1. ?From wanem yumi mas mekem fasin blong yumi blong fren gud wetem Jehova i stap strong oltaem?

SIPOS yu wan Witnes blong Jehova we yu baptaes finis, yu gat wan samting we i sas. Hemia se, yu save fren gud wetem Jehova. Be wol blong Setan mo sin we i stap long yumi, oli save mekem se yumi no moa fren gud wetem God. From samting ya, yumi evriwan i mas traehad blong mekem fasin blong yumi blong fren gud wetem Jehova, i stap strong oltaem.

2. (1) ?Fasin ya we man i fren gud wetem narafala i minim wanem? (Yu luk futnot.) (2) ?Yumi save mekem wanem, blong fasin blong yumi blong fren gud wetem Jehova i kam strong moa?

² ?Yu yu bilif se Jehova i stap? ?Yu haremsave se hem i Fren blong yu? ?Yu yu wantem we fasin blong yu blong fren gud wetem hem, i kam strong moa? Long Jemes 4:8 i talem samting we yu mas mekem. Hem i se: “Yufala i mas stap klosap long God, nao hem bambae i kam stap klosap long yufala.” Yu mas tingbaot se, fasin blong yu blong fren gud wetem God, i dipen long yu mo Jehova. * Sipos yu putum sam mak blong kam klosap long  Jehova, hem bambae i kam klosap long yu. Taem yu gohed blong mekem olsem, bambae yu luksave se Jehova i tru, mo fasin blong yutufala blong fren gud tugeta, bambae i kam strong moa. Nao, bambae yu gat sem filing olsem Jisas we i se: “God i sanem mi mi kam mo hem i tru” mo, “mi mi save hem.” (Jon 7:28, 29) ?Be wanem sam samting we yu save mekem, blong kam klosap long Jehova?

3. ?Olsem wanem yumi save toktok wetem Jehova? ?Olsem wanem Jehova i toktok long yumi?

³ Sipos yu wantem kam klosap long Jehova, i impoten we oltaem, yu toktok wetem hem. ?Be olsem wanem yu save mekem samting ya? Yu traem tingbaot rod we yu yusum blong toktok long wan fren blong yu, we i stap long wan defren ples. Maet oltaem yutufala i raetem leta, mo toktok long telefon. Long sem fasin, yu toktok wetem Jehova taem yu prea long hem oltaem. (Ridim Ol Sam 142:2.) ?Be olsem wanem yu save letem Jehova i toktok long yu? Blong mekem olsem, oltaem yu mas ridim tok blong hem Baebol, mo tingting dip long hem. (Ridim Aesea 30:20, 21.) I gud yumi luk olsem wanem fasin blong toktok gud tugeta, bitwin yu mo Jehova, i save mekem se fasin blong yutufala blong fren gud tugeta, i kam strong moa. Mo olsem wanem yu save luk Jehova olsem wan Fren we i tru.

4, 5. ?Olsem wanem Jehova i toktok long yu, taem yu stadi Baebol? Yu talem wan eksampol.

⁴ Yumi save se Baebol, hem i talemaot mesej blong Jehova long yumi evriwan. ?Be i tru se Baebol i save givhan long yu blong kam klosap long Jehova? !Yes i tru! Taem yu ridim Baebol oltaem mo yu stadi long hem, i gud yu tingbaot filing blong yu, long samting we yu ridim. Mo olsem wanem yu save mekem samting ya, i wok long laef blong yu. Taem yu mekem olsem, yu stap letem Jehova i toktok long yu. Hem i kam wan gudfala Fren, we i stap givhan long yu, mo yu stap kam klosap long hem.—Hibrus 4:12; Jemes 1:23-25.

⁵ Yu traem tingbaot eksampol ya. ?Yu yu harem olsem wanem taem yu ridim ol toktok blong Jisas, we hem i talem se: “I nogud yufala i stap hivimap ol gudgudfala samting blong yufala long wol ya”? Sipos yu traehad blong putum Jehova long fasples long laef blong yu, bambae yu haremsave se hem i glad long yu. Be maet, taem yu ridim  ol toktok blong Jisas, yu luksave se yu no mas mekem laef blong yu i fasfas. Mo yu mas tingbaot moa, blong mekem wok blong God. Sipos yu gat tingting olsem, be hemia Jehova we i givhan long yu blong kasemsave samting we yu save mekem, blong kam klosap long hem.—Matiu 6:19, 20.

6, 7. (1) Taem yumi stadi long Baebol, ?lav blong yumi long Jehova, mo lav we Jehova i gat long yumi bambae i olsem wanem? (2) ?Wanem mak blong yumi, taem yumi stadi Baebol?

⁶ I tru tumas se taem yumi stadi long Baebol, yumi lanem olsem wanem yumi save mekem ol jenis long laef blong yumi, blong mekem moa long wok blong Jehova. Mo tu, yumi luksave ol gudfala samting we hem i givim long yumi, mo ol gudfala fasin blong hem. Ol samting ya, oli givhan blong mekem lav we yumi gat long Jehova i gru moa. Long sem fasin, lav we Jehova i gat long yumi, hemia tu i gru moa. Ale fasin blong yumi blong fren gud wetem God, bambae i kam strong moa.—Ridim 1 Korin 8:3.

⁷ Sipos yumi wantem kam klosap long Jehova, i impoten we yumi stadi Baebol, wetem wan tingting we i stret. Jisas i talem se: “Mo laef ya, hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Taem yumi ridim Baebol, yumi save lanem plante niufala samting. Be mak blong yumi, hemia se yumi mas save gud Jehova olsem wan Man we i tru, mo i laef.—Ridim Eksodas 33:13; Ol Sam 25:4.

8. (1) ?Maet samfala oli gat wanem tingting, long fasin we Jehova i mekem long King Usia? (2) Sipos yu save gud Jehova, ?bambae yu harem olsem wanem long samting we hem i mekem?

⁸ Taem yumi save Jehova olsem wan gudfala Fren, bambae yumi no wari sipos oltaem Baebol i no eksplenem from wanem Jehova i mekem wan samting. Eksampol, taem Usia i kam king blong Judia, ol man oli wosipim ol giaman god. Usia i no joen wetem olgeta. Baebol i talem se: “Oltaem, king ya i stap mekem ol samting we Hae God i glad long hem.” (2 King 15:1-5) Nating se i olsem, Jehova i mekem we King Usia i kasem leprosi. ?Be from wanem Jehova i panisim hem? Haf blong stori ya, i no talem from wanem Jehova i mekem samting ya. Taswe, ?yu yu harem olsem wanem long samting we Jehova i mekem? ?Hemia i mekem yu yu wari? ?Yu yu harem se Jehova i no mekem i sem mak long olgeta man, taem hem i panisim Usia we i stap mekem ol gudfala fasin? Nogat, yu no mas gat tingting olsem. Sipos yu save gud Jehova, bambae yu luksave se, oltaem hem i stretem man long fasin we i stret. Mo hem “i no mekem i strong tumas” long man, taem hem i stretem hem. (Jeremaea 30:11) Taswe, nating sipos yu no save from wanem Jehova i panisim Usia, be yu save sua se Jehova i mekem samting we i stret.

9. ?Wanem i givhan long yumi blong kasemsave from wanem Jehova i mekem king Usia i kasem leprosi?

⁹ I gat sam moa samting we Baebol i talem, blong tokbaot laef blong king Usia. (2 King 15:7, 32) Narafala haf blong stori we stap long 2 Kronikel 26:3-5, 16-21, i soemaot se King Usia, hem i stap “mekem ol samting we Hae God i glad long hem.” Be Baebol i talem se, biaen hem “i kam praod tumas.” Ale, king ya i traem blong mekem sam samting we ol pris nomo oli gat raet blong mekem. I gat 81 pris we oli talem long hem se, hem i mekem samting we i rong, mo oli traem blong stopem hem. ?Be hem i mekem wanem? !Hem i kam flas tumas, nao hem i kros long olgeta! Smol haf blong stori ya, i givhan long yumi blong  kasemsave, from wanem Jehova i mekem king ya i kasem leprosi.

10. ?From wanem yumi no nid blong save ol risen blong evri samting we Jehova i mekem? ?Yumi save trastem Jehova moa se oltaem hem i stap mekem samting we i stret olsem wanem?

¹⁰ ?Wanem impoten lesen we yumi lanem? Yumi luk se i gat naf save long stori blong King Usia, we oli givhan long yumi blong kasemsave from wanem Jehova i panisim hem. ?Be bambae yu mekem wanem sipos Baebol i no tokbaot ol save ya? ?Bambae yu tingting se samting we Jehova i mekem i stret? No, ?bambae yu harem se ol save we Baebol i talem, oli naf finis blong mekem yu trastem Jehova se oltaem hem i mekem samting we i stret? (Dutronome 32:4) Taem yumi savegud Jehova olsem wan Man we i tru, bambae yumi lavem hem mo yumi trastem hem. Taswe i no nid we yumi save risen blong evri samting we Jehova i mekem. Taem yumi stadi Baebol, bambae yumi luksave we Jehova i tru, mo bambae yumi kam klosap moa long hem.—Ol Sam 77:12, 13.

11-13. ?Olsem wanem yu save se Jehova i stap lesin long ol prea? (Yu luk pija long stat blong stadi ya.)

¹¹ Taem yumi prea, yumi stap kam klosap long Jehova. Yumi presem hem, yumi talem tangkiu long hem, mo yumi askem hem blong hem i givhan long yumi. (Ol Sam 32:8) Be sipos yu wantem fren gud wetem Jehova, yu mas bilif strong se hem i save harem ol prea blong yu.

¹² Sam man oli talem se God i no stap lesin long ol prea, mo tu oli talem se, prea hem i wan samting blong mekem yu harem gud nomo. Oli bilif se prea i givhan nomo long yu blong tingting gud long ol problem  blong yu, mo blong tingbaot wan rod blong winim ol problem ya. I tru se maet prea i save givhan long yu long ol rod ya. Be taem yu toktok wetem Jehova long prea, hem i stap lesin long yu. ?Olsem wanem yu save sua long samting ya?

¹³ Yu traem tingbaot samting ya: Bifo we Jisas i kam long wol, hem i luk we Jehova i stap ansa long ol prea blong ol gudfala man blong Hem. Taem Jisas i stap long wol, hem i prea long Papa blong hem long heven, mo hem i talemaot ol tingting mo ol filing blong hem. I gat wan taem we Jisas i prea fulnaet. (Luk 6:12; 22:40-46) ?Olsem wanem? Sipos Jisas i ting se Jehova i no stap lesin long ol prea, ?hem i save prea long hem? Mo tu, Jisas i tijim ol man blong hem olsem wanem blong oli prea long Jehova. Sipos hem i ting se Jehova i no stap lesin long ol prea, ?hem i save mekem olsem? Jisas i luksave klia nomo we Jehova i stap lesin long ol prea. Mo hem i talem se: “ Papa. Mi mi talem tangkiu long yu from we yu harem prea blong mi. Mo mi save we oltaem yu stap harem mi.” Yumi tu, yumi save sua se Jehova i stap lesin long ol prea blong yumi.—Jon 11:41, 42; Ol Sam 65:2.

14, 15. (1) ?Wanem gudfala samting i save kamaot taem yumi askem stret samting we yumi wantem? (2) ?Olsem wanem ol prea blong Kathy oli givhan long hem blong kam klosap long Jehova?

¹⁴ Maet samtaem yu no luksave ansa blong ol prea blong yu. Be taem yu askem stret samting we yu wantem, long ol prea blong yu, bambae yu luksave ansa we Jehova i givim long yu. Mo tu, bambae yu luk Jehova olsem wan man we i tru mo i laef. Taem yu talemaot long Jehova, evri samting we yu stap wari long hem, bambae hem i kam stap klosap long yu.

¹⁵ Yu traem tingbaot Kathy. Oltaem hem i go long wok blong prij, be hem i no glad taem hem i mekem wok ya. * Hem i talem se: “Mi no laekem wok blong prij. Mi min  se, mi no laekem nating.” Taem hem i ritae long wok blong hem, wan elda i leftemap tingting blong hem blong mekem wok blong fultaem paenia. Hem i talem se: “Elda ya i givim wan fom blong mi fulumap. Ale, mi mekem desisen blong mekem wok ya, mo tu mi stat blong prea long Jehova evri dei, blong hem i givhan long mi blong laekem wok ya.” ?Olsem wanem? ?Jehova i ansa long prea blong hem? Afta we Kathy i mekem wok blong paenia blong tri yia, hem i talem se: “From we mi spenem plante taem long wok blong prij, mo mi lanem plante samting wetem ol sista, hemia i givhan long mi blong mi kamgud moa long fasin blong mi blong prij. Tede, mi no jes laekem nomo blong prij, be mi lavem wok ya tumas. Samting we i gud moa hemia se, mi fren gud moa wetem Jehova bitim bifo.” Taswe, ol prea we Kathy i mekem oli givhan long hem blong kam klosap moa long Jehova.

16, 17. (1) ?Yumi mas mekem wanem blong yumi gohed blong fren gud moa wetem Jehova? (2) ?Bambae yumi tokbaot wanem long nekis stadi?

¹⁶ Yumi save gohed blong kam klosap moa long Jehova blong olwe. Taswe i gud we yumi gohed blong lesin long hem taem yumi stadi Baebol, mo yumi gohed blong toktok wetem hem long prea. Sipos yumi mekem olsem, bambae fasin blong yumi blong fren gud wetem Jehova, bambae i kam strong moa. Mo tu, bambae hem i givhan long yumi blong stanap strong long ol samting we oli traem yumi.

¹⁷ Be samtaem yumi fesem ol problem blong laef, nating se yumi gohed blong prea long Jehova. Long ol taem olsem, yumi save stat blong lusum tras we yumi gat long Jehova. Maet yumi harem se Jehova i no moa lesin long prea blong yumi, mo maet yumi stap tingting se ating Jehova i no moa fren gud wetem yumi. ?Bambae yu mekem wanem sipos yu stat blong gat ol tingting olsem? Nekis stadi bambae i givhan long yu blong faenem ansa blong kwestin ya.