!Yumi Mas Trastem Jehova Oltaem!
“Olgeta. . . . I gud yufala i trastem hem oltaem.” —OL SAM 62:8.
1-3. ?From wanem Pol i gat strong tingting blong trastem Jehova? (Yu luk pija long stat blong stadi ya.)
SIPOS yu yu wan Kristin we yu laef long taem blong ol fas Kristin long Rom, i sua se yu laef long wan taem we i denja tumas. Ol man Rom oli mekem i nogud tumas long ol Kristin. Oli blemem ol Kristin se, olgeta nao oli statem bigfala faea long Rom, mo oli talem se ol Kristin oli ol man we oli no laekem ol narafala man. Ale, oli arestem plante Kristin brata mo sista blong yumi. Samfala ol anamol oli kakae olgeta. Mo sam narafala oli nilim olgeta long pos, we oli laef nomo, mo oli bonem olgeta blong mekem se i gat laet long naet. Evri dei, yu stap tingbaot se maet, wan long ol samting ya i save hapen long yu.
2 Long ol hadtaem ya, aposol Pol i stap long kalabus. Hem i stap tingting se, maet ol Kristin brata bambae oli givhan long hem no nogat, from we hem i tingbaot se i gat wan taem finis we hem i stap long kalabus be i no gat man i givhan long hem. Be Jehova i yusum Masta Jisas blong givhan long Pol. Pol i talem se: “Be Masta blong yumi, hem i stap wetem mi, mo hem i givim paoa long mi.” Yes, Jisas i givim paoa we Pol i nidim. Mo tu, Pol i talem se, Jisas i “tekemaot mi long maot blong laeon.”—2 Timoti 4:16, 17. *
3 Aposol Pol i tingbaot olsem wanem Jehova i bin givhan long hem bifo. Taswe hem i bilif se Jehova bambae i givim paoa we hem i nidim, blong stanap strong long ol trabol we hem i stap fesem naoia mo long fiuja. Hem i sua fulwan long samting ya, nao hem i raetem se: “Masta ya blong yumi, hem bambae i tekemaot mi long han blong olgeta man nogud ya we oli wantem spolem mi.” (2 Timoti 4:18) Pol i lanem se nating sipos ol Kristin brata oli no givhan long hem, long taem we hem i kasem trabol, be oltaem hem i trastem Jehova mo Jisas se bambae tufala i save givhan long hem. Mo hem i sua fulwan long samting ya.
OL JANIS WE YUMI GAT BLONG TRASTEM JEHOVA
4, 5. (1) ?Oltaem hu i save givhan long yu, long taem we yu nidim? (2) ?Yu save mekem wanem blong fren gud moa wetem Jehova?
4 ?Yu yu kasem finis wan problem we i had blong yu winim, mo yu harem se i nogat man blong givhan long yu? Maet yu lusum wok blong yu, no maet yu kasem sam traem long skul. Maet yu sik bigwan, no maet yu kasem sam narafala problem bakegen. Maet yu harem nogud from yu askem sam man blong oli givhan long yu, be oli no mekem. I tru, i gat sam problem we ol man oli no save winim. Sipos i olsem, ?bambae yu mekem wanem? Baebol i talem se, yumi mas ‘trastem Jehova.’ (Ol Proveb 3:5, 6) ?Olsem wanem? ?Yu yu sua se Jehova bambae i givhan long yu? !Yes! Yumi save ridim plante stori long Baebol we oli pulum yumi blong bilif se, Jehova i save givhan long ol man blong hem.
Wan trabol we yumi kasem i olsem wan janis we yumi gat blong trastem Jehova fulwan
5 Yu no mas kros taem narafala i no givim samting we yu askem. Defren olgeta, olsem Pol, yu tingbaot ol traem ya, olsem wan janis we yu gat blong trastem Jehova fulwan. Mo tu, hemia wan janis we yu gat, blong luk olsem wanem Jehova i kea long yu. Taem yu mekem olsem, bambae yu trastem Jehova moa, mo tu bambae yu fren gud moa wetem hem.
YUMI MAS TRASTEM JEHOVA
6. ?From wanem maet i no isi blong yumi trastem Jehova, taem yumi kasem wan problem?
6 Maet yu kasem wan problem we i mekem yu harem nogud tumas. Yu mekem evri samting we yu naf blong mekem blong winim problem ya, mo yu prea long Jehova blong hem i givhan long yu. ?Olsem wanem? ?Naoia tingting blong yu i save stap kwaet, from we yu trastem Jehova se bambae hem i givhan long yu? !Yes, tingting blong yu i save stap kwaet! (Ridim Ol Sam 62:8; 1 Pita 5:7.) Sipos yu wantem fren gud wetem Jehova, i impoten we yu lanem blong trastem hem. Be i no isi blong mekem olsem. ?From wanem? Wan risen hemia se, maet Jehova i no save ansa long prea blong yu kwiktaem.—Ol Sam 13:1, 2; 74:10; 89:46; 90:13; Habakuk 1:2.
Papa blong yumi long heven Jehova, hem i lavem yumi mo hem i save samting we yumi nidim
7. ?From wanem Jehova i no ansa long ol prea blong yumi kwiktaem?
7 ?From wanem Jehova i no ansa long ol prea blong yumi kwiktaem? Baebol i talem se Jehova i papa blong yumi, mo yumi ol pikinini blong hem. (Ol Sam 103:13) Wan papa i no givim evri samting we pikinini blong hem i askem, mo maet hem i no givim long stret taem we pikinini i askem. Hem i save se wan pikinini maet i wantaem samting, be biaen hem i no moa laekem samting ya. Hem i save samting we wan pikinini i nidim, mo hem i save wetaem bambae hem i givim samting ya long pikinini. Sipos papa ya i givim evri samting we pikinini i askem, wantaem nomo bambae hem i kam olsem wokman blong pikinini ya. Papa blong yumi long heven, Jehova, hem i lavem yumi tumas. Hem i Man ya we i wokem yumi, mo hem i gat bigfala waes, hem i save samting we yumi nidim. Mo tu, hem i save wetaem i stret blong givim samting we yumi askem. I moa gud we yumi wet, mo luk olsem wanem Jehova i ansa long ol prea blong yumi.—Skelem wetem Aesea 29:16; 45:9.
8. ?Jehova i promes long yumi blong yumi naf blong mekem wanem?
8 I gud blong tingbaot se, Jehova i save samting we yumi naf blong winim, mo samting we yumi no naf blong winim. (Ol Sam 103:14) Taswe hem i givim paoa we yumi nidim. I tru samtaem yumi harem se yumi no moa save mekem wan samting. Be Jehova i promes long yumi se, sipos i gat plante trabol we oli kam traem yumi, hem bambae i “mekem rod blong yumi,” winim ol trabol ya. (Ridim 1 Korin 10:13.) Yumi glad tumas blong save se, yumi save trastem Jehova se hem i save samting we yumi naf blong winim.
9. ?Yumi mas mekem wanem sipos yumi prea long Jehova blong i givhan long yumi, be hem i no ansa kwiktaem?
9 Sipos yumi prea long Jehova blong hem i givhan long yumi, be hem i no ansa kwiktaem, i gud yumi gat longfala tingting. Yumi mas tingbaot se Jehova i wantem tumas blong givhan long yumi, be hem i wet kasem taem we hem i luk se i stret blong hem givim samting we yumi askem. Baebol i talem se: “Hae God i stap sore yet long yufala, mo hem i wantem mekem i gud long yufala. Hem i stap rere yet blong i kaen long yufala, from we oltaem nomo, hem i stap mekem i stret. Olgeta we oli stap trastem hem, olgeta evriwan oli save harem gud.”—Aesea 30:18.
“MAOT BLONG LAEON”
10-12. (1) ?Wanem i save mekem se i had blong lukaot long wan famle we i sik? (2) Taem yu trastem Jehova long taem we i gat trabol, ?hemia i save mekem wanem long fasin blong yu blong fren gud wetem God?
10 Maet problem we yu kasem i had tumas nao yu harem olsem Pol mo yu nidim wan man blong tekemaot yu long “maot blong laeon.” (2 Timoti 4:17) Long ol taem olsem, i impoten tumas we yu trastem Jehova. Eksampol, maet yu stap lukaot long wan famle blong yu we i sik. Yu prea long Jehova blong hem i givhan long yu blong mekem ol gudfala desisen, mo blong yu gat strong tingting. * Naoia yu save harem se yu gat pis, taem yu tingbaot se Jehova i luk yu mo i kasemsave long trabol blong yu. Hem bambae i givhan long yu blong stanap strong mo gohed blong trastem hem.—Ol Sam 32:8.
Yu trastem Papa blong yu long heven se bambae hem i givim paoa long yu blong obei gud long hem
11 Samtaem maet yu luk se, Jehova i no givhan long yu. Maet ol dokta oli no agri long desisen blong yu. No, maet yu stap tingting se ol famle blong yu bambae oli givhan long yu, be nogat, olgeta oli mekem we ol samting oli kam mowas. Nating se i olsem, i gud we yu gohed blong trastem Jehova se, bambae hem i givhan long yu. Mo oltaem, yu mas kam klosap long hem. (Ridim 1 Samuel 30:3, 6.) Biaen, taem yu luksave we Jehova i givhan long yu, bambae fasin blong yu blong fren gud wetem Jehova i kam strong moa.
12 Linda we i wan sista, hem i gat sem filing olsem. * Hem i lukaotgud long papa mo mama blong hem, we tufala i sik blong longtaem, mo biaen tufala i ded. Hem i talem se: “Long taem ya, mi wetem man blong mi, mo brata blong mi, oltaem mifala i faenem i had blong save samting we mifala i mas mekem. Plante taem mifala i harem se i no gat man blong givhan long mifala. Be, taem mifala i tingbaot taem ya, mifala i luksave klia we Jehova i stap wetem mifala. Hem i givim paoa long mifala mo hem i givim samting we mifala i nidim, nating se samtaem mifala i no moa save wanem samting blong mekem.”
13. ?Olsem wanem fasin blong trastem Jehova i givhan long Rhonda blong stanap strong long ol trabol we hem i kasem?
13 Taem yumi trastem Jehova fulwan, hemia bambae i givhan long yumi blong stanap strong long ol trabol we yumi kasem. Hemia nao samting we i hapen long wan sista we nem blong Rhonda. Man blong hem we i no wan Witnes, i divosem hem. Long sem taem ya, brata blong Rhonda i faenemaot se hem i gat wan sik we i nogud tumas. Nem blong sik ya lupus. Mo sam manis biaen, woman blong brata blong hem i ded. Taem Rhonda i stat blong harem gud bakegen afta long ol trabol we oli kamaot, hem i stat blong mekem wok blong paenia. Be afta, mama blong hem i ded. ?Olsem wanem Rhonda i stanap strong long ol trabol ya? Hem i talem se: “Mi mi toktok wetem Jehova evri dei, nating se sam desisen we mi mekem i smol nomo. Taem mi mi mekem olsem, mi luk Jehova olsem wan man we i tru. Hemia i tijim mi blong trastem Jehova nomo, i no wan narafala man. Mo ol samting we hem i mekem blong givhan long mi, oli tru tumas, hem i givim evri samting we mi nidim. From samting ya, ol samting we oli hapen long laef blong mi, oli mekem mi mi wok klosap wetem Jehova.”
Ol samting we oli hapen long famle blong yu maet oli save traem fasin blong yu blong fren gud wetem Jehova (Yu luk haf 14-16)
14. ?Olsem wanem Jehova i save givhan long yu, sipos kongregesen i putumaot wan famle blong yu?
14 Tingbaot wan narafala hadtaem. Maet kongregesen i putumaot wan famle blong yu. Yu save finis fasin we yu mas mekem we Baebol i talem long olgeta we kongregesen i putumaot olgeta. (1 Korin 5:11; 2 Jon 10) Be from we yu lavem hem tumas, maet yu harem se i had tumas, no yu harem se yu no save obei long loa ya blong Baebol. ?Olsem wanem? ?Bambae yu yu trastem Papa blong yu long heven se bambae hem i givim paoa long yu blong obei gud long hem? ?Yu yu tingbaot hadtaem ya, olsem wan janis blong kam klosap moa long Jehova?
15. ?From wanem Adam i no obei long Jehova?
15 ?Olsem wanem hemia i sem mak long trabol we fas man Adam i fesem? ?Yu ting se Adam i gat tingting ya se hem i save gohed blong laef olwe, nating sipos hem i no obei long Jehova? Nogat, Baebol i talem se: “I no Adam we Setan i trikim hem.” (1 Timoti 2:14) Taswe, ?from wanem Adam i no obei long Jehova? Hem i kakae frut we woman blong hem i givim long hem, from we hem i lavem woman blong hem moa, i bitim we hem i lavem Jehova. Hem i lesin long tok blong woman blong hem, mo hem i no obei long loa blong Jehova.—Jenesis 3:6, 17.
16. ?Yumi mas lavem hu moa i bitim ol narafala man? ?From wanem yumi mas mekem olsem?
16 Desisen we Adam i mekem, i tijim yumi se yumi mas lavem Jehova moa i bitim ol narafala man. (Ridim Matiu 22:37, 38.) Mo taem lav we yumi gat long Jehova i kam strong, bambae yumi givhan long ol famle blong yumi long rod we i beswan, nating se oli wosipim Jehova no nogat. Taswe yu mas gohed blong lavem Jehova, mo yu trastem gud hem. Sipos yu stap wari from wan famle we kongregesen i putumaot hem, i gud yu prea long Jehova mo yu talemaot ol filing blong yu long hem. * (Rom 12:12; Filipae 4:6, 7) Nating se yu harem nogud bigwan, i gud yu tingbaot hadtaem ya, olsem wan janis blong fren gud moa wetem Jehova. Biaen bambae yu naf blong trastem Jehova, mo yu luksave se sipos yu obei long hem, bambae i gat gudfala frut i kamaot.
TAEM YUMI STAP WET
Yu soemaot long Jehova se yu trastem hem, taem yu gohed blong stap bisi long wok blong prij (Yu luk haf 17)
17. Sipos yumi bisi oltaem long wok blong prij, ?yumi trastem se bambae Jehova i mekem wanem?
17 ?From wanem Jehova i tekemaot Pol long “maot blong laeon”? Pol i talem se: “Blong mi talemaotgud ol tok blong hem.” (2 Timoti 4:17) Jehova i givim wok ya long yumi blong yumi talemaot “gud nius,” mo hem i singaot yumi olsem ol “man blong mekem wok blong hem.” (1 Tesalonaeka 2:4; 1 Korin 3:9) Sipos yumi bisi oltaem long wok ya, yumi save trastem Jehova se bambae i givim olgeta samting we yumi nidim. (Matiu 6:33) Mo bambae i isi long yumi blong yumi wet long Jehova blong hem i ansa long ol prea blong yumi.
18. ?Olsem wanem yu save trastem Jehova mo mekem fasin blong yu blong fren gud hem i kam strong moa?
18 Taswe i gud we evri dei yu traehad blong mekem fasin blong yu blong fren wetem Jehova i kam strong moa. Taem i gat ol trabol we oli mekem yu wari, i gud yu yusum janis ya blong kam klosap moa long Jehova. I gud yu ridim, yu stadi, mo yu tingting dip long Tok blong God, Baebol. Yu gohed oltaem blong prea long Jehova mo yu gohed blong bisi long wok blong hem. Sipos yu mekem ol samting ya, yu save trastem Jehova se bambae hem i givhan long yu blong stanap strong long ol trabol we yu kasem naoia, mo ol trabol we maet oli kasem yu long fiuja.
^ par. 2 Maet Pol i ronwe long wan tru laeon no maet hem i winim wan narafala hadtaem.
^ par. 10 I gat sam atikol we oli kamaot finis, mo oli blong givhan long ol Kristin, blong oli stanap strong taem oli kasem wan strong sik, mo i givhan tu long olgeta we oli stap lukaot long hemia we i sik. Yu luk Wajtaoa blong 1 Septemba 2003, pej 13-19.
^ par. 12 Mifala i jenisim sam nem.
^ par. 16 I gat sam atikol we oli kamaot finis, blong givhan long yumi, taem wan long famle i lego Jehova. Yu luk Wajtaoa blong 1 Septemba 2006, pej 17-21 (Franis mo Inglis), mo 15 Jenuware 2007, pej 17-20 (Franis mo Inglis).
