LONG 28 Eprel 2013, brata Anthony Morris blong Hed Kampani i givim wan spesel tok long taon ya, Nagoya long Japan. Hem i talemaot wan niufala buk we i kamaot long lanwis blong ol man Japan, we taetel blong hem se The Bible—The Gospel According to Matthew. Bitim 210,000 man we oli joen long miting ya, samfala oli stap long wan defren taon, be oli yusum Intenet blong lukluk video, mo folem program ya. Afta we brata Morris i talemaot niufala buk ya, evriwan oli glad tumas, mo oli klapem han blong olgeta blong longtaem.

Niufala buk ya, i gat 128 pej blong hem, mo oli printim folem wan buk long Baebol ya, New World Translation. Hem i wan spesel buk blong ol man Japan. Brata Morris i eksplenem se, oli wokem buk ya blong givhan long ol man Japan. ?Olsem wanem buk ya i defren? ?From wanem ol man Japan oli nidim buk ya? ?Ol man oli mekem wanem taem oli ridim buk ya?

Plante man oli sapraes long fasin we oli folem blong raetem buk blong Matthew. Long lanwis blong ol man Japan, oli save raetem ol toktok (characters), long fasin we i godaon no oli raetem i go stret. Ol toktok long plante buk mo magasin, mo long ol buk blong yumi, oli raetem ol toktok blong olgeta i go stret nomo. Be long niufala buk ya, oli raetem ol toktok blong hem i godaon, hemia i sem mak long plante niuspepa mo buk we oli kamaot long lanwis blong ol man Japan. Plante man Japan oli faenem se i isi moa blong ridim ol buk no magasin we oli raetem ol toktok blong hem i godaon. Mo tu, fastaem ol taetel oli stap antap long pej blong Baebol, be naoia oli muvum olgeta i go klosap long ol haf, olsem ol smosmol stamba tok. Fasin ya i givhan long ol man we oli ridim blong oli kasem save bigfala poen long haf we oli ridim.

Taem ol brata mo sista long Japan oli kasem buk blong Matthew, oli no wet, oli ridim wantaem nomo. Wan sista we i gat 80 yia, i talem se: “Mi mi ridim buk blong Matiu plante taem finis, be naoia taem mi ridim buk ya bakegen long fasin we oli raetem ol toktok i godaon, mi jes kasemsave long toktok blong Jisas we hem i mekem antap long hil.” Wan yangfala sista i talem se: “Mi mi ridim ful buk blong Matthew wantaem nomo. Mi mi lan blong ridim buk we ol toktok blong hem i go stret nomo, be plante man Japan oli laekem moa blong ridim buk we ol toktok blong hem oli godaon.”

?From wanem buk ya, i wok gud long teritori blong ol man Japan? Nating se plante man Japan oli no gat plante save long Baebol, be oli glad nomo blong ridim. Plante long olgeta oli neva luk wan Baebol, be naoia oli gat janis blong holem wan haf blong Baebol mo oli save ridim

?From wanem oli jusum buk blong Matiu? From we long Japan, plante man taem oli harem tok ya “Baebol” oli tingbaot Jisas Kraes. Taswe oli jusum buk ya, from we hem i tokbaot famle laen blong Jisas, mo taem we hem i bon, ol Bigfala toktok we Jisas i mekem antap long Hil, mo ol profet tok we hem i talem. Hemia sam samting we plante man Japan oli intres long hem.

 Ol pablisa long Japan oli gat strong tingting blong seremaot niufala buk ya long ol haos wanwan, mo long ol visit blong olgeta. Wan sista i talem se: “Naoia mi mi gat moa janis blong seremaot Tok blong God long ol man long teritori blong mifala. Mi mi seremaot wan kopi blong buk ya long aftenun, afta we buk ya i kamaot.”

?Ol pablisa oli mekem olsem wanem blong seremaot buk ya? Plante man Japan oli save ol toktok olsem, “get ya we i smol,” “sakem ol gudgudfala samting i go long ol pig,” mo “i nogud yufala i stap tingting tumas from ol samting blong tumora.” (Matiu 6:34; 7:6, 13) Olgeta oli sapraes blong luk se hemia ol tok blong Jisas Kraes. Taem oli luk ol tok ya long buk blong Matthew, plante oli talem se: “Mi wantem tumas blong ridim Baebol, nating se mi ridim wantaem nomo.”

Taem ol pablisa oli gobak blong mekem visit long man we oli givim buk ya long hem, oli luk se plante oli ridim fulwan buk ya finis, be samfala oli ridim sam haf nomo. Wan man we i gat 60 yia, i talem long wan pablisa se: “Mi mi ridim buk ya bakegen mo bakegen, mo samting ya i mekem mi harem gud tumas. Plis yu tijim mi long Baebol.”

Ol pablisa oli seremaot buk ya taem oli prij long ol pablik ples tu. Long wok blong prij, wan sista i givim imel adres blong hem long wan woman we i glad blong tekem buk ya. Wan aoa biaen, woman ya i sanem wan imel long sista ya, mo i talem long hem se, hem i ridim wan haf blong buk ya finis, mo hem i wantem blong kasem moa save. Wan wik biaen, woman ya i stat blong stadi Baebol, mo i no longtaem biaen, hem i stat blong kam long miting.

Oli sanem bitim 1,600,000 kopi blong buk ya, i go long defdefren kongregesen long Japan. Evri manis, ol Witnes oli givimaot plante taosen kopi blong buk ya. Fastok blong buk ya i soemaot filing blong ol man we oli wokem buk ya, oli talem se: “Mifala i wantem tumas se taem yu ridim buk ya, bambae buk ya i pulum yu blong wantem save moa long Baebol.”