Tijim Pikinini Blong i Mekem Wok Blong Jehova
“Hae God. Plis yu sanem man ya blong yu . . . i kam talemaot long mitufala ol samting ya we bambae mitufala i mas mekem long boe ya, taem hem i bon.”—JAJES 13:8.
SINGSING: 88, 120
1. ?Manoa i mekem wanem, taem hem i harem se bambae hem i kam wan papa?
MANOA mo woman blong hem, tufala i save se bambae tufala i neva gat pikinini. Be wan dei, wan enjel blong Jehova i kam luk woman blong Manoa. Mo hem i talem long hem se bambae hem i bonem wan pikinini boe. !Woman blong Manoa i sapraes tumas! Taem Manoa i harem nius ya, hem tu i glad tumas. Be hem i wari long wok we Jehova i givim long hem olsem wan papa. ?Olsem wanem hem mo woman blong hem, tufala i save tijim pikinini blong tufala blong i lavem Jehova mo i mekem wok blong hem? Manoa i tingbaot we ol man Isrel oli stap mekem plante rabis samting. Taswe, hem i askem strong long Jehova se: “Plis yu sanem man ya blong yu we yu sanem i kam fastaem, i kambak long mitufala bakegen. I gud hem i kam talemaot long mitufala ol samting ya we bambae mitufala i mas mekem long boe ya, taem hem i bon.”—Jajes 13:1-8.
2. ?Wanem i save givhan long yu, blong yu tijim pikinini blong yu? ?Olsem wanem blong tijim pikinini? (Yu luk bokis ya “ Baebol Stadi We i Moa Impoten i Bitim Ol Narawan.”)
2 Sipos yu wan papa no wan mama, ating yu kasem save long tingting blong Manoa. Yu tu yu gat wok ya blong tijim pikinini blong yu blong i save Jehova mo i lavem hem. (Ol Proveb 1:8) Long famle wosip, yu givhan long hem blong i gohed blong kasem save long Jehova mo long Baebol. Be i no naf blong stadi Baebol wetem pikinini evri wik. (Ridim Dutronome 6:6-9.) ?Wanem narafala samting we i save givhan long yu? Long stadi ya, bambae yumi tokbaot eksampol blong Jisas. Nating se hem i no wan papa, be fasin blong hem blong tijim mo trenem ol disaepol blong hem i save givhan long yu. Jisas i lavem olgeta mo i gat tingting daon. Mo hem i kasem save gud olgeta mo i save olsem wanem blong givhan long olgeta. Naoia i gud yumi luk olsem wanem yumi save folem fasin blong Jisas.
LAVEM PIKININI BLONG YU
3. ?Ol disaepol blong Jisas oli save olsem wanem se hem i lavem olgeta?
3 Oltaem Jisas i talem long ol disaepol blong hem se i lavem olgeta. (Ridim Jon 15:9.) Hem i spenem plante taem wetem olgeta. (Mak 6:31, 32; Jon 2:2; 21:12, 13) Jisas i no tija blong olgeta nomo, be hem i fren blong olgeta tu. Taswe oli save se hem i lavem olgeta. ?Fasin ya blong Jisas i tijim yumi long wanem samting?
4. ?Yu soemaot olsem wanem se yu lavem pikinini blong yu? (Yu luk pija long stat blong stadi.)
4 Yu mas talem long pikinini blong yu se yu lavem hem. Yu soemaot long hem se long tingting blong yu, hem i impoten tumas. (Matiu 3:17; Taetas 2:4) Samuel, we i laef long Ostrelia, i talem se: “Taem mi mi pikinini, papa blong mi i stap ridim Buk Blong Ol Baebol Stori long mi evri naet. Hem i ansa long ol kwestin blong mi, i holem mi, mo i kisim mi blong talem gud naet. !Mi mi sapraes tumas blong faenemaot se taem papa blong mi i smol, papa mo mama blong hem i no holholem hem mo kisim hem! Be hem i traehad blong soemaot se hem i lavem mi. From samting ya, mi mi lavem hem, mi harem gud, mo mi no fraet.” Oltaem i gud yu talem long pikinini blong yu se, “mi mi lavem yu,” nao hem tu bambae i harem olsem. Yu holem hem mo yu kisim hem. Yu spenem taem blong toktok wetem hem, kakae wetem hem, mo pleplei wetem hem.
5, 6. (1) From we Jisas i lavem ol disaepol blong hem, ?hem i mekem wanem? (2) ?Yu mas folem wanem fasin blong stretem pikinini blong yu?
5 Jisas i talem se: “Long olgeta man we mi lavem olgeta, mi mi stap tok strong long olgeta, mo mi stap givim panis long olgeta.” * (Revelesen 3:19) Yu traem tingbaot: Ol disaepol blong hem oli rao plante taem se hu i hae moa long olgeta. Jisas i no satem ae blong hem long problem ya. Be hem i gat longfala tingting mo i stretem olgeta bakegen mo bakegen. Oltaem hem i kaen, mo i jusum stret taem mo ples blong stretem olgeta.—Mak 9:33-37.
Yu jusum stret taem mo ples blong stretem pikinini long kaen fasin
6 From we yu lavem pikinini blong yu, yu save se yu mas stretem hem. Samtaem, i nidim nomo blong yu eksplenem from wanem wan samting i stret no i no stret. ?Be olsem wanem sipos hem i no obei? (Ol Proveb 22:15) Yu folem fasin blong Jisas. Yu mas gat longfala tingting, mo yu gohed blong lidim pikinini, tijim hem, mo stretem hem. Yu jusum stret taem mo ples blong stretem hem, mo yu mekem long kaen fasin. Wan sista long Saot Afrika, nem blong hem Ilein, i tingbaot fasin blong papa mo mama blong hem blong stretem hem. Oltaem tufala i eksplenem samting we tufala i wantem blong hem i mekem. Tufala i talem long hem se sipos hem i no obei, bambae tufala i panisim hem. Mo hemia nao samting we tufala i mekem. Ilein i talem se: “Be tufala i neva stretem mi long fasin we tufala i kros. Oltaem tufala i eksplenem from wanem tufala i stap stretem mi.” From samting ya, hem i save se papa mo mama blong hem tufala i lavem hem.
YU MAS GAT TINGTING DAON
7, 8. (1) ?Ol disaepol blong Jisas oli lanem wanem, taem oli harem ol prea blong Jisas? (2) ?Olsem wanem ol prea blong yu oli save tijim pikinini blong i dipen long God?
7 Bifo we ol man oli holem Jisas mo kilim hem i ded, hem i askem strong long Papa blong hem se: “‘Aba,’ . . . yu yu save mekem evri samting. Plis yu tekemaot ol samting ya we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem.” * (Mak 14:36) Maet ol disaepol blong Jisas oli harem ol tok blong prea ya, no maet oli kasem save biaen nomo se hem i mekem prea olsem. Yu traem tingbaot se oli harem olsem wanem, taem oli luk se Jisas i askem long Papa blong hem blong i givhan long hem, nating se hem i stret gud olgeta. Oli kasem save se olgeta tu oli mas gat tingting daon mo dipen long Jehova.
Taem pikinini i harem yu, yu prea blong Jehova i givhan long yu, hem i lanem blong dipen long Jehova
8 Pikinini blong yu i save lanem plante samting taem hem i lesin long ol prea blong yu. Be i tru se yu no prea blong tijim pikinini blong yu nomo. Nating se i olsem, taem oli harem yu yu prea, oli save lanem blong dipen long Jehova. Taem yu prea, yu no askem long Jehova blong i givhan long pikinini blong yu nomo, be yu askem long hem blong i givhan long yu tu. Ana, we i laef long Brasil, i talem se: “Taem abu man mo abu woman i sik, Papa mo Mama i askem long Jehova blong i mekem tufala i stanap strong, mo blong givim waes long tufala blong mekem ol gudfala desisen. Nating se papa mo mama blong mi i wari tumas, be tufala i lego ol problem oli stap long han blong Jehova. From samting ya, mi tu mi lanem blong dipen long Jehova.” I gud pikinini blong yu i harem yu yu askem long Jehova blong i givim strong tingting blong yu prij long ol man raonabaot long yu. Mo taem yu wantem askem spel blong go long asembli, i gud pikinini i harem yu yu prea long Jehova blong i givim strong tingting long yu. Long taem olsem, pikinini i luksave se yu dipen long Jehova, mo hem i lanem blong mekem sem mak.
9. (1) ?Jisas i tijim ol disaepol blong hem olsem wanem, blong oli gat tingting daon mo oli tingbaot narafala fastaem? (2) Sipos yu folem fasin blong Jisas, ?bambae pikinini i lanem wanem?
9 Jisas i talem long ol disaepol blong hem se oli mas gat tingting daon mo tingbaot narafala fastaem. Mo hem i soemaot eksampol tu. (Ridim Luk 22:27.) Ol aposol oli luk we hem i lego samting we hem i wantem blong mekem wok blong Jehova mo blong givhan long ol narafala. Nao olgeta oli mekem sem mak olsem Jisas. Eksampol blong yu tu i save tijim pikinini blong yu. Debi, we i gat tu pikinini, i talem se: “Mi mi no save kros taem man blong mi we i elda, i spenem taem blong givhan long ol narafala. Mi save se nomata wetaem mi mo ol pikinini i nidim hem, bambae hem i spenem taem wetem mifala.” (1 Timoti 3:4, 5) ?Gudfala eksampol blong Debi mo man blong hem Pranas, i mekem wanem long famle? Pranas i talem se ol pikinini blong hem oli rere oltaem blong givhan long ol asembli. Oli glad, mo oli gat ol gudfala fren, mo oli wantem joen wetem ol brata mo sista long kongregesen. Naoia, evriwan long famle oli stap mekem wok blong Jehova fultaem. Sipos yu yu gat tingting daon mo yu tingbaot narafala fastaem, bambae yu tijim pikinini blong yu blong i glad blong givhan long ol narafala.
YU KASEM SAVE GUD PIKININI
10. ?Jisas i kasem save wanem, taem sam man Galili oli kam lukaotem hem?
10 Jisas i kasem save samting we i stap long tingting blong ol man. Hem i no luk nomo ol samting we man i mekem, be hem i tingbaot from wanem hem i mekem samting ya. Hem i save samting we i stap long hat blong man. Yu traem tingbaot taem ya we sam man Galili oli kam lukaotem hem. (Jon 6:22-24) Hem i luksave se ol man ya oli kam from kakae nomo, be oli no kam from we oli wantem lesin long tijing blong hem. (Jon 2:25) Jisas i kasem save long tingting blong olgeta. Nao hem i stretem olgeta long kaen fasin, mo i eksplenem samting we oli mas mekem blong jenisim fasin blong olgeta.—Ridim Jon 6:25-27.
Yu givhan long pikinini blong i laekem wok blong prij (Yu luk haf 11)
11. (1) ?Olsem wanem blong kasem save tingting blong pikinini blong yu long wok blong prij? (2) ?Yu save givhan long pikinini blong yu olsem wanem blong i glad blong prij?
11 Nating se yu no save wanem i stap long hat blong narafala, be yu save kasem save long tingting blong hem. I gud yu traem kasem save long tingting we pikinini blong yu i gat long wok blong prij. ?Olsem wanem? ?Hem i glad blong go prij nomo taem hem i save se biaen, bambae yufala i go samples blong kakae mo spel? Sipos yu luksave se pikinini blong yu i no glad tumas blong prij, i gud yu tingbaot sam rod blong mekem se hem i intres moa long wok ya. Yu givim sam smol wok long hem, blong hem i no harem se i stap westem taem.
12. (1) ?Jisas i givim wanem woning long ol disaepol blong hem? (2) ?From wanem ol disaepol oli nidim woning ya?
12 ?Jisas i kasem save wanem narafala samting? Hem i save se taem wan man i mekem mastik, samting ya i save lidim hem blong i mekem wan narafala mastik, mo maet i foldaon long bigfala sin. Jisas i givim woning blong samting ya long ol disaepol blong hem. Ol disaepol oli save finis se rabis fasin blong man wetem woman i no stret. Be Jisas i givim woning long olgeta long samting we i save pulum olgeta blong oli foldaon long rabis fasin ya. Hem i talem se: “Man we i luk wan woman, nao i wantem hem tumas, i olsem we hem i slip wetem woman ya finis. Sipos raet ae blong yu i mekem yu yu foldaon long sin, i gud yu tekemaot, yu sakem.” (Matiu 5:27-29) Ol disaepol blong Jisas oli laef wetem ol man Rom. Ol man Rom ya oli laekem blong lukluk ol so we oli fulap long rabis fasin mo tok swea. Taswe Jisas i givim woning long ol disaepol blong hem blong oli blokem ol samting we i save mekem i had blong oli folem stret fasin.
13, 14. ?Yu save givhan long pikinini blong yu olsem wanem, blong i blokem ol samting we oli tokbaot rabis fasin?
13 Papa mo mama, i gud yutufala i kasem save pikinini blong yutufala. Olsem nao, bambae yutufala i save lukaot gud long hem, blong i no mekem wan samting we Jehova i no glad long hem. Tede i isi nomo blong ol smol pikinini oli lukluk ol rabis pija mo ol narafala samting we i soemaot rabis fasin. I tru, yu mas talem long hem se i nogud blong lukluk ol rabis fasin ya. Be yu mas mekem sam moa samting blong lukaot gud long hem. ?Olsem wanem? ?Pikinini blong yu i save from wanem ol rabis pija oli nogud? ?Wanem i save pulum hem blong i lukluk ol rabis pija ya? ?Yu yu mekem i isi blong hem i toktok long yu long evri samting? ?Bambae hem i no sem blong askem help blong yu sipos wan samting i pulum hem blong i lukluk ol rabis pija? Nating se pikinini i smol nomo, i gud yu talem long hem se: “Sipos yu luk wan samting long Intenet we i pulum yu blong yu wantem save moa long fasin blong man wetem woman, plis yu kam storian wetem mi. Yu no fraet mo sem blong askem long mi. Mi mi glad blong givhan long yu.”
14 Taem yu stap jusum ol samting we bambae yu mekem blong spel, i gud yu tingbaot olsem wanem yu save soemaot gudfala eksampol long pikinini blong yu. Pranas, we yumi tokbaot finis, i talem se: “Yu save talem plante samting, be pikinini blong yu bambae i folem samting we yu yu mekem.” Sipos yu jusum gud ol miusik, ol buk, mo ol muvi we oli no tokbaot rabis fasin, bambae yu givhan long pikinini blong i mekem sem mak.—Rom 2:21-24.
JEHOVA BAMBAE I GIVHAN LONG YU
15, 16. (1) ?From wanem yu save se Jehova bambae i givhan long yu blong yu tijim pikinini blong yu? (2) ?Bambae yumi tokbaot wanem long nekis stadi?
15 ?Jehova i mekem wanem taem Manoa i askem long hem blong i givhan long hem? Baebol i talem se: “God i mekem samting ya we Manoa i askem.” (Jajes 13:9) Ol papa mo mama, Jehova bambae i lesin long ol prea blong yufala tu. Hem bambae i givhan long yufala blong yufala i tijim ol pikinini blong yufala. Mo tu, hem bambae i givhan long yufala, blong yufala i lavem ol pikinini blong yufala, yufala i gat tingting daon, mo yufala i kasem save long olgeta.
16 Jehova i save givhan long yufala blong yufala i tijim ol pikinini blong yufala taem oli smol. Long sem fasin, bambae hem i givhan long yufala blong yufala i tijim olgeta taem oli kam yangfala. Long nekis stadi, bambae yumi tokbaot bakegen fasin blong Jisas blong lavem ol man, blong gat tingting daon, mo blong kasem save gud olgeta. Bambae yumi tokbaot olsem wanem eksampol blong hem i save givhan long yufala, blong yufala i tijim ol yangfala blong yufala blong oli mekem wok blong Jehova.
^ par. 5 Baebol i soemaot se panis i min se yumi lidim pikinini, tijim hem, stretem hem, mo samtaem yumi wipim hem. Papa mo mama i no mas panisim pikinini long fasin we tufala i kros, be tufala i mas mekem long kaen fasin.
^ par. 7 Ol pikinini long taem blong Jisas oli singaot papa blong olgeta se Aba. Tok ya i soemaot se oli lavem papa blong olgeta mo oli respektem hem.—The International Standard Bible Encyclopedia.
