1. ?Aposol Jon i pulum yumi blong yumi tingbaot wanem? ?From wanem?

APOSOL Jon i pulum yumi blong yumi tingting dip long bigfala lav we Jehova i gat. Long 1 Jon 3:1, hem i talem se: “Yufala i mas luklukgud long fasin ya blong Papa blong yumi, we hem i lavem yumi tumas.” Taem yumi tingting dip long bigfala lav blong Jehova mo olsem wanem hem i soemaot lav ya long yumi, yumi kam klosap moa long hem mo yumi lavem hem moa.

2. ?From wanem samfala oli no kasem save se God i lavem olgeta?

² Sore tumas, samfala oli no kasem save se God i lavem olgeta. Oli ting se God i no tingbaot ol man, be hem i mekem ol rul nomo mo i panisim ol man we oli no obei long hem. Samfala we oli bilif long ol giaman tijing, oli ting se God i stap spolem ol man, taswe oli no save lavem hem. Sam narafala oli ting se God i lavem ol man, nomata wanem samting oli mekem. Be taem yu yu stadi Baebol, yu kasem save trutok blong Jehova. Yu save se stamba fasin blong God hemia lav, mo se hem i givim Pikinini  blong hem blong i pemaot yumi. (Jon 3:16; 1 Jon 4:8) Be maet ol samting we i hapen long laef blong yu, i mekem yu yu ting se Jehova i no lavem yu.

3. ?Wanem i save givhan long yumi blong yumi kasem save se Jehova i lavem yumi?

³ Blong kasem save se Jehova i lavem yumi, fastaem yumi mas kasem save se Jehova i mekem yumi. Hem nao i givim laef long yumi. (Ridim Ol Sam 100:3-5.) Taswe, Baebol i talem se fas man hem i “pikinini blong God.” (Luk 3:38) Mo Jisas i talem se yumi mas singaot Jehova se: ‘Papa blong mifala long heven.’ (Matiu 6:9) Yes, Jehova i Papa blong yumi mo hem i lavem yumi, olsem wan gudfala papa we i lavem ol pikinini blong hem.

4. (1) ?Jehova i wanem kaen Papa? (2) ?Bambae yumi tokbaot wanem long stadi ya mo long nekis stadi?

⁴ Samfala oli luk se i had blong tingbaot Jehova olsem wan Papa we i lavem yumi. Maet oli harem nogud taem oli tingting bak long yangtaem blong olgeta, from we papa blong olgeta i mekem i nogud long olgeta. Jehova i no save mekem olsem long ol pikinini blong hem. Hem i wan Papa we i moagud i winim olgeta papa long wol. (Ol Sam 27:10) Hem i lavem yumi tumas mo i lukaot gud long yumi long plante fasin. Moa we yumi harem se Jehova i lavem yumi, moa we bambae yumi lavem hem. (Jemes 4:8) Long stadi ya, bambae yumi tokbaot fo samting we Jehova i mekem blong soemaot se hem i lavem yumi. Mo long nekis stadi, bambae yumi tokbaot fo samting we yumi save mekem blong soemaot se yumi lavem hem.

5. ?God i stap givim wanem long yumi evriwan?

⁵ Taem aposol Pol i stap long taon ya Atens long Gris, hem i luk we i gat plante pija blong ol giaman god. Mo tu, ol man oli bilif se ol god ya oli givim laef long olgeta. Taswe, Pol i tokbaot ‘God ya we i mekem wol mo olgeta samting we oli stap long hem.’ Hem i talem se God ya nao i “mekem yumi evriwan i laef, mo hem i stap givim olgeta samting long yumi.” (Ol Wok 17:24, 25, 28) Jehova i stap givim evri samting we yumi nidim blong laef mo blong harem gud long laef. Yu traem tingbaot sam samting we hem i givim long yumi from we hem i lavem yumi.

6. ?Jehova i givim wanem hom long yumi? (Yu luk pija long stat blong stadi.)

⁶ Yumi save tingbaot se Jehova i rerem wan gudfala hom, blong yumi save stap long hem. (Ol Sam 115:15, 16) Wol ya i defren long olgeta narafala planet we God i mekem. Ol saentis oli go antap long skae blong traem faenem ol narafala planet, be oli no save faenem wan planet we i gat olgeta samting we man i nidim blong stap laef. Be long wol ya, Jehova i givim evri samting we yumi nidim blong laef, mo antap long hemia, hem i mekem wol i naes, i wan ples we yumi save stap sef mo harem gud long hem. (Aesea 45:18) Taem yumi tingting gud long naesfala hom we Papa blong yumi, Jehova, i givim long yumi, yumi kasem save se hem i lavem yumi tumas.—Ridim Job 38:4, 7; Ol Sam 8:3-5.

7. ?Jehova i mekem yumi wetem wanem fasin, we i soemaot se hem i lavem yumi?

⁷ I gat wan narafala samting tu we i soemaot se Jehova i lavem yumi. Hem i mekem yumi we yumi naf blong folem fasin blong hem. (Jenesis 1:27) Hemia i min se, yumi naf blong harem se hem i lavem yumi, mo yumi naf blong lavem hem. Hem i save se samting ya bambae i mekem yumi glad. Yu  traem tingbaot ol pikinini. Oli glad moa taem oli harem se papa mo mama blong olgeta, tufala i lavem olgeta. Mo yumi no mas fogetem samting we Jisas i tijim yumi long hem, se bambae yumi glad sipos yumi stap klosap long Papa blong yumi Jehova. (Matiu 5:3) Hem i stap givim “plante samting long yumi, blong yumi harem gud long hem.” I klia se hem i gat gladhat blong givim presen long yumi, mo hem i lavem yumi tumas.—1 Timoti 6:17; Ol Sam 145:16.

8. ?From wanem yumi wantem se Jehova i tijim yumi?

⁸ Ol papa oli lavem ol pikinini blong olgeta, taswe oli no wantem we narafala i giaman long olgeta no i lidim olgeta oli go krangke. Be tede, plante papa mo mama oli no agri long ol tok blong Baebol, we i talem samting we i stret mo samting we i no stret. Taswe, oli no save lidim gud pikinini blong olgeta, nao famle i no glad mo tingting blong olgeta i fasfas. (Ol Proveb 14:12)  Be Jehova i lidim gud ol pikinini blong hem, from we hem i “God blong trutok.” (Ol Sam 31:5, NW) Hem i glad blong tijim yumi long samting we i tru long saed blong hem. Mo tu, hem i tijim yumi olsem wanem blong mekem wosip long hem, mo hem i soemaot long yumi fasin blong laef we i beswan. (Ridim Ol Sam 43:3.) ?Jehova i tijim yumi long wanem samting, we i soemaot se hem i lavem yumi?

9, 10. (1) ?From wanem Jehova i tijim yumi long saed blong hem? (2) ?Hem i talem se yumi joen olsem wanem long plan blong hem?

⁹ Jehova i tijim yumi long saed blong hem, from we hem i wantem se yumi save hem. (Jemes 4:8) Ale, hem i talem nem blong hem long yumi. Baebol i talemaot nem ya plante moa taem i bitim ol narafala nem. Mo tu, Jehova i talem ol fasin blong hem long yumi. Taem yumi lukluk ol samting raonabaot long yumi we hem i mekem, yumi luksave se hem i gat paoa mo hem i waes. (Rom 1:20) Mo taem yumi ridim Baebol, yumi kasem save se hem i mekem i stret oltaem mo hem i lavem yumi tumas. Taem yumi save ol nambawan fasin ya blong Jehova, yumi kam klosap moa long hem.

¹⁰ Mo tu, Jehova i tijim yumi olsem wanem yumi joen long plan blong hem. Hem i talem se yumi stap insaed long famle blong hem. Mo hem i eksplenem samting we hem i wantem se yumi mekem, blong yumi save joen gud mo yumi gat pis wetem ol narafala long famle ya. Baebol i soemaot klia se God i no givim raet long yumi blong yumi talem wanem i stret mo wanem i no stret. (Jeremaea 10:23) Jehova i save wanem samting i moa gud long yumi. Sipos yumi letem hem i lidim yumi mo yumi obei long hem, bambae yumi gat pis mo yumi harem gud long laef. Jehova i tijim yumi long impoten trutok ya from we hem i lavem yumi.

11. ?Papa blong yumi we i lavem yumi, i talem wanem long saed blong fiuja?

¹¹ Wan papa we i lavem pikinini blong hem, i tingting gud long fiuja blong pikinini ya. Hem i wantem se pikinini ya i gat wan gudfala laef. Sore tumas, plante man tede oli wari long fiuja, mo plante oli westem taem blong olgeta blong wok had long samting we i no save stap longtaem. (Ol Sam 90:10) !Yumi glad tumas se Papa blong yumi, Jehova, i tijim yumi blong laef long fasin we i mekem yumi harem gud naoia, mo i promes tu blong givim nambawan laef long fiuja!

12. ?Olsem wanem Jehova i traem blong givhan long Ken mo Baruk?

¹² Taem Jehova i luk we Ken i stap long rod blong mekem bigfala sin, hem i traem blong givhan long hem. Hem i askem long Ken se: “?From wanem yu yu kros olsem? ?Weswe fes blong yu i kam nogud olsem? Sipos fasin blong yu i stret, bambae mi mi glad long yu.” (Jenesis 4:6, 7) Ken i no wantem se Jehova i givhan long hem, mo from samting ya, hem i kasem trabol. (Jenesis 4:11-13) Long wan narafala taem, Jehova i luk we Baruk i taed mo i harem nogud. Hemia from we tingting blong Baruk i  no stret. Ale, Jehova i talem long hem se tingting blong hem i no stret mo hem i mas jenisim. Baruk i lesin long advaes ya, mo samting ya i sevem laef blong hem.—Jeremaea 45:2-5.

13. ?Taem ol man blong Jehova bifo oli kasem trabol long laef blong olgeta, oli lanem wanem?

¹³ Jehova i stap lidim mo stretem yumi from we hem i lavem yumi. Hem i no stretem yumi nomo, be hem i trenem yumi tu. (Hibrus 12:6) Baebol i tokbaot plante man blong Jehova we hem i trenem olgeta blong oli kam gud moa, olsem Josef, Moses, mo Deved, we oli kasem plante trabol. Long ol trabol ya, Jehova i stap wetem olgeta. Mo taem oli winim ol trabol ya, oli lanem plante samting we i givhan long olgeta blong oli mekem wok we i bigwan moa. Taem yumi ridim stori blong ol man we Jehova i trenem olgeta mo i givhan long olgeta, yumi kasem save se Jehova i lavem yumi tumas.—Ridim Ol Proveb 3:11, 12.

14. ?Olsem wanem Jehova i soemaot lav long yumi taem yumi mekem wan samting we i rong?

¹⁴ Taem yumi mekem wan samting we i rong, Jehova i gohed blong soemaot lav long yumi. Sipos yumi letem hem i stretem yumi mo yumi tanem tingting blong yumi, hem “i kwik blong fogivim yumi, i tekemaot ol sin blong yumi.” (Aesea 55:7) ?Hemia i minim wanem? Deved i tokbaot fasin blong Jehova blong fogivim man, mo i soemaot se hem i wan Papa we i gat sore, i se: “Hem i stap fogivim mi, i stap tekemaot ol sin blong mi. Hem i stap tekemaot ol sik blong mi, i mekem mi mi gud bakegen, mo i stap lukaot gud long mi blong mi mi no ded. Hem i lavem mi tumas, mo i sore tumas long mi, nao oltaem hem i stap mekem i gud tumas long mi. Ol sin ya blong yumi, hem i stap tekemaot olgeta i go longwe we longwe long yumi, olsem we saed long is i stap longwe long saed long wes.” (Ol Sam 103:3, 4, 12) Jehova i yusum ol defdefren rod blong stretem yumi mo blong lidim yumi. ?Olsem wanem? ?Yu yu hareap blong jenisim fasin blong yu? Yu no mas fogetem se Jehova i stretem yumi from we hem i lavem yumi.—Ol Sam 30:5.

15. ?Wanem narafala samting we i soemaot se Jehova i lavem yumi?

¹⁵ Wan papa we i lavem famle blong hem, i protektem olgeta taem i gat denja. Hemia nao samting we Papa blong yumi Jehova i mekem. Wan man we i raetem Ol Sam i tokbaot Jehova, i se: “Hem i stap lukaot gud long laef blong [ol man blong hem], mo taem we olgeta oli stap long paoa blong ol man nogud, hem i stap tekemaot olgeta.” (Ol Sam 97:10) Yu traem tingbaot: Yu yu protektem ae blong yu from we ae i wan samting we i impoten tumas. Long sem fasin, Jehova i protektem ol man blong hem, from we long tingting blong hem oli impoten tumas.—Ridim Sekaraea 2:8.

16, 17. Long taem bifo mo tede, ?Jehova i protektem ol man blong hem olsem wanem?

¹⁶ Wan rod we Jehova i yusum long taem bifo mo tede tu blong protektem ol man blong hem, hemia ol enjel. (Ol Sam 91:11) Long wan naet, wan enjel i kilim i ded  185,000 soldia blong Asiria, mo i sevem ol man blong God. (2 King 19:35) Long taem blong ol fas Kristin, ol enjel oli mekem Pita, mo Pol, mo sam narafala, oli kamaot long kalabus. (Ol Wok 5:18-20; 12:6-11) I no longtaem i pas, i gat wan rabis faet long wan ples long Afrika. Ol man oli stap faet, oli stilim ol samting, oli repem woman, mo oli kilim man i ded. I no gat wan brata blong yumi we i ded, be plante long olgeta oli lusum evri samting blong olgeta. Nating se i olsem, olgeta evriwan oli haremsave se Jehova i lavem olgeta, mo oli save se hem i stap lukaot gud long laef blong olgeta. Oli safa bigwan, be oli no lusum glad blong olgeta. Taem wan brata blong hedkwota i visitim olgeta, hem i askem long ol brata mo sista se oli harem olsem wanem. Oli ansa se: “!Mifala i gud nomo, Jehova i lukaot gud long mifala!”

¹⁷ I tru se sam man blong Jehova oli ded from we oli obei long hem, olsem disaepol Steven. I no evritaem we Jehova i blokem samting ya. Be hem i protektem ol man blong hem olsem wan grup, taem hem i givim woning long ol trik we Setan i stap yusum. (Efesas 6:10-12) Ol woning ya oli stap long Baebol mo long ol buk we ogenaesesen blong Jehova i wokem. Yumi kasem woning blong ol trabol we i save kamaot from Intenet, fasin blong lavem mane tumas, ol muvi we oli soemaot faet mo ol rabis fasin, ol buk, mo ol pleplei. Samting ya i soemaot klia se Jehova i lavem yumi mo i wantem protektem yumi.

18. Taem yu tingbaot we Jehova i lavem yu, ?yu harem olsem wanem?

¹⁸ Taem Moses i tingting bak long ol yia we hem i mekem wok blong Jehova, hem i bilif strong se Jehova i lavem hem. Moses i talem se: “Plis yu mekem we evri moning, mifala i savegud we oltaem yu yu lavem mifala tumas, nao bambae mifala i save singsing, mifala i save glad oltaem long laef blong mifala.” (Ol Sam 90:14) !I no gat wan blesing we i bigwan moa i bitim we yumi save se Jehova i lavem yumi, mo yumi harem lav blong hem! Yumi gat sem tingting olsem aposol Jon, we i talem se: “Yufala i mas luklukgud long fasin ya blong Papa blong yumi, we hem i lavem yumi tumas.”—1 Jon 3:1.