TAEM Anita i kam Witnes blong Jehova, man blong hem i no glad nating. * Hem i traem blokem Anita blong i no moa go long ol miting mo blong i no moa talem nem blong God. Taem hem i harem Anita i talem nem ya Jehova, hem i kros tumas.

Man ya i no wantem tu se Anita i tijim ol pikinini blong tufala blong oli save Jehova, mo hem i no wantem we Anita i tekem ol pikinini ya i go long ol miting. I rili had long Anita blong tijim ol pikinini blong tufala long fasin haed from we hem i fraet long man blong hem.

Maet yu tu yu olsem Anita. Maet wan famle blong yu i traem blong blokem yu blong yu no mekem wosip long Jehova. No maet i gat wan narafala problem we yu kasem. Maet yu stap sik longtaem finis. Maet pikinini blong yu, man blong yu, no woman blong yu i ded. Maet wan famle blong yu i lego Jehova. Long ol taem olsem, ?yu save mekem wanem blong yu fren gud oltaem wetem Jehova?

Aposol Pol i talem se: “Yufala i mas stanap strong oltaem.” (Hibrus 10:36, NW) Ale, ?wanem i save givhan long yu blong yu stanap strong?

Taem yu harem nogud, yu mas tingbaot se yu mas dipen long Jehova blong givhan long yu blong stanap strong. Yu mas prea long hem blong i givhan long yu. Hemia nao samting we Ana i mekem, taem man blong hem i ded. Hem mo man blong hem tufala i mared 30 yia. Ana i tokbaot man blong hem se: “Hem i go wok afta i no moa kambak. Long taem ya, hem i gat 52 yia nomo.”

Ana i gohed blong wok, be nating se hem i bisi, samting ya i no tekemaot harem nogud blong hem. ?Ale Ana i mekem wanem? Hem i talem se: “Mi talemaot evri samting we i stap long hat blong mi long Jehova, mo mi plis long hem blong i givhan long mi.” Afta we hem i prea, hem i harem se hem i gat pis long tingting mo tingting blong hem i kwaet. Ana i luksave wantaem se Jehova i givhan long hem. Hem i talem se: “Mi suagud se Jehova bambae i mekem man blong mi i laef bakegen.”—Filipae 4:6, 7.

Jehova i promes se bambae hem i harem prea blong ol man blong hem. (Ol Sam 65:2) Mo bambae hem i givim evri samting we oli nidim, blong oli mekem wok blong hem oltaem. Yes, Jehova bambae i givhan long yu blong yu holemstrong long hem, nating se yu kasem trabol.

I gat wan narafala rod we Jehova i yusum blong givhan long yumi blong stanap strong. Hem i givim ol brata mo sista long kongregesen. Yumi save lanem plante samting long stori blong ol Kristin long Tesalonaeka, we oli stap givgivhan long olgeta taem ol man oli mekem i nogud long olgeta. Long taem ya, oli nidim blong givgivhan long olgeta mo talem ol gudfala toktok blong mekem tingting blong olgeta i strong. (1 Tesalonaeka 2:14; 5:11) Oli givhan long ol brata mo sista blong oli holemstrong long Jehova, taem oli kam wanples blong mekem miting mo oli fren gud. ?Yumi save mekem wanem blong yumi stanap strong olsem ol Kristin long Tesalonaeka?

Long taem blong trabol, i gud we oltaem yumi stap fren gud wetem ol brata mo sista, mo yumi lefleftemap tingting blong yumi. (Rom 14:19) Aposol Pol i harem nogud tumas from we ol man oli agensem hem mo from sam narafala trabol bakegen. Be Jehova i givim paoa long hem blong hem i stanap strong. Jehova i yusum ol brata mo sista blong oli leftemap tingting blong Pol. Aposol Pol i tokbaot ol fren blong hem, i se: “Trifala ya i stap mekem mi mi harem gud tumas.” (Kolosi 4:10, 11) Yes, ol brata ya oli lavem Pol tumas, mekem se taem Pol i nidim help, olgeta ya oli leftemap tingting blong hem mo oli mekem hem i harem gud. !Ating yu tu yu tingbaot wan taem we ol brata mo sista long kongregesen oli bin talem no mekem wan samting we i leftemap tingting blong yu!

Mo tu, Jehova i givim ol elda long kongregesen. Olgeta ya oli save leftemap tingting blong yu mo oli save givim ol gudfala advaes we oli kamaot long Baebol. Oli olsem “strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Bambae oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.” (Aesea 32:2) Yumi harem gud tumas blong save se ol brata ya oli rere oltaem blong givhan long yumi. Taswe, taem sam samting i mekem laef blong yu i had, i gud yu go luk wan elda. Olgeta ya oli save givhan long yu blong yu gohed blong mekem wok blong Jehova.

I tru se ol elda oli no save stretem olgeta trabol blong yu. Ol elda oli sinman nomo olsem yu. (Ol Wok 14:15) Be taem yu go luk wan elda mo hem i prea long Jehova long saed blong trabol blong yu, samting ya i save mekem yu yu harem gud. (Jemes 5:14, 15) I gat wan brata long Itali we i stap harem nogud longtaem finis from wan sik we hem i gat. Ale, ol elda oli go leftemap tingting blong hem. Brata ya i talem se: “Ol elda ya oli rili soemaot lav long mi mo oli kea gud long mi. Oli kam visitim mi oltaem. Samting ya i givhan long mi blong mi stanap strong longtaem.” Sipos yu stap harem nogud long wan samting, Jehova i wantem se yu go luk ol elda blong oli givhan long yu.

Sipos yumi gohed nomo blong mekem wok blong Jehova, bambae yumi luk se Jehova i stap givhan long yumi. Hemia nao samting we Jon i mekem. Taem hem i gat 39 yia, ol dokta oli faenemaot se hem i gat kansa. Hem i harem se i no stret we hem i sik olsem from we hem i yangfala nomo. Mo hem i wari tu long woman blong hem mo boe blong tufala we i gat 3 yia nomo. Hem i talem se: “Woman blong mi i lukaot long pikinini blong mitufala mo i mas lukaot long mi tu, mo tu hem i mas tekem mi mi go luk dokta.” Mo Jon i stap tekem ol meresin we oli mekem hem i taed mo bel blong hem i soa. Be i no hemia nomo. Jon i harem se papa blong hem klosap i ded, taswe i nidim wan man blong lukaot long hem tu.

?Wanem i givhan long Jon mo famle blong hem long hadtaem ya? Nating se plante taem Jon i taed, be hem i meksua se famle blong hem i gohed nomo blong mekem wok blong Jehova. Hem i talem se: “Mifala i go long olgeta miting. Mifala i prij evri wik. Mo mifala i gohed blong mekem famle wosip oltaem, nating se samtaem i no isi.” Jon i luksave se i impoten tumas blong hem i fren gud wetem Jehova oltaem. Nating se long stat, hem i wari tumas mo tingting blong hem i paspas, be naoia tingting blong hem i kwaet. Hem i save se Jehova i lavem hem mo i givim paoa long hem. Yes, Jehova i save givhan long yu tu, taem yu wari mo yu fraet. Jon i talem se: “Jehova i save mekem yu yu strong, sem mak olsem we hem i mekem long mi.”

Taem yu stap harem nogud long wan samting, i gud yu tingbaot ol tok blong Pol se: “Yufala i mas stanap strong oltaem.” Yu mas dipen long Jehova, yu mas prea long hem. Yu mas joen gud wetem ol Kristin brata mo sista blong yu. Yu mas askem ol elda blong oli givhan long yu. Mo yu mas gohed nomo blong mekem wosip long Jehova. Yes, long wanem trabol no hadtaem we yu kasem naoia, no we maet bambae yu kasem long fiuja, be Jehova bambae i givhan long yu blong yu stanap strong.