1, 2. (1) ?Jisas i talemaot wanem samting we bambae i hapen long ol las dei? (2) ?Bambae yumi tokbaot wanem trifala kwestin?

YU TRAEM tingbaot: Jisas i stap sidaon long Hil blong Tri ya Olif, i stap lukluk i godaon long tempol long Jerusalem. Hem i stap wetem fo aposol blong hem, Pita, Andru, Jemes mo Jon. Oli lesin gud long nambawan profet tok we Jisas i stap talemaot. Profet tok ya bambae i kamtru long ol las dei blong rabis wol ya, taem Jisas i rul long Kingdom blong God. Jisas i talem se bambae ‘slef we i stret mo waes’ i wok long nem blong hem long wol ya. Long stret taem, slef ya bambae i givimaot save blong God we i olsem kakae, long ol man blong hem.—Matiu 24:45-47, NW.

² Long sem profet tok ya, Jisas i talemaot parabol blong  ten yang gel. (Ridim Matiu 25:1-13.) Long stadi ya, bambae yumi tokbaot tri kwestin: (1) ?Wanem bigfala tingting long parabol ya? (2) ?Ol tabu Kristin oli folem tingting ya olsem wanem, mo wanem i kamaot from? (3) ?Parabol ya i givhan olsem wanem long yumi wanwan?

3. ?Ol buk blong yumi bifo, oli eksplenem parabol blong ten yang gel olsem wanem? ?Be wanem i save hapen taem yumi traem faenemaot mining blong ol smosmol samting?

³ Long las stadi, yumi lanem se long ol yia we oli pas, slef we i stret mo waes i jenisim fasin blong eksplenem ol stori blong Baebol. Naoia, hem i no moa tingbaot tumas blong faenemaot se ol stori blong Baebol oli pija blong wanem, be hem i tingbaot moa wanem tijing we ol stori ya oli givim. Yumi save tingbaot parabol blong ten yang gel. Bifo, ol buk blong yumi oli talem se ol laet, karsin, mo ol botel, oli pija blong narafala samting. Be taem yumi traem faenemaot mining blong ol smosmol samting ya, yumi save mestem bigfala tingting we i stap. Be i impoten we yumi kasem bigfala tingting.

4. (1) Long parabol ya, ?hu ya man we i jes mared, mo hu ya ol yang gel? (2) ?Olsem wanem yumi save samting ya?

⁴ Bambae yumi tokbaot bigfala tingting long parabol blong ten yang gel. Fastaem yu traem tingbaot ol man long parabol ya. ?Man we i jes mared, hem i hu? Hemia Jisas. Yumi save samting ya, from we bifo finis Jisas i talem se hem nao man we i jes mared. (Luk 5:34, 35) ?Hu ya ol yang gel? Hemia ‘smol kampani’ blong ol tabu Kristin. ?Olsem wanem yumi save samting ya? Yumi save from we long parabol ya, ol yang gel ya oli rerem ol laet blong olgeta, mo oli stap wet long man we i jes mared. Hemia i klosap sem mak long ol tok we Jisas i talem long ol tabu man blong hem, se: ‘Yufala i mas rere, olsem man we i putum klos blong hem, i taetem strap blong hem, mo i laetem laet blong hem finis, i stap rere. Yufala i mas olsem ol man blong wok we oli stap wet long masta blong olgeta we i jes mared, blong i aot long kakae blong mared, i kamhom.’ (Luk 12:32, 35, 36) Mo tu, aposol Pol mo Jon, tufala i talem se ol tabu man blong Jisas oli olsem ol yang gel we oli klin. (2 Korin 11:2; Revelesen 14:4) Taswe, yumi luksave se advaes mo woning long Matiu 25:1-13, i stret long ol tabu man blong Jisas.

5. ?Wetaem ol tabu Kristin oli mas folem advaes blong Jisas long parabol ya?

⁵ ?Wetaem ol tabu Kristin oli mas folem advaes blong Jisas long parabol ya? Long en blong parabol, Jisas i givim ansa, i se: “Man ya we i jes mared i kamtru.” (Matiu 25:10) Folem Wajtaoa blong 15 Julae 2013, Jisas i yusum tok ya  “kamtru” 8 taem long profet tok blong Matiu japta 24 mo 25. Taem hem i talem se bambae hem i “kamtru,” hem i stap tokbaot taem we bambae hem i kamtru blong jajem mo spolem rabis wol ya, long taem blong bigfala trabol. Taswe, parabol ya i stap tokbaot ol las dei, be Jisas bambae i “kamtru” long taem blong bigfala trabol.

6. ?Wanem bigfala tingting long parabol ya?

⁶ ?Wanem bigfala tingting long parabol ya? I gud yumi tingbaot ol vas raonabaot. Long Matiu japta 24, Jisas i tokbaot ‘slef we i stret mo waes.’ Slef ya, hemia wan smol grup blong ol tabu Kristin we oli lidim ol man blong Kraes long ol las dei. Jisas i givim woning long ol man ya se oli mas stanap strong. Long nekis japta, Jisas i talem parabol blong ol ten yang gel blong givim woning long olgeta tabu man blong hem long ol las dei. Bigfala tingting se oli mas “lukaot gud,” blong oli no lusum nambawan janis ya blong laef long heven. (Matiu 25:13) Naoia bambae yumi luk olsem wanem ol tabu Kristin oli obei long woning ya.

7, 8. (1) ?Ol gel we oli waes oli mekem wanem blong stap wekap? (2) ?Ol tabu Kristin oli soemaot olsem wanem se oli rere?

⁷ Long parabol ya, Jisas i makem gud se ol yang gel we oli waes oli defren long olgeta we oli no waes, from we oli stap wekap taem man we i jes mared i kamtru. ?Oli mekem wanem blong stap wekap? Oli rere gud mo oli stap lukaot gud. Ol ten yang gel ya oli mas stap wekap, mo laet blong olgeta i mas laet fulnaet. Ol faef yang gel we oli waes oli rere, from we oli pem karsin finis, be ol gel we oli no waes oli no mekem olsem. ?Olsem wanem long ol tabu Kristin? ?Oli mekem wanem blong rere from taem ya we bambae Jisas i kamtru?

⁸ Ol tabu Kristin oli rere blong wok go kasem en. Oli save se blong mekem wok blong God, oli mas tanem baksaed long ol sas samting blong wol blong Setan. Mo oli rere blong mekem olsem. Oli gat strong tingting blong obei gud long Jehova nomo. Oli no mekem samting ya from we en i klosap, be oli mekem from we oli lavem Jehova mo Pikinini blong hem. Oli holemstrong long Jehova, mo oli no tekem tingting blong wol blong ronem ol sas samting, oli no joen long ol rabis fasin, mo oli no mekem samting we olgeta nomo oli wantem. Ol tabu Kristin ya oli stap saenaot, olsem ol yang gel we oli waes mo oli rere wetem laet blong olgeta. Oli stap wet wetem longfala tingting blong Man we i jes mared i kamtru, nating we i luk olsem se Man ya i tektaem tumas.—Filipae 2:15.

9. (1) ?Jisas i givim woning se wanem samting i save hapen long wan tabu Kristin? (2) ?Ol tabu Kristin oli mekem wanem taem oli harem tok ya, “!Man ya we i jes mared, bambae i kamtru naoia!”? (Yu luk futnot tu.)

⁹ Narafala risen from wanem ol  yangfala gel we oli waes oli rere, hemia from we oli stap lukaot gud. Long parabol ya, i luk olsem se man we i jes mared i tektaem tumas. Taswe ‘ae blong ol ten gel ya i kam hevi, nao oli slip.’ ?Olsem wanem? ?Samting ya i save hapen long wan tabu Kristin tede? Yes i save hapen, sipos hem i letem sam samting i pulum tingting blong hem, nao i no moa rere from taem ya we Kraes bambae i kamtru. Jisas i save se nating we wan man i gat strong tingting, be hem i save letem narafala samting i pulum tingting blong hem, nao i kam slak. From samting ya, ol tabu Kristin oli traehad moa blong lukaot gud. ?Oli mekem samting ya olsem wanem? Long parabol ya, ol ten yang gel evriwan oli harem man we i singaot se, “!Man ya we i jes mared, bambae i kamtru naoia!” Be ol faef yang gel we oli waes, olgeta nomo oli stap lukaot gud go kasem we hem i kamtru. (Matiu 25:5, 6; 26:41) Long sem fasin, long ol las dei ya, ol tabu Kristin oli luksave ol pruf we i soemaot se klosap nao bambae Jisas i kamtru. Hemia i olsem se oli harem man we i singaot se: “!Man ya we i jes mared, bambae i kamtru naoia!” Taem oli luk ol klia pruf ya, oli stap wekap gud mo stanap strong. * Bambae yumi luk lashaf blong parabol ya, we i tokbaot wan spesel taem.

10. Ol gel we oli waes oli no wantem givim karsin, ?samting ya i stanemap wanem kwestin?

¹⁰ Klosap long en blong parabol ya, ol yang gel we oli no waes oli askem karsin long olgeta we oli waes. Be olgeta we oli waes oli no wantem givim. (Ridim Matiu 25:8, 9.) ?Wetaem ol tabu Kristin oli no wantem givhan long man we i trabol? Yumi mas tingbaot taem we parabol ya i stap tokbaot. Man ya we i jes mared, Jisas, bambae hem i kamtru blong jajem ol man klosap long en blong bigfala trabol. Taswe i luk olsem se, long taem ya nao, ol yang gel we oli no waes oli askem karsin long olgeta we oli waes. ?From wanem yumi talem olsem? From we long taem ya, ol tabu Kristin bambae oli kasem las mak blong olgeta.

11. (1) Bifo we bigfala trabol i stat, ?wanem bambae i hapen? (2) Taem ol gel we oli waes oli talem long ol narafala gel blong oli go pem karsin, ?hemia i soemaot wanem?

¹¹ Nao biaen, bifo we bigfala trabol i stat, God bambae i putum las mak long ol tabu Kristin. (Revelesen 7:1-4) Hemia i min se bambae oli go long heven, samting ya i no save jenis. Be bifo long bigfala trabol, ?wanem bambae i hapen long ol tabu Kristin we oli no stap lukaot gud, nao oli no moa holemstrong long Jehova? Jehova bambae i no putum las mak long olgeta. Bifo long taem ya, Jehova i makemaot finis sam narafala Kristin wetem tabu spirit. Taem bigfala trabol i stat mo Bigfala Babilon i lus, maet olgeta ya we oli no waes oli sek. Long taem ya nao, maet oli jes luksave  se oli no rere. ?Wanem bambae i hapen sipos oli askem help long ol narafala? Ansa i stap long parabol. Ol gel we oli waes oli no wantem givim karsin long olgeta we oli no waes. Oli talem long olgeta blong oli go pem. ?Be bambae oli faenem karsin wea “long medel naet” olsem? !Bambae oli no faenem, i let finis!

12. (1) Long bigfala trabol, ?olsem wanem long ol tabu Kristin we oli no holemstrong mo oli no kasem las mak blong God? (2) ?Jisas bambae i talem wanem long olgeta?

¹² Long bigfala trabol, ol gudfala tabu Kristin oli no save givhan long olgeta we oli no waes. !Bambae i let finis! ?Ale wanem panis blong olgeta we oli no waes? Yu traem luk wanem i hapen taem ol gel we oli no waes oli go blong pem karsin: “Man ya we i jes mared i kamtru. Hem i go insaed long haos blong hem, mo ol faef gel ya we oli rere long hem oli go wetem hem, oli joen long kakae blong mared. Nao ol man oli satem doa.” Klosap long en blong bigfala trabol, Jisas bambae i kam wetem bigfala paoa, mo bambae hem i tekem ol gudfala tabu Kristin oli go long heven. (Matiu 24:31; 25:10; Jon 14:1-3; 1 Tesalonaeka 4:17) Maet ol tabu Kristin we oli no holemstrong long God bambae oli talem olsem ol gel we oli no waes se: “!Masta, Masta! !Plis yu letem mifala i kam insaed!” Be doa i sat finis. ?Ale, Jisas bambae i talem wanem long olgeta? Bambae hem i talem sem tok we hem i talem long ol nani, se: “Tru mi talem long yufala, mi mi no save yufala.”—Matiu 7:21-23; 25:11, 12.

13. (1) ?Jisas i stap talem se plante tabu Kristin bambae oli no holemstrong long God? ?From wanem yu ansa olsem? (2) ?Olsem wanem parabol ya i soemaot strong tingting blong Jisas se, ol tabu Kristin oli naf blong kasem praes? (Yu luk pija long stat blong stadi.)

¹³ ?Olsem wanem? ?Jisas i stap talem se plante tabu Kristin bambae oli no holemstrong long God, nao God bambae i jusum sam narafala blong tekem ples blong olgeta? Nogat. Long Matiu japta 24, Jisas i givim woning long slef we i stret mo waes se i no mas kam wan rabis slef. Be hemia i no min se samting ya bambae i hapen. Long sem fasin, parabol blong ten yang gel i wan strong woning. Long parabol ya, faef yang gel oli waes mo faef oli no waes, hemia i soemaot se wanwan tabu Kristin i mas jusum sipos hem i wantem rere mo lukaot gud olsem ol gel we oli waes. Sipos no, bambae hem i no moa holemstrong long God, olsem ol yang gel we oli no waes. Pol i givim wan woning we i klosap sem mak long ol tabu brata mo sista blong hem. (Ridim Hibrus 6:4-9; skelem wetem Dutronome 30:19.) Pol i tok strong long ol Kristin ya. Be hem i soemaot strong tingting tu se bambae oli kasem praes blong olgeta. Long sem fasin, parabol blong ten yang gel i givim woning. Be Jisas i gat strong tingting tu, se ol tabu Kristin wanwan oli naf blong holemstrong mo kasem praes blong olgeta.

14. ?Olsem wanem parabol ya i save givhan long “ol narafala sipsip”?

¹⁴ Parabol blong Jisas i go stret long ol tabu Kristin. ?Be parabol ya i save givhan long “ol narafala sipsip”? (Jon 10:16) !Yes! Bigfala tingting long parabol ya i klia nomo: “Yufala i mas lukaot gud.” Mo long wan narafala taem bakegen Jisas i talem se: “Tok ya we mi talem long yufala, mi stap talem long olgeta man se, ‘Oltaem, yufala i mas lukaot gud.’” (Mak 13:37) Jisas i wantem se olgeta disaepol blong hem oli rere mo oli stap lukaot gud. Oli save folem eksampol blong ol tabu Kristin we oli putum wok blong prij fastaem long ol narafala samting. Taem ol gel we oli no waes oli askem karsin be ol narawan oli no wantem givim, samting ya i tijim yumi se, i stap long yumi wanwan blong yumi holemstrong long God, yumi rere, mo yumi lukaot gud. Narafala man i no save mekem samting ya blong yumi. Yumi wanwan bambae yumi stanap long fes blong Jisas Kraes we i jajem man long stret fasin. Bambae hem i kamtru i no longtaem. !Yumi mas rere!

15. ?Wanem blesing we olgeta man long wol bambae oli kasem from mared blong Kraes?

¹⁵ Olgeta Kristin oli harem gud tumas taem oli tingbaot mared ya long parabol blong Jisas. Afta long faet blong Amagedon, ol tabu Kristin bambae oli mared long Kraes. (Revelesen 19:7-9) Olgeta man long wol bambae oli kasem blesing from mared ya long heven. ?Wanem blesing? Wan gavman we i stret gud olgeta bambae i rul long olgeta man. Nating se yumi stap wet blong laef long heven no long wol, yumi mas gat strong tingting blong rere mo lukaot gud. !Olsem nao, bambae yumi kasem nambawan fiuja we Jehova i rerem blong yumi!