1, 2. ?Olsem wanem Jehova i tijim yumi blong lavem hem?

NAMBAWAN rod blong tijim ol pikinini, i blong soemaot eksampol long olgeta. Taem wan papa i lavem ol pikinini blong hem, hem i stap tijim olgeta blong oli lavem narafala. I no gat wan man we i lavem yumi olsem Papa blong yumi Jehova. Taswe “from we God i lavem yumi fastaem,” yumi lanem olsem wanem blong lavem hem.—1 Jon 4:19.

² ?Jehova i mekem wanem blong “lavem yumi fastaem”? Baebol i talem se: “Kraes i ded blong sevem yumi, long taem ya we yumi stap mekem i nogud yet.” (Rom 5:8) Papa blong yumi Jehova, we i lavem yumi, i givim Pikinini blong hem, blong i pemaot yumi long sin mo ded. Nambawan presen ya i mekem se yumi save kam klosap long Jehova mo yumi lavem hem. Taem Jehova i mekem olsem, hem i soemaot eksampol long yumi. Hem i tijim yumi se sipos yumi lavem hem, bambae yumi tingbaot hem fastaem, mo bambae yumi gat gladhat blong givim presen long hem.—1 Jon 4:10.

3, 4. ?Yumi soemaot olsem wanem se yumi lavem God?

³ Lav nao i stamba fasin blong Jehova. Yumi kasem save from wanem Jisas i talem se loa we i moa impoten, hemia se: “Yufala  i mas lavem Hae God ya we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.” (Mak 12:30) Jehova i wantem se yumi lavem hem long “olgeta hat” blong yumi. Jehova bambae i harem nogud sipos yumi lavem narafala man no narafala samting, i winim we yumi lavem hem. Be taem yumi lavem Jehova, hemia i no wan filing nomo. Mo tu, Jehova i wantem se yumi lavem hem long “olgeta tingting” mo “olgeta paoa” blong yumi. Hemia i min se olgeta tingting mo aksen blong yumi oli mas soemaot se yumi lavem hem.—Ridim Maeka 6:8.

⁴ Yumi mas lavem Jehova wetem evri haf blong bodi mo laef blong yumi. Taem yumi putum hem i stap fastaem long ol narafala samting long laef blong yumi, yumi soemaot se yumi lavem hem tumas. Long las stadi, yumi tokbaot fo samting we Jehova i mekem blong soemaot se hem i lavem ol pikinini blong hem. Naoia, bambae yumi luk olsem wanem yumi save lavem Jehova moa, mo soemaot se yumi lavem hem.

5. Taem yumi tingbaot ol samting we Jehova i mekem blong yumi, ?yumi wantem mekem wanem?

⁵ Taem narafala i givim presen long yu, yu talem tangkiu. Mo tu, yu yusum presen ya from we yu glad long hem. Jemes i talem se: “Evri samting we oli gud mo evri presen we oli nambawan we yumi kasem, oli kamaot long heven nomo. God i mekem olgeta laet blong skae, mo hem i stap givim ol gudgudfala samting ya long yumi. Fasin blong hem i no save jenis, mo hem i no save tanem baksaed long yumi blong livim yumi long tudak.” (Jemes 1:17) Yumi glad tumas we Jehova i givim evri samting we yumi nidim blong laef mo blong harem gud. Yumi luksave se hem i lavem yumi, mo yumi wantem soemaot se yumi lavem hem. ?Yu yu harem olsem?

6. ?Ol man Isrel oli mas mekem wanem sipos oli wantem se Jehova i blesem olgeta?

⁶ Ol man Isrel oli kasem plante gudfala samting long Jehova. Hem i givim ol loa we oli lidim olgeta blong plante handred yia, mo hem i givim ol samting we oli nidim blong laef. (Dutronome 4:7, 8) Ol man Isrel oli stap talem tangkiu long Jehova taem oli obei long ol loa blong hem. Wan long ol loa ya, hemia se taem oli givim presen long Jehova, oli mas tekem “ol nambawan kakae long ol fas kakae blong garen” blong givim long hem. (Eksodas 23:19) Ol man Isrel oli save se Jehova bambae i gohed blong blesem olgeta, sipos oli obei long hem mo oli givim presen we i beswan.—Ridim Dutronome 8:7-11.

7. ?Olsem wanem yumi givim “ol nambawan samting” blong soemaot se yumi lavem Jehova?

⁷ Yumi soemaot se yumi lavem Jehova taem yumi givim “ol nambawan samting” blong yumi long hem. (Ol Proveb 3:9) Yumi mekem olsem taem yumi yusum ol samting we yumi gat blong ona long hem. Yumi save givim presen mane blong givhan long wok blong Kingdom long kongregesen blong yumi mo long fulwol. Nating se yumi gat plante samting no yumi gat smol nomo, be yumi evriwan i save yusum samting we yumi gat blong soemaot se yumi lavem Jehova. (2 Korin 8:12) Be i gat sam narafala rod tu blong soemaot se yumi lavem hem.

8, 9. ?Wanem narafala rod blong soemaot se yumi lavem Jehova? ?Mike mo famle blong hem oli mekem wanem?

⁸ Jisas i tijim yumi se yumi mas obei long Kingdom fastaem, mo yumi no mas tingting tumas long klos mo kakae. Papa blong yumi i promes se bambae hem i givim ol samting we yumi nidim. (Matiu 6:31-33) Yumi trastem Jehova, mo hemia i stret nomo, from  we taem yumi lavem wan man, yumi trastem hem. Yumi save se Jehova bambae i holem promes blong hem. Moa we yumi trastem hem, moa we yumi soemaot se yumi lavem hem. (Ol Sam 143:8) Taswe, maet yumi askem se: ‘?Olsem wanem long ol plan we mi mi mekem? ?Mi mi yusum taem mo paoa blong mi olsem wanem? ?Ol samting ya oli soemaot se mi lavem Jehova? ?Mi mi trastem Jehova evri dei se bambae hem i givim samting we mi mi nidim?’

⁹ Mike mo famle blong hem oli trastem Jehova. Taem Mike i yangfala, hem i wantem go prij long narafala kantri. Afta we hem i mared mo i gat tu pikinini, hem i wantem yet blong go long narafala kantri. Taem hem mo famle blong hem oli ridim stori blong ol brata mo sista we oli go long ples we i nidim moa man blong prij, oli jenisim sam samting long laef blong olgeta blong mekem se i no moa fasfas. Oli salem bigfala haos blong olgeta mo oli muv i go long wan haos we i smol moa. Mo tu, Mike i gat wan bisnes blong klinim ol haos, ale hem i mekem bisnes ya i kam smol moa. Mo hem i lanem blong yusum Intenet, blong i save gohed blong mekem bisnes ya taem hem i stap long narafala kantri. Nao Mike mo famle blong hem oli muv i go, mo oli harem gud tumas long wok blong prij. Hem i talem se: “!Mifala i luksave se ol tok blong Matiu 6:33 i kamtru long mifala!”

10. ?From wanem i gud yumi tingting dip long ol samting we Jehova i mekem mo i talem, olsem Deved?

¹⁰ King Deved i talem se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.” Hem i gohed, i se: “Loa blong Hae God i stret gud, mo i stap givim niufala paoa long yumi. Ol tok we Hae God i putum, yumi save bilif long hem, mo i stap givim waes long olgeta we oli no waes.” Taem Deved i tingting dip long ol loa blong God we oli waes, mo ol naes samting raonabaot long hem we God i mekem, hem i kam klosap moa long Jehova mo i wantem soemaot se hem i lavem hem. Deved i talem se: “Prea blong mi, we ol tok blong mi mo ol tingting blong mi bambae oli stret gud long fes blong yu.”—Ol Sam 19:1, 7, 14.

11. Blong soemaot se yumi lavem Jehova, ?yumi mas mekem wanem long ol save we hem i givim? (Yu luk pija long stat blong stadi.)

¹¹ Tede, Jehova i tijim yumi long plante samting, olsem stamba tingting blong hem, ol samting raonabaot long yumi we hem i mekem, mo Tok blong hem. Wol blong Setan i pulum ol man blong oli kasem moa save, be plante man we oli skul gud oli no moa lavem God. Tijing blong Jehova i defren. Jehova i wantem se yumi gat save, be hem i givhan long yumi blong yumi kam waes tu. Hem i wantem se yumi yusum ol save ya blong givhan long yumi bakegen, mo blong givhan long ol narafala. (Ol Proveb 4:5-7) Taswe, hem i wantem se yumi talemaot “trutok” long ol narafala mo yumi givhan long olgeta blong oli kasem laef. (1 Timoti 2:4) Yumi soemaot se yumi lavem Jehova mo ol man, taem yumi tijim olgeta long Kingdom blong God mo ol gudfala blesing we Kingdom ya bambae i karem long ol man.—Ridim Ol Sam 66:16, 17.

12. ?Wan yangfala sista i talem wanem from presen we Jehova i givim?

 ¹² Ol yangfala tu oli save tingting dip long ol tijing blong Jehova, mo ol samting we hem i givim. Shannon i stap tingting bak long bigfala asembli ya “Fasgud Long God,” we hem i go long hem taem hem i gat 11 yia mo sista blong hem i gat 10 yia. Long wan tok long asembli ya, oli askem long ol yangfala blong oli sidaon wanples. Fastaem Shannon i fraet. Be afta, hem i sapraes, from we ol yangfala oli kasem wan niufala buk, nem blong hem Ol Kwestin We Ol Yangfala Oli Askem—Ol Ansa We Oli Wok Gud. Taem hem i kasem nambawan presen ya, ?hem i harem olsem wanem? Hem i talem se: “Mi mi jes kasem save long taem ya se Jehova i laef i stap mo i lavem mi. !Yumi glad tumas se God blong yumi Jehova, i givim ol nambawan presen olsem!”

13, 14. ?Yumi mas mekem wanem taem Jehova i stretem yumi? ?From wanem?

¹³ Baebol i talem se: “Ol man we [Jehova] i lavem olgeta, oltaem hem i stap stretem olgeta, olsem we papa i stap stretem pikinini blong hem, we i glad tumas long hem.” (Ol Proveb 3:12) Taem yumi letem Jehova i stretem mo trenem yumi, yumi lanem blong mekem samting we i stret, mo yumi gat pis long laef blong yumi. I tru, “sipos God i stretem yumi, bambae samting ya i no save mekem yumi harem gud, i mas mekem we yumi harem nogud.” (Hibrus 12:11) Nating se i olsem, ?yumi mas mekem wanem taem Jehova i stretem yumi? I nogud yumi sakemaot advaes blong Jehova no yumi  kros from we yumi no laekem ol tok blong man we i stretem yumi. Yumi lavem Jehova, taswe yumi mas lesin long hem mo jenisim ol fasin we oli no stret.

¹⁴ Long taem blong Malakae, plante man Isrel oli no wantem lesin long Jehova. Jehova i no glad long ol sakrefaes we oli mekem, be oli no wantem save. Taswe Jehova i tok strong blong stretem olgeta. (Ridim Malakae 1:12, 13.) Jehova i tok long olgeta plante taem, be oli no wantem harem. Ale hem i talem se: “Bambae mi mekem we trabol i kam kasem yufala. Bambae mi mekem we trabol i kam kasem ol gudgudfala samting we yufala i stap kasem.” (Malakae 2:1, 2) I klia se, sipos yumi no wantem lesin long advaes blong Jehova, no yumi ting nating long advaes ya, bambae hem i no moa wantem yumi olsem fren blong hem.

15. ?Yumi no mas gat wanem tingting?

¹⁵ Wol blong Setan i pulum ol man blong oli flas mo oli tingbaot olgeta nomo. Plante man oli no wantem we narafala i stretem olgeta mo i talem samting we oli mas mekem. Samfala oli fosem olgeta nomo blong oli lesin long advaes. Be yumi no mas mekem olsem. Baebol i talem se: “Yufala i no mas letem fasin blong yufala i kam olsem fasin blong ol man long wol.” Yumi mas kasem save long samting we Jehova i glad long hem, mo yumi mekem. (Rom 12:2) Hem i yusum ogenaesesen blong hem blong stretem yumi. Yu traem tingbaot ol advaes we yumi kasem, long stret fasin blong man wetem woman, olsem wanem blong jusum ol fren mo blong jusum samting we yumi mekem blong spel mo pleplei. Yumi mas lesin long ol advaes we Jehova i givim mo yumi jenisim fasin blong yumi blong mekem hem i glad. Taem yumi mekem olsem, yumi soemaot se yumi lavem hem mo yumi glad blong hem i lidim yumi.—Jon 14:31; Rom 6:17.

16, 17. (1) ?From wanem yumi mas faenemaot tingting blong Jehova bifo we yumi mekem desisen? (2) ?Ol man Isrel oli mekem wanem we i soemaot se oli no trastem Jehova?

¹⁶ Ol pikinini oli trastem papa mo mama  blong olgeta blong tufala i protektem olgeta mo givhan long olgeta. Taem oli kam bigman, oli naf blong mekem prapa desisen blong olgeta. Be samtaem oli askem advaes yet long papa mo mama blong olgeta, from we oli save se tufala i save givim gudfala advaes. Papa blong yumi, Jehova, i letem yumi blong yumi mekem ol desisen blong yumi. Nating se i olsem, oltaem yumi askem long hem blong i givhan long yumi, from we yumi trastem hem mo yumi lavem hem. Mo tu, bifo we yumi mekem wan desisen, yumi mekem bes blong yumi blong faenemaot tingting blong hem. Sipos yumi trastem Jehova, bambae hem i givim tabu spirit long yumi. Hemia bambae i givhan long yumi blong yumi mekem samting we i stret.—Filipae 2:13.

¹⁷ Long taem blong Samuel, ol man Isrel oli faet agens long ol man Filistia, be oli lus. Biaen, oli no askem long Jehova wanem we oli mas mekem, be oli girap oli talem se: “Yumi mas go long Silo, yumi karem Bokis ya we i Saen blong Promes blong [God] i kam, blong hem i stap wetem yumi, i tekemaot yumi long han blong ol enemi ya blong yumi, i sevem yumi.” ?Wanem i kamaot from desisen ya? Ol man Filistia “oli winim ol laen blong Isrel, oli ronem olgeta, oli kilim toti taosen soldia blong olgeta oli ded . . . mo Bokis ya we i Saen blong Promes blong Hae God, ol man Filistia oli karem i go long ples blong olgeta.” (1 Samuel 4:2-4, 10, 11) Ol man Isrel oli ting se sipos oli karem Bokis ya i go wetem olgeta, Jehova bambae i givhan long olgeta mo i protektem olgeta. Be oli no askem long Jehova blong i givhan long olgeta, mo oli no traem faenemaot tingting blong hem. Oli mekem samting we olgeta nomo oli ting se i stret, mo oli kasem trabol from.—Ridim Ol Proveb 14:12.

18. ?Wanem ol tok blong Baebol we i talem se yu mas trastem Jehova?

¹⁸ Wan man blong raetem Ol Sam, we i laekem Jehova tumas mo i trastem hem, i talem se: “Bambae mi mi putum tingting blong mi i stap long yu nomo, mo bakegen, bambae mi stap presem yu we yu yu God blong mi, yu sevem mi . . . tingting blong mi i kam nogud, ale, mi putum tingting blong mi i stap long yu bakegen.” (Ol Sam 42:5, 6) ?Yu yu gat sem tingting olsem man ya? ?Yu yu harem se yu stap klosap long Jehova mo yu save trastem hem? I gud yu traehad blong trastem hem moa. Baebol i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”—Ol Proveb 3:5, 6.

19. ?Bambae yu soemaot olsem wanem se yu lavem Jehova?

¹⁹ Jehova i lavem yumi fastaem, nao hemia i tijim yumi olsem wanem blong lavem hem. I gud yu tingbaot oltaem, ol samting we hem i mekem blong yu, mo olsem wanem hem i lavem yu. Yu mas soemaot long hem se yu lavem hem long olgeta hat, mo laef, mo tingting, mo paoa blong yu.—Mak 12:30.