1. ?Jisas i ting se wok blong prij i impoten? Plis eksplenem.

JISAS i laekem tumas blong tokbaot Kingdom blong God. Taem hem i stap long wol, hem i tokbaot Kingdom moa i bitim ol narafala samting. Taem hem i stap prij, hem i tokbaot Kingdom i bitim 100 taem. Hemia i soemaot se Kingdom i impoten long hem.—Ridim Matiu 12:34.

2. ?Hamas man oli stap taem Jisas i talem tok ya long Matiu 28:19, 20? Plis eksplenem. (Yu luk futnot.)

² Smoltaem afta we Jisas i laef bakegen, hem i toktok long wan grup blong moa long 500 man, we maet plante long olgeta oli kam disaepol biaen. (1 Korin 15:6) Ating hemia nao taem ya we Jisas i talem se oli mas go prij long “ol man long olgeta ples long wol.” * Wok ya bambae i no isi. Hem i talem  long olgeta se wok blong prij bambae i gohed blong longtaem, gogo “wol ya i finis.” Taem yu talemaot gud nius, yu stap givhan blong mekem profet tok ya i kamtru.—Matiu 28:19, 20.

3. ?Wanem trifala samting we oli givhan long yumi blong talemaot gud nius?

³ Afta we Jisas i talem se oli mas prij, hem i talem se bambae hem i stap wetem olgeta. (Matiu 28:20) Taswe Jisas i promes long ol disaepol blong hem se hem bambae i lidim wok blong prij, mo bambae hem i givhan long olgeta blong oli prij long fulwol. Jehova tu i stap wetem yumi. Hem i givim “evri gudfala samting” blong givhan long yumi blong prij. (Hibrus 13:20, 21) Long stadi ya, bambae yumi tokbaot tri long ol gudfala samting ya: (1) ol tul we yumi kasem blong givhan long yumi, (2) ol defdefren rod we yumi yusum, mo (3) ol trening we yumi kasem. Fastaem, bambae yumi tokbaot sam long ol tul we yumi yusum long 100 yia we i pas finis.

4. ?Olsem wanem ol defdefren tul oli givhan long yumi long wok blong prij?

⁴ Jisas i talem se ol tok blong Kingdom i olsem sid we man i planem long ol defdefren kaen graon. (Matiu 13:18, 19) Blong rerem graon, man blong wokem garen i save yusum defdefren tul. Long sem fasin, King blong yumi i givim ol tul we yumi save yusum blong givhan long ol man blong oli lesin long gud nius. Sam long ol tul ya yumi bin yusum blong smoltaem nomo, be sam narafala tul yumi stap yusum yet. Nating se i olsem, evri tul i givhan long yumi blong yumi kamgud moa long wok blong prij.

5. ?Wanem tul we ol pablisa oli yusum bifo, mo oli yusum olsem wanem?

⁵ Long yia 1933, ol pablisa oli stat blong yusum wan smol kad. Hem i wan tul we i givhan long plante man blong oli stat blong mekem wok blong prij. Long smol kad ya i gat wan sot toktok we i stanap long Baebol. Samtaem i gat wan niufala kad we i gat ol narafala tok long hem. Brata Elenmaea i gat ten yia nomo taem hem i yusum smol kad ya fastaem. Hem i talem se: “Mifala i talem long man blong haos se, ‘?Yu save ridim kad ya plis?’ Afta we man ya i ridim, mifala i givim buk long hem mo mifala i aot.”

6. ?Smol kad ya i givhan long ol pablisa olsem wanem?

⁶ Smol kad ya i givhan long ol pablisa long ol defdefren rod. Sam pablisa oli sem, mo nating se oli wantem prij, be oli no save wanem tok blong talem. Sam narafala pablisa oli no fraet nating. Oli talem evri samting we oli save kwiktaem nomo, be plante taem oli no talem long kaen fasin. Smol kad ya i givhan long ol pablisa blong oli talemaot gud nius long fasin we i klia mo i isi.

7. ?From wanem i no isi blong yusum smol kad ya?

⁷ Be i no oltaem we i isi. Sista Gres Estep i talem se: “Samtaem ol man oli askem se, ‘?Be kad ya i tokbaot wanem? ?Yu no save talem stret long mi?’” Mo tu, sam man oli  no save ridim ol tok long kad ya. Sam narafala oli tekem kad ya mo oli satem doa kwiktaem. Sam man we oli no laekem trutok, oli terem kad ya long fored blong olgeta. Nating se i no isi, smol kad ya i givhan long plante pablisa blong oli prij long ol man raonabaot long olgeta, mo i soemaot long ol man se oli kam blong talemaot Kingdom.

8. ?Oli yusum gramafon olsem wanem? (Yu luk pija long stat blong stadi.)

⁸ Wan narafala tul we oli yusum afta long yia 1930, hemia gramafon. Sam Witnes oli singaotem masin ya se Eron, from we masin i toktok long ples blong olgeta. (Ridim Eksodas 4:14-16.) Sipos man blong haos i wantem lesin, pablisa i plei wan sot tok we i stanap long Baebol, mo afta, i givim sam buk long hem. Samtaem, evriwan long famle oli kam wanples blong harem wan tok. Long yia 1934, Wajtaoa Sosaeti i wokem sam gramafon we oli stret blong yusum long wok blong prij. I gat 92 defren tok we ol brata oli rikodem.

9. ?Wanem gudfala samting i kamaot taem ol pablisa oli yusum gramafon?

⁹ Taem Hilari Goslin i harem wan long ol tok ya, hem i askem blong yusum wan gramafon blong wan wik, blong hem i serem tok blong Baebol wetem ol man raonabaot long hem. From samting ya, sam man oli intres mo biaen oli baptaes. Mo tu, tufala gel blong Brata Goslin i go long Skul Blong Gilead, mo tufala i kam misinari. Gramafon i givhan long ol niuwan blong oli prij, olsem smol kad ya i mekem. Afta, King blong yumi Jisas, i yusum Tiokratik Skul blong trenem ol man blong hem blong oli kam ol gudfala tija.

10, 11. ?Oli yusum niuspepa mo radio olsem wanem blong talemaot gud nius? ?From wanem tufala rod ya i gud?

¹⁰ King blong yumi i lidim ol man blong God blong oli yusum ol defdefren rod blong prij long plante man. Long taem ya i gat smol man nomo we oli prij, taswe ol defdefren rod ya oli givhan bigwan blong kasem plante man. (Ridim Matiu 9:37.) Wan rod we oli yusum long taem bifo, hemia niuspepa. Evri wik Brata Russell i sanem wan tok we i stanap long Baebol i go long wan kampani blong printim niuspepa. Afta, kampani ya i sanem tok ya i go long ol niuspepa long Kanada, Yurop, mo Amerika. Long yia 1913, ol tok blong Brata Rasel oli kamaot long 2,000 niuspepa we 15 milian man oli stap ridim.

¹¹ Radio tu i wan gudfala rod we oli yusum blong talemaot gud nius. Long 16 Eprel 1922, Brata Ratafod i givim wan long ol fas tok blong hem long radio, mo i gat samwe long 50,000 man oli lesin. I no longtaem biaen, ol brata oli stat blong yusum prapa radio stesen blong olgeta we oli singaotem se WBBR. Fas program blong hem i  kamaot long 24 Februari 1924. Wajtaoa blong 1 Disemba 1924 i talem se: “Mifala i luk se i no nidim bigfala mane blong yusum radio, mo i kasem plante moa man i winim ol narafala rod we yumi yusum finis blong talemaot trutok.” Olsem niuspepa, radio i givhan long yumi blong yumi prij long plante man long ol ples we i gat smol pablisa nomo.

12. (1) Yu talem wan pablik ples we yu laekem moa blong prij long hem. (2) ?Wanem i save givhan long yumi, blong yumi winim fraet blong prij long pablik ples?

¹² Prij long pablik ples i wan gudfala rod we yumi yusum tede blong prij long ol man. Plante brata oli traehad blong prij long ol man long ples we bas mo tren i stop long hem, ol ples blong putum trak, ol ples blong spel, mo long maket haos. ?Yu yu fraet blong prij long pablik ples? Sipos yes, yu save prea long Jehova blong i givhan long yu, mo yu tingbaot samting we wan eria elda nem blong hem Brata Manera i talem, se: “Mifala i bin luk ol niufala rod blong prij olsem ol narafala rod blong mekem wok blong Jehova. Oli givim janis long mifala blong soemaot se mifala i ona long Jehova, mo oli traem mifala tu blong luk sipos mifala i obei long hem. Mifala i wantem soemaot se mifala i rere blong mekem wok blong Jehova long enikaen rod we hem i askem.” Taem yumi winim fraet mo yumi  yusum ol niufala rod blong prij, yumi lanem blong trastem Jehova moa, mo yumi kam gud moa long wok blong prij.—Ridim 2 Korin 12:9, 10.

13. ?From wanem i gud blong talemaot Websaet blong yumi? Yu talem wan gudfala stori blong samting we i kamaot taem yu yusum Websaet ya.

¹³ Plante pablisa oli laekem blong talemaot Websaet blong yumi long ol man. Long Websaet ya jw.org, oli save ridim mo daonlodem ol buk we oli tokbaot Baebol long bitim 700 lanwis. Evri dei, bitim wan milian haf man oli luk Websaet blong yumi. Long taem bifo, oli yusum radio blong talemaot gud nius long ol ples we oli stap longwe. Tede, Websaet blong yumi i mekem sem mak.

14. ?Ol pablisa oli nidim wanem trening? ?Wanem skul i givhan long olgeta blong oli kam ol gudfala tija?

¹⁴ Ol tul mo ol rod we yumi tokbaot finis, oli givhan bigwan long wok blong prij. Nating se i olsem, long ol yia bifo, ol pablisa oli nidim trening blong oli save prij. Maet wan man blong haos i no glad long samting we hem i harem long gramafon. Sam narafala man oli intres mo oli wantem save moa. Ol pablisa oli mas lanem olsem wanem blong ansa long kaen fasin, mo olsem wanem oli save tijim gud ol man. Tabu spirit i givhan long Brata Nor blong i luksave se i impoten blong trenem ol pablisa blong oli toktok gud long wok blong prij. Taswe, stat long yia 1943, ol kongregesen oli mekem Tiokratik Skul. Skul ya i givhan long evriwan blong oli kam ol gudfala tija.

15. (1) ?Wanem i hapen long samfala taem oli givim tok long Tiokratik Skul? (2) Yu tokbaot promes blong Jehova long Ol Sam 32:8 mo olsem wanem i kamtru long yu wan.

¹⁵ Plante brata oli fraet blong toktok long fored blong ol man. Brata Ramu i tingbaot fas tok we hem i givim long yia 1944. Hem i mas tokbaot wan man long Baebol, nem blong hem Doeg. Hem i talem se: “Ol leg mo han blong mi oli seksek bitim mak, mo ol tut blong mi oli faefaerap olsem man we i kolkol.” Hem i gohed se: “Hemia fastaem we mi mi stanap long fored blong ol man blong toktok. Be mi no stop, mi gohed blong traehad.” Ol pikinini tu oli givim ol tok long skul ya, nating se i no isi. Brata Manera i tingbaot samting we i hapen taem wan yangfala boe i givim fas tok blong hem, i se: “Hem i fraet we i fraet bitim mak, taswe taem hem i statem tok blong hem, hem i krae. Be hem i gat strong tingting blong finisim tok ya, ale hem i gohed blong pulum win nogud, gogo kasem en blong tok blong hem.” Maet yu no ansa long ol miting  from we yu sem no yu harem se yu no naf. Sipos i olsem, yu save askem long Jehova blong i givhan long yu blong yu winim fraet ya. Hem bambae i givhan long yu olsem i givhan long olgeta long taem bifo we oli mekem tok long Tiokratik Skul.—Ridim Ol Sam 32:8.

16. ?Skul blong Gilead i mekem wanem (1) long taem bifo (2) afta long yia 2011?

¹⁶ Ogenaesesen blong God i yusum Skul blong Gilead tu blong trenem plante brata mo sista. Skul ya i givhan long olgeta blong oli wantem mekem moa long wok blong talemaot gud nius. Skul blong Gilead i stat long yia 1943, mo kam kasem naoia, i trenem 8,500 brata mo sista we oli go prij long 170 kantri. Stat long yia 2011, oli singaotem sam spesel paenia, sam eria elda, samfala we oli wok long Betel, mo sam misinari we oli no go long skul ya yet, blong oli joen long Skul blong Gilead.

17. ?I gat gudfala frut i kamaot from trening we ol brata mo sista oli kasem long Skul blong Gilead?

¹⁷ ?Olsem wanem? ?I gat gudfala frut i kamaot from trening we ol brata mo sista oli kasem long Skul blong Gilead? Yes. Yu traem tingbaot Japan. Long Ogis 1949, namba blong ol pablisa long Japan i no kasem 10. Be long en blong yia 1949, i gat 13 misinari oli stap prij wetem ol pablisa ya. Tede, i gat samwe long 216,000 pablisa long Japan, mo bitim 100,000 oli paenia.

18. ?I gat wanem narafala skul bakegen?

¹⁸ I gat plante narafala skul tu, olsem Kingdom Ministri Skul, Skul Blong Paenia, Skul Blong Ol Man Blong Talemaot Kingdom, Skul Blong Ol Eria Elda Wetem Woman Blong Olgeta, mo Skul Blong Ol Memba Blong Branj Komiti Wetem Woman Blong Olgeta. Ol skul ya oli trenem gud ol brata mo sista, mo oli mekem bilif blong olgeta i strong moa. I klia se Jisas i stap gohed blong trenem plante man.

19. ?Brata Rasel i talem wanem long saed blong wok blong prij? ?Samting ya i kamtru olsem wanem?

¹⁹ Kingdom blong God i stap rul bitim 100 yia nao. Long ol yia ya, King blong yumi Jisas Kraes, i lidim wok blong prij. Long yia 1916, Brata Rasel i talem se wok blong talemaot gud nius bambae i kasem olgeta ples long wol, i se: “Wok ya blong talemaot ‘gud nius blong kingdom’ i stap kam bigwan kwiktaem, mo bambae i kam bigwan moa yet, from we wok ya i mas go kasem olgeta ples long wol.” (Faith on the March, we A. H. Makmilan i raetem, pej 69) Wok ya i stap gohed tede. Yumi talem tangkiu long Jehova we i God blong pis, from we hem i givim evri samting we yumi nidim blong mekem wok blong hem.