1. ?Olsem wanem yumi yusum ol tok blong Lodsprea taem yumi prij?

PLANTE man oli save gud prea ya long Matiu 6:9-13. * Plante taem long wok blong prij, yumi yusum ol tok blong prea ya blong tijim ol man se Kingdom blong God i wan tru gavman we bambae i mekem wol ya i kam wan paradaes. Mo tu, yumi yusum tok ya “plis yu mekem we nem blong yu i tabu,” blong soemaot se God i gat wan nem we yumi mas mekem nem ya i stap tabu.—Matiu 6:9, NW.

2. ?Olsem wanem yumi save se Jisas i no wantem we yumi ripitim ol toktok blong Lodsprea?

² ?Be yu ting se Jisas i wantem se yumi ripitim evri toktok blong Lodsprea ya? Nogat. Jisas i talem se: “Taem yu prea, yu no mas talem sem toktok bakegen mo bakegen.” (Matiu 6:7, NW) Wan taem, Jisas i talem prea ya bakegen long ol man blong hem, be hem i no ripitim ol semfala toktok blong prea ya. (Luk 11:1-4) Taswe, i klia se Jisas i talem prea ya blong givhan long yumi nomo,  blong yumi save wanem samting i stret blong tokbaot long ol prea blong yumi.

3. ?Wanem ol kwestin blong tingbaot taem yu stadi long ol toktok blong Lodsprea?

³ Long stadi ya mo long nekis stadi, bambae yumi stadi gud long ol toktok blong Lodsprea. Taem yumi mekem olsem, i gud yu askem se: ‘?Prea ya i save givhan long mi olsem wanem blong mi mekem gud ol prea blong mi?’ Mo samting we i impoten moa se: ‘?Mi mi stap mekem samting we Lodsprea i talem?’

4. ?Toktok ya “Papa blong mifala” i mekem yumi tingbaot wanem, mo olsem wanem Jehova i “Papa” blong yumi?

⁴ Jisas i statem prea ya olsem: “Papa blong mifala.” Toktok ya i mekem yumi tingbaot se Jehova i Papa blong olgeta Kristin brata mo sista blong yumi long fulwol. (1 Pita 2:17) Ol tabu Kristin we Jehova i jusumaot olgeta blong oli go long heven, Jehova i adoptem olgeta oli kam pikinini blong hem, taswe oli singaot Jehova se “Papa.” (Rom 8:15-17) Olgeta we bambae oli laef olwe long wol ya, olgeta tu oli save singaot Jehova se “Papa,” from we Jehova i givim laef long olgeta mo i givim ol samting we oli nidim. Olgeta ya bambae oli kam “ol pikinini blong God,” afta we oli kam stret gud olgeta mo oli holemstrong long Jehova long laswan traem.—Rom 8:21; Revelesen 20:7, 8.

5, 6. ?Wanem nambawan presen we ol papa mo mama oli save givim long ol pikinini blong olgeta, mo ol pikinini wanwan oli save mekem wanem wetem presen ya? (Yu luk pija long stat blong stadi.)

⁵ Wan nambawan presen we ol papa mo mama oli save givim long ol pikinini blong olgeta, hemia taem tufala i tijim ol pikinini blong prea mo blong oli luk Jehova olsem wan Papa we i kea long olgeta. Wan eria elda long Saot Afrika i talem se: “Stat long dei we ol gel blong mitufala oli jes bon, mi prea wetem olgeta evri naet. Sipos mi go long wan narafala ples, long taem ya nomo mi no prea wetem olgeta. Ol gel blong mi oli talem se oli no tingbaot ol toktok we mi talem long ol prea ya, be oli save tingbaot yet se long taem ya, oli harem save se fasin blong toktok wetem Papa Jehova i wan tabu samting, i gat pis, oli harem gud mo oli sef. Taem mi luk se oli naf blong prea olgeta wan, mi leftemap tingting blong olgeta blong oli prea laod, olsem nao mi save harem olgeta taem oli stap talemaot ol tingting mo filing blong olgeta long Jehova. !Hemia wan nambawan janis blong save wanem i stap long hat blong olgeta! Biaen, sloslo mi talem sam impoten samting we oli save tokbaot long prea blong olgeta, olsem we i stap long Lodsprea, blong mekem se prea blong olgeta i gat mining.”

⁶ Ol gel ya oli gruap mo oli gohed gud long trutok. Naoia oli mared finis mo oli stap mekem wok blong Jehova fultaem wetem ol man blong olgeta. Yes, wan nambawan presen we ol papa mo mama oli save givim long ol pikinini blong olgeta, hemia blong givhan long olgeta blong oli fren gud wetem Jehova. Be ol pikinini wanwan oli mas traehad blong fren gud oltaem wetem Jehova.—Ol Sam 5:11, 12; 91:14.

7. ?Yumi glad tumas long wanem, mo from samting ya yumi mas mekem wanem?

⁷ Yumi glad tumas blong save nem blong God mo blong “holem nem blong hem.” (Ol Wok 15:14; Aesea 43:10) Yumi stap prea se: “Plis, yu mekem we nem blong yu i tabu.” Taem yumi prea olsem, bambae yumi wantem moa blong askem long Jehova blong i givhan long yumi blong no mekem no talem eni samting we i save sakem doti long nem blong hem. Yumi no wantem kam olsem ol man long taem blong ol fas Kristin, we oli  talem samting be oli no mekem. Pol i talem long olgeta se: “Ol hiten man oli stap tok nogud long nem blong God, be i fol blong yufala nomo.”—Rom 2:21-24.

8, 9. Yu tokbaot wan stori we i soemaot se Jehova i givhan long olgeta we oli wantem mekem nem blong hem i tabu.

⁸ Yumi wantem blong mekem nem blong God i stap tabu. Wan sista long Nowei i lusum man blong hem long ded, nao hem wan i lukaot long smol boe blong tufala we i gat 2 yia. Sista ya i talem se: “Hemia wan taem long laef blong mi we i had tumas. Mi prea evri dei, maet klosap evri aoa, blong Jehova i givim paoa long mi blong mi no tingting tumas, mo blong mi no mekem wan desisen we i save givim janis long Setan blong i jikim Jehova from. Mi wantem mekem nem blong Jehova i tabu, mo mi wantem se pikinini blong mi i luk papa blong hem bakegen long Paradaes.”—Ol Proveb 27:11.

⁹ ?Olsem wanem? ?Jehova i ansa long prea blong sista ya? Yes. Hem i harem gud bakegen from we hem i joen oltaem wetem ol brata mo sista. Faef yia biaen, hem i mared long wan elda. Naoia boe blong hem i gat 20 yia mo i baptaes finis. Sista ya i talem se: “Mi mi glad tumas we man blong mi i givhan long mi blong lukaot long pikinini blong mi.”

10. ?Olsem wanem God bambae i mekem nem blong hem i stap tabu blong olwe?

¹⁰ Jehova bambae i mekem se nem blong hem i stap tabu blong olwe, taem hem i spolem olgeta man we oli sakem doti long nem blong hem mo oli no wantem se hem i rul long olgeta. (Ridim Esikel 38:22, 23.) Long taem ya, sloslo ol man bambae oli kam stret gud olgeta, mo olgeta long heven mo long wol bambae oli wosip long Jehova mo oli leftemap tabu nem blong God. Nao biaen, Papa blong yumi we i lavem yumi bambae i “rul long olgeta samting.”—1 Korin 15:28.

11, 12. ?Long yia 1876, Jehova i givhan long ol man blong hem blong oli kasem save long wanem?

¹¹ Bifo we Jisas i gobak long heven, ol aposol blong hem oli askem se: “?I stret taem nao blong yu mekem we ol laen blong Isrel oli gat king blong olgeta bakegen, no i no taem blong hem yet?” Ansa blong Jisas i soemaot se i no stret taem yet blong oli save wetaem Kingdom blong God bambae i stat blong rul. Hem i talem long olgeta blong oli putum tingting blong olgeta long impoten wok ya hemia blong prij. (Ridim Ol Wok 1:6-8.) Be hem i tijim olgeta tu blong oli prea blong Kingdom blong God i kam, mo oli wet long taem ya we Kingdom bambae i kam. Hemia nao from wanem yumi stap gohed yet blong prea blong Kingdom i kam.

¹² Klosap long taem we Jisas bambae i rul long heven, Jehova i givhan long ol man blong hem blong oli kasem save wanem yia stret, samting ya bambae i hapen. Long yia 1876, i gat wan haf long magasin ya Bible Examiner, we Charles Taze Russell i raetem, we stamba tok blong hem se: “Rul Blong Ol Man We Oli No Laen Blong Isrel, ?Bambae i Finis Wetaem?” Insaed long haf ya, hem i talem se yia 1914 hem i wan impoten yia. Hem i eksplenem se ol “seven yia” we profet tok blong Daniel i tokbaot, oli sem mak long “taem blong ol man we oli no laen blong Isrel” we profet tok blong Jisas i tokbaot. *—Daniel 4:16; Luk 21:24.

13. ?Wanem i hapen long yia 1914, mo ol samting we oli hapen stat long yia ya oli pruvum wanem?

¹³ Long yia 1914, bigfala faet i stat long ol kantri long Yurop, mo smoltaem biaen, hem i kasem evri ples long wol. Long yia 1918, taem faet ya i finis, plante man oli sot long  kakae mo i gat wan kaen flu we i kilim moa man i bitim ol man we oli ded long faet. Olgeta samting ya oli haf blong “saen” we Jisas i tokbaot. Saen ya i pruvum se Jisas i kam King long heven long yia 1914. (Matiu 24:3-8; Luk 21:10, 11) I klia se long yia 1914, Jisas i kasem hat blong King mo hem i stap “raed long hos i go, olsem man we i win finis long faet, nao i go blong faet bakegen, blong bambae i win bakegen.” (Revelesen 6:2) Jisas i sakemaot Setan mo ol enjel blong hem, oli aot long heven oli kamdaon long wol. Stat long taem ya, profet tok ya i stat blong kamtru, se: “Sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”—Revelesen 12:7-12.

14. (1) ?From wanem yumi stap gohed yet blong prea blong Kingdom i kam? (2) ?Wanem impoten wok we yumi mas mekem naoia?

¹⁴ Profet tok long Revelesen japta 12 i givhan long yumi blong kasem save from wanem ol nogud samting oli stat blong hapen long wol, long taem ya we Jisas i kam King long Kingdom blong God. Nating se Jisas i stap rul long heven, be Setan i stap rulum wol ya yet. Be i no longtaem, Jisas bambae i “win bakegen,” taem hem i finisim olgeta rabis fasin long wol ya. Be go kasem taem ya, yumi mas gohed blong prea blong Kingdom i kam, mo yumi mas gohed blong talemaot Kingdom ya. Jisas i bin talem se: “Ol man bambae oli talemaot gud nius ya blong Kingdom long olgeta ples long wol, blong oli witnes long olgeta neson, nao biaen en bambae i kam.”—Matiu 24:14, NW.

15, 16. ?Yu ting se i naf blong prea nomo se God i mekem samting we hem i wantem i kamtru long wol ya? Yu eksplenem.

¹⁵ Samwe long 6,000 yia i pas finis, God i mekem samting we hem i wantem i kamaot long wol ya. Hemia nao from wanem Jehova i talem se evri samting we hem i mekem “oli gud we i gud tumas.” (Jenesis 1:31) Be biaen Setan i agensem Jehova. Stat long taem ya, bighaf blong ol man oli no mekem samting  we God i wantem. Nating se i olsem, tede i gat samwe long 8 milian man oli stap mekem wok blong Jehova. Oli stap prea blong God i mekem samting we hem i wantem i kamtru long wol ya, mo tu oli stap mekem samting we God i wantem. Oli mekem laef blong olgeta i stret long fes blong God, mo oli wok strong blong tijim Kingdom blong God long ol man.

¹⁶ Wan misinari sista long Afrika we i gat 80 yia, mo i baptaes long yia 1948, i talem se: “Plante taem, mi stap prea blong ol man blong Jehova oli save faenem ol man we oli olsem sipsip mo givhan long olgeta blong oli save Jehova bifo we i let tumas. Mo tu, bifo we mi prij long wan man, mi askem Jehova blong i givim waes long mi, blong mi save kasem hat blong man ya. Mo mi prea long Jehova blong i blesem traehad we yumi mekem blong lukaotgud long olgeta we oli stap stadi Baebol finis.” Olfala sista ya i givhan long plante man blong oli save Jehova. ?Yu yu tingbaot sam narafala olfala brata mo sista olsem we oli stap wok strong long wok blong Jehova?—Ridim Filipae 2:17.

17. ?Yu yu harem olsem wanem taem yu tingbaot ol samting we Jehova bambae i mekem long fiuja?

¹⁷ Bambae yumi gohed blong prea blong God i mekem samting we hem i wantem i kamtru long wol ya, go kasem taem we Jehova i finisim gud ol enemi blong hem. Afta, wol ya bambae i kam wan paradaes mo plante taosen man bambae oli laef bakegen. Jisas i talem se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.” (Jon 5:28, 29) !Yu traem tingbaot glad we bambae yumi gat taem yumi welkamem ol famle blong yumi we oli laef bakegen! God “bambae i ravemaot wota blong ae” blong yumi. (Revelesen 21:4) Plante long olgeta we oli laef bakegen, hemia “ol man we oli no stret,” we oli neva save trutok long saed blong Jehova mo Jisas. Bambae yumi glad blong tijim olgeta long save blong Jehova, blong oli save kasem “laef we i no save finis.”—Ol Wok 24:15; Jon 17:3.

18. ?Wanem samting we ol man oli wantem tumas?

¹⁸ Taem Kingdom blong God i kam, bambae hem i mekem nem blong God i tabu, nao bambae olgeta man long heven mo long wol oli joen gud mo oli stap long pis. Yes, God bambae i givim ol samting we ol man oli wantem tumas, olsem we trifala fas haf blong Lodsprea i tokbaot. Long nekis stadi, bambae yumi tokbaot sam narafala samting long Lodsprea ya we Jisas i tijim yumi long hem.