Blong plante yia, ol buk blong yumi oli eksplenem se King Gogo [“Gog blong kantri ya Magog,” NW] hem i Setan, afta we oli sakemaot hem long heven i kamdaon long wol. ?From wanem? Buk blong Revelesen i soemaot se Setan nao bambae i lidim ol man long olgeta ples long wol blong oli faet agensem ol man blong God. (Revelesen 12:1-17) Hemia nao from wanem yumi ting se Gog i narafala nem blong Setan.

Be i gat sam samting i rong wetem eksplenesen ya. ?From wanem? Yu traem tingbaot samting ya: Taem Jehova i tokbaot taem ya we bambae hem i spolem Gog, hem i talem se bambae hem i ‘letem ol pijin mo ol wael anamol oli kam kakae dedbodi blong hem.’ (Esikel 39:4) Mo bakegen hem i talem se: “Taem ol samting ya oli kamtru, bambae mi makemaot wan pis graon long Isrel . . . blong oli berem King Gogo [Gog] . . . long hem.” (Esikel 39:11) ?Be olsem wanem “ol pijin mo ol wael anamol” oli save kakae Setan we hem i spirit? ?Olsem wanem oli save berem hem long graon? Baebol i talem klia se Setan bambae i kalabus long bigfala hol ya we i godaon we i godaon, blong 1,000 yia. Baebol i no talem se bambae oli berem hem no ol pijin mo wael anamol oli kakae hem, nogat.—Revelesen 20:1, 2.

Baebol i talem se long en blong 1,000 yia, Setan bambae i kamaot long bigfala hol ya, mo “bambae i go long olgeta ples, blong i giaman long ol laen blong Gog mo Magog, we hemia ol man blong olgeta kantri long wol. Bambae Setan i tekem ol man ya blong olgeta kantri oli kam wanples blong kilim ol man blong God.” (Revelesen 20:8) Be sipos Setan nao hem i Gog, ?olsem wanem hem i save giaman long hem wan? From samting ya, ‘Gog’ ya we buk blong Esikel mo Revelesen i tokbaot, i no minim Setan.

?Be hu ya Gog blong Magog? Blong ansa long kwestin ya, yumi mas faenemaot long Baebol se hu bambae i faet agensem ol man blong God. Baebol i tokbaot faet blong ‘Gog blong Magog,’ mo faet blong “king blong not,” mo faet blong “ol king blong wol.” (Esikel 38:2, 10-13; Daniel 11:40, 44, 45; Revelesen 17:14; 19:19) ?Olsem wanem? ?Ol faet ya oli defdefren? Nogat. I luk olsem se Baebol i yusum defdefren nem blong tokbaot sem faet nomo. ?From wanem yumi talem olsem? From we Baebol i talem se olgeta neson long wol bambae oli joen long laswan faet we i makemaot stat blong Amagedon.—Revelesen 16:14, 16.

 Taem yumi lukluk gud long ol vas we oli tokbaot laswan faet agensem ol man blong God, i klia nomo se Gog blong Magog i no minim Setan. Be, Gog blong Magog i minim wan grup blong ol neson. ?Olsem wanem? ?“King blong not” nao bambae i lidim grup ya? Yumi no save talem stret. Be i luk olsem se save ya i laenap wetem samting we Jehova i talem long Gog, i se: “Yu aot long ples blong yu daon long not we long not olgeta, nao yu lidim wan bigfala kampani blong ol soldia we oli strong tumas, wetem ol soldia ya we oli kamaot long ol narafala kantri we olgeta evriwan oli ron long hos, yu kamtru long ples ya.”—Esikel 38:6, 15.

Long sem fasin, profet Daniel we i laef long sem taem wetem Esikel, i tokbaot king blong not, i se: “Bambae wan nius i kam long is mo long not we bambae i mekem hem i fraet, be bambae hem i kros tumas, nao hem i faet strong, i kilim plante man i ded. Mo bambae king ya i putumap bigfala haos tapolen blong hem i stap long medel blong solwota mo hil ya we haos blong God i stap long hem. Be bambae hem i ded, we i no gat man blong givhan long hem.” (Daniel 11:44, 45) Tok ya i sem mak long samting we Esikel i talem se Gog bambae i mekem.—Esikel 38:8-12, 16.

?Wanem bambae i hapen afta long laswan faet? Daniel i talem se: “Long taem ya, bambae enjel ya Mikael [Jisas Kraes] we i hae we i hae [stat long 1914], we i stap lukaot long ol man ples blong yu, bambae hem i kamtru [long Amagedon]. Mo bambae i gat wan taem blong trabol [bigfala trabol] i kam we i mowas olgeta, i winim ol narafala taem blong trabol, i stat long taem ya bifo we i gat ol fas man i stap, i kam kasem tede. Long taem ya, olgeta man long kantri blong yu we oli gat nem blong olgeta long buk blong God, bambae oli sef.” (Daniel 12:1) Yumi ridim wan tok olsem tu long Revelesen 19:11-21, we i tokbaot samting we Jisas bambae i mekem.

?Be hu ya “Gog mo Magog” we Revelesen 20:8 i tokbaot? Hemia olgeta man we oli rebel agensem Jehova long en blong 1,000 yia, long taem blong laswan traem. Olgeta ya bambae oli gat sem tingting olsem ‘Gog blong Magog,’ we hemia olgeta neson we oli faet agensem ol man blong God long en blong bigfala trabol. Mo ol neson ya bambae oli lus blong olwe long Amagedon, sem mak olsem Gog mo Magog. (Revelesen 19:20, 21; 20:9) Taswe i stret nomo blong kolem olgeta man we oli rebel long en blong 1,000 yia se “Gog mo Magog.”

Yumi stap stadi dip long Baebol, taswe yumi stap wet blong luk se hu ya “king blong not.” Be nomata se hu bambae i lidim ol neson blong faet agensem ol man blong God, yumi sua long 2 samting: (1) Gog blong Magog mo ol ami blong hem bambae oli lus. (2) King blong yumi, Jisas Kraes, bambae i sevem ol man blong God mo i lidim olgeta i go insaed long niufala wol, we oli stap long pis mo oli sef.—Revelesen 7:14-17.