1. ?Wanem stamba fasin blong God? ?Samting ya i mekem yu yu harem olsem wanem?

BAEBOL i talem se “God i stamba blong fasin ya blong lavem ol man.” (1 Jon 4:8) ?Hemia i minim wanem? Hemia i no min se lav, hem i wan nomo long ol gudfala fasin blong Jehova. Lav i stamba fasin blong hem. Hem i no gat lav nomo, be hem i stamba blong lav. Lav i lidim hem long evri samting we hem i mekem. !Yumi glad tumas se lav i pulum Jehova blong i wokem heven mo wol mo olgeta laef samting!

2. From we God i lavem yumi, ?yumi sua long wanem samting? (Yu luk pija long stat blong stadi.)

² Jehova i wantem mekem i gud long ol man we hem i wokem. From we hem i lavem yumi, yumi sua se bambae hem i mekem stamba tingting blong hem i kamtru long fasin we i beswan, nao ol man we oli obei long hem bambae oli harem gud tumas. From we Jehova i lavem yumi, hem “i putum dei finis we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae hem i yusum blong jajem olgeta man,” hemia Jisas Kraes. (Ol Wok 17:31) Yumi sua se jajmen ya bambae i kamtru. Olgeta we oli obei long God, bambae oli gat wan nambawan laef long fiuja, we i no save finis.

3. ?Laef bambae i olsem wanem sipos God i no lavem ol man?

³ ?Laef blong ol man bambae i olsem wanem sipos lav i no stamba fasin blong God? Ol man bambae oli gohed nomo blong rul long olgeta. Mo bambae oli gohed blong stap aninit long paoa blong rabis god ya Setan, we i no laekem ol man nating. (2 Korin 4:4; 1 Jon 5:19; ridim Revelesen 12:9, 12.) !Laef blong ol man bambae i nogud olgeta sipos Jehova i no lavem yumi!

4. ?From wanem Jehova i letem Setan i agensem rul blong hem?

⁴ Taem Setan i agensem rul blong God, hem i pulum fas papa mo mama blong yumi, blong tufala tu i agensem God. Hem i talem se God i no gat raet blong rul antap long heven mo wol. Setan i talem se rul blong hem i moa gud i bitim rul blong God. (Jenesis 3:1-5) From we Jehova i waes, hem i letem Setan i rul blong smoltaem, blong traem pruvum se tok blong hem i tru. Be samting we i kamaot i soemaot klia se rul blong ol man mo Setan i nogud.

5. ?Ol samting we i hapen finis i soemaot wanem?

⁵ Tede, wol blong yumi i stap kam moa nogud. Long 100 yia we i pas finis, i gat moa long 100 milian man we oli ded long ol faet. Baebol i tokbaot ol las dei, i se: “Ol man nogud wetem ol man blong giaman, bambae oli save gohed blong mekem i mowas olgeta.” (2 Timoti 3:1, 13) Baebol i talem tu se: “Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jeremaea 10:23) Ol samting we i hapen finis i soemaot klia se ol tok ya i tru. Taem Jehova i wokem ol man, hem i no givim raet long olgeta blong oli rul, mo hem i no mekem we oli naf blong rul. Oli nidim Jehova blong lidim olgeta.

6. ?From wanem God i letem ol nogud fasin oli gohed?

⁶ Taem Jehova i letem ol nogud fasin oli gohed, hem i soemaot tu se rul blong hem nomo i gud. Long fiuja, God bambae i spolem ol man nogud. Biaen long taem ya, sipos wan man i agensem rul blong God we i soemaot lav, God bambae i spolem hem kwiktaem. ?I stret we God i mekem olsem? Blong ansa long kwestin ya, yumi save tingbaot ol samting we i hapen finis, mo olsem wanem rul blong man i mekem olgeta man oli harem nogud. Taswe, God bambae i no moa letem ol nogud fasin oli kamaot bakegen.

7, 8. ?Jehova i soemaot olsem wanem se hem i lavem yumi?

⁷ Jehova i soemaot long plante fasin se hem i lavem yumi. Yu traem tingbaot olsem wanem wol ya i bigwan mo i naes tumas. I gat plante milian grup blong ol sta, mo long ol grup wanwan, i gat plante milian sta mo planet. San i stap long grup blong ol sta we wol blong yumi i stap long hem, nem blong hem Milki Wei. Sipos i no gat san, man i no save laef long wol. Ol samting ya oli pruvum se i gat wan God, mo God ya hem i Jehova. Mo oli soemaot ol fasin blong hem tu, olsem paoa, waes, mo lav. Baebol i talem se God i stap oltaem, “mo paoa blong hem i no save finis. Be i stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.”—Rom 1:20.

 ⁸ Jehova i mekem wol ya blong ol laef samting oli stap long hem. Evri samting long wol i stret long ol man mo ol anamol. God i mekem wan naesfala garen blong man i save laef long hem, mo i givim wan bodi mo tingting long man we i stret gud mo i save stap olwe. (Ridim Revelesen 4:11.) Antap long samting ya, “hem i stap givim kakae long olgeta samting long wol ya we oli gat laef. Oltaem bambae hem i lavem yumi, gogo i no save finis.”—Ol Sam 136:25.

9. Jehova i lavem ol man, ?be wanem samting we hem i no laekem nating?

⁹ I tru se Jehova i lavem ol man, be hem i soemaot tu se hem i no laekem nating ol rabis fasin. Ol Sam 5:4-6 i tokbaot Jehova se: “Yu yu no olsem ol narafala god ya we oli stap glad long ol rabis fasin . . . Yu no laekem ol man nogud nating.” Mo tu, hem i no laekem nating “ol man blong faet mo ol man blong trikim man.”

10, 11. (1) ?Wanem bambae i hapen long ol man nogud? (2) ?Olsem wanem Jehova bambae i blesem ol man we oli obei long hem?

¹⁰ Long stret taem, Jehova bambae i tekemaot ol rabis fasin long heven mo wol, from we hem i lavem ol samting we i gud mo i no laekem nating ol fasin nogud. Tok blong God i promes se: “Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta. Bambae i no longtaem, ol man nogud oli lus.” Ol enemi blong Jehova “bambae oli lus olsem smok nomo.”—Ol Sam 37:9, 10, 20.

¹¹ Tok blong God i promes tu se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Ol man we oli obei long God “bambae oli harem gud, from we oli stap gud, mo oli gat plante samting.” (Ol Sam 37:11) ?From wanem? From we God i lavem yumi mo oltaem hem i mekem i gud long ol man we oli obei long hem. Baebol i talem se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:4) !Hemia wan gudfala fiuja blong ol man we oli obei long God mo talem tangkiu long hem, from we hem i lavem olgeta!

12. ?Hu ya “gudfala man”?

¹² Baebol i talem se: “Yu lukluk gud long gudfala man, we laef blong hem i stret, mo we hem i wantem pis, yu traem makem fasin blong hem. Olgeta we oli kamaot biaen long hem oli plante we plante. Be ol man nogud, Hae God i stap kilim olgeta oli ded. Mo olgeta we oli kamaot biaen long olgeta, hem i stap flatemgud olgeta.” (Ol Sam 37:37, 38) “Gudfala man” i kasem save long Jehova mo Pikinini blong hem, mo i mekem samting we God i wantem. (Ridim Jon 17:3.) Hem i bilif strong se “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) From we en blong wol i klosap, i impoten tumas we yumi putum tingting blong yumi i stap strong long Jehova, mo yumi obei long ol tok blong hem.—Ol Sam 37:34.

13. ?Wanem bigfala samting we i soemaot se God i lavem yumi?

¹³ Yumi no stret gud olgeta, be yumi save obei long God yet. Sakrefaes blong Jisas we i pemaot  yumi, i bigfala samting we i soemaot se God i lavem yumi. Sakrefaes ya i mekem se yumi save fren gud wetem Jehova. Jehova i letem Jisas i ded blong mekem se ol man we oli obei long hem oli save kam fri long sin mo ded. (Ridim Rom 5:12; 6:23.) Bifo we Jisas i kamdaon long wol, hem i obei gud long God blong longtaem. Taswe Jehova i save se Pikinini blong hem bambae i obei gud taem hem i stap long wol. Olsem wan papa we i lavem pikinini blong hem, Jehova i harem nogud tumas taem hem i luk ol nogud samting we ol man oli mekem long Pikinini blong hem. Be Jisas i soemaot se hem i bilif strong we God i gat raet blong rul. Mo hem i soemaot se wan man we i stret gud olgeta i save gohed blong holem strong long God, nating se i kasem bigfala trabol.

14, 15. ?Ded blong Jisas i mekem wanem long ol man?

¹⁴ Nating se Jisas i kasem bigfala trabol, be hem i holemstrong long God mo i luksave se Jehova i gat raet blong rul. Yumi glad se Jisas i ded blong pemaot yumi, from we hem i mekem se ol man oli gat janis blong laef olwe long niufala wol. Aposol Pol i tokbaot sakrefaes blong Jisas we i soemaot bigfala lav blong Jehova mo Jisas, i se: “Long taem ya we yumi no gat paoa yet blong kam stret man long fes blong God, stret long taem we God i makem, Kraes i ded blong sevem ol man nogud. Sipos wan man i ded blong sevem wan stret man, hemia wan strong samting ya. Maet i gat sam man we oli save ded blong sevem wan gudfala man. Be God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:6-8) Aposol Jon i raetem se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi. Stamba blong fasin ya i no we yumi lavem God, be we God i lavem yumi, nao i sanem Pikinini blong hem, blong i ded blong mekem rod blong God i tekemaot ol sin blong yumi.”—1 Jon 4:9, 10.

¹⁵ Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Jehova i harem nogud blong luk we Pikinini blong hem i ded. Nating se i olsem, hem i letem Jisas i  ded blong sevem ol man. Hemia i soemaot se hem i lavem ol man tumas. Mo lav blong hem bambae i stap olwe. Pol i raetem se: “Mi mi save finis we i no gat wan samting nating we i save tekemaot yumi long Kraes we hem i lavem yumi tumas. Bambae yumi ded, be hemia i no save tekemaot yumi, mo laef blong yumi i no save mekem. I no gat sam enjel, no sam haeman, no sam narafala paoa long heven we i save mekem. I no gat wan samting we i stap finis, no wan samting we bambae i kam, we i save mekem. I no gat samting blong ples blong God, mo i no gat samting long Hom blong ol Dedman, we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i lavem yumi ya tumas, we yumi joen long Jisas Kraes, Masta blong yumi.”—Rom 8:38, 39.

16. ?Wanem ya Kingdom blong God? ?Jehova i jusumaot hu blong oli rul long Kingdom ya?

¹⁶ Wan narafala samting we i soemaot se Jehova i lavem yumi, hemia Kingdom blong God we Mesaea i rul long hem. Kingdom ya, hemia gavman blong God. ?Olsem wanem yumi save samting ya? Jehova i jusumaot finis Jisas Kraes, we hem i lavem ol man mo hem i naf blong rul long Kingdom ya. (Ol Proveb 8:31) Mo tu, God i jusumaot 144,000 man blong oli rul wetem Jisas long heven. Taem oli laef bakegen long heven, oli yusum ol save we oli kasem long wol, blong mekem i gud long ol man we oli rul long olgeta. (Revelesen 14:1) Taem Jisas i stap long wol, hem i tijim ol man long Kingdom blong God, mo hem i tijim ol disaepol blong hem blong oli prea olsem: “Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu, mo we yu yu kam King blong olgeta man [“Kingdom blong yu i kam,” NW], mo we olgeta man long wol oli mekem ol samting we yu yu wantem, olsem we olgeta long heven oli stap mekem.” (Matiu 6:9, 10) Yumi stap wet blong luk taem ya we ol prea blong ol man blong hem bambae oli kamtru, nao Kingdom blong God bambae i givim plante blesing long ol man.

17. ?Rul blong Jisas i defren olsem wanem long rul blong ol man?

¹⁷ Jisas i lavem ol man, taswe rul blong hem i defren olgeta long rul blong ol man. Rul blong ol man i mekem ol faet oli kamaot we plante milian man oli ded from. Be Jisas i folem ol nambawan fasin blong God, antap moa, fasin ya blong lavem ol man. (Revelesen 7:10, 16, 17) Jisas i talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Matiu 11:28-30) Hemia wan nambawan promes we i soemaot se Jisas i lavem yumi.

18. (1) ?Wanem i hapen afta long yia 1914? (2) Long nekis stadi ?bambae yumi tokbaot wanem?

¹⁸ Baebol i soemaot se Kingdom blong God i stat rul long heven long yia 1914. Afta long taem ya, wan bigfala wok i gohed blong hivimap ol laswan we bambae oli rul wetem Jisas long heven. Mo tu, ‘wan bigfala kampani’ blong man i hivap, we bambae i laef tru long en blong wol ya blong go long niufala wol. (Revelesen 7:9, 13, 14) ?Tede bigfala kampani ya i bigwan olsem wanem? ?God i wantem se oli mekem wanem? Long nekis stadi, bambae yumi tokbaot tufala kwestin ya.