1, 2. ?Wanem i mekem se ol man oli defren long ol anamol?

BREN blong man i spesel. Eksampol, yumi ol man yumi naf blong lanem wan lanwis mo lanwis nao i mekem se yumi save rid, raet, toktok mo kasem save long samting we yumi harem. Lanwis i givhan long yumi tu blong yumi prea mo singsing blong presem Jehova. Olgeta samting ya oli mekem se yumi defren long ol anamol. I had blong ol saentis oli kasemsave gud olsem wanem bren blong yumi i save mekem ol nambawan samting ya.

² Fasin blong yumi blong yusum lanwis i wan presen we Jehova i givim. (Ol Sam 139:14; Revelesen 4:11) Mo tu, hem i givim wan narafala presen long yumi we i mekem se yumi defren long ol anamol. God i mekem ol man blong oli “tekem fasin blong hem.” Yumi gat fasin ya we yumi fri blong jusum wanem samting we yumi wantem mekem. Mo yumi save jusum blong yusum lanwis blong mekem wok blong Jehova mo blong presem hem.—Jenesis 1:27.

3. ?Jehova i givim wanem long yumi blong mekem yumi waes?

³ Jehova i givim Baebol blong soemaot long yumi olsem wanem blong mekem wok blong hem mo blong presem hem. Tede,  ful Baebol no sam haf blong hem i stap long bitim 2,800 lanwis. Taem yumi tingting dip long wanem we Baebol i talem, bambae yumi stat blong gat tingting blong God. (Ol Sam 40:5; 92:5; 139:17) Mo ol tingting blong Jehova oli mekem yumi waes mo oli lidim yumi blong kasem laef ya we i no save finis.—Ridim 2 Timoti 3:14-17.

4. ?Tingting dip i minim wanem? ?Wanem ol kwestin we bambae yumi tokbaot?

⁴ Taem yumi tingting dip long wan samting, hemia i min se yumi tingting gud long samting ya mo yumi no letem wan narafala samting i pulum tingting blong yumi. (Ol Sam 77:12; Ol Proveb 24:1, 2) Yumi save kasem plante gudfala samting, taem yumi tingting dip long samting we yumi lanem long Jehova mo Jisas. (Jon 17:3) Long stadi ya, bambae yumi ansa long ol kwestin ya: ?Yumi save mekem wanem blong rid long wan fasin we i mekem i isi long yumi blong yumi tingting dip? ?Yumi save tingting dip long wanem samting? ?Mo wanem i save givhan long yumi blong yumi tingting dip oltaem mo blong harem gud long hem?

5, 6. ?Wanem i save givhan long yu blong yu tingbaot mo kasemsave gud samting we yu ridim?

⁵ ?Yu yu luksave se i gat sam samting we yu stap mekem we neva yu tingbaot? Hemia taem yu stap pulum win, wokbaot, no taem yu stap ron long baskel. Be samtaem taem yu rid, maet yu no stap tingting long ol samting we yu stap ridim. Maet yu stat blong tingting long wan narafala samting taem yu stap rid. ?Bambae yu yu save mekem wanem blong blokem fasin ya? I impoten we yu putum tingting blong yu i stap long samting we yu stap ridim mo yu tingbaot mining blong hem. Afta, taem yu kasem en blong wan paragraf no wan haf blong wan smol stamba tok long wan magasin no buk blong yumi, i gud yu stop smol mo yu tingting dip long samting we yu jes ridim. I gud yu tingbaot wanem yu lanem mo yu meksua se yu kasemsave gud long hem.

⁶ Ol saentis oli faenemaot se i isi moa blong tingbaot samting we yumi ridim taem yumi ridimaot. Jehova i save samting ya, taswe hem i talem long Josua blong i “tingting gud, [ridim long smol voes, NW]” long ol tok we i stap long buk blong Loa. (Ridim Josua 1:8.) Taem yu ridim Baebol long bigfala voes, samting ya bambae i givhan long yu blong yu putum tingting blong yu i stap long samting we yu ridim.

7. ?Wetaem nao i stret blong tingting dip long Baebol? (Yu luk pija long stat blong stadi.)

⁷ I nidim taem blong tingting dip mo blong putum tingting blong yumi i stap strong long samting we yumi stap stadi long hem. Taswe, i gud we yu tingting dip long taem we yu no taed mo long wan ples we i kwaet we i no gat plante samting i save pulum tingting blong yu. Long naet Deved i ledaon long bed mo i stap tingting dip. (Ol Sam 63:6) Jisas, we i stret gud olgeta, hem i jusum wan ples we i kwaet blong hem i tingting dip mo i prea.—Luk 6:12.

8. (1) ?Yumi save tingting dip long wanem samting? (2) ?Jehova i harem olsem wanem taem yumi tokbaot hem long ol narafala?

⁸ I impoten we yu tingting dip long ol samting we yu ridim long Baebol. Be i gat sam narafala samting tu we yu save tingting dip long hem. Eksampol, taem yu luk wan nambawan samting we Jehova i wokem, i gud yu tekem smoltaem blong tingbaot kwestin ya: ‘?Samting ya i tijim mi long wanem fasin blong Jehova?’ Taem yu mekem olsem, samting ya bambae i pusum yu blong yu prea blong talem tangkiu long Jehova. Mo sipos yu stap wetem ol narafala, bambae yu wantem tumas blong talemaot ol tingting blong yu long olgeta. (Ol Sam 104:24; Ol Wok 14:17) Jehova i luk ol samting we yumi stap mekem mo hem i glad taem yumi tingting dip, yumi prea mo yumi tokbaot hem long ol narafala. Baebol i talem se: “Ol man blong hem [Jehova] oli raetemdaon long wan buk, ol nem blong olgeta ya we oli ona gud long hem, mo oli tinghevi long hem.”—Malakae 3:16.

9. (1) ?Pol i talem long Timoti blong hem i tingting dip long wanem? (2) ?Yumi save tingting dip long wanem samting taem yumi rerem wok blong prij?

⁹ Aposol Pol i talem long Timoti blong hem i tingting dip long ol toktok blong hem, ol samting we hem i mekem mo ol fasin blong hem blong tij, blong luk olsem wanem oli save gat paoa long ol narafala. (Ridim 1 Timoti 4:12-16.) Yu tu yu save tingting dip long ol samting ya. Eksampol, taem yu  rerem wan Baebol stadi blong yu, yu nidim blong tingting dip. I gud yu tingbaot hem mo yu traem faenem wan gudfala kwestin no pijatok we i save givhan long hem. Taem yu mekem olsem, bambae bilif blong yu i kam strong mo bambae yu kam wan gudfala tija we yu gat strong tingting blong tijim narafala long Baebol. Taem yu tingting dip bifo we yu go prij, samting ya tu bambae i givhan long yu. (Ridim Esra 7:10.) Maet yu save ridim wan japta long buk blong Ol Wok blong givhan long yu blong yu gat strong tingting blong prij. Yu save tingting dip tu long ol vas we yu wantem yusum taem yu prij, mo long ol magasin no buk we yu wantem seremaot. (2 Timoti1:6) I gud yu tingbaot ol man long teritori, mo samting we bambae yu talem blong pulum tingting blong olgeta. Taem yu mekem olsem, bambae yu naf blong yusum gud Baebol blong talemaot gud nius long ol narafala.—1 Korin 2:4.

10. ?Wanem ol narafala samting we yumi save tingting dip long hem?

¹⁰ ?Wanem ol narafala samting we yu save tingting dip long hem? Sipos yu tekem sam not long taem blong ol pablik tok mo ol asembli, i gud we yu ridim ol not ya bakegen. Taem yu mekem olsem, i gud yu tingbaot kwestin ya se, ‘?Mi mi lanem wanem long Tok blong God mo long ogenaesesen blong hem?’ Yu save tingting dip tu long ol save we oli stap long ol Wajtaoa mo Wekap! mo long ol niufala buk we oli kamaot long ol asembli. Taem yu ridim wan stori long Yearbook, i gud yu tekem smol taem blong tingting long stori ya blong i save tajem hat blong yu. Taem yu ridim wan magasin no buk blong yumi, i gud yu putum wan mak long ol bigfala tingting no yu raetemdaon sam not. Samting ya bambae i givhan long yu taem yu stap rerem wan visit no wan tok. No maet i save givhan long wan elda blong i visitim wan brata no sista we i kasem trabol. Samting we i moa impoten hemia se, taem yu tekem smoltaem blong tingting dip long samting we yu ridim, ol tingting ya bambae oli tajem hat blong yu mo bambae yu save prea blong talem tangkiu long Jehova from ol gudfala samting we yu stap lanem.

11. ?Wanem impoten buk ya we yumi mas tingting dip long hem? ?Mo samting ya i givhan long yumi olsem wanem? (Yu luk futnot tu.)

¹¹ Baebol hem i impoten buk we yumi mas tingting dip long hem. ?Be sipos wan dei oli tekemaot Baebol blong yu, bambae yu mekem wanem? * I no gat man i save blokem yu blong yu tingting dip long ol samting we yu save finis, olsem ol vas blong Baebol we yu laekem tumas no ol singsing blong Kingdom. (Ol Wok 16:25) Mo spirit blong God bambae i givhan long yu blong yu tingbaot ol samting we yu lanem, nao bambae yu gohed blong holemstrong long Jehova.—Jon 14:26.

12. ?Wanem wan rod we yu save folem blong ridim Baebol evri dei?

¹² ?Wanem wan rod we yu save folem  blong ridim Baebol evri dei? Maet sam dei long wik yu save ridim mo tingting dip long Baebol riding we i stap long program blong Tiokratik Skul. Long ol narafala dei yu save ridim ol Gospel blong Matiu, Mak, Luk, mo Jon mo yu tingting dip long ol samting we Jisas i talem mo i mekem. (Rom 10:17; Hibrus 12:2; 1 Pita 2:21) Yumi gat wan buk tu we i tokbaot ol stori long laef blong Jisas, we i folem prapa oda blong taem we ol samting oli hapen. Buk ya i save givhan bigwan long yu taem yu stap ridim ol Gospel.—Jon 14:6.

13, 14. ?From wanem i impoten tumas blong yumi gohed blong tingting dip long Jehova mo Jisas? ?Mo samting ya bambae i pusum yumi blong mekem wanem?

¹³ Taem wan man i tingting dip long Jehova mo Jisas, samting ya bambae i givhan long hem blong i kam bigman long Kristin fasin mo bambae hem i save holemtaet strong bilif we hem i gat. (Hibrus 5:14; 6:1) Be sipos hem i spenem smol taem nomo blong tingting dip long God, bambae sloslo hem i no moa fren gud wetem Jehova mo tu hem i save lego Jehova. (Hibrus 2:1; 3:12) Jisas i givim woning ya se, sipos yumi no “gat gudfala tingting” taem yumi harem Tok blong God, bambae yumi no ‘holemstrong long tingting blong yumi blong obei long hem.’ Be, bambae i isi nomo blong yumi ‘tingting tumas long ol samting blong laef blong yumi, no yumi kam rijman, no yumi gat gud taem long laef blong yumi.’—Luk 8:14, 15.

¹⁴ I gud yumi gohed blong tingting dip long Baebol mo save moa Jehova. Hemia bambae i pusum yumi blong folem ol nambawan fasin blong hem. (2 Korin 3:18) Yumi save gohed blong lanem moa long Papa blong yumi long heven mo blong folem fasin blong hem blong olwe. !Hemia i wan nambawan blesing!—Prija 3:11.

15, 16. (1) ?Yu yu kasem wanem gudfala samting taem yu tingting dip long Jehova mo Jisas? (2) ?From wanem i had samtaem blong yumi tingting dip? ?From wanem yumi mas traehad oltaem blong tingting dip?

¹⁵ Taem yu gohed blong tingting dip long Jehova mo Jisas, hemia bambae i givhan long yu blong yu wok strong long trutok. Bambae yu yu wok strong blong leftemap tingting blong ol brata mo sista mo ol man we yu prij long olgeta. Mo taem yumi tingting dip long sakrefaes blong Jisas we Jehova i givim blong sevem yumi bambae yumi gohed blong tinghae long fasin we yumi gat blong fren gud wetem God. (Rom 3:24; Jemes 4:8) Mark i wan brata blong Saot Afrika, we i stap long kalabus blong tri yia from bilif blong hem, hem i talem se: “Fasin blong tingting dip, i olsem wan man we i glad tumas blong wokbaot i go blong lukluk wan niufala ples. Moa we yumi tingting dip long ol samting we Jehova i givim long yumi, moa we bambae yumi lanem plante niufala samting. Samtaem taem mi harem se tingting blong mi i foldaon no mi wari long wan samting, mi karem Baebol mo mi ridim wan vas. Mo taem mi tingting dip long hem, samting ya i mekem mi mi harem gud bakegen.”

 ¹⁶ Laef long wol ya i fulap long ol samting we oli save blokem yumi blong yumi faenem taem blong tingting dip long Baebol. Patrick, we i wan brata blong Afrika, i talem se: “Bren blong mi i olsem wan bokis blong leta, we i gat plante defdefren tingting i stap insaed long hem, olgeta we i gud wetem olgeta we i nogud. Taem mi stap jekem olgeta mo mi faenem ol tingting we i mekem mi wari, mi prea long Jehova blong hem i givhan long mi. Nao bambae mi save tingting dip we tingting blong mi i klia. Be i tekem plante taem blong mekem samting ya. Nating se i olsem, taem mi tingting dip long ol samting we Jehova i givim, mi mi harem se mi kam klosap moa long Jehova. Samting ya i mekem se mi kasemsave gud trutok.” (Ol Sam 94:19) Taem yumi ridim mo tingting dip long Baebol evri dei, bambae yumi kasem plante gudfala samting from.—Ol Wok 17:11.

17. ?Yu yu faenem taem olsem wanem blong tingting dip?

¹⁷ Sam man oli girap eli long moning blong ridim Baebol, tingting dip mo prea. Sam narafala oli mekem olsem long medel dei taem oli spel. Be maet yu luk se gudfala taem we yu save mekem olsem hemia long sapa no bifo we yu go slip. Samfala oli laekem blong ridim Baebol long moning mo bakegen long naet bifo we oli go slip. (Josua 1:8) Be samting we i moa impoten hemia se, yu mas ‘yusum evri janis we yu yu kasem.’ Hemia i min se yu no spenem tumas taem long ol samting we oli no impoten. Long rod ya, bambae yu gat moa taem blong tingting dip evri dei long Tok blong God.—Efesas 5:15, 16.

18. Olgeta we oli stap tingting dip long Tok blong God evri dei mo oli folem, ?bambae oli kasem wanem blesing?

¹⁸ Baebol i promes se Jehova bambae i blesem olgeta we oli stap tingting dip long Tok blong hem, mo oli stap traehad blong folem ol samting we oli lanem. (Ridim Ol Sam 1:1-3.) Jisas i talem se: “Man we i harem tok blong God mo i obei long hem, hem i save harem gud moa.” (Luk 11:28) Be samting we i moa impoten hemia se, taem yumi tingting dip long Tok blong Jehova evri dei, samting ya bambae i givhan long yumi blong yumi mekem ol fasin we oli leftemap nem blong hem. Taem yumi mekem olsem, Jehova bambae i mekem yumi harem gud naoia mo bambae yumi kasem laef ya we i no save finis long niufala wol.—Jemes 1:25; Revelesen 1:3.