LAEF STORI
Mi Gat Pis Wetem God Mo Mama Blong Mi
MAMA blong mi i askem se: “?From wanem yu no wantem mekem wosip long ol bubu blong yu? Sipos oli no stap, yu bambae yu no laef. ?Yu no save samting ya? ?From wanem yu no wantem talem tangkiu long olgeta? ?Olsem wanem yu sakemaot kastom we ol olfala oli pasem long yumi? Taem yu no moa ona long ol bubu blong yu, yu mekem olsem we wosip blong yumi i krangke.” Afta we Mama i sakem ol tok ya, hem i krae.
Sam manis bifo long taem ya, ol Witnes blong Jehova oli askem long Mama sipos hem i wantem stadi Baebol. Mama i no wantem stadi, be hem i no wantem spolem olgeta tu. Taswe, hem i talem long olgeta se mi bambae mi stadi. Be afta, hem i no moa glad long mi. Long ol narafala taem mi mi obei long hem, mo hem i glad. Be long taem ya, mi mi no save obei long hem from we mi wantem mekem Jehova i glad. I no isi, be Jehova i givim paoa long mi.
MI STAT BLONG SAVE JEHOVA
Ol famle blong mi oli Budis, olsem plante man long Japan. Be afta we mi stadi tu manis wetem ol Witnes blong Jehova, mi bilif se Baebol i tru. Mi kasem save se mi gat wan Papa long heven, mo mi wantem tumas blong save hem. Fastaem, Mama i glad blong storian wetem mi long ol samting we mi stap lanem. Mo mi go long miting evri Sande long Haos Kingdom. Taem mi kasem save moa, mi talem long Mama se bambae mi mi no moa joen long wosip we ol Budis oli mekem. Wantaem nomo, fasin blong hem i jenis. Hem i talem se: “Yu yu no lavem ol bubu blong yu. Yu mekem bigfala sem long famle.” Hem i talem se bambae mi no moa stadi Baebol mo mi no moa go long miting. Mi no ting se mama blong mi i save toktok olsem. I olsem se hem i no moa mama blong mi be hem i kam wan narafala woman.
Papa i tekem saed blong Mama. Mi mi ridim long Efesas japta 6 se Jehova i wantem we mi obei long papa mo mama blong mi. Mi wantem tumas we i gat pis long famle, taswe mi lesin long tufala. Mi ting se sipos mi lesin long tufala, bambae tufala i jenisim tingting blong tufala. Mo tu, long taem ya, mi stap mekem rere from ol eksam long skul. Ale, mi folem tingting blong tufala blong tri manis. Be mi promes long Jehova se afta we tri manis i pas, bambae mi gobak long miting bakegen.
Be desisen ya i nogud. Mi mi ting se afta we tri manis i pas, bambae mi wantem yet blong mekem wok blong Jehova. Be mi luk se kwiktaem nomo, mi kam slak mo mi no moa fren wetem Jehova. Mo tu, Mama mo Papa tufala i
traehad moa blong blokem mi long wosip blong Jehova.SAM OLI GIVHAN SAM OLI AGENS
Long Haos Kingdom, mi bin mitim plante Witnes we fastaem famle blong olgeta i agensem olgeta. Oli talem ol gudfala toktok blong mekem tingting blong mi i strong se Jehova bambae i givim paoa long mi. (Matiu 10:34-37) Oli talem se sipos mi mi gohed blong obei long Jehova, maet bambae mi pulum famle blong mi blong oli wantem save hem. Oltaem mi prea strong long Jehova, from we mi stap traehad blong trastem hem.
Famle i agensem mi long plante defren fasin. Mama i toktok plante long mi, mo i plis long mi blong mi mas lego stadi. Plante taem mi stap kwaet nomo. Sipos mi toktok, mitufala i rao, from we mitufala tugeta i stap talem se narawan i rong. Naoia mi luksave se, sipos mi respektem moa tingting mo bilif blong mama blong mi, maet i no gat plante rao olsem. Papa mo Mama i givim moa wok long mi, blong mi stap kwaet long haos. Samtaem tufala i lokem doa blong haos, blong mi no save go insaed, mo tufala i no givim kakae long mi.
Mama i askem long sam narafala blong oli toktok long mi. Hem i askem long tija blong mi, be tija i no mekem wan samting. Mama i tekem mi mi go luk bos blong hem long wok, blong hem i traem mekem mi mi luksave se mi westem taem blong folem wan skul. Mo tu, Mama i toktok long ol famle long telefon, i krae long olgeta se oli mas givhan long hem. Hemia i mekem mi mi harem nogud tumas. Be long miting, ol elda oli talem long mi se taem Mama i stap toktok long ol narafala ya, i olsem we hem i stap prij long olgeta.
Papa mo Mama i wantem se mi skul gud long yunivesiti, blong mi save faenem wan gudfala
wok. Mifala i no save storian gud long bisnes ya, taswe mi raetem sam leta long tufala blong eksplenem wanem we mi wantem mekem long laef blong mi. Papa i kros we i kros, i talem se: “Yu ting se yu yu naf blong faenem wan wok, ale, yu faenem tumora, sipos no, yu aot long haos.” Mi prea long Jehova blong hem i givhan long mi. Long nekis dei, taem mi stap prij, tu sista i askem long mi blong mi tijim pikinini blong tufala. Papa i no glad long samting ya, ale hem i no moa toktok long mi, mo i mekem olsem se mi no stap. Mama i talem se i moa gud sipos mi wan stronghed gel we mi mekem nogud fasin, i bitim we mi wan Witnes blong Jehova.Jehova i stretem tingting blong mi, nao mi save samting we mi mas mekem
Samtaem mi harem se, maet Jehova i no wantem we mi agensem toktok blong papa mo mama blong mi olsem. Ale, mi prea long Jehova mo mi tingting dip long ol vas blong Baebol we oli tokbaot lav. Hemia i mekem se tingting blong mi i kam gud moa. Mo tu, mi kasem save se tufala i wari long mi, taswe tufala i agensem mi. Jehova i givhan long mi blong mi stretem tingting blong mi, nao mi save samting we mi mas mekem. Mo tu, moa we mi prij, moa we mi harem gud. Taswe, mi wantem tumas blong kam wan paenia.
MI MEKEM WOK BLONG PAENIA
Sam sista oli harem se mi wantem mekem wok blong paenia, nao oli talem se i moagud mi wet gogo papa mo mama blong mi i no moa kros. Mi prea long Jehova blong i givim waes long mi, mo mi stadi moa. Mi tingbaot from wanem mi wantem mekem wok blong paenia, mo mi toktok wetem sam brata mo sista we oli stap longtaem long trutok. Afta, mi mekem desisen se mi wantem folem rod we i mekem Jehova i glad. Sipos mi wet fastaem bifo we mi statem wok blong paenia, be maet papa mo mama i agensem mi yet.
Long las yia blong mi long hae skul, mi stat long wok blong paenia. Afta we mi mekem wok ya smoltaem, mi wantem muv i go long wan ples we i nidim moa man blong prij. Be Mama mo Papa i no wantem we mi aot long haos. Ale, mi wet go kasem we mi gat 20 yia, nao mi askem long branj ofis sipos mi save go long wan ples long saot Japan, we i gat sam famle blong mifala i stap. Olsemia, Mama bambae i no wari tumas.
Mi harem gud blong luk se samfala we mi stadi Baebol wetem olgeta long ples ya oli baptaes. Mi stat blong lanem Inglis from we mi wantem mekem moa long wok blong Jehova. Mi luk olsem wanem tufala spesel paenia long kongregesen oli wok strong, mo samting we tufala i mekem blong givhan long ol narafala, nao mi tu mi wantem kam wan spesel paenia. Tu taem, Mama i sik bigwan, mo mi gobak long haos blong lukaot long hem. Hem i sapraes tumas, mo hem i kaen moa long mi.
JEHOVA I GIVIM PLANTE BLESING
Seven yia biaen long samting ya, wan long tufala spesel paenia we mi tokbaot finis, nem blong hem Atsushi, i raetem leta long mi. Hem i wantem mared mo i askem long mi sipos mi intres long hem. Mi mi neva gat filing long Atsushi, mo mi no ting se hem i gat filing long mi. Wan manis afta, mi ansa long leta blong hem, mo mi talem se mi mi glad blong save hem moa. Sloslo mitufala i luksave se mitufala i gat sem plan mo tingting. Mitufala i wantem gohed nomo long wok blong paenia, mo mitufala i rere blong go long eniples we oli sanem mitufala long hem. Ale, mitufala i mared. Mi glad tumas se Mama mo Papa wetem sam narafala famle oli kam long mared blong mitufala.
Nepal
Smoltaem biaen, taem mitufala i stap mekem wok blong fultaem paenia, branj ofis i askem long Atsushi blong i tekem ples blong wan eria elda. Afta, oli askem long mitufala blong mekem wok blong spesel paenia, mo biaen
bakegen, mitufala i mekem wok blong eria elda. Taem mitufala i visitim evri kongregesen finis long eria blong mitufala, branj ofis i ring, i askem sipos mitufala i glad blong mekem wok blong eria elda long Nepal.Taem mi stap long ol defdefren kantri, mi lanem plante samting long saed blong Jehova
Mi mi wari se maet papa mo mama blong mi tufala i no glad we mi mi go longwe olsem. Taem mi ring long tufala blong talem nius ya, Papa i talem se: “Hemia wan gudfala ples ya.” Wan wik bifo, wan fren blong hem i givim wan buk long hem we i tokbaot Nepal. Nao Papa i stap tingbaot se ples ya i wan gudfala ples blong visitim.
Mitufala i glad blong stap wetem ol man Nepal, we oli fren gud wetem narafala. Afta, oli mekem se Banglades tu i stap long eria we mitufala i wok long hem. Nating se kantri ya i klosap long Nepal, be hem i defren olgeta. Mitufala i stap mitim plante defren kaen man long wok blong prij. Mitufala i stap faef yia long ples ya. Afta, oli askem long mitufala blong kam mekem wok blong eria elda bakegen long Japan.
Taem mi mekem wok blong Jehova long Japan, Nepal, mo Banglades, mi lanem plante samting long saed blong Jehova. Laef blong ol man long ol kantri ya i no sem mak, oli gat defdefren fasin mo kastom. Mi mi luk olsem wanem Jehova i tingbaot ol man wanwan, i laekem olgeta, i givhan long olgeta, mo i blesem olgeta.
Mi talem tangkiu long Jehova from plante samting. Hem i mekem rod blong mi save hem mo mi mekem wok blong hem. Mi mi mared long wan gudfala Kristin man. Jehova i givhan long mi blong mi mekem ol gudfala desisen, mo naoia mi fren gud wetem hem mo famle blong mi. Mi talem tangkiu long Jehova we mi mo Mama, mitufala i fren gud bakegen. Mi mi glad tumas se mi gat pis wetem God mo mama blong mi.
Mitufala i glad tumas long wok blong eria elda