1, 2. Nomata se yumi yangfala no yumi olfala, ?Jehova i wantem se yumi evriwan i mekem wanem?

OL YANGFALA, yufala i mas save se yufala i wan impoten haf blong ogenaesesen blong Jehova long wol. Long plante kantri, bighaf blong olgeta we oli stap baptaes, oli yangfala. !I gud tumas blong luk fulap yangfala oli mekem desisen ya blong wosipim Jehova!

² Sipos yu wan yangfala, ating yu harem gud blong joen wetem ol narafala yangfala. I tru, yumi laekem blong joen wetem ol fren we oli gat sem yia olsem yumi. Hemia i stret, be Jehova i wantem se yumi evriwan i joen wanples blong wosipim hem. Hem i wantem se olgeta man blong hem oli joen gud, nomata se oli olfala no oli yangfala, no oli kamaot long wanem ples. Aposol Pol i talem se God i wantem “sevem olgeta man, mo i wantem we olgeta man bambae oli save trutok blong hem.” (1 Timoti 2:3, 4) Revelesen 7:9 i talem se olgeta we oli wosipim God bambae oli kamaot long “olgeta kala, mo long olgeta kantri, mo long olgeta laen, mo long olgeta lanwis.”

3, 4. (1) ?Plante yangfala tede oli gat wanem fasin? (2) Long Efesas 4:25, ?Pol i talem se kongregesen i olsem wanem?

 ³ Ol yangfala we oli wosipim Jehova oli defren olgeta long ol yangfala long wol. Plante yangfala we oli no wosipim Jehova oli tingbaot olgeta nomo mo samting we olgeta oli wantem. Sam man we oli stadi long bisnes ya, oli talem se fasin ya i bigwan moa long ol yangfala tede. Ol toktok blong olgeta mo klos blong olgeta oli soemaot se oli no gat respek long ol narafala, antap moa, long ol olfala.

⁴ Fasin ya we man i tingbaot hem wan nomo i stap long evri ples. From samting ya, ol yangfala we oli wantem mekem Jehova i glad, oli mas wok had blong blokem fasin ya. Pol i givim woning long ol fas Kristin, se olgeta we oli folem fasin ya, “oli stap obei long Setan, we hem i jif blong ol devel, we oli stap olbaot long wol.” (Ridim Efesas 2:1-3.) I gud tumas blong luk ol yangfala long kongregesen we oli blokem fasin ya. Oli wantem joen gud wetem ol Kristin brata mo sista blong olgeta, blong mekem wok blong Jehova. Oli kasem save se kongregesen i olsem wan bodi we i gat plante haf blong hem, mo evriwan oli joen gud blong mekem wok. Pol i talem se, “yumi evriwan i olsem ol haf blong wan bodi nomo.” (Efesas 4:25) Taem yumi stap kam klosap moa long en blong rabis wol ya, i impoten moa blong joen gud wetem ol brata mo sista. Bambae yumi tokbaot sam stori long Baebol we oli soemaot from wanem yumi mas fasgud long yumi.

5, 6. ?Yumi lanem wanem long famle blong Lot, long saed blong fasin blong joen gud?

⁵ Long taem bifo, ol man blong Jehova oli pastru long sam bigfala trabol. Taem oli joen gud mo oli givgivhan long olgeta, Jehova i lukaot gud long olgeta. Yumi evriwan, ol yangfala mo ol olfala, yumi save lanem samting long ol stori ya long Baebol. Fastaem bambae yumi tokbaot Lot.

⁶ Lot mo famle blong hem oli fesem wan bigfala trabol. Jehova i rere blong spolem taon ya we oli stap long hem, hemia Sodom. Hem i sanem tufala enjel blong givim woning long Lot, se oli mas aot long taon ya, oli mas ronwe i go antap long ol hil. Tufala i talem se: “!Yufala i resis! !Sipos no, bambae yufala i lus ya!” (Jenesis 19:12-22) Lot mo tufala gel blong hem, trifala i obei. Sore tumas, ol narafala long famle blong Lot oli no obei. Lot i talem long tufala  man we tufala i blokem tufala gel blong hem, se tufala tu i mas aot. Be tufala i ting se Lot i stap “mekem trik nomo long tufala.” Tufala i no lesin long woning ya, ale tufala i ded taem Jehova i spolem Sodom. (Jenesis 19:14) Lot wetem tufala gel blong hem nomo oli laef, from we oli obei mo oli fasgud long olgeta.

7. ?Jehova i givhan olsem wanem long olgeta we oli aot long Ijip olsem wan grup nomo?

⁷ Yumi save tingbaot ol man Isrel tu. Taem oli aot long Ijip, oli no seraot long ol smosmol grup, we olgeta nomo oli jusum rod blong olgeta blong go long Promes Lan. Be oli wokbaot olsem wan grup nomo we i joen gud. Taem Jehova i mekem solwota blong Red Si i seraot, Moses i no wokbaot i go hem wan, mo i no tekem sam man nomo oli go wetem hem. Ful neson i wokbaot wetem Moses, mo Jehova i lukaot gud long olgeta. (Eksodas 14:21, 22, 29, 30) Plante we oli no man Isrel, olgeta tu oli aot long Ijip, from we oli wantem wosipim Jehova. Olgeta evriwan oli wokbaot olsem wan grup nomo we oli fas gud long olgeta. (Eksodas 12:38) I krangke nomo sipos wan smol grup, maet ol yangfala, oli bin wokbaot olgeta nomo long rod we oli ting se i beswan. Olgeta we oli folem prapa tingting blong olgeta, Jehova i no sevem olgeta.—1 Korin 10:1.

8. Long taem blong Jehosafat, ?ol man blong God oli joen gud olsem wanem?

⁸ Long taem blong King Jehosafat, wan bigfala ami i kam blong faet agensem ol man blong God. (2 Kronikel 20:1, 2) ?Ol man Isrel oli mekem wanem taem ami ya i raonem olgeta? Oli prea long Jehova blong i lidim olgeta, mo oli trastem hem. (Ridim 2 Kronikel 20:3, 4.) Oli no traem winim trabol ya olgeta wanwan, folem rod we oli ting se i stret, be oli joen olsem wan grup. Baebol i talem se: “Olgeta man Juda wetem ol woman mo ol pikinini blong olgeta oli stap stanap long fran blong haos blong Hae God.” (2 Kronikel 20:13) Ful neson ya, ol yangfala mo ol olfala tu, olgeta evriwan oli trastem Jehova mo oli mekem samting we hem i talem. Oli joen gud olsem wan grup nomo, nao Jehova i sevem olgeta. (2 Kronikel 20:20-27) Stori ya i soemaot olsem wanem ol man blong God oli save winim trabol taem oli joen gud.

9. ?Ol fas Kristin oli mekem wanem fasin we yumi save folem?

⁹ Ol fas Kristin tu oli gat pis mo oli joen gud olsem wan grup blong wosipim Jehova. Ol Kristin we oli man Isrel mo olgeta we oli no man Isrel, olgeta evriwan oli folem tijing blong ol aposol. Oli joen wanples blong storian, mo blong kakae, mo blong prea. (Ol Wok 2:42) Taem ol man oli ronem mo kilim olgeta, oli no go wanwan, be oli joen olsem wan grup nomo. Long taem ya nao, oli nidim olgeta moa. (Ol Wok 4:23, 24) Long sem fasin, taem ol man oli ronem yumi mo kilim yumi, yumi mas joen gud olsem wan grup nomo we yumi givgivhan long yumi.

10. ?Wetaem bambae yumi nidim moa blong joen gud?

¹⁰ I no longtaem, bambae i gat wan trabol long wol ya we i bigwan moa i bitim ol narafala trabol bifo. Profet Joel i talem se: “Dei ya bambae i gat bigfala klaod, we i blak we i blak, mo olgeta ples bambae i tudak olgeta.” (Joel 2:1, 2; Sefanaea 1:14) Long taem ya, bambae yumi nidim moa blong joen gud i bitim ol narafala taem. Yu traem tingbaot tok ya blong Jisas se: “Sipos ol man blong wan jif oli seraot, nao haf i agens long narafala haf, ol wok blong jif ya i mas foldaon.”—Matiu 12:25.

11. ?Ol Sam 122:3, 4 i tijim ol man blong God long wanem? (Yu luk pija long stat blong stadi.)

 ¹¹ ?Fasin blong yumi blong joen gud i mas strong olsem wanem? Yu traem tingbaot ol haos long Jerusalem bifo. Oli wokem ol haos ya we oli joejoenem olgeta. Taswe buk blong Ol Sam i talem se ‘olgeta haf blong taon ya oli stap joen gud blong mekem wan gudfala taon.’ Ol man oli harem se oli sef, from we oli stap kloklosap long olgeta. I isi moa blong oli givgivhan long olgeta, mo blong oli lukaot gud long olgeta. Maet from samting ya nao, man blong raetem Sam ya i tingbaot se ol haos ya oli olsem ol defdefren laen blong Isrel we oli stap joen gud blong wosipim Jehova. (Ridim Ol Sam 122:3, 4.) * I impoten tumas we ol man blong Jehova oli “stap joen gud” naoia, mo long hadtaem we bambae yumi gotru long hem long fiuja.

12. Taem Gogo bambae i agensem ol man blong Jehova, ?yumi mas mekem wanem blong stap laef?

¹² ?From wanem i impoten moa we yumi joen gud long fiuja? Profet tok blong Esikel japta 38 i talem se, ‘Gogo blong kantri ya Magog’ bambae i girap agensem ol man blong Jehova. Long taem ya, yumi no mas letem wan samting i seraotem yumi. Yumi no mas ting se wol blong Setan bambae i protektem yumi. Nogat. Yumi mas fas gud long ol Kristin brata mo sista blong yumi. I tru, blong stap laef i no naf we yumi joen olsem wan grup nomo. Yumi wanwan i mas trastem Jehova mo yumi mas obei long hem. Nao Jehova mo Jisas bambae tufala i lukaot gud long yumi taem Gogo i agensem yumi, go kasem we yumi gotru long niufala wol. (Joel 2:32; Matiu 28:20) Yumi mas joen gud olsem wan grup. Jehova i no save sevem olgeta we oli folem prapa tingting blong olgeta nomo.—Maeka 2:12.

13. ?Ol yangfala oli save lanem wanem from ol samting we yumi tokbaot finis?

¹³ Ol yangfala, ?yufala i luksave from wanem i waes blong stap joen gud wetem ol brata mo sista? Yufala i mas agensem tingting ya blong wantem joen nomo wetem ol narafala yangfala, no blong wantem stap longwe long ol man. I no longtaem, bambae yumi nidim yumi moa, yumi evriwan, ol yangfala mo ol olfala tu. Naoia nomo, yufala i mas fren gud wetem olgeta brata mo sista, mo yufala i mas harem gud blong joen wetem olgeta blong wosipim Jehova. !Sipos yufala i mekem olsem, Jehova bambae i sevem yufala!

14, 15. (1) ?From wanem Jehova i stap trenem yumi blong yumi joen gud? (2) ?Wanem advaes blong Jehova we i save givhan long yumi?

¹⁴ Jehova i stap givhan long yumi blong yumi wok wanples, olsem we “solda blong wan i joen long solda blong narawan.” (Sefanaea 3:8, 9, NW) Hem i stap trenem yumi from laef long fiuja. Long taem ya, bambae hem i mekem ‘olgeta samting long heven mo long wol oli kam joen long Kraes.’ (Ridim Efesas 1:9, 10.) Stamba tingting blong Jehova i blong mekem olgeta long heven mo long wol oli joen olsem wan famle nomo blong wosipim hem. Mo yumi  save gud se stamba tingting ya blong Jehova bambae i kamtru. Ol yangfala, yufala i save stap long famle ya gogo i no save finis. Sipos yufala i wantem olsem, yufala i mas joen gud wetem ogenaesesen blong Jehova.

¹⁵ Jehova i stap trenem yumi naoia blong yumi joen gud. Olsem nao, long niufala wol, bambae yumi save laef wanples long pis. Jehova i gat longfala tingting, i stap tijim yumi sloslo, se yumi mas “lukaot gud blong givhan long ol narafala,” ‘yumi mas lavlavem yumi,’ ‘yumi mas taltalem ol tok long yumi, blong mekem tingting blong yumi i strong,’ mo ‘yumi mas givgivhan long yumi.’ (1 Korin 12:25; Rom 12:10; 1 Tesalonaeka 4:18; 5:11) Samtaem i no isi blong joen gud, from we yumi evriwan i sinman. Jehova i save samting ya. Taswe hem i talem se: “Yufala i mas fofogivim yufala.”—Efesas 4:32.

16, 17. (1) ?From wanem yumi gat ol miting? (2) ?Eksampol blong Jisas i tijim ol yangfala long wanem samting?

¹⁶ Wan narafala rod we Jehova i yusum blong trenem yumi blong fas gud long yumi, hemia ol miting. Hibrus 10:24, 25 i talem wan risen blong ol miting, hemia se yumi leftemap tingting blong yumi blong mekem ol gudfala fasin. Taem yumi stap kam klosap moa long dei blong Jehova, yumi nidim moa ol miting.

¹⁷ Jisas i soemaot gudfala eksampol long yumi. Hem i laekem blong joen wanples wetem ol man blong Jehova. Taem hem i gat 12 yia, hem i folem papa mo mama blong hem oli go long wan miting long tempol. Afta long miting ya, tufala i no save faenem hem. ?Olsem wanem? ?Jisas i go lukaot ol yangfala blong storian wetem olgeta? Nogat. Taem papa mo mama blong hem i faenem hem, hem i stap wetem ol tija long tempol, i stap storian long Baebol.—Luk 2:45-47.

18. ?Olsem wanem prea i save mekem yumi joen gud moa?

¹⁸ Blong joen gud moa, yumi mas prea from ol brata blong yumi. Yumi askem long Jehova blong i givhan long olgeta long sam spesel rod. Taem yumi prea olsem, yumi luksave se yumi lavem olgeta moa. I impoten tumas we yumi lavem ol brata mo sista, mo yumi toktok gud long olgeta long ol miting blong leftemap tingting blong olgeta, mo yumi prea from olgeta.  Ol yangfala, ?yufala i traem ol samting ya finis? Sipos yufala i mekem olsem, bambae yufala i fren moa wetem ol narafala long kongregesen. Blong gotru long en blong rabis wol ya, yumi mas fren gud wetem ol brata mo sista, be i no wetem wol blong Setan.

19-21. (1) From we “yumi evriwan i stap joen long yumi,” ?yumi mekem wanem long taem blong disasta? Yu talem sam stori. (2) ?Ol stori ya oli tijim yu long wanem?

¹⁹ I gat plante samting we oli soemaot se yumi ol man blong Jehova, “yumi evriwan i stap joen long yumi.” (Rom 12:5) Taem i gat wan disasta we i mekem sam brata blong yumi oli trabol, yumi sore long olgeta, mo yumi wantem givhan long olgeta. Long Disemba 2011, wan hariken i kilim aelan blong Mindanao long Filipin. Long wan naet nomo, wota i spolem bitim 40,000 haos, mo plante long ol haos ya oli blong ol brata. Branj ofis i talem se komiti blong givhan long taem blong disasta i no kamtru yet, be “ol Kristin brata long ol narafala ples oli sanem plante samting i kam finis.”

²⁰ Long Japan, graon i seksek bigwan long is blong kantri, mo i gat wan taetel wef we i mekem bigfala trabol long plante brata blong yumi. Plante oli lusum evri samting. Sista Yoshiko we i stap 40 kilometa longwe long Haos Kingdom, i lusum haos blong hem. Hem i talem se: “Mifala i sapraes taem mifala i faenemaot se, long dei afta we graon i seksek, eria elda wetem wan narafala brata, tufala i kam blong traem faenem mifala.” Yoshiko i smael mo i gohed se: “Mifala i harem gud tumas we kongregesen i lukaot gud long mifala, i givim evri samting we mifala i nidim blong stap strong long bilif. Antap long hemia, mifala i kasem ol kot, ol sus, ol basket, mo ol klos.” Wan brata long komiti blong givhan long taem blong disasta, i talem se: “Ol brata long evri ples long Japan oli wok olsem wan tim nomo blong givhan long olgeta we oli kasem trabol. Sam brata blong Amerika tu oli mekem longfala trip blong kam givhan. Taem narafala i askem long olgeta from wanem oli mekem olsem, oli talem se: ‘Mifala i wan nomo wetem ol brata blong mifala long Japan, mo oli nidim mifala blong givhan long olgeta.’” ?Olsem wanem? ?Yu yu harem gud blong stap long wan ogenaesesen we ol man blong hem oli lavlavem olgeta tumas? Sipos yes, yu traem tingbaot olsem wanem Jehova i glad taem hem i luk we yumi joen gud olsem.

²¹ Sipos yumi givgivhan long yumi naoia, bambae yumi rere blong gotru long ol trabol long fiuja. Nating sipos yumi no moa save toktok long ol brata long ol narafala ples long wol, be bambae yumi gohed nomo blong joen gud wetem ol brata long ples blong yumi. Afta we wan bigfala hariken i kilim Japan, wan sista we nem blong hem Fumiko, i talem se: “En blong rabis wol ya i klosap tumas. Yumi mas gohed blong givhan long ol brata mo sista blong yumi. Long semtaem, yumi tingbaot se long fiuja bambae i no moa gat disasta.”

22. Sipos yumi joen gud naoia, ?hemia bambae i givhan long yumi olsem wanem long fiuja?

²² Yu mas rere naoia from dei blong Jehova. Yu mas mekem evri samting we yu yu naf blong mekem, blong joen gud wetem ol brata mo sista. Taem Jehova i spolem rabis wol ya blong Setan, bambae hem i sevem ol man blong hem olsem hem i mekem bifo. (Aesea 52:9, 10) Nating se yu wan yangfala no yu wan olfala, be yu mas joen gud oltaem wetem ol man blong God, nao God bambae i sevem yu. Long nekis stadi, bambae yumi tokbaot from wanem yumi mas glad long nambawan presen we yumi kasem finis.