wan ples long Jemani, 4 paenia oli mekem tingting blong olgeta i strong blong prij long ol stoa. Wan long olgeta, nem blong hem Michael, i talem se oli fraet from we oli no moa mekem wok ya plante yia. Hem i gohed se: “Ating Jehova i luksave samting ya, from we hem i mekem se mifala i gat wan gudfala taem long wok blong prij we mifala i no save fogetem. !Mifala i glad tumas we mifala i folem advaes long Kingdom Wok Blong Yumi, mo mifala i trastem Jehova blong i givhan long mifala!” ?Olsem wanem? ?Yu yu wantem tumas blong traem ol niufala rod ya blong prij?

10. ?Wanem sam jenis we ogenaesesen blong Jehova i mekem i no longtaem?

¹⁰ Samtaem i gat jenis long ol Betel tu. I no longtaem i pas, oli klosem sam smol branj ofis, mo oli muvum ol wok we oli mekem long ol ofis ya i go long ol bigfala branj ofis. Hemia i min se olgeta we oli wok long ol branj ofis ya oli mas mekem sam jenis. Samtaem i no isi blong mekem jenis olsem, be biaen ol brata oli luk se plan ya i wok gud. (Pri. 7:8) !Oli glad blong wok wetem  ogenaesesen blong Jehova tede, mo blong obei long ol jenis we hem i stap mekem!

11-13. ?Wanem ol jenis we ol brata mo sista long sam Betel oli mas mekem?

¹¹ Yumi save lanem plante samting long ol brata mo sista ya we oli mekem ol jenis ya. Yu traem tingbaot wan brata mo woman blong hem we tufala i wok long wan smol Betel, nao oli askem long tufala blong tufala i go long Meksiko. Namba blong ol brata mo sista we oli stap long Betel long Meksiko, i samting olsem 30 taem antap long namba we i stap long narafala smol Betel. Brata ya we nem blong Rogelio, i talem se: “I had blong lego ol famle mo ol fren.” Oli askem long wan narafala brata tu blong i muv i go long Meksiko, nem blong hem Juan. Brata ya i talem se laef blong hem i jenis bigwan, i olsem we hem i statem laef blong hem bakegen. Hem i gohed se: “Mi mas faenem ol niufala fren, mi mas lan long ol niufala kastom, mo mi mas traehad blong kasem save long tingting blong ol manples.”

¹² Taem oli klosem sam Betel long Yurop, oli askem long plante brata mo sista blong oli go wok long branj ofis long Jemani. Olgeta ya tu oli fesem hadtaem, from we i no isi nating blong oli livim kantri blong olgeta. Samfala we oli aot long Swiselan, oli harem nogud blong lego ol naes ples antap long ol bigbigfala hil long kantri ya. Mo samfala we oli aot long Ostria, oli sore se oli no moa stap long smol Betel ya we i no gat plante man long hem.

¹³ Yes, ol brata mo sista we oli muv i go long wan narafala Betel, oli mekem plante jenis. Oli mas lan long wan niufala ples, mo long ol niufala fren we oli wok wetem olgeta, mo maet oli mas lanem wan niufala wok tu. Oli joen long wan niufala kongregesen, oli prij long niufala teritori, mo maet oli mas lanem wan narafala lanwis. Ol jenis ya oli no isi, be olgeta ya oli glad blong mekem. ?From wanem? Bambae yumi ridim toktok blong sam long olgeta.

14, 15. (1) ?Plante brata mo sista oli talem wanem blong soemaot se oli tinghae long janis blong wok wetem Jehova? (2) ?I gud yumi folem wanem fasin blong olgeta?

¹⁴ Grethel i talem se: “Mi mi glad blong go long narafala ples from we hem i wan rod blong soemaot long Jehova se mi lavem hem oltaem, i no long taem ya nomo we mi stap long kantri blong mi, mo long haos we mi lan long hem, mo long wok we mi save gud.” Dayska i talem se: “Taem mi mi tingbaot se Jehova nao i askem long mi blong mi jenisim ples, mi glad blong go.” Andre mo Gabriela i gat sem tingting, tufala i talem se: “Mitufala i luk se hemia wan janis blong lego ol samting we mitufala nomo i wantem, blong mekem wok blong Jehova.” Tufala i luksave se taem ogenaesesen blong Jehova i mekem sam jenis, i moa gud yumi glad blong folem olgeta i bitim we yumi traem mekem eskius.

¹⁵ Oli askem long sam brata mo sista we oli bin wok long ol branj ofis we oli klosem, blong oli mekem wok blong paenia. Samting ya i hapen long trifala Betel long Denmak, Nowei, mo Swiden, taem trifala i joen i kam branj blong Skandinavia.  Florian mo woman blong hem Anja, tufala i talem se: “Mitufala i luk se bambae mitufala i lanem plante samting long niufala wok ya. Long tingting blong mitufala, i nambawan we Jehova i wantem yusum mitufala, nomata se weples. !Mitufala i harem se hemia i wan bigfala blesing!” I tru, bighaf blong yumi i no nid blong mekem ol jenis olsem ol brata mo sista ya. Nating se i olsem, yumi save folem gudfala fasin blong olgeta blong putum wok blong Kingdom fastaem long ol narafala samting. (Aes. 6:8) Yumi save se oltaem Jehova bambae i blesem olgeta we oli tinghae long janis blong wok wetem hem, nomata se weples.

16. (1) ?Galesia 6:4 i givim wanem advaes? (2) ?Wanem nambawan blesing we yumi evriwan i gat?

¹⁶ Yumi ol sinman, oltaem yumi stap skelem wok blong yumi wetem wok blong narafala. Be tok blong God i talem se yumi no mas mekem olsem. (Ridim Galesia 6:4.) I no yumi evriwan we i save wok olsem elda, paenia, misinari, no wok long Betel. I tru, i wan bigfala blesing blong mekem ol wok ya. Be yumi no mas fogetem nambawan blesing we yumi evriwan i gat, hemia blong wok wetem Jehova blong talemaot gud nius. !Yumi mas tinghae long janis ya!

17. Long rabis wol ya, ?laef blong yumi i olsem wanem? ?From wanem yumi no mas harem nogud?

¹⁷ Long rabis wol ya, maet yumi no save mekem wok blong Jehova olsem yumi wantem. Maet i gat sam samting long laef blong yumi we oli blokem yumi, olsem wok long famle, no sik, no narafala samting olsem. Be yumi no mas harem nogud. Yumi save tekem evri janis blong talemaot nem blong God mo Kingdom blong hem, nomata wanem problem yumi gat. Samting  we i impoten, se yumi mekem bes blong yumi. Mo yumi prea se bambae Jehova i givhan long olgeta we oli naf blong mekem moa. !Yumi no mas fogetem se, Jehova i tinghae long evriwan we oli leftemap nem blong hem!

18. ?Yumi stap wet long wanem samting? ?Be yumi gat wanem nambawan janis naoia?

¹⁸ Nating se yumi sinman, Jehova i letem yumi blong yumi wok wetem hem. !Long ol las dei ya, i nambawan tumas blong gat janis ya! Yumi stap wet nomo long “laef ya we i prapa wan.” Long taem ya, bambae yumi harem gud blong mekem ol samting we yumi no naf blong mekem naoia. Long niufala wol ya we i klosap, Jehova bambae i givim bigfala blesing ya long yumi, hemia laef olwe long glad mo pis.—1 Tim. 6:18, 19.

19. ?Wanem nambawan blesing we Jehova i promes blong givim long fiuja?

¹⁹ I no longtaem, niufala wol we God i promes blong mekem, bambae i kamtru. Yumi save tingbaot tok we Moses i talem long ol man Isrel taem oli rere blong go insaed long Promes Lan, i se: ‘Jehova bambae i mekem we yufala i stap gud, i gat gudfala laef, mo bambae yufala i gat plante samting.’ (Dut. 30:9) Afta long Amagedon, Jehova bambae i givim wol ya long olgeta we oli stap wok wetem hem, olsem we hem i talem finis. !Long taem ya, bambae yumi gat wan niufala wok bakegen, hemia blong mekem wol ya i kam wan naesfala paradaes!